ຈັດກອງປະຊຸມສຳມະນາທິດສະດີຄັ້ງທີ 4 ລະຫວ່າງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ
Minh Duc -
(vovworld) - ໃນອາທິດຜ່ານມາ, ລະບົບກະຈາຍສຽງພາກພາສາຕ່າງປະເທດແຫ່ງຊາດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ, ອີແມວ ໂທລະສັບ 180 ສະບັບຈາກທ່ານຜູ້ຝັງຈາກ 37 ປະເທດໃນໂລກ. ໃນນັ້ນລາຍກະຈາຍສຽງພາກພາສາລາວ ໄດ້ຮັບອີແມວ, ໂທລະສັບ 5 ສະບັບຈາກທ່ານຜູ້ຟັງລາວ. ໃນລາຍການໂອ້ລົມກັບເພື່ອນລາວ ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ, ຄຳແນະນຳ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ.
(ກອງປະຊຸມສຳມະນາທິດສະດີຄັ້ງທີ 4 ລະຫວ່າງ
ພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ)
ເພື່ອນ ສຸຄຳ ມະລີວົງ, ຢູ່ແຂວງ ໄຊຍະບູລີ, ໄດ້ສົ່ງອີແມວຫາລາຍການໂດຍຖາມວ່າ: ໃນອາທິດຜ່ານມາ, ຢູ່ນະຄອນຫຼວງວຽງຈັນ ໄດ້ຈັດກອງປະຊຸມສຳມະນາທິດສະດີຄັ້ງທີ 4 ລະຫວ່າງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ. ຂ້າພະເຈົ້າຢາກຮູ້ແຈ້ງກວ່າກ່ຽວກັນຄວາມໝາຍຂອງກອງປະຊຸມສຳມະນານີ້?
ເພື່ອນ ສຸຄຳ ມະລີວົງ ທີ່ຮັກແພງ, ໃນອາທິດຜ່ານມາ, ຢູ່ນະຄອນຫຼວງວຽກຈັນ ໄດ້ຈັດກອງປະຊຸມສຳມະນາທິດສະດີຄັ້ງທີ 4 ລະຫວ່າງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ ດ້ວຍຫົວຂໍ້ວ່າ “ການເຊື່ອມໂຍງສາກົນ - ບົດຮຽນຂອງລາວ, ບົດຮຽນຂອງຫວຽດນາມ”. ນີ້ແມ່ນໂອກາດເພື່ອໃຫ້ສອງຝ່າຍແລກປ່ຽນບາງບັນຫາທິດສະດີ ແລະ ພຶດຕິກຳກ່ຽວກັບການເຊື່ອມໂຍງເຂົ້າກັບສາກົນໃນວິວັດການຍູ້ແຮງກິດຈະການປ່ຽນແປງໃຫມ່ຢູ່ຫວຽດນາມ ແລະ ລາວ, ປະກອບສ່ວນເຮັດແຈ້ງບັນດາບັນຫາທິດສະດີເຊິ່ງ 2 ພັກຕ່າງມີຄວາມສົນໃຈ ກໍຄືແລກປ່ຽນບັນດາບົດຮຽນເຊື່ອມໂຍງເຂົ້າກັບສາກົນຂອງ 2 ພັກ; ພ້ອມທັງຊີ້ແຈ້ງບັນດາບັນຫາໃໝ່ຕ້ອງສືບຕໍ່ລົງເລິກຄົ້ນຄວ້າ, ແກ້ໄຂດ້ານທິດສະດີ. ທີ່ກອງປະຊຸມສຳມະນາ, ບັນດາຜູ້ແທນໄດ້ເປັນເອກະພາບຖືວ່າ ຜ່ານ 30 ປີປະຕິບັດການປ່ຽນແປງໃໝ່, ສອງພັກ, ສອງລັດ ຍາດໄດ້ໄຊຊະນະອັນໃຫຍ່ຫຼວງຫລາຍຢ່າງ, ມີຄວາມໝາຍປະຫວັດສາດໃນສະພາບເຊື່ອມໂຍງເຂົ້າກັບສາກົນຢ່າງເລິກເຊິ່ງ. ບັນດາຜູ້ແທນຂອງສອງພັກໄດ້ ປະກອບຄຳເຫັນ ແລະ ແລກປ່ຽນກ່ຽວກັບບັນດາບັນຫາຫລັກແຫລ່ງແກ່ນສານກ່ຽວກັບການເຊື່ອມໂຍງເຂົ້າກັບສາກົນນັ້ນແມ່ນ:ການຊີ້ນຳນຳພາຂອງພັກກ່ຽວກັບການເຊື່ອມໂຍງ; ຍົກສູງກຳລັງແກ່ງແຍ້ງຂອງພື້ນຖານເສດຖະກິດ; ຮັບປະກັນເອກະລາດຊົນຊາດ, ຄວາມສະຖຽນລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ; ການປ້ອງກັນຊາດ, ປ້ອງກັນຄວາມສະຫງົບ, ວັດທະນະທຳ; ວຽກງານການຕ່າງປະເທດຂອງພັກ; ເພີ່ມທະວີວຽກງານກໍ່ສ້າງພັກ. ໝາກຜົນຂອງກອງປະຊຸມສຳມະນາ ແມ່ນພື້ນຖານສຳຄັນຊ່ວຍໃຫ້ບັນດາອົງການຄົ້ນຄ້ວາທິດສະດີຂອງຫວຽດນາມ ແລະ ລາວແບ່ງປັນຂໍ້ມູນຂ່າວ ແລະ ບົດຮຽນ ປະກອບສ່ວນເປັນເສນາທິການໃຫ້ສອງພັກ ໃນການວາງແນວທາງນະໂຍບາຍກໍຄືການຊີ້ນຳໃນພຶດຕິກຳຕົວຈິງກ່ຽວກັບການເຊື່ອມໂຍງເຂົ້າກັບສາກົນ. ທັງລາວ ແລະ ຫວຽດນາມ ລ້ວນແຕ່ສະແດງຄວາມເຊື່ອໝັ້ນຢ່າງແນວແນ່ວ່າ, ຈາກບັນດາບົດຮຽນທີ່ມີຜົນປະໂຫຍດ, ບັນດາຜົນສຳເລັດກໍຄືບັນດາສິ່ງຈຳກັດໃນການເຊື່ອມໂຍງສາກົນ ເຊິ່ງບັນດານັກວິທະຍາສາດ, ຜູ້ແທນຍົກອອກມາ ແລະ ພ້ອມກັນແລກປ່ຽນທີ່ກອງປະຊຸມສຳມະນາຄັ້ງນີ້ ຈະປະກອບສ່ວນຢ່າງແທດຈິງເຂົ້າໃນຄວາມສຳຄັນຂອງການເຊື່ອມໂຍງເຂົ້າກັບສາກົນຂອງແຕ່ລະພັກ, ແຕ່ລະປະເທດ; ປະກອບສ່ວນເຮັດໃຫ້ສາຍພົວພັນສາມັກຄີແບບພິເສດລະຫວ່າງຫວຽດນາມ - ລາວ ເລິກເຊິ່ງກວ່າອີກ, ພ້ອມທັງເຮັດໃຫ້ທິດສະດີຂອງແຕ່ລະພັກອຸດົມສົມບູນກວ່າ ແລະ ເຫັນແຈ້ງພຶດຕິກຳຕົວຈິງໃນການເຊື່ອມໂຍງເຂົ້າກັບສາກົນຂອງແຕ່ລະປະເທດຢ່າງມີຊີວິດຊີວາ; ສ້າງພື້ນຖານເພື່ອໃຫ້ 2 ພັກຮ່ວມມືກັນຢ່າງແໜ້ນແຟ້ນກວ່າ ໃນວິວັດແຫ່ງການສ້າງສາ ແລະ ພັດທະນາປະເທດຊາດ ໃນເງື່ອນໄຂໃໝ່, ພ້ອມກັນຜັນຂະຫຍາຍການປະຕິບັດມະຕິກອງປະຊຸມໃຫຍ່ຂອງແຕ່ລະພັກຢ່າງມີໄຊ.
