ຕອບຈົດໝາຍທ່ານຜູ້ຟັງຜຸ້ອ່ານຝາກມາຍັງລາຍການໃນອາທິດຜ່ານມາ

Anh Dao -

ວັນອາທິດ ທີ 26 ກໍລະກົດ ຄ.ສ. 2015 | 12:24:10

ໃນອາທິດຜ່ານມາ, ລາຍການກະຈາຍສຽງຫວຽດນາມພາກພາສາລາວ ໄດ້ຮັບຈົດໝາຍ, email ຫລາຍສະບັບ ແລະ ໂທລະສັບຈາກທ່ານຜູ້ຟັງລາວ. ໃນຈົດໝາຍ, ບັນດາທ່ານຜູ້ຟັງລ້ວນແຕ່ສະແດງຄວາມຮູ້ສຶກເມື່ອໄດ້ຮັບຟັງແຕ່ລະ ລາຍການໃນພາກພາສາລາວ ແລະ ຢາກຮູ້ຂໍ້ມູນຂ່າວກ່ຽວກັບນະຄອນຫລວງ ຮ່າໂນ້ຍ. ໃນລາຍການໂອ້ລົມກັບເພື່ອນລາວພາກນີ້, ພວກຂ້າພະເຈົ້າຂໍຄັດສະເຫນີເນື້ອໃນຈົດໝາຍບາງສະບັບ ແລະຕອບບາງຄຳຖາມຊື່ງທ່ານຜູ້ຟັງໄດ້ຝາກມາຫາລາຍການໃນອາທິດຜ່ານມາ.

ຕອບຈົດໝາຍທ່ານຜູ້ຟັງຜຸ້ອ່ານຝາກມາຍັງລາຍການໃນອາທິດຜ່ານມາ - ảnh 1

ຫນອງໂຮ່ເກືອມ- ຮ່າໂນ້ຍ

ເພື່ອນ ມີໄຊ ຢູ່ ແຂວງ ອຸດົມໄຊ ໃນຈົດໝາຍສົ່ງເຖິງລາຍການ ໄດ້ເວົ້າວ່າ: ຂ້າພະເຈົ້າ ຕິດຕາມບັນດາຄໍລຳໃນລາຍການກະຈາຍສຽງພາກພາສາລາວທາງວິທະຍຸ ກໍຄື ຜ່ານຫນ້າເວັບ vovworld.vn ເປັນປະຈຳ, ພິເສດ ແມ່ນລາຍການຊາຍຄາອາຊຽນ. ຜ່ານລາຍການນີ້ ຂ້າພະເຈົ້າມີຄວາມເຂົ້າໃຈຕື່ມອີກກ່ຽວກັບການພົວພັນຮ່ວມມືລະຫວ່າງບັນດາ ປະເທດພາຍໃນກຸ່ມ ອາຊຽນ ກໍຄືບັນດາຈຸດວັດທະນະທຳທີ່ເປັນເອກະລັກສະເພາະຂອງບັນດາເຂດພາກຢູ່ ປະເທດສະມາຊິກ ອາຊຽນຈຳນວນຫນຶ່ງ. ໃນອາທິດຜ່ານມາ, ພາຍຫລັງໄດ້ຮັບຊົມລາຍການ “ຊາຍຄາອາຊຽນ” ຜ່ານຫນ້າເວັບ vov5 ດ້ວຍຫົວຂໍ້ວ່າ: ການເຊື່ອມໂຍງເຂົ້າກັບພາກພື້ນ ອາຊຽນ: ບາດກ້າວຫັນປ່ຽນສຳຄັນຂອງພື້ນຖານເສດຖະກິດຫວຽດນາມ. ຜ່ານບົດຂຽນນີ້ ຂ້າພະເຈົ້າໄດ້ເຂົ້າໃຈກວ່າກ່ຽວກັບການພົວພັນແລກປ່ຽນການຄ້າລະຫວ່າງ ຫວຽດນາມ ແລະ ບັນດາປະເທດ ອາຊຽນ, ອາຊຽນ ແມ່ນຕະຫລາດສົ່ງອອກໃຫຍ່ອັນດັບ 3 ແລະ ແມ່ນຄູ່ຮ່ວມມືສະຫນອງສິນຄ້າໃຫຍ່ອັນດັບ 2 ຂອງຫວຽດນາມ, ໃນນັ້ນ ວົງເງິນການຄ້າສອງສົ້ນຫວຽດນາມ ແລະ ອາຊຽນ ໃນປີ 2013 ແມ່ນ 39,7 ຕື້ USD, ກວມ 15% ຍອດວົງເງິນຂາອອກຂາເຂົ້າຂອງຫວຽດນາມ.

