(vovworld) –ໃນອາທິດຜ່ານມາ, ພາກພາສາລາວ ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວ, ໂທລະສັບຈາກທ່ານຜູ້ຟັງລາວ ຫຼາຍທ່ານ. ໃນລາຍການໂອ້ລົມກັບເພື່ອນລາວພາກນີ້, ພວກຂ້າພະເຈົ້າຂໍຄັດສະເໜີບາງຄຳເຫັນ ແລະ ຕອບຈົດໝາຍ, ອີແມວເຊິ່ງທ່ານຜູ້ຟັງໄດ້ຝາກມາລາຍການ.
ໃນອາທິດດ ທ່ານນາງ ທອງມີ ຢວນສັກດາ, ຮອງທີ່ປຶກສາດ້ານວັດທະນະທຳແຫ່ງ ສປປ.ລາວ ປະຈຳຫວຽດນາມ, ທ່ານເພັດສະຫວັນ, ໂທລະພາບແຫ່ງຊາດລາວ ທີ່ພວມຮໍ່າຮຽນຢູ່ຫວຽດນາມ, ທ່ານເພັດສະຫວັນ ສີຊານົນ ຢູ່ແຂວງອັດຕະປື ແລະ ທ່ານ ຫງວຽນວັນແຕ້ວ, ຊາວຫວຽດນາມ ອາໄສຢູ່ໄທ, ໄດ້ສົ່ງອີແມວມາອວຍພອນເອື້ອຍນ້ອງແມ່ຍິງລາຍການ ໃນໂອກາດວັນແມ່ຍິງຫວຽດນາມ 20/10. ໃນຈົດໝາຍຂອງຕົນ, ທ່ານ ຫງວຽນວັນແຕ້ວ ໄດ້ແບ່ງປັນວ່າ.
ຜ່ານສົງຄາມ 2 ຄັ້ງຕ້ານພວກລ່າເມືອງຂຶ້ນຝລັ່ງ ແລະ ຈັກກະພັດອາເມລິກາ, ບັນດາແມ່, ບັນດາເອື້ອຍທີ່ໄດ້ມີການອຸທິດສ່ວນອັນໃຫຍ່ຫຼວງ, ເຮັດລ້ອນວຽກບ້ານ, ການເຮືອນ, ຕັ້ງໜ້າອອກແຮງງານທຳການຜະລິດ, ລະດົມຜົວ, ລູກ ເດີນທາງໄປຕໍ່ສູ້ປົດປ່ອຍຊາດ, ບັນດາແມ່, ບັນດາເອື້ອຍ ໄດ້ສະແດງໃຫ້ເຫັນທາດແທ້ວິລະຊົນປະຕິວັດ. ສົມເປັນນາມມະຍົດທີ່ປະທານໂຮ່ຈິມິນ ໄດ້ມອບໃຫ້ນັ້ນແມ່ນ: ວິລະຊົນ, ບໍ່ຍອມຈຳນົນ, ຈົ່ງຮັກພັກດີ, ເຮັດລ້ອນວຍຽກງານ ການເຮືອນ.
ລຸງ ຫງວຽນວັນແຕ້ວຍັງສະແດງຄວາມພາກພູມໃຈເມື່ອໄດ້ຮັບຂ່າວວ່າ, ຮ່າໂນ້ຍ ຫາກໍ່ເປີດສະຫຼອງກິດຈະກຳຂົວ ດົງຈູ ຂ້າມແມ່ນ້ຳ ດວ໋ງ ທີ່ເຊື່ອມຕໍ່ກັບເສັ້ນທາງເລກ 5, ນີ້ແມ່ນໂຄງການຄົມມະນາຄົມທີ່ມີຂອບຂະໜາດໃຫຍ່ກວ່າໝູ່ນັບແຕ່ກ່ອນມາຮອດປະຈຸບັນ, ໂດຍນັກສະຖາປານິກ, ນັກວິສະວະກອນຫວຽດນາມ ປະຕິບັດເອງ, ນີແມ່ນກິດຈະກຳທີ່ມີຄວາມໝາຍສຳຄັນເນື່ອງໃນໂອກາດສະເຫຼີມສະຫຼອງ 60 ປີແຫ່ງວັນປົດປ່ອຍນະຄອນຫຼວງ.
