ອາທິດຜ່ານມາ, ພາກພາສາລາວໄດ້ຮັບ 3 ອີແມວ, 2 ໂທລະສັບ ແລະ ຈົດໝາຍ 1 ສະບັບຈາກທ່ານຜູ້ຟັງລາວ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບຄຳຖາມເຊິ່ງທ່ານຜູ້ຟັງຝາກມາລາຍການ.
ທ່ານ ໄກຄຳ, ແຂວງ ສາລາວັນ ໄດ້ຝາກ ອີແມວມາຍັງລາຍການໃນນັ້ນແບ່ງປັນວ່າ: ໄລຍະມໍ່ໆມານີ້, ເມື່ອຮັບຟັງວິທະຍຸ, ຂ້າພະເຈົ້າເຫັນວ່າມີຫຼາຍຂ່າວກ່ຽວກັບພິທີສະເຫຼີມສະຫຼອງ 70 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ. ຂ້າພະເຈົ້າແມ່ນທະຫານທີ່ຫາກໍ່ໄດ້ພັກກິນເບ້ຍບຳນານດັ່ງນັ້ນກໍ່ມີຄວາມສົນໃຈເຖິງສິ່ງດັ່ງກ່າວ. ຜ່ານລາຍການຂ້າພະເຈົ້າຢາກຮູ້ແຫຼ່ງຂ່າວບາງຢ່າງກ່ຽວກັບກອງທັບປະຊາຊົນ ຫວຽດນາມໄດ້ບໍ່? ແລະ ການເຄື່ອນໄຫວສະເຫຼີມສະຫຼອງ 70 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ?
ພາບປະກອບ
ທ່ານ ໄກຄຳ ທີ່ຮັກ ກ່ອນນີ້ 70 ປີ, ໂດຍໄດ້ຮັບຄຳສັ່ງຂອງປະທານ ໂຮ່ຈີມິນ, ວັນທີ 22/12/1944, ຢູ່ເຂດປ່າ ເຈີນຮືງດ້າວ, ຕາແສງ ຕາມກິມ, ເມືອງ ງວຽນບິ່ງ, ແຂວງກາວບັ່ງ, ກອງ ໂຄສະນາທະຫານປົດປ່ອຍຫວຽດນາມໄດ້ຮັບການສ້າງຕັ້ງຂຶ້ນ. ນີ້ແມ່ນກອງທະຫານຕົ້ນຕໍທຳອິດຂອງກອງທັບປະຊາຊົນ ຫວຽດນາມ ວິລະຊົນ. ຈາກນັ້ນ, ວັນທີ 22/12/1944 ໄດ້ຮັບຖືເປັນວັນສ້າງຕັ້ງກອງທັບປະຊາຊົນ ຫວຽດນາມ, ນີ້ກໍ່ແມ່ນວັນມູນເຊື້ອກົມໃຫຍ່ການເມືອງກອງທັບປະຊາຊົນ ຫວຽດນາມ. ໃນຕະຫຼອດ 70 ປີຜ່ານມາ, ພະນັກງານ, ນັກຮົບກອງທັບປະຊາຊົນ ຫວຽດນາມ ລຸ້ນຕ່າງໆໄດ້ຜ່ານຜ່າຄວາມລຳບາກ, ກາກກຳຫຼາຍຢ່າງ, ສ້າງວິລະກຳຫຼາຍຢ່າງ, ປະກອບສ່ວນເໝາະສົມເຂົ້າໃນພາລະກິດປົດປ່ອຍຊາດກໍ່ຄືໃນພາລະກິດສ້າງສາ ແລະ ປົກປັກຮັກສາປະເທດສັງຄົມນິຍົມ ຫວຽດນາມ, ສົມເປັນນາມມະຍົດອັນສູງສົ່ງໂດຍປະຊາຊົນມອບໝາຍໃຫ້ນັ້ນແມ່ນ “ທະຫານລຸງໂຮ່”.
