ໃນອາທິດຜ່ານມາ, ລາຍການກະຈາຍສຽງພາກພາສາລາວ ສືບຕໍ່ຮັບຈົດໝາຍ, ອິແມວ ແລະ ໂທລະສັບຈາກຜູ້ຟັງລາວຫຼາຍຄົນ.ໃນລາຍການພາກນີ້,ພວກເຮົາຄັດສະເຫນີເນື້ອໃນຈົດໝາຍບາງສະບັບ ຊື່ງຜູ້ຟັງຜູ້ອ່ານສ່ົງເຖິງລາຍການໃນອາທິດຜ່ານມາ.
ທ່ານ ບຸນເທືອງ ຢູ່ ແຂວງ ຈຳປາສັກ ສົ່ງຈົດໝາຍມາຍັງລາຍການໂດຍເວົ້າວ່າ: ຊຸມມື້ຜ່ານມາ, ຂ້າພະເຈົ້າ ເຂົ້າອ່ານຂ່າວໃນຫນ້າເວັບ vovwolrd.vn ແລະ ໄດ້ຮູ້ຈັກວ່າ: ຢູ່ ຫວຽດນາມ ໄດ້ຈັດຕັ້ງວັນປື້ມຫວຽດນາມຄືວັນທີ 21/4. ຂ້າພະເຈົ້າເຫັນວ່າ: ນີ້ແມ່ນເຫດການມີຄວາມໝາຍທີ່ສຸດ, ບໍ່ພຽງແຕ່ແມ່ນໂອກາດທີ່ດີເພື່ອໃຫ້ຜູ້ມັກອ່ານປື້ມເທົ່ານັ້ນ ຫາກຍັງສົ່ງເສີມ ແລະ ຂະຫຍາຍຂະບວນການອ່ານປື້ມໃນວົງຄະນາຍາດອີກດ້ວຍ. ຕໍ່ຫນ້າສະພາບການທີ່ບັນດາພາຫະນະສື່ສານພັດທະນາຢ່າງແຮງ , ບັນດາການເຄື່ອນໄຫວຄືແນວນັ້ນ ຈະຊ່ວຍປະຊາຊົນຍົກສູງຄວາມຮັບຮູ້ກ່ຽວກັບຄວາມສຳຄັນຂອງການອ່ານປື້ມ.
ທ່ານ ບົວໄລ ຢູ່ ແຂວງ ວຽງຈັນ ໂທລະສັບມາຫາລາຍການໂດຍເວົ້າວ່າ: ຂ້າພະເຈົ້າມີຄວາມຮູ້ສຶກປະທັບໃຈເມື່ອເຂົ້າເບິ່ງພາບສາລະຄະດີໃນຫນ້າເວັບ vov5 ຂອງວິທະຍຸກະຈາຍສຽງຫວຽດນາມ. ພິເສດແມ່ນຮູບພາບກ່ຽວກັບ Festival ເຫ້ວ 2014 ໂດຍບັນດານັກຂ່າວ vov ຖ່າຍ ແມ່ນສວຍງາມຫລາຍ, ແລະ ສ່ອງແສງໃຫ້ເຫັນການເຄື່ອນໄຫວທີ່ອຸດົມສົມບູນ ຢູ່ Festival ເຫ້ວ ຜ່ານມາ. ຂ້າພະເຈົ້າບໍ່ທັນມີໂອກາດໄດ້ໄປຢ້ຽມຢາມ ຫວຽດນາມ ເພື່ອເຂົ້າຢ້ຽມ ເຫ້ວ ແລະ ເຂົ້າຮ່ວມ Festival ເຫ້ວ ແຕ່ຜ່ານພາບສາລະຄະດີ ຂ້າພະເຈົ້າເຂົ້າໃຈໄດ້ສ່ວນໃດຫນຶ່ງກ່ຽວກັບ Festival ທີ່ມີຂອບຂະຫນາດໃຫຍ່ທີ່ສຸດນັ້ນ. ຫວັງວ່າ ຂ້າພະເຈົ້າຈະມີໂອກາດໄດ້ໄປຢ້ຽມຢາມ ເຫ້ວ ແລະ ເຂົ້າຮ່ວມ Festival 2016.
