ໃນປະຫວັດສາດການທະຫານ ແລະ ການບິນຫວຽດນາມ, ມີຜູ້ໜຶ່ງສ້າງ 2 ສະຖິຕິພິເສດ: ນັ້ນແມ່ນນັກບິນທີ່ເຄີຍຍິງເຮືອບິນ B52 ຂອງອາເມລິກາຕົກໃນປາງສົງຄາມ ແລະ ແມ່ນນັກອະວະກາດອາຊີຜູ້ທຳອິດທີ່ບິນຂຶ້ນສູ່ອະວະກາດ, ນັ້ນແມ່ນພົນຕີ, ນັກວິລະຊົນກຳລັງປະກອບອາວຸດປະຊາຊົນ, ນັກວິລະຊົນແຮງງານຟ້າມຕວນ. ໃນໂອກາດສະເຫລີມສະຫຼອງ 40 ປີແຫ່ງໄຊຊະນະດ້ຽນບຽນຝູທາງອາກາດ, ເມື່ອເຕື້ອງເຖິງຜົນງານໃນການຍິງເຮືອບິນ B52 ຕົກ, ທ່ານຖືວ່າ, ນັ້ນແມ່ນຜົນງານຂອງການປະດິດສ້າງ, ນ້ຳໃຈອົງອາດກ້າຫານຂອງທັງທະຫານ ແລະ ປະຊາຊົນຫວຽດນາມ ຊື່ງໃນນັ້ນມີການປະກອບສ່ວນຂອງທ່ານ.
ທ່ານຟ້າມຕວນໃນເຮືອບິນສູ້ຮົບ
(ພາບ: vnexpress.net)
ປະຈຸບັນ, ທ່ານຟ້າມຕວນແມ່ນາຍພົນທະຫານຜູ້ມີຊື່ສຽງຂອງກອງທັບປະຊາຊົນຫວຽດນາມແລ້ວ ແຕ່ທ່ານຍັງຈື່ຈຳຊຸມວັນທີ່ເຂົ້າເປັນທະຫານທີ່ສຸດ, ນັ້ນແມ່ນເມື່ອເດືອນ 7/1965, ຟ້າມຕວນ ໄດ້ຮັບການຄັດເລືອກໄປຮຽນເປັນທະຫານເຕັກນິກຣາດາຢູ່ໂຊວຽດເກົ່າ, ຫຼັງຈາກນັ້ນ, ໄດ້ຮັບເລືອກເປັນນັກບິນ. ທ່ານພົນຕີຟ້າມຕວນເລົ່າສູ່ຟັງວ່າ:
“ຂ້າພະເຈົ້າໄດ້ຮັບການກຳເນີດຢູ່ເຂດຊົນນະບົດແຂວງທາຍບິງ, ນັບແຕ່ຄາວຍັງນ້ອຍ, ຂ້າພະເຈົ້າກໍ່ມີຄວາມໄຝ່ຝັນຢາກເປັນນັກບິນແລ້ວ, ໃນຈຸດເວລານັ້ນ, ສົງຄາມເກີດຂຶ້ນ ແລະ ຂ້າພະເຈົ້າໄດ້ເຂົ້າເປັນທະຫານຄືແນວນັ້ນ“
ນັກວິລະຊົນຟ້າມຕວນໂອ້ລົມກັບເຍົາວະຊົນ
(ພາບ: quocphong.baodatviet.vn)
ທ່ານຟ້າມຕວນ ໄດ້ຮຽນຈົບໂຮງຮຽນກໍ່ສ້າງນັບບິນທະຫານຢູ່ໂຊວຽດເກົ່າເມື່ອປີ 1967, ແລ້ວກັບເມືອປະເທດ ແລະ ກາຍເປັນນາຍທະຫານຂັບເຮືອບິນສູ້ຮົບຂອງກອງພັນໃຫ່ຍປ້ອງກັນອາກາດດາວແດງທີ່ເຂົ້າຮ່ວມການຕໍ່ສູ້ປ້ອງກັນເຂດນ່ານຟ້າທາງພາກເໜືອຫວຽດນາມ. ທ່ານພ້ອມກັບຜູ້ຮ່ວມກົມກອງເປັນກຽດທີ່ໄດ້ເຂົ້າຮ່ວມການສູ້ຮົບຄັ້ງປະຫວັດສາດກັບກອງທັບອາກາດອາເມລິກາ, ຊອກຫາຍິງທຳລາຍເຮືອບິນ B52 ຊື່ງແມ່ນເຮືອບິນທີ່ທັນສະໃໝທີ່ສຸດຢູ່ໂລກຂອງອາເມລິກາ ໃນເຂດນ່ານຟ້າຮ່າໂນ້ຍ. ບັນດານັກບິນເກັ່ງກ່ວາໝູ່ໄດ້ຮັບການປຸກລະດົມເຂົ້າຮ່ວມການຕໍ່ສູ້ໃນເວລານັ້ນ. ໃນຄ່ຳຄືນວັນທີ 18/12/1972, ນັກບິນຟ້າມຕວນ ແລະ ຜູ້ຮ່ວມກົມກອງໄດ້ຮັບຄຳສັ່ງບິນຂຶ້ນ. ທ່ານພັນເອກຫວູ໋ບັນຈວຽນ (Vũ Văn Chuyên) ຜູ້ບັນຊາທາງບິນໃຫ້ແກ່ທ່ານຟ້າມຕວນ ເລົ່າຄືນວ່າ:
“ໃນຈຳນວນນັບບິນໃນກາງຄືນມີນັກບິນເກັ່ງສອງຄົນ, ນັ້ນແມ່ນດິງຕົນ ແລະ ຟ້າມຕວນ. ຟ້າມຕວນ ແມ່ນນັກບິນໜຸ່ມແຕ່ບິນເກັ່ງ, ສະຫຼາດສະຫຼຽວ ແລະ ມີຄວາມອົງອາດກ້າຫານ, ສະນັ້ນ, ຂ້າພະເຈົ້າຖືວ່າ, ໃນການຕໍ່ສູ້ເມື່ອຄ່ຳຄືນວັນທີ 18/12/1972, ເຖິງວ່າບໍ່ທັນຍິງເຮືອບິນ B52 ຕົກໄດ້ກໍ່ຕາມແຕ່ຟ້າມຕວນ ກໍ່ສົມເປັນນັກວິລະຊົນແລ້ວ, ຍ້ອນວ່າໃນເງື່ອນໄຂກອງທັບອາກາດອາເມລິກາ ໄດ້ບຸກໂຈມຕີຢ່າງດຸດເດືອດແຕ່ລາວຍັງສາມາດຂັບເຮືອບິນຍິງທຳລາຍ ແລະ ເຮັດໃຫ້ກອງບິນຂອງສັດຕູຖືກກະວົນກະວາຍ, ສ້າງເງື່ອນໄຂໃຫ້ຜູ້ຮ່ວມກົມກອງທຳການຕໍ່ສູ້ ແລະ ສ້າງຜົນງານລວມໝູ່“
ການສູ້ຮົບໃນຄ່ຳຄືນວັນທີ 27/12/1972, ນັກບິນຟ້າມຕວນ ໄດ້ສ້າງຜົນງານການສູ້ຮົບພິເສດ, ຂັບເຮືອບິນ MIG 21 ບິນຂ້າມຜ່ານເຮືອບິນໜູນຫຼັງຫຼາຍລຳ, ຍິງເຮືອບິນ B52 ຕົກຢູ່ກັບທີ່ ແລະ ກັບຄືນຖານທີ່ໝັ້ນດ້ວຍຄວາມປອດໄພ. ແລະ ຈຸດເວລາແຫ່ງໄຊຊະນະແຫ່ງປະຫວັດສາດໃນເວລານັ້ນຍັງຄົງໄດ້ຝັງເລິກໃນດວງໃຈຂອງທ່ານຕະຫຼອດໄປ. ທ່ານພົນຕີຟ້າມຕວນ ເລົ່າສູ່ຟັງວ່າ:
“ເມື່ອເຮືອບິນ B52 ບິນເຂົ້າຫ່າງຈາກເຂດຊາຍແດນຫວຽດນາມ-ລາວ 200, 300 ກມ, ຂ້າພະເຈົ້າໄດ້ຮັບຄຳສັ່ງອອກເດີນທາງ. ຂ້າພະເຈົ້າເປັນຜູ້ທຳອິດທີ່ພົບເຫັນເຮືອບິນ B52 ຢູ່ຊານນະຄອນຮ່າໂນ້ຍ ແລະ ໃນຄ່ຳຄືນຂອງວັນທີ 27/12, ຂ້າພະເຈົ້າໄດ້ຍິງເຮືອບິນ B52 ຕົກຢູ່ເຂດນ່ານຟ້າຂອງນະຄອນຫຼວງທີ່ຮັກແພງ “
ໃນເວລານັ້ນ, ວົງການນັກການເມືອງອາເມລິກາ ແລະ ບັນດາສຳນັກຂ່າວສານໂລກແປກປະຫຼາດໃຈທີ່ສຸດ, ຍ້ອນບໍ່ເຂົ້າໃຈໄດ້ວ່າເປັນຫຍັງປະເທດໜຶ່ງທີ່ຍັງມີຄວາມອ່ອນດ້ອຍທຸກຢ່າງ ພັດສາມາດຍິງເຮືອບິນ B52 ທີ່ເປັນສັນຍາລັກການທະຫານ, ຊື່ງຖືກເອີ້ນວ່າ “ເຮືອບິນທີ່ບໍ່ອາດທຳລາຍໄດ້“ ຂອງອາເມລິກາ ຕົກໄດ້.
ປະຈຸບັນ, ທ່ານພົນຕີຟ້າມຕວນ ມີອາຍຸ 65 ປີແລ້ວ, ຍາມໃດທ່ານກໍ່ມີຄວາມຄິດວ່າ: ຕ້ອງຮັກອາຊີບທີ່ເຮົາເລືອກເພື່ອປະຕິບັດໜ້າຂອງຕົນສຳເລັດ.