(vovworld)- “ບໍ່ຕ້ອງການຂີ່ຍົນ, ພຽງແຕ່ຂີ່ລົດເມທ່ານກໍ່ສາມາດກິນເຂົ້າເຊົ້າຢູ່ ຫວຽດນາມ ແລະ ກິນເຂົ້າສວາຍຢູ່ໄທໄດ້”. ນັ້ນແມ່ນຄຳແບ່ງປັນຂອງທ່ານ ຫງວຽນເຕີດແທ່ງ, ເອກອັກຄະລັດຖະທູດໄທ ປະຈຳຫວຽດນາມກັບນັກຂ່າວ ເນື່ອງໃນໂອກາດທ່ານກັບຄືນເມືອປະເທດເຂົ້າຮ່ວມກອງປະຊຸມການທູດຄັ້ງທີ 29 ຊື່ງຫາກໍ່ດຳເນີນ ຫວ່າງແລ້ວນີ້ຢູ່ຮ່າໂນ້ຍ. ພາຍຫລັງ 40 ປີແຫ່ງການສ້າງການພົວພັນທາງການທູດ, ການພົວພັນລະຫວ່າງຫວຽດນາມ ແລະ ໄທ ໄດ້ມີບັນດາບາດກ້າວພັດທະນາກະໂດດຂັ້ນ, ພິເສດໃນຂົງເຂດເສດຖະກິດ.
ນັບມື້ນັບມີຊາວຫວຽດນາມຫລາຍຄົນໄປຢ້ຽມຢາມໄທ
ພາບ:internet |
ບັນດາຄວາມຄືບຫນ້າຂອງສາຍພົວພັນລະຫວ່າງຫວຽດນາມ ແລະ ໄທ ໃນໄລຍະຜ່ານມາໄດ້ພິສູດໃຫ້ເຫັນວ່າ ສອງປະເທດບໍ່ແມ່ນຄູ່ແຂ່ງແກ້ງແຍ້ງເທົ່ານັ້ນ ຫາກແມ່ນຄູ່ຮ່ວມມືດ້ານເສດຖະກິດ, ຫນູນຊ່ວຍເຊິ່ງກັນ ແລະກັນ, ພ້ອມກັນພັດທະນາ. ສອງປະເທດລ້ວນແຕ່ມີຄວາມຕ້ອງການນຳເຂົ້າສົ່ງອອກສິນຄ້າຫລາຍປະເພດ. ວົງເງິນການຄ້າສອງສົ້ນເພີ່ມຂຶ້ນແຕ່ 509 ລ້ານ USD ໃນປີ 1995 ໃຫ້ຂຶ້ນເຖິງປະມານ 13 ຕື້ USD ໃນປີ 2015 ແລະ ສູ້ຊົນບັນລຸ 20 ຕື້ USD ໃນປີ 2020. ທ່ານ ຫງວຽນເຕີດແທ່ງ, ເອກອັກຄະລັດຖະທູດຫວຽດນາມ ປະຈຳໄທ ໃຫ້ຮູ້ວ່າ:
“ຫວຽດນາມ ມີທ່າໄດ້ປຽບໃຫຍ່ສົມຄວນ ເພາະແມ່ນປະເທດຫນຶ່ງດຽວໃນໂລກ ໄດ້ລົງນາມໃນບັນດາສັນຍາການຄ້າເສລີກັບບັນດາປະເທດປະຈຳສະພາຄວາມໝັ້ນຄົງ ສປຊ. ໄທ ພວມປາດຖະຫນາຢາກມີສິ່ງນັ້ນ. ສະນັ້ນ ເຂົາເຈົ້າຊອກວິທີເພື່ອຍາດແຍ່ງກາລະໂອກາດຈາກຫວຽດນາມ. ປີ 2015, ປະຊາຊົນຫວຽດນາມ ແລະ ໄທ ໄປທ່ອງທ່ຽວເຊິ່ງກັນ ແລະກັນປະມານ 750.000 ເທື່ອຄົນ ແລະ ກວ່າ 210.000 ເທື່ອຄົນຕາມລຳດັບ. ຖ້າຫາກສັງເກດຈຳນວນຖ້ຽວບິນໄປມາລະຫວ່າງສອງປະເທດ ພວກເຮົາຈະເຫັນວ່າ ກ່ອນນີ້ 1 ປີ, ມີພຽງປະມານກວ່າ 100 ຖ້ຽວບິນ/ອາທິດ ແຕ່ມາຮອດປະຈຸບັນ ມີ 210 ຖ້ຽວບິນ/ອາທິດ. ຕົວເລກນີ້ສະແດງໃຫ້ເຫັນວ່າ ແຕ່ລະມື້ມີປະມານ 30 ຖ້ຽວບິນໄປກັບລະຫວ່າງ ໄທ ແລະ ຫວຽດນາມ.”
