ໃນຊຸມວັນນີ້, ທົ່ວປະເທດຫວຽດນາມ ພວມມຸ້ງໄປເຖິງການສະເຫຼີມສະຫຼອງ 40 ປີແຫ່ງໄຊຊະນະ “ຮ່າໂນ້ຍ-ດ້ຽນບຽນຝູທາງອາກາດ“, ຫວນຄືນຊຸມເດືອນປີແຫ່ງການຕໍ່ສູ້ອັນດຸເດືອດທີ່ບໍ່ອາດຫຼົງລືມໄດ້. ໃນ 12 ວັນ ແລະ ຄືນທ້າຍເດືອນ 12/1972, ບັນດາພະນັກງານ, ນັກເຕັກນິກ, ນັກດົນຕີ, ນັກສິລະປິນຂອງວິທະຍຸກະຈາຍສຽງຫວຽດນາມ ກໍ່ມີບັນດາອະນຸສອນພິເສດ.
(ພາບປະກອບ:tinhhinh.net)
ໃນບັ້ນຮົບ “ຮ່າໂນ້ຍ-ດ້ຽນບຽນຝູທາງອາກາດ“, ສະຖານນີເຄື່ອງສົ່ງເໝ໋ຈີ່ ຂຶ້ນກັບວິທະຍຸກະຈາຍສຽງຫວຽດນາມ ແມ່ນເປົ້າໝາຍຖືກຈັກກະພັດອາເມລິກາ ຍິງທຳລາຍຢ່າງໜັກໜ່ວງ. ໃນຕອນເຊົ້າຂອງວັນທີ 19/12/1972, ອາເມລິກາ ໄດ້ຖີ້ມລະເບີດລົງເຂດນີ້. ທ່ານເຢືອງຊວນເຈື່ອງ ຫົວໜ້າກອງປ້ອງກັນຕົວຊື່ງລວມມີ 9 ຄົນໄດ້ຮັບການມອບໝາຍໜ້າທີ່ປ້ອງກັນວິທະຍຸໃນເວລານັ້ນ ໄດ້ຫວນຄືນວ່າ:
“ໃນເບື້ອງຕົ້ນ, ອ້າຍນ້ອງໄດ້ຮັບຮູ້ໜ້າທີ່ຂອງຕົນແລ້ວ, ສອງຄົນຍາມຜຽນໜຶ່ງແລ້ວຜັດປ່ຽນກັນ, ຍາມໃດກໍ່ມີຄວາມຫ້າວຫັນ, ໄປໃສກໍ່ຖືປືນ K44 ໄປນຳ, ບໍ່ຢ້ານກົວຫຍັງ. ເມື່ອເຫັນເຮືອບິນ F111 ກໍ່ຍິງເລີຍບໍ່ສົນໃຈວ່າພວກມັນຈະຖີ້ມລະເບີດຢູ່ເຂດໃດ“
ລະບົບອານແຕນຂອງສະຖານນີເຄື່ອງສົ່ງເໝ໋ຈີ່ ໃນໄລຍະສົງຄາມ
(ພາບ:vov.vn)
ໃນ 12 ວັນ ແລະ ຄືນທີ່ອາເມລິກາ ໄດ້ບຸກໂຈມຕີຮ່າໂນ້ຍ ດ້ວຍທາງອາກາດຢ່າງດຸເດືອດນັ້ນ, ວິທະຍຸກະຈາຍສຽງຫວຽດນາມ ກາຍເປັນພາຫະນະສື່ມວນຊົນທີ່ສຳຄັນ, ຕົ້ນຕໍເພື່ອໃຫ້ປະຊາຊົນຮັບຟັງສະຖານະການສູ້ຮົບ, ສ່ວນຫາງສຽງໂລກແມ່ນຕິດຕາມຮັບຟັງຂ່າວຂອງວິທະຍຸກະຈາຍສຽງຫວຽດນາມ ເພື່ອຮັບຊາບກ່ຽວກັບການຄົງຕົວຂອງຊາດໜຶ່ງ. ກຸ່ມໂຄສົກໄດ້ແຈ້ງຂ່າວກ່ຽວກັບທກຸໆການເຄື່ອນໄຫວຂອງບັ້ນຮົບ “ຮ່າໂນ້ຍ-ດ້ຽນບຽນຝູທາງອາກາດ“ ຢ່າງທັນການ. ນັກສິລະປິນດີເດັ່ນກີມກຸກ, ໃນເວລານັ້ນແມ່ນໂຄສົກ, ຮັບຜິດຊອບການອ່ານຂ່າວໂດຍກົງໃນບັ້ນຮົບ 12 ວັນ ແລະ ຄືນແຫ່ງປະຫັວດສາດ ໃຫ້ຮູ້ວ່າ:
“ໃນໄລຍະນັ້ນ, ພວກຂ້າພະເຈົ້າຢູ່ຮ່າໂນ້ຍ ເພື່ອເວັນຍາມ, ພວກຂ້າພະເຈົ້າລ້ວນແຕ່ຕ້ອງຍາມ 24/24 ຊົ່ວໂມງທີ່ສຳນັກງານຢູ່ເຮືອນເລກທີ 39 ຖະໜົນບ່າຈ້ຽວ ແລະ 58 ຖະໜົນກວານຊື. ໃນເວລານັ້ນມີແຕ່ 7 ຄົນຈັດລາຍການອອກອາກາດໃຫ້ສຳເລັດໃນແຕ່ລະວັນ“