ໃນຈົດໝາຍສົ່ງເຖິງລາຍການ, ເພື່ອນ ບຸນມີ ຢູ່ ແຂວງ ສະຫວັນນະເຂດ ເວົ້າວ່າ: ໃນອາທິດຜ່ານມາ, ໃນລາຍການ “ຊົນນະບົດໃຫມ່” VOV 5 ໄດ້ແນະນຳບົດທ່ີມີຫົວຂໍ້ວ່າ: “ຜູ້ອາຍຸສູງຕັ້ງຫນ້າກໍ່ສ້າງຊົນນະບົດໃຫມ່” ແມ່ນມີຄວາມໝາຍທີ່ສຸດ. ຜ່ານບົດຂຽນ ຂ້າພະເຈົ້າມີຄວາມເຂົ້າໃຈກ່ຽວກັບຂະບວນການ “ຜູ້ອາຍຸສູງ - ເປັນແບບຢ່າງ” ຢູ່ບັນດາເຂດຊົນນະບົດຂອງຫວຽດນາມ. ຜູ້ອາຍຸສູງຢູ່ເມືອງ ນາມດານ ແຂວງ ເຫງ້ອານ ເວົ້າສະເພາະ ແລະ ຜູ້ອາຍຸສູງຢູ່ບັນດາທ້ອງຖິ່ນອື່ນຂອງຫວຽດນາມເວົ້າລວມ ໄດ້ມີຄຸນງາມຄວາມດີອັນໃຫຍ່ຫລວງໃນຂະບວນການຂົນຂວາຍປະຊາຊົນປະກອບທີ່ດິນເພື່ອກໍ່ສ້າງເສັ້ນທາງຄົມມະນາຄົມ, ກໍ່ສ້າງໂຮງຮຽນ ແລະເຂົ້າຮ່ວມບັນດາວຽກງານທີ່ເໝາະສົມກັບເງື່ອນໄຂຂອງຄອບຄົວ ເພື່ອກໍ່ສ້າງບ້ານເກີດເມືອງນອນໃຫ້ຮັ່ງມີສວຍງາມກວ່າ. ນີ້ແມ່ນການກະທຳທີ່ດີເພື່ອໃຫ້ບັນດາຜູ້ອາຍຸສູງຄືຂ້າພະເຈົ້າສາມາດຮ່ຳຮຽນຕາມ.