ໃນການປະຊຸມຂ່າວໂດຍຄະນະໂຄສະນາສຶກສາສູນກາງ, ກະຊວງປ້ອງກັນປະເທດ, ກະຊວງຖະແຫຼງຂ່າວ ແລະ ສື່ສານ ສົມທົບກັນຈັດຕັ້ງໃນທ້າຍເດືອນ 11 ຜ່ານມາໃຫ້ຮູ້ວ່າ, ບັນດາການເຄື່ອນໄຫວສະເຫຼີມສະຫຼອງ 70 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ (22/12/1944 – 22/12/2014) ແລະ 25 ປີແຫ່ງວັນປ້ອງກັນຊາດທົ່ວປວງຊົນ (22/12/1989 – 22/12/2014), 70 ປີແຫ່ງວັນມູນເຊື້ອກົມໃຫຍ່ການເມືອງກອງທັບປະຊາຊົນ ຫວຽດນາມ (22/12/1944 – 22/12/2014), ຖືກຈັດຂຶ້ນດ້ວຍລະດັບຊາດ. ກະຊວງປ້ອງກັນປະເທດສົມທົບກັບບັນດາຄະນະ, ຂະແໜງການ, ທ້ອງຖີ່ນຈັດຕັ້ງການເຄື່ອນໄຫວແທດຈິງຫຼາຍຢ່າງຄື: ພິທີຍ້ອງຍໍຊົມເຊີຍຊາວໜຸ່ມກອງທັບ ແລະ ຊາວໜຸ່ມຕຳຫຼວດ “ຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານ ໂຮ່ຈີມິນ ໄລຍະ 2012 - 2014” ໃນວັນທີ 7/12, ລາຍການ “ເດີນທາງກັບເມືອກົກເຄົ້າເຫງົ້າກໍ” ຂອງຊາວໜຸ່ມກອງທັບຖືກດຳເນີນໄປຢູ່ແຂວງ ກາວບັ່ງ, ກອງປະຊຸມສຳມະນາວິທະຍາສາດ “ກອງທັບວິລະຊົນຂອງປະເທດຫວຽດນາມ ວິລະຊົນ”, ງານວາງສະແດງຜົນງານ 70 ປີແຫ່ງການສ້າງຕັ້ງ, ແລະ ເຕີບໃຫຍ່ຂອງກອງທັບປະຊາຊົນ ຫວຽດນາມ…
ຖ້າຜູ້ຟັງທ່ານໃດຢາກຮູ້ແຈ້ງກ່ວາກ່ຽວກັບການເຄື່ອນໄຫວໃນວັນບຸນໃຫຍ່ຂອງກອງທັບປະຊາຊົນ ຫວຽດນາມ ນີ້, ອາດຈະເຂົ້າຊົມລາຍການ “70 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ” ໃນແວບໄຊ: vovworld.vn ຫຼື vov5.vn ຂອງພວກເຮົາ.
++++
ເພື່ອນ ລັດດາພອນ, ຢູ່ນະຄອນຫຼວງ ວຽງຈັນ ໄດ້ໂທລະສັບຫາລາຍການໂດຍຖາມວ່າ: ຂ້າພະເຈົ້າຮັບຟັງວິທະຍຸ ແລະ ອ່ານໜັງສືພິມເຄີຍມີແຖວໜັງສື: “ຈຸດໝາຍສະຫັດສະຫວັດຂອງ ສປຊ”, ຂ້າພະເຈົ້າໄດ້ຮູ້ວ່າມີ 8 ຈຸດໝາຍ, ແຕ່ຢາກຖາມວ່າ 8 ຈຸດໝາຍນັ້ນແມ່ນຫຍັງແດ່?.
ເພື່ອນ ລັດດາພອນ ທີ່ຮັກແພງ, 8 ຈຸດໝາຍສະຫັດສະຫວັດຂອງ ສປຊ ແມ່ນ: ລົບລ້າງສະພາບຂາດທັນຍາການ ແລະ ອຶດຫິວ; ປະຕິບັດສຳເລັດການສຶກສາຂັ້ນປະຖົມພາກບັງຄັບ; ຍົກສູງຄວາມສະເໝີພາບລະຫວ່າງຍິງ - ຊາຍ, ກຳລັງຄວາມສາມາດຂອງແມ່ຍິງ; ຫລຸດຜ່ອນອັດຕາການຕາຍຂອງເດັກ; ປັບປຸງສຸຂະພາບຂອງແມ່; ປ້ອງກັນ, ຕ້ານ HIV ໂລກເອດ, ໄຂ້ຍຸງ ແລະ ບັນດາໂລກພະຍາດອື່ນໆ; ຮັບປະກັນຄວາມໝັ້ນຄົງຂອງສິ່ງແວດລ້ອມ; ເພີ່ມທະວີການພົວພັນຄູ່ຮ່ວມມືກັບທົ່ວໂລກເພື່ອພັດທະນາ.