ໃນ 12 ວັນ ແລະ ຄືນແຫ່ງປະຫວັດສາດປີນັ້ນ, ພະນັກງານ, ນັກຂ່າວຂອງວິທະຍຸກໍ່ຕ້ອງເຮັດວຽກຢ່າງຫ້າວຫັນ. , ບັນດານັກຂ່າວໄດ້ຖີບລົດເກົ່າໄປເຖິງສະໜາມຮົບ, ສະຖານທີ່ທີ່ສັດຕູຖີ້ມລະເບີດທຸກແຫ່ງເພື່ອເອົາຂ່າວ. ໃຜກໍ່ຢາກປະກອບສ່ວນເລກນ້ອຍໃຫ້ແກ່ນະຄອນຫຼວງທີ່ພວມຖືກເຮືອບິນອາເມລິກາ ຍິງທຳລາຍ. ນັກດົນຕີຟ້າມຕວຽນ,ໃນເວລານັ້ນພວມເຮັດວຽກຢູ່ພະແນກສິລະປະວັນນະຄະດີວິທະຍຸກະຈາຍສຽງຫວຽດນາມ ແບ່ງປັນວ່າ: ໃນການບຸກໂຈມຕີທາງອາກາດຂອງຈັກກະພັດອາເມລິກາ, ຮ່າໂນ້ຍ ມີຄວາມອົງອາດກ້າຫານທີ່ສຸດ. ກັບເມືອບ້ານພາຍຫຼັງການຖີ້ມລະເບີດຄັ້ງໜຶ່ງຂອງອາເມລິກາ, ທ່ານຮູ້ສຶກເຈັບປວດ, ເສຍດາຍ ແຕ່ມີຄວາມເອກອ້າງທະນົງໃຈທີ່ສຸດ. ແລະ ບົດເພງ “ຮ່າໂນ້ຍ-ດ້ຽນບຽນຝູທາງອາກາດ“ ໄດ້ຖືກແຕ່ງຂຶ້ນໃນຄືນດຽວດ້ວຍອາລົມຈິດທີ່ປ່ຽມລົ້ນຂອງທ່ານ:
“ໃນການປະຊຸມ, ທ່ານຜູ້ອຳນວຍການໃຫ່ຍວິທະຍຸກະຈາຍສຽງຫວຽດນາມ ເຈີນເລີມ ໄດ້ເວົ້າວ່າ, ຄະນະພັກກອງທັບມີຄຳເຫັນຕ້ອງເດັດດ່ຽວຕ້ານຄືນສັດຕູປຽບເໝືອນບັ້ນຮົບດ້ຽນບຽນຝູ. ໄດ້ຍິນຄຳສັບດ້ຽນບຽນຝູກໍ່ເຫັນວ່າມີຄວາມສະຫງ່າງອົງອາດທີ່ສຸດ. ສະນັ້ນຂ້າພະເຈົ້າໄດ້ແຕ່ງບົດເພງ ຮ່າໂນ້ຍ-ດ້ຽນບຽນຝູທາງອາກາດ ຊື່ງມີຈັງຫວະຈູບຈ້າວຫ້າວຫັນ ແລະ ຕື່ນເຕັ້ນທີ່ສຸດ“
ເມື່ອບົດເພງດັ່ງກ່າວຖືກອອກອາກາດຜ່ານທາງວິທະຍຸກະຈາຍສຽງ ຫວຽດນາມ ຊື່ງດັງກ້ອງກັງວານໃນທົ່ວສາມພາກເໜືອ-ກາງ-ໃຕ້, ເຮັດໃຫ້ປະຊາຊົນມີຄວາມພາກພູມໃຈທີ່ສຸດ. ໃນເວລານັ້ນ, ເມື່ອໄດ້ຮັບຟັງບົດເພງ ຮ່າໂນ້ຍ-ດ້ຽນບຽນຝູທາງອາກາດ ຊາວໄຊງ່ອນໄດ້ເວົ້າວ່າ: “ຮ່າໂນ້ຍ ທັງຕໍ່ສູຸ້ທັງຮ້ອງເພງ, ແນ່ນອນວ່າຈະໄດ້ຮັບໄຊຊະນະ“.
ເພື່ອກ້າວໄປເຖິງໄຊຊະນະສຸດທ້າຍ, ກອງທັບ ແລະ ປະຊາຊົນຫວຽດນາມ, ປະຊາຊົນຮ່າໂນ້ຍ ໄດ້ຜ່ານຜ່າຄວາມທຸກຍາກລຳບາກນາໆປະການ. ບັ້ນຮົບ ດ້ຽນບຽນຝູທາງອາກາດ ໃນ 12 ວັນ ແລະ ຄືນແຫ່ງປະຫວັດສາດ, ຕີເອົາຊະນະຕໍ່ການບຸກໂຈມຕີດ້ວຍເຮືອບິນ B52 ໃນເຂດນ່ານຟ້າຮ່າໂນ້ຍ ກໍ່ໄດ້ເຂົ້າສູ່ປະຫວັດສາດຕະຫຼອດໄປ,ແມ່ນຄວາມເອກອ້າງທະນົງໃຈຂອງຊາດຫວຽດນາມ. ໃນຄວາມຊົງຈຳຂອງຕົນ, ບັນດາພະນັກງານ, ນັກຂ່າວ, ບັນນາທິການຂອງວິທະຍຸກະຈາຍສຽງຫວຽດນາມ ກໍ່ມີຄວາມເອກອ້າງທະນົງໃຈຕະຫຼອດໄປ ຍ້ອນວ່າຕົນເອງໄດ້ປະກອບສ່ວນໃນຜົນງານຂອງບັ້ນຮົບດັ່ງກ່າວ.