ໃນຈົດໝາຍສົ່ງເຖິງລາຍການກະຈາຍສຽງພາກພາສາລາວໃນອາທິດຜ່ານມາ, ທ່ານ ແສງເພັດ ຢູ່ ແຂວງ ບໍລິຄຳໄຊ ເວົ້າວ່າ: ໃນວັນອາທິດຜ່ານມາ, ລາຍການກະສຽງຫວຽດນາມ ພາກພາສາລາວ ໄດ້ແນະນຳບົດທີ່ມີຫົວຂໍ້ວ່າ: ຫນ່ວຍທ່ານໝໍອາສາສະໝັກກວດປິ່ນປົວພະຍາດເພື່ອຄົນທຸກຍາກ ໂດຍພະແນກສາທາລະນະສຸກ ນະຄອນ ເກີນເທີ ສ້າງຕັ້ງຂຶ້ນແຕ່ປີ 2002. ດ້ວຍ ທ່ານໝໍ, ນາງແພດ ເກືອບ 300 ຄົນ, ຫນ່ວຍທ່ານໝໍອາສາສະໝັກ ໄດ້ຈັດຕັ້ງການກວດ,ປິ່ນປົວພະຍາດເກືອບ 400 ຄັ້ງ, ດ້ວຍຈຳນວນປະຊາຊົນໄດ້ຮັບການກວດພະຍາດທັງໝົດກວ່າ 300.000 ເທື່ອຄົນ ແລະ ຈຳນວນຢຸກຢາທີ່ແຈກຢາຍໃຫ້ຄົນທຸກຍາກໂດຍບໍ່ເກັບຄ່າ ລວມມູນຄ່າ 9 ຕື້ດົ່ງ. ພິເສດ, ແຕ່ລະປີ, ຫນ່ວຍທ່ານໝໍອາສາສະໝັກ ໄປກວດກາ ແລະ ປິ່ນປົວພະຍາດໂດຍບໍ່ເກັບຄ່າໃຫ້ແກ່ປະຊາຊົນຢູ່ບັນດາແຂວງ ທຸກຍາກ ຂອງລາວ ແລະ ກຳປູເຈຍ. ຂ້າພະເຈົ້າເຫັນວ່າ ບັນດາການອຸທິດສ່ວນຂອງຫນ່ວຍທ່ານໝໍອາສາສະໝັກ ມີຄວາມໝາຍທີ່ສຸດ, ບໍ່ພຽງແຕ່ປະກອບສ່ວນເຂົ້າໃນວຽກງານເບິ່ງແຍງສຸຂະພາບໃຫ້ແກ່ປະຊາຊົນທີ່ທຸກຍາກ, ປະຊາຊົນຢູ່ເຂດຫ່າງໄກສອກຫລີກ ເທົ່ານັ້ນ ຫາກຍັງເປັນຂົວເຊື່ອມຕໍ່, ເພີ່ມພູນຄູນສ້າງໃຫ້ແກ່ສາຍພົວພັນລະຫວ່າງສາມປະເທດ ຫວຽດນາມ,ລາວ ແລະ ກຳປູເຈຍ ອີກດ້ວຍ.