ຕອບຈົດໝາຍທ່ານຜູ້ຟັງຜຸ້ອ່ານຝາກມາຍັງລາຍການໃນອາທິດຜ່ານມາ - ảnh 2

ບັນດາເຍື່ອງອາຫານຢູ່ ຮ່າໂນ້ຍ

ເພື່ອນ ສົມສັກ ຢູ່ ແຂວງ ຄຳມ່ວນ ສົ່ງອີແມວ ມາເຖິງລາຍການໂດຍແບ່ງປັນວ່າ: ຜ່ານຫນ້າເວັບ vovworld.vn ນ້ອງໄດ້ຮູ້ຈັກເຖິງຂໍ້ມູນຂ່າວຫລາຍຢ່າງ, ກໍຄືຮູບພາບທີ່ສວຍງາມກ່ຽວກັບນະຄອນຫລວງ ຮ່າໂນ້ຍ, ພິເສດແມ່ນຄຸ້ມຖະຫນົນເກົ່າ. ໄລຍະຈະມາເຖິງ ນ້ອງພ້ອມກັບໝູ່ເພື່ອນຈະໄປຢ້ຽມຢາມ ນະຄອນຫລວງ ຮ່າໂນ້ຍ. ສະນັ້ນ ເພື່ອກະກຽມໃຫ້ລາຍການທ່ອງທ່ຽວຂອງຕົນ, ນ້ອງຢາກຮູ້ກ່ຽວກັບຄຸ້ມຖະຫນົນເກົ່າຮ່າໂນ້ຍຢ່າງລະອຽດກວ່າ. ພວກອ້າຍເອື້ອຍໃນພາກພາສາລາວຊ່ວຍນ້ອງແດ່.

ເພື່ອນສົມສັກ ທີ່ຮັກແພງ! ຄຸ້ມຖະຫນົນ ເກົ່າຮ່າໂນ້ຍ ແມ່ນຊື່ເອີ້ນຂອງເຂດຕົວເມືອງຫນື່ງ ທີ່ມີມາແຕ່ດົນນານຢູ່ ຮ່າໂນ້ຍ. ປຊຊ ຢູ່ເຂດນີ້ ສ່ວນຫລາຍແມ່ນຜະລິດເຄື່ອງຫັດຖະກຳ ແລະ ຄ້າຂາຍສິນຄ້າ, ສ້າງເປັນບັນດາຖະໜົນທີ່ມີອາຊີບເປັນເອກະລັກສະເພາະ. ຊື່ເອີ້ນຂອງຖະໜົນສາຍຕ່າງໆຢູທີ່ນີ້ແມ່ນຕິດພັນກັບບັນດາປະເພດ ສິນຄ້າທີ່ໄດ້ຮັບການຜະລິດ, ຕົວຢ່າງຄື: Hàng Đường (ຮ່າງເດືອງ) ແປວ່າ ຖະໜົນນ້ຳຕານ ຂາຍປະເພດສິນຄ້າທີ່ເຮັດດ້ວຍນ້ຳຕານ, Hàng Gà (ຮ່າງກາ) ແປວ່າຖະໜົນໄກ່, ປຊຊ ຢູ່ທີ່ນີ້ຂາຍສັດປີກ, Hàng Lược (ຮ່າງເລືອກ) ແປວ່າ ຖະໜົນຫວີ ຂາຍຫວີຊະນິດຕ່າງໆ. ຄຸ້ມເມືອງເກົ່າ ຮ່າໂນ້ຍ ຂຶ້ນກັບບໍລິເວນເມືອງ ຮວານກຽມ ດ້ວຍເນື້ອທີ່ທັງໝົດປະມານ 100 ເຮັກຕາ, ມີຖະໜົນ 76 ສາຍ. ເຖິງວ່າ ບັນດາຄຸ້ມຖະໜົນເກົ່າຂອງຮ່າໂນ້ຍ ຍັງຕັ້ງຢູ່ນອກເຂດນີ້ກໍຕາມ, ແຕ່ຍ້ອນວ່າ ເຂດນີ້ມີຖະໜົນເກົ່າຫລາຍສຸດ ແລະ ຍັງຮັກສາໄດ້ບັນດາຈຸດທີ່ເປັນເອກະລັກສະເພາະ ສະນັ້ນ ຄຸ້ມຖະຫນົນເກົ່າພຽງແຕ່ໄດ້ຮັບການຮັກສາ, ປະຕິສັງຂອນເທົ່ານັ້ນ. ຖ້າມີໂອກາດມາຢາມຄຸ້ມຖະຫນົນເກົ່າ, ແຂກທ່ອງທ່ຽວຈະໄດ້ຮັບຊົມບັນດາສະຖາປັດຕະຍະກຳທີ່ເປັນເອກະລັກສະເພາະຂອງບັນດາຫລັງຄາເຮືອນບູຮານ ຢູ່ ຖະຫນົນຮ່າງເດືອງ, ຮ່າງບາກ, ໝາໄມ… ຊື່ງໄດ້ຮັບການກໍ່ສ້າງນັບແຕ່ສັດຕະວັດທີ່ 19. ຄຸ້ມຖະຫນົນເກົ່າຮ່າໂນ້ຍໄດ້ຮັບການສ້າງຂຶ້ນນັບແຕ່ສະໄຫມລາຊະວົງຫລີ -ເຈີນ ແຕ່ສັດຕະວັດທີ 11 ຮອດສັດຕະວັດທີ່ 15. ເຂດຊຸມຊົນດຳລົງຊີວິດ ແລະ ຄ້າຂາຍຢ່າງຄັບຄາໜາແຫນ້ນນີ້ ຕັ້ງຢູ່ທາງທິດຕາເວັນອອກຂອງກຸງເກົ່າ ທັງລອງ ຈົນເຖິງໃກ້ກັບແມ່ນ້ຳແດງ. ສະໄຫມລາຊະວົງ ຫລີ ເຈີນ, ປະຊາຊົນ ຈາກບັນດາໝູ່ບ້ານອ້ອມຂ້າງເຂດທ່ົ່ງພຽງພາກເໜືອ ໄດ້ເຕົ້າໂຮມຢູ່ເຂດນີ້ເພື່ອດຳລົງຊີວິດ, ສ້າງເປັນຄຸ້ມເມືອງທີ່ຄັບຄາຫນາແຫນ້ນທີ່ສຸດຢູ່ເມືອງຫລວງ ທັງລອງ. ປະຈຸບັນ, ຄຸ້ມຖະຫນົນ ເກົ່າ ຮ່າໂນ້ຍ ແມ່ນສະຖານທີ່ທ່ອງທ່ຽວອັນດູດດື່ມ ສຳລັບນັກທ່ອງທ່ຽວຜູ້ຢາກຊອກຮູ້ກ່ຽວກັບທັງລອງ-ດົງໂດຮ່າ ໂນ້ຍ.