(ສຳນັກສະພາແຫ່ງຊາດຫຼັງໃໝ່)
ເພື່ອນ ມາລິວອນ, ຢູ່ວຽງຈັນ ສົ່ງອີແມວມາຍັງລາຍການໂດຍຖາມວ່າ: ຂ້າພະເຈົ້າໄດ້ຮັບຂ່າວວ່າ, ຫວຽດນາມ ຫາກໍ່ຈັດຕັ້ງກອງປະຊຸມສະໄໝສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13 ຢູ່ສຳນັກສະພາແຫ່ງຊາດຫຼັງໃໝ່. ແຕ່ຂ້າພະເຈົ້າບໍ່ຮູ້ວ່າ ສຳນັກສະພາແຫ່ງຊາດຫຼັງໃໝ່ນີ້ ໄດ້ຮັບການລົງມືກໍ່ສ້າງແຕ່ເວລາໃດ? ຕັ້ງຢູ່ໃສ? ແລະ ມີເນື້ອທີ່ທັງໝົດກວ້າງເທົ່າໃດ?
ເພື່ອນ ມາລິວອນ ທີ່ຮັກແພງ, ສຳນັກສະພາແຫ່ງຊາດຫຼັງໃໝ່ໄດ້ເລີ່ມລົງມືກໍ່ສ້າງເມື່ອເດືອນ 10/2009 ຢູ່ຖະໜົນ ດົກເລີບ, ຕໍ່ໜ້າແມ່ນສຸສານປະທານໂຮ່ຈິນິນ ແລະ ໃກ້ກັບປູຊະນິຍະສະຖານ ຮ່ວາງແທ່ງທັງລອງ. ສຳນັກສະພາແຫ່ງຊາດຫຼັງໃໝ່ ສູງ 39 ມ, ໄດ້ອອກແບບເປັນຮູບຈະຕຸລັດ, ລວມມີ 7 ຊັ້ນໃນນັ້ນມີ 2 ຊັ້ນໃຕ້ດິນ. ດ້ວຍເນື້ອທີ່ທັງໝົດແມ່ນ 60.000 ຕາແມັດ, ມີຫ້ອງປະຊຸມໃຫຍ່, ນ້ອຍກວ່າ 80 ຫ້ອງ. ໃນນັ້ນ, ຫ້ອງປະຊຸມຕົ້ນຕໍແມ່ນຕັ້ງຢູ່ໃຈກາງເປັນຮູບວົງມົນສາມາດບັນຈຸຜູ້ແທນໄດ້ 600 ຄົນ. ກິດຈະກຳໄດ້ຮັບການຕີລາຄາວ່າ ມີຂອບຂະໜາດໃຫຍ່, ສັບສົນກວ່າໝູ່ນັບແຕ່ກອນມາຮອດປະຈຸບັນຢູ່ຫວຽດນາມ ໂດຍນັກປະມູນຫວຽດນາມ ກໍ່ສ້າງເອງ.
ສ້າງຕັ້ງ 4 ໜ່ວຍປ້ອງກັນ, ຕ້ານພະຍາດ Ebola
(ພາບປະກອບ: TTXVN)
ເພື່ອນວົງຄຳ, ແຂວງຫົວພັນ ສົ່ງອີແມວມາຍັງລາຍການໂດຍຖາມວ່າ: ປະຈຸບັນພະຍາດ Ebola ພວມຜັນແປໄປຢ່າງສັບສົນ, ມີໄພແຜ່ລາມອອກສູ່ຫຼາຍປະເທດ. ສະນັ້ນ, ຂ້າພະເຈົ້າຢາກຮູ້ວ່າ, ຫວຽດນາມ ໄດ້ມີບັນດາບາດກ້າວການກະກຽມຄືແນວໃດແດ່ ໃນການປ້ອງກັນ ຕ້ານພະຍາດ Ebola?
ເພື່ອນວົງຄຳ ທີ່ຮັກແພງ, ຕອນເຊົ້າວັນທີ 20/10, ກະຊວງສາທາລະນະສຸກຫວຽດນາມ ໄດ້ຈັດກອງປະຊຸມຂ່າວລາຍງານໂລກລະບາດ ໂດຍເຊື້ອ Ebola ກໍ່ຂຶ້ນໃນທົ່ວໂລກ ແລະ ເຜີຍແຜ່ການເຄື່ອນໄຫວປ້ອງກັນ ຕ້ານພະຍາດນີ້ຢູ່ຫວຽດນາມ. ທີ່ກອງປະຊຸມຈ່າວ, ທ່ານຮອງລັດຖະມົນຕີກະຊວງສາທາລະນະສຸກ ຫງວຽນແທງລອງ ໃຫ້ຂໍ້ສັງເກດວ່າ, ສະພາບໂລກພະຍາດ Ebola ໃນໂລກພວມຜັນແປຢ່າງສັບສົນທີ່ສຸດ, ຈຳນວນຜູ້ຕິດພະຍາດ ແລະ ເສຍຊີວິດນັບມື້ນັບເພີ່ມຂຶ້ນ. ມາຮອດປະຈຸບັນ, ຫວຽດນາມ ຍັງບໍ່ທັນມີກໍ່ລະນີ້ໃດຕິດພະຍາດ Ebola.
ເພື່ອປ້ອງກັນ, ຕ້ານພະຍາດບໍ່ໃຫ້ແຜ່ລາມອອກ ແລະ ແຊກຊຶມເຂົ້າຫວຽດນາມ, ກະຊວງສາທາລະນະສຸກໄດ້ ແລະ ພວມຮີບເຮັ່ງກະກຽມບັນດາມາດຕະການຮັບມືເມື່ອມີພະຍາດເກີດຂຶ້ນ. ໃນນັ້ນໄດ້ຜັນຂະຫຍາຍບັນດາມາດຕະການຄື:
- ສ້າງຕັ້ງ 4 ໜ່ວຍປ້ອງກັນ, ຕ້ານພະຍາດ Ebola ສຸກເສີນ, ເຊິ່ງຕັ້ງຢູ່ພາກເໜືອ, ພາກກາງ, ພາກໃຕ້, ເຂດໃຕ້ງວຽນ ເພື່ອຕອບສະໜອງ ແລະ ຊີ້ນຳຢ່າງທັນການ ໃນກໍລະນີມີຜູ້ຖືກສົງໄສວ່າຕິດພະຍາດ Ebola.
- ຈັດຕັ້ງບັນດາການຝຶກອົບຮົມປ້ອງກັນ, ຕ້ານພະຍາດ ແລະ ຈັດຕັ້ງກອງປະຊຸມເປັນປະຈຳ ເພື່ອສະໜອງຂໍ້ມູນ, ປຶກສາຫາລືມາດຕະການປ້ອງກັນ, ຕ້ານພະຍາດ.
- ເປັນເຈົ້າການຍົກອອກມາດຕະການຕິດຕາມກວດກາ ແລະ ປ້ອງກັນ, ຕ້ານໂລກພະຍາດບໍ່ໃຫ້ແຜ່ລາມອອກຜ່ານດ່ານຊາຍແດນຢ່າງມີປະສິດທິຜົນ.
- ຜັນຂະຫຍາຍລະບົບຂ້າເຊື້ອພະຍາດເຄື່ອນທີ ຢູ່ສະໜາມບິນໂນ້ຍບ່າຍ ແລະ ເຕີນເຊີນຍືດ ເພື່ອແກ້ໄຂ, ແຍກຕົວກໍລະນີເຂົ້າເມືອງທີ່ຖືກສົງໄສວ່າຕິດພະຍາດ Ebola ຢ່າງທັນການ.
- ອັບເດັດ ແລະ ເຜີຍແຜ່ບັນດາຂໍ້ມູນກ່ຽວຂ້ອງເຖິງພະຍາດ Ebola ທາງສື່ມວນຊົນເປັນປະຈຳເພື່ອໃຫ້ປະຊາຊົນກຳໄດ້.
- ສ້າງສາຍໂທລະສັບດ່ວນເພື່ອແກ້ໄຂຂໍ້ຂ້ອງໃຈໃຫ້ແກ່ປະຊາຊົນ, ຜູ້ເຂົ້າເມືອງເມື່ອມີຄວາມຈຳເປັນ.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ
. ຖ້າມີຄວາມສົນໃຈເຖິງບັນຫາໃດໜຶ່ງ,
ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ
laovov@yahoo.com, laovov5@gmail.com.