ປະດັບຫຼຽນໄຊ, ຫຼຽນກາຂອງລັດລາວ ໃຫ້ພະນັກງານ,
ນັກຊ່ຽວຊານ, ທະຫານອາສາສະໝັກຫວຽດນາມ
(ພາບ: TTXVN)
ແລະກໍ່ໃນອາທິດຜ່ານມາ, ເພື່ອນ ຈິດຕະວົງ, ຢູ່ແຂວງອັດຕະປື ໄດ້ໂທລະສັບຫາລາຍການ ຢາກຮູ້ກ່ຽວກັບການເຄື່ອນໄຫວປະດັບຫຼຽນໄຊ, ຫຼຽນກາຂອງລັດລາວ ໃຫ້ພະນັກງານ, ນັກຊ່ຽວຊານ, ທະຫານອາສາສະໝັກຫວຽດນາມ ທີ່ມີຜົນງານຊ່ວຍເຫຼືອປະເທດລາວ, ເຊິ່ງດຳເນີນໃນວັນທີ 29/10 ຢູ່ແຂວງບັ໋ກຢາງ.
ເພື່ອນ ຈິດຕະວົງ ທີ່ຮັກແພງ, ວັນທີ 29/10 ຜ່ານມາ, ຄະນະກຳມະການປະຊາຊົນແຂວງບັ໋ກຢາງ ໄດ້ຈັດພິທີປະດັບຫຼຽນໄຊ, ຫຼຽນກາຂອງລັດ ລາວ ໃຫ້ພະນັກງານ, ນັກຊ່ຽວຊານ, ທະຫານອາສາສະໝັກຫວຽດນາມ ທີ່ມີຜົນງານຊ່ວຍເຫຼືອປະເທດລາວ, ເຊິ່ງປະຈຸບັນພວມເຮັດວຽກ, ດຳລົງຊີວິດຢູ່ແຂວງບັ໋ກຢາງ. ໃນການປະດັບຄັ້ງນີ້, ມີພະນັກງານ, ນັກຊ່ຽວຊານ, ທະຫານອາສາສະໝັກຫວຽດນາມ 596 ຄົນທີ່ເຄີຍໄປຊ່ວຍເຫຼືອການປະຕິວັດລາວ ໃນໄລຍະແຕ່ປີ 1945 - 1975 ໄດ້ຮັບຫຼຽນໄຊ, ຫຼຽນກາຕໍ່ຕ້ານ. ໃນນັ້ນ, ລັດລາວໄດ້ປະກອບຫຼຽນໄຊເອກະລາດຊັ້ນໜຶ່ງໃຫ້ 74 ຄົນ; ຫຼຽນໄຊຕໍ່ຕ້ານຊັ້ນໜຶ່ງໃຫ້ 218 ຄົນ; ຫຼຽນໄຊຕໍ່ສູ້ຕ້ານພວກລ່າເມືອງຂຶ້ນຝລັ່ງໃຫ້ 11 ຄົນ; ຫຼຽນໄຊຕໍ່ສູ້ຕ້ານຈັກກະພັດອາເມລິກາ ໃຫ້ 293 ຄົນ. ນີ້ແມ່ນຂອງຂວັນອັນສູງສົ່ງເຊິ່ງພັກ ແລະ ລັດລາວ ໄດ້ປະດັບໃຫ້ເພື່ອຮັບຮູ້ບັນດາຜົນງານການອຸທິດສ່ວນຊ່ວຍເຫຼືອການປະຕິວັດລາວ ແຕ່ໄລຍະຕ່ໍສູ້ກູ້ຊາດ, ຕ້ານການຮຸກຮ້ານ. ບັນດາຜົນງານຕໍ່ສູ້ພິລະອົງອາດ, ບັນດາຜົນງານໃຫຍ່ຫຼວງຂອງບັນດາພະນັກງານ, ນັກຊ່ຽວຊານ, ທະຫານອາສາສະໝັກຫວຽດນາມ ໄດ້ປະກອບສ່ວນສຳຄັນໃຫ້ແກ່ການເພີ່ມທະວີການພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານທີ່ເປັນມູນເຊື້ອອັນດີງາມລະຫວ່າງລາວ ແລະ ຫວຽດນາມ.
ດັ່ງທີ່ກ່າວມາຂ້າງເຖິງແມ່ນເນື້ອໃນຄຳເຫັນຂອງທ່ານຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຝັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບມາໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov5@gmail.com.
Minh Duc