ພວກຂ້າພະເຈົ້າຂໍຂອບໃຈທ່ານຜູ້ຟັງທີ່ໄດ້ຮັບຟັງລາຍການພາກພາສາ ລາວເປັນປະຈຳ ແລະ ປະກອບຄຳເຫັນໃຫ້ລາຍການ. ທ່ານສາມາດຮັບຟັງ ແລະ ອ່ານບັນດາລາຍການຂອງພວກເຮົາ ຜ່ານຫນ້າເວັບ: vov5.vn ຫລື vovworld.vn.

ທ່ານຜູ້ຟັງສາມາດສົ່ງຈົດໝາຍເຖິງພວກເຮົາ, ໂດຍ ຈ່າຫນ້າຊອງວ່າ: ວິທະຍຸກະຈາຍສຽງຫວຽດນາມ ພາກພາສາລາວ ເຮືອນເລກທີ 45 ຖະຫນົນ Ba Trieu Ha Noi, ຫລືໂທລະສັບມາໂດຍກົງກໍ່ໄດ້ຕາມເບີ: 0084-4-38256631. Email: Laovov5@gmail.com. ຂໍຂອບໃຈຫລ່ວງຫນ້າ.

ສຸດທ້າຍ, ພວກຂ້າພະເຈົ້າ ຂໍອວຍພອນໃຫ້ທ່ານຜູ້ຟັງຜູ້ອ່ານຈົ່ງມີສຸຂະພາບເຂັ້ມແຂງ ແລະ ປະສົບຜົນສຳເລັດໃນວຽກງານຂອງຕົນ.

Anh Dao