ຕາມທ່ານ ຫງວຽນເຕີດແທ່ງ, ເອກອັກຄະລັດຖະທູດ ຫວຽດນາມ ປະຈຳໄທແລ້ວ, ເພື່ອບັນລຸຜົນປະໂຫຍດຢ່າງສຸດຂີດ, ຫນຶ່ງໃນບັນດາຈຸດສຸມນັ້ນແມ່ນ ພັດທະນາການເຊື່ອມຕໍ່ຄົມມະນາຄົມຂົນສົ່ງ ເພື່ອສ້າງເງື່ອນໄຂສະດວກກວ່າອີກໃຫ້ແກ່ຂົງເຂດການຄ້າ, ການລົງທຶນ ແລະ ທ່ອງທ່ຽວ. ໄທ ປາດຖະຫນາວ່າ ສອງປະເທດອາດຈະເປີດບໍລິການລົດໂດຍສານຜ່ານລາວ ແລະ ກຳປັ່ນໂດຍສານທາງທະເລຜ່ານກຳປູເຈຍ ເຂົ້າເຄື່ອນໄຫວໂດຍໄວ.
“ປະຈຸບັນ, ສອງຝ່າຍກໍພວມຊຸກຍູ້ການເຊື່ອມຕໍ່ທາງທະເລ, ການຮ່ວມມືກ່ຽວກັບການທ່ອງທ່ຽວ ແລະ ການຄ້າ. ພິເສດ, ສອງຝ່າຍພວມຍູ້ແຮງການເຊື່ອມຕໍ່ທາງບົກ. ປະຈຸບັນ, ບັນດາລັດຖະບານກ່ຽວຂ້ອງ ນັ້ນແມ່ນ ຫວຽດນາມ, ລາວ, ໄທ, ກຳປູເຈຍ ພວມຊຸກຍູ້ການເຊື່ອມຕໍ່ຜ່ານທາງລົດເມປະຈຳວັນ. ຫວັງວ່າ ແຕ່ລະມື້ຈະມີສາຍລົດເມທ່ອງທ່ຽວນັບສີບໆສາຍລະຫວ່າງບັນດາແຂວງ, ນະຄອນຂອງຫວຽດນາມ ແລະໄທ. ປີນີ້ ເນື່ອງໃນໂອກາດສະເຫລີມສະຫລອງ 40 ປີແຫ່ງວັນສ້າງຕັ້ງສາຍພົວພັນທາງການທູດ ລະຫວ່າງຫວຽດນາມ ແລະໄທ, ສອງຝ່າຍພວມຊຸກຍູ້ການເປີດສະຫລອງສາຍທາງຕົ້ນຕໍເພື່ອໃຫ້ໄລຍະຈະມາເຖິງ ລົດເມຂອງຫວຽດນາມ ບໍ່ພຽງແຕ່ໄປຍັງລາວເທົ່ານັ້ນ ຫາກໄປຍັງໄທອີກດ້ວຍ, ຈາກນັ້ນ ຊຸກຍູ້ການເຊື່ອມຕໍ່ ແລະ ແມ່ນພື້ນຖານເພື່ອຊຸກຍູ້ດ້ານການຄ້າ ການລົງທຶນ ແລະ ພົວພັນແລກປ່ຽນປະຊາຊົນລະຫວ່າງສອງປະເທດ. ແນວຄວາມຄິດກິນເຂົ້າເຊົ້າຢູ່ຫວຽດນາມ, ກິນເຂົ້າສວາຍຢູ່ໄທແມ່ນຈະ ເປັນໄປໄດ້ໃນໄລຍະໃກ້ໆນີ້.”
ທ່ານ ຫງວຽນເຕີດແທ່ງ, ເອກອັກຄະລັດຖະທູດ ຫວຽດນາມ ປະຈຳໄທ
|
ການພົວພັນດ້ານເສດຖະກິດມີບັນດາບາດກ້າວພັດທະນາດີພໍສົມຄວນ ແລະ ຄວາມສາມາດບົ່ມຊ້ອນ ຮ່ວມມື ລະຫວ່າງຫວຽດນາມ ແລະ ໄທ ຍັງໃຫຍ່ຫລວງຢູ່, ພິເສດໃນສະພາບປະຊາຄົມ ອາຊຽນ ຫາກໍ່ໄດ້ຮັບການສ້າງຕັ້ງຂຶ້ນ. ເຖິງຢ່າງໃດກໍຕາມ, ຕາມທ່ານ ຫງວຽນເຕີດແທ່ງ, ເອກອັກຄະລັດຖະທູດ ຫວຽດນາມ ປະຈຳໄທ ແລ້ວ ,ໃນຂະນະບັນດາວິສາຫະກິດ ໄທ ມີຄວາມສົນໃຈເຖິງຕະຫລາດ ອາຊຽນ ແລະ ຕະຫລາດຂອງບັນດາປະເທດສະມາຊິກໃນອາຊຽນ, ເຂົາເຈົ້າມີຄວາມສົນໃຈທີ່ສຸດເຖິງຕະຫລາດຫວຽດນາມ, ແຕ່ບັນດາວິສາຫະກິດຫວຽດນາມ ຍັງບໍ່ທັນມີຄວາມສົນໃຈ ເຖິງຕະຫລາດ ໄທ ປານໃດ. ບັນດາວິສາຫະກິດໄທ ໄດ້ຊອກທຸກວິທີເພື່ອພົບປະກັບບັນດາເອກອັກຄະລັດຖະທູດບັນດາປະເທດ, ເຊື້ອເຊີນທ່ານເອກອັກຄະລັດຖະທູດບັນດາປະເທດ ເຂົ້າຮ່ວມບັນດາເຫດການກ່ຽວຂ້ອງເຖິງດ້ານເສດຖະກິດ ການຄ້າ, ພິເສດ ແມ່ນບັນດາການເຄື່ອນໄຫວກ່ຽວຂ້ອງເຖິງປະຊາຄົມເສດຖະກິດ ອາຊຽນ. ໃນຂະນະນັ້ນບັນດາວິສາຫະກິດຫວຽດນາມ ຍັງບໍ່ທັນຍາດແຍ່ງການຊ່ວຍເຫລືອຈາກອົງການຜູ້ຕາງຫນ້າຫວຽດນາມ ຢູ່ ຕ່າງປະເທດ ໃຫ້ມີປະສິດທິຜົນ. ທ່ານ ຫງວຽນເຕີດແທ່ງ, ເອກອັກຄະລັດຖະທູດ ຫວຽດນາມ ປະຈຳໄທ ໃຫ້ຮູ້ວ່າ:
“ໄທແມ່ນຕະຫລາດໃຫຍ່ພໍສົມຄວນ ດ້ວຍພົນລະເມືອງປະມານ 70 ລ້ານຄົນ. ໃນຍອດວົງເງິນນຳເຂົ້າສົ່ງອອກສິນຄ້າຂອງຫວຽດນາມ ມີພຽງປະມານ 20% ແມ່ນ ນຳເຂົ້າສົ່ງອອກສິນຄ້າໃນ ອາຊຽນ. ຫວຽດນາມ ສົນໃຈເຖິງຕະຫລາດບັນດາປະເທດພັດທະນາຄື: ອາເມລິກາ, ບັນດາປະເທດ ເອີລົບ, ແຕ່ພວກເຮົາຍັງບໍ່ທັນຂຸດຄົ້ນຕະຫລາດ ອາຊຽນ ຢ່າງເຂັ້ມງວດ. ປະຈຸບັນ, ໃນຂົງເຂດຄ້າຂາຍສິນຄ້າ, ບັນດາວິສາຫະກິດຫວຽດນາມ ຍັງບໍ່ທັນສົນໃຈເຖິງຕະຫລາດໄທ. ຈຳນວນບໍລິສັດຫວຽດນາມ ໄປລົງທຶນຢູ່ໄທບໍ່ມີຫລາຍ. ອີກດ້ານຫນຶ່ງ ຂ້າພະເຈົ້າເຫັນວ່າ ບັນດາວິສາຫະກິດພາຍໃນປະເທດ ພວມພັດທະນາຕາມຍຸດທະສາດສະເພາະ ຫາກຍັງບໍ່ທັນຕິດພັນກັບຕະຫລາດພາກພື້ນ ແລະ ທົ່ວໂລກຢ່າງແຫນ້ນແຟ້ນ. ອົງການຕາງຫນ້າຂອງຫວຽດນາມ ຢູ່ ຕ່າງປະເທດ ແມ່ນຫນຶ່ງໃນບັນດາອົງການ ຊື່ງບັນດາວິສາຫະກິດສາມາດຍາກແຍ່ງການຊ່ວຍເຫລືອໄດ້ ແຕ່ບັນດາວິສາຫະກິດຫວຽດນາມ ພັດບໍ່ທັນຊອກວິທີຍາດແຍ່ງໃຫ້ມີປະສິດທິຜົນ.”
ປະຈຸບັນ, ໄທ ຢືນອັນດັບທີ 11 ກ່ຽວກັບການລົງທຶນຂອງຕ່າງປະເທດເຂົ້າຫວຽດນາມ. ປີ 2015, ໄທ ລົງທຶນໃນ 415 ໂຄງການ ດ້ວຍຈຳນວນທຶນກວ່າ 7,36 ຕື້ USD. ຕາມທ່ານ ຫງວຽນເຕີດແທ່ງ, ເອກອັກຄະລັດຖະທູດ ຫວຽດນາມ ປະຈຳໄທ ແລ້ວ, ສະຖານທູດຫວຽດນາມ ປະຈຳໄທ ພວມມານະພະຍາຍາມສົ່ງເສີມການໂຄສະນາການລົງທຶນຢູ່ໄທ. ດ້ວຍຄວາມມານະພະຍາຍາມຂອງສະຖານທູດຫວຽດນາມ ປະຈຳໄທ ແລະ ດ້ວຍບັນດາໝາກຜົນທີ່ບັນລຸໄດ້ນັ້ນ ພວກເຮົາມີຄວາມເຊື່ອໝັ້ນວ່າ ຄາດໝາຍຍົກວົງເງິນການຄ້າສອງສົ້ນໃຫ້ຂຶ້ນເຖິງ 20 ຕື້ USD ໃນປີ 2020 ຈະປະກົດຜົນເປັນຈິງໂດຍໄວ.