ທ່ານ ເພັດສະຫວັນ ສີຊານົນ ຢູ່ ແຂວງ ອັດຕະປື ສ່ົງອີແມວ ມາຫາລາຍການໂດຍເວົ້າວ່າ: ໃນການຢ້ຽມຢາມຫວຽດນາມ ຜ່ານມາ, ບັນນາທິການ, ໂຄສົກຂອງລາຍການພາກພາສາລາວເວົ້າສະເພາະ ແລະ ຂອງ VOV 5 ເວົ້າລວມ ໄດ້ຕ້ອນຮັບຄອບຄົວຂ້າພະເຈົ້າຢ່າງສະຫນິດສະຫນົມ. ເຖິງວ່າຄ້າງຄາກັບວຽກງານກໍຕາມ, ແຕ່ພວກອ້າຍເອື້ອຍໃນລາຍການພາກພາສາລາວ ພະຍາຍາມຍາດເວລາເພື່ອພາພວກຂ້າພະເຈົ້າໄປຢ້ຽມຢາມສະຖານທີ່ປະຫວັດສາດ, ວັດທະນະທຳ ບາງແຫ່ງຢູ່ນະຄອນຫລວງ ຮ່າໂນ້ຍ. ພາຍຫລັງກັບຄືນເມືອປະເທດ, ຂ້າພະເຈົ້າໄດ້ຮັບຟັງບົດຂຽນຂອງບັນນາທິການພາກພາສາລາວທີ່ເວົ້າເຖິງຄວາມຮູ້ສຶກຂອງພວກຂ້າພະເຈົ້າເມື່ອເຂົ້າຂຳ່ນັບສຸສານປະທານໂຮ່ຈິມີນ ທີ່ມີຫົວຂໍ້ວ່າ: ຄອບຄົວຊາວລາວເຂົ້າຂຳ່ນັບສຸສານປະທານໂຮ່ຈິມີນ, ຂ້າພະເຈົ້າຮູ້ສຶກສະເທືອນໃຈຫລາຍ. ອີກຄັ້ງຫນຶ່ງຂ້າພະເຈົ້າຂໍຂອບອົກຂອບໃຈບັນດາອ້າຍເອື້ອຍບັນນາທິການພາກພາສາລາວ ແລະ VOV 5 ໄດ້ຊ່ວຍບັນດາຊາວລາວຄືພວກຂ້າພະເຈົ້າ ມີໂອກາດຢ້ຽມຢາມ ຮ່າໂນ້ຍ ແລະ ໄດ້ເຫັນຜູ້ນຳທີ່ແສນເຄົາລົບຮັກຂອງປະຊາຊົນຫວຽດນາມ.
ທ່ານຜູ້ຟັງທີ່ເຄົາລົບ! ທີ່ທ່ານຫາກໍຮັບຟັງແມ່ນບາງຄຳເຫັນຊື່ງທ່ານຜູ້ຟັງໄດ້ຝາກມາລາຍການພາກສາລາວໃນອາທິດຜ່ານມາ. ລາຍການພາກພາສາລາວ ຂອບອົກຂອບໃຈພວກທ່ານທີ່ໄດ້ຕິດຕາມ, ສົ່ງຈົດໝາຍປະກອບຄຳເຫັນເຖິງລາຍການ. ຫວັງວ່າ ໃນໄລຍະຈະມາເຖິງ, ທ່ານຜູ້ຟັງຈະສືບຕໍ່ຝາກຈົດໝາຍມາຍັງລາຍການນັບມື້ນັບຫລາຍກວ່າ. ຂໍອວຍພອນທ່ານຜູ້ຟັງທຸກຄົນມີສຸຂະພາບເຂັ້ມແຂງ ແລະ ປະສົບຜົນສຳເລັດໃນວຽກງານຂອງຕົນ.
ທ່ານສາມາດຮັບຟັງ ແລະ ຊົມລາຍການຜ່ານຫນ້າເວັບ vovworld.vn ຫລື vov5.vn ແລະ ຢ່າລືມສົ່ງຈົດໝາຍໃຫ້ພວກຂ້າພະເຈົ້າຜ່ານທີ່ຢູ່:
ລາຍການພາກພາສາລາວ- ວິທະຍຸກະຈາຍສຽງຫວຽດນາມ
45 Ba Trieu, Ha Noi