ຮ້ານຂາຍເຄື່ອງປະດັບ
ສ່ວນທ່ານ ວັນວິໄລ, ແຂວງ ບໍ່ແກ້ວ ໄດ້ຝາກຈົດໝາຍມາຍັງລາຍການ, ໃນນັ້ນມີຕອນຂຽນວ່າ: ຂ້າພະເຈົ້າມີຫຼານສາວຄົນໜຶ່ງທີ່ພວມຮ່ຳຮຽນຢູ່ ຫວຽດນາມ, ລາວໄດ້ໂທລະສັບໂອ້ລົມກັບຂ້າພະເຈົ້າແລະບອກວ່າ: ຊ່ວງເວລານີ້ຢູ່ຮ່າໂນ້ຍ ພວມໜາວຈັດ, ແຕ່ວ່າຖະໜົນຫົນທາງໄດ້ຮັບການປະດັບປະດາດ້ວຍດອກໄຟທີ່ມີສີຫຼາກຫຼາຍ, ຕົ້ນແປກ, Santa Claus… ເຖິງວ່າຂ້າພະເຈົ້າຖືສາສະໜາພຸດກໍ່ຕາມແຕ່ກໍ່ຢາກຊົມເບິ່ງບັນຍາກາດຂອງວັນບຸນ ກຣິດສມາດ ແລະ ຕ້ອນຮັບປີໃໝ່ 2015 ຢູ່ປະເທດຫວຽດນາມ ຫຼາຍ.
ທ່ານ ວັນວິໄລ ທີ່ເຄົາລົບ, ປະຈຸບັນ, ຢູ່ ຮ່າໂນ້ຍເວົ້າສະເພາະ ແລະ ໃນທົ່ວປະເທດ ຫວຽດນາມ ເວົ້າລວມພວມຟົດຟື້ນໄປດ້ວຍບັນຍາກາດຂອງວັນບຸນ ກຣິດສມາດ ແລະ ພິທີຕ້ອນຮັບປີໃໝ່ 2015. ຖະໜົນຫົນທາງສາຍຕ່າງໆ ແລະ ພິເສດແມ່ນບັນດາສູນການຄ້າ, ຮ້າຍຄ້າລ້ວນແຕ່ໄດ້ຮັບການປະດັບປະດາດ້ວຍດອກໄມ້ທີ່ມີສີຫຼາກຫຼາຍ ແລະ ຕົ້ນແປກຢ່າງສວຍງາມ. ຢູ່ຖະໜົນ ເລືອງວັນການ, ຮ່າງມ້າ… ໄດ້ວາງຂາຍເຄື່ອງປະດັບປະດາຫຼາຍປະເພດ. ເຖິງວ່າອຸນຫະພູມຢູ່ ຮ່າໂນ້ຍ ນັບມື້ນັບຕຳ່ກໍ່ຕາມແຕ່ດ້ວຍບັນຍາກາດງານບຸນຟົດຟື້ນຄືແນວນັ້ນກໍ່ເຮັດໃຫ້ທຸກຄົນຮູ້ສຶກອົບອຸ່ນຫຼາຍ. ເຊີນທ່ານ ວັນວິໄລ ພ້ອມກັບຄອບຄົວມາຢ້ຽມຢາມ ຮ່າໂນ້ຍ ໃນຊຸມວັນນີ້ເພື່ອເຈືອຈານໃນບັນຍາກາດຟົດຟື້ນມ່ວນຊື່ນນີ້.
ລາຍການໂອ້ລົມກັບເພື່ອນລາວຂອງພວກເຮົາຂໍສິ້ນສຸດລົງພຽງເທົ່ານີ້, ຖ້າຫາກຜູ້ຟັງທ່ານໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົນບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 0084.43.825.6631, ອີແມວ:
Laovov@yahoo.com ຫຼື laovov5@gmail.com. ພວກເຮົາຍິນດີຕ້ອນຮັບ ແລະ ພ້ອມແລ້ວທີ່ຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ.