ລາຍການກະຈາຍສຽງພາກພາສາລາວມີຄວາມປິຕິຊົມຊື່ນຍ້ອນວ່າປະຈຳອາທິດລ້ວນແຕ່ໄດ້ຮັບຈົດໝາຍemail ຫລາຍສະບັບ ແລະ ໂທລະສັບຈາກທ່ານຜູ້ຟັງລາວ. ເຖິງວ່າຖືກຄ້າງຄາກັບວຽກງານກໍຕາມ ແຕ່ ບັນດາ ທ່ານຜູ້ຟັງລ້ວນແຕ່ຍາດເວລາເພື່ອສົ່ງຈົດໝາຍມາຍັງລາຍການ, ປະກອບຄຳຄິດຄຳເຫັນ, ສະແດງຄວາມຮູ້ສຶກເມື່ອໄດ້ຮັບຟັງບັນດາລາຍການ ກໍ່ຄືຢາກຊອກຮູ້ບາງບັນຫາ ຊື່ງທ່ານຜູ້ຟັງມີຄວາມສົນໃຈ. ໃນລາຍການ ໂອ້ລົມກັບເພື່ອນລາວພາກນີ້, ພວກຂ້າພະເຈົ້າຂໍຕອບບາງຄຳຖາມຊື່ງທ່ານຜູ້ຟັງໄດ້ຝາກມາຫາລາຍການໃນອາທິດຜ່ານມາ.
ນັກທ່ອງທ່ຽວຢ້ຽມຢາມບ້ານໂດນ
ພາບ:internet
|
ເພື່ອນຈັນທະຈອນ ຢູ່ ແຂວງ ບໍລິຄຳໄຊ ສົ່ງຈົດໝາຍມາຍັງລາຍການໂດຍຖາມວ່າ: ຂ້າພະເຈົ້າຄ້າງຄາກັບວຽກງານຫລາຍ, ບໍ່ມີເວລາເພື່ອຮັບຟັງລາຍການຜ່ານວິທະຍຸໄດ້, ຂ້າພະເຈົ້າຢາກໄດ້ຮັບຟັງ ແລະ ອ່ານລາຍການພາກພາສາລາວຜ່ານ ອີນເຕີແນດ ມັນຈະສະດວກກວ່າ. ສະນັ້ນ ຂໍໃຫ້ພວກອ້າຍເອື້ອຍບັນນາທິການແນະນຳໃຫ້ຂ້າພະເຈົ້າວິທີເຂົ້າຫນ້າເວັບຂອງວິທະຍຸກະຈາຍສຽງຫວຽດນາມແດ່.
ເພື່ອນ ຈັນທະຈອນທີ່ຮັກແພງ! ເພື່ອນສາມາດຮັບຟັງລາຍການກະຈາຍສຽງພາກພາສາລາວກໍຄືລາຍການດ້ວຍພາສາຕ່າງປະເທດອື່ນຂອງວິທະຍຸກະຈາຍສຽງຫວຽດນາມຜ່ານຫນ້າເວັບ vovworld.vn ຫລື vov5.vn. ພາຍຫລັງເພື່ອນເຂົ້າຫນ້າເວັບໄດ້ແລ້ວ, ເພື່ອນເລືອກເຟັ້ນພາສາຢູ່ເບື້ອງຂວາເທິງຫນ້າເວັບ. ແລະ ເພື່ອນຢາກຮັບຟັງລາຍການໃນແຕ່ລະມື້, ເພື່ອນສາມາດເລືອກລາຍການ: ຟັງລາຍການໃນສັບປະດາ. ຫວັງວ່າ ເພື່ອນຈະເປັນຜູ້ຟັງປະຈຳຂອງວິທະຍຸກະຈາຍສຽງຫວຽດນາມ.
ເພື່ອນ ບຸນທອງ ຢູ່ ແຂວງ ຄຳມ່ວນໄດ້ສົ່ງຈົດໝາຍມາຫາລາຍການໂດຍເວົ້າວ່າ: ຫວ່າງແລ້ວນີ້ ນ້ອງໄດ້ອ່ານວາລະສານແນະນຳບັນດາສະຖານທີ່ທ່ອງທ່ຽວທີ່ລືຊື່ຂອງຫວຽດນາມ, ໃນນັ້ນ ເວົ້າເຖິງບ້ານໂດນ ຢູ່ ແຂວງດັກລັກ. ນ້ອງເຫັນວ່າ ຊື່ບ້ານໂດນນັ້ນ ຄິດວ່າຄືຢູ່ບ້ານຂອງຕົນ, ສະນັ້ນ ນ້ອງສົ່ງຈົດໝາຍມາຫາລາຍການຢາກພວກອ້າຍເອື້ອຍໃນລາຍການຊ່ວຍໃຫ້ນ້ອງ ຊອກຮູ້ລະອຽດກ່ຽວກັບເຂດດິນແຫ່ງນີ້.
ເພື່ອນ ບຸນທອງ ທີ່ຮັກແພງ! ບ້ານໂດນແມ່ນສະຖານທີ່ລືຊື່ຂອງຫວຽດນາມ ແລະ ນັກທ່ອງທ່ຽວຫລາຍຄົນຢູ່ໃນໂລກກໍ່ຮູ້ຈັກເຖິງ ແມ່ນເຂດທີ່ມີມູນເຊື້ອໃນການລ່າເນື້ອ ແລະ ເຝີກແອບຊ້າງໃນປ່າ. ປະຈຸບັນ, ບ້ານໂດນມີ 45 ຊົນເຜົ່າດຳລົງຊີວິດຮ່ວມ ກັນ, ໃນນັ້ນ ມີ 3 ຊົນເຜົ່າຕົ້ນຕໍນັ້ນແມ່ນ ເຜົ່າລາວ, ເອເດ ແລະ ເມີນົງ (Mnong). ບ້ານໂດນ ຕາມພາສາລາວແມ່ນ ບ້ານດອນ ໝາຍຄວາມວ່າ ແມ່ນບ້ານແຫ່ງຫນື່ງໄດ້ຮັບການກໍ່ສ້າງໃນດອນເກາະຂອງແມ່ນ້ຳ Serepok, ສ່ວນຊາວ ເອເດ ແລະ ເມີນົງ (Mnong )ເອີ້ນວ່າ ບວນໂດນ. ແຕ່ກ່ອນ ບ້ານໂດນ ແມ່ນສະຖານທີ່ພົວພັນແລກປ່ຽນການຄ້າ ທາງນ້ຳທີ່ສຳຄັນລະຫວ່າງສາມປະເທດອີນດູຈີນ . ຄົນລາວໃນຄາວນັ້ນ, ເມື່ອລົງແມ່ນ້ຳເພື່ອຄ້າຂາຍສິນຄ້າ ເຂົາເຈົ້າໄດ້ພົບເຫັນເຂດດິນແດນທີ່ສວຍງາມນີ້ ແລະ ຕັດສິນໃຈດຳລົງຊີວິດຢູ່ທີ່ນີ້ຮ່ວມກັບຊາວ ເອເດ ປະຈຳຖິ່ນ ແລະ ພ້ອມກັນກໍ່ສ້າງໝູ່ບ້ານແຫ່ງຫນື່ງທີ່ຫນາແຫນ້ນ, ອຸດົມສົມບູນ ແລະເຕັມໄປດ້ວຍສີສັນຊົນເຜ່ົາ. ບ້ານໂດນ ກ່ອນນີ້ ແມ່ນເມືອງເອກຂອງແຂວງ ດັກລັກ. ປະຈຸບັນ, ບ້ານໂດນ ແມ່ນສະຖານທີ່ທ່ອງທ່ຽວນອນໃນບໍລິເວນຕາແສງ Ea Wer ເມືອງ ບວນໂດນ ແຂວງ ດັກລັກ, ຫ່າງຈາກ ບວນມາທວດ ປະມານ 40 Km ທາງທິດຕາເວັນຕົກສຽງເຫນືອ. ບ້ານໂດນແມ່ນຊື່ເອີ້ນລວມເພື່ອເວົ້າເຖິງກຸ່ມທ່ອງທ່ຽວຂອງເມືອງ ບວນໂດນ. ຢູ່ ບ້ານໂດນ ມີເຂດທ່ອງທ່ຽວຫລາຍແຫ່ງທີ່ສວຍງາມຄື: ຊາຍຕາດນ້ຳຕົກ ໃບ໋ແຍງ(Bay Nhanh), ຫນອງດືກມີງ, ເຮືອນຮ້ານບູຮານ, ທາບຈຳ Yang Prong Ea Sup, ປ່າສະຫງວນແຫ່ງຊາດ Yok don ທີ່ລືຊື່ ຊື່ງແມ່ນປ່າສະຫງວນທີ່ກວ້າງກວ່າໝູ່ຢູ່ ຫວຽດນາມ ແລະ ພິເສດແມ່ນສີສັນບັນດາເຜົ່າ ດ້ວຍທ່າເຮືອຕ່າງໆທີ່ຍັງຮັກສາຄວາມງາມແບບຮົກເຮື້ອເປົ່າຫວ່າງ ແລະ ເທບນິຍາຍກ່ຽວກັບຊ້າງ.
ເພື່ອນ ພອນທະວີ ຢູ່ແຂວງ ຫລວງພະບາງ ໄດ້ສົ່ງຈົດໝາຍ ເຖິງລາຍການກະຈາຍສຽງພາກພາສາລາວ ໂດຍເວົ້າວ່າ: ຂ້າພະເຈົ້າໄດ້ຮັບຟັງລາຍການກະຈາຍສຽງ ພາກພາລາວເປັນປະຈຳ, ບັນດາຄໍລຳໃນລາຍການ ຂ້າພະເຈົ້າລ້ວນແຕ່ມັກຮັບຟັງ ແຕ່ຂ້າພະເຈົ້າສົນໃຈສຸດແມ່ນລາຍການ “ສີສັນ 54 ຊົນເຜົ່າຫວຽດນາມ”, ເພາະວ່າ ຜ່ານລາຍການ ຂ້າພະເຈົ້າເຂົ້າໃຈໄດ້ຫລາຍສິ່ງຫລາຍຢ່າງກ່ຽວກັບຮີດຄອງປະເພນີ ຂອງບັນດາເຂດບ້ານນາຢູ່ຫວຽດນາມ. ໃນຈຳນວນບັນດາ ຊົນເຜົ່າຢູ່ ຫວຽດນາມ ນັ້ນ ຂ້າພະເຈົ້າເຫັນວ່າ ມີບາງຊົນເຜົ່າມີຫລາຍຈຸດຄ້າຍຄືກັນກັບບາງຊົນເຜົ່າຢູ່ລາວ, ຕົວຢ່າງຄື: ຊົນເຜົ່າ ມົ້ງ ຢູ່ ຫວຽດນາມ . ນອງ້ຢາກໃຫ້ອ້າຍເອື້ອຍບັນນາທິການຊ່ວຍໃຫ້ນ້ອງເຂົ້າໃຈຕື່ມກ່ຽວກັບຊົນເຜົ່າ ມົ້ງຢູ່ຫວຽດນາມແດ່.
ຊາວເຜົ່າມົ້ງຢູ່ຫວຽດນາມ
photo:internet
|
ເພື່ອນ ພອນທະວີ ທີ່ຮັກແພງ! ຜ່ານການຊອກຮູ້ພວກຂ້າພະເຈົ້າອາດຈະແຈ້ງໃຫ້ເພື່ອນຊາບຄືດັ່ງນີ້: ຊົນເຜົ່າ ມົ້ງໄດ້ຮັບຖືວ່າ ແມ່ນສະມາຊິກອັນສຳຄັນໃນວົງຄະນາຍາດບັນດາຊົນເຜົ່າສ່ວນຫນ້ອຍຢູ່ ຫວຽດນາມ, ມີຈຳນວນພົນລະເມືອງຢືນອັນດັບທີ 8 ໃນຕາຕະລາງບັນຊີລາຍຊື່ 54 ຊົນເຜົ່າຢູ່ ຫວຽດນາມ. ເຜົ່າມົ້ງ ອາໃສຢູ່ເຂດພູສູງໃນຄວາມສູງ 800 ຫາ 1500 ແມັດ ເມື່ອທຽບກັບຫນ້ານ້ຳທະເລ ແລະສ່ວນຫລາຍແມ່ນຢູ່ບັນດາແຂວງພູດອຍທາງພາກເໜືອຫວຽດນາມ ໃນບໍລິເວນທີ່ີກ້ວາງໃຫຍ່, ລຽບຕາມຊາຍແດນ ຫວຽດນາມ - ຈີນ ແລະ ຫວຽດນາມ -ລາວ ຈາກແຂວງ ລ້າງເຊີນ ຮອດ ເຫງ້ອານ, ໃນນັ້ນເຕົ້າໂຮມຢູ່ບັນດາແຂວງທາງທິດຕາເວັນອອກ- ຕາເວັນຕົກສຽງເຫນືອຂອງຫວຽດນາມຄື: ຮ່າຢາງ, ລ່າວກາຍ, ລາຍເຈົາ, ເຊີນລາ ແລະອື່ນໆ. ຍ້ອນປະເພນີການດຳລົງຊີວິດມັກເຄື່ອນຍ້າຍ ສະນັ້ນ ໃນຊຸມປີ 1980, 1990 ຊາວເຜົ່າມົ້ງຈຳນວນຫນື່ງ ໄດ້ຍົກຍ້າຍເຂົ້າມາດຳລົງຊີວິດແບບ ກະແຈກກະຈາຍ ຢູ່ແຂວງ ຢາລາຍ ແລະ ກອນຕູມ. ອາຊີບຕົ້ນຕໍຂອງ ຊາວເຜົ່າມົ້ງ ແມ່ນເຮັດໄຮ່, ປູກສາລີ, ເຮັດນາຂັ້ນໄດ. ນອກນັ້ນ ເຂົາເຈົ້າຍັງຕຳ່ແຜນແພ ແລະ ປູກຕົ້ນຢາສະຫມູນໄພ. ບຸນເຕັດປະເພນີຊາວເຜົ່າມົ້ງແມ່ນຖືກຈັດຂຶ້ນໃນເດືອນທັນວາ. ຫວັງວ່າ ບັນດາຂໍ້ມູນຂ່າວທີ່ກ່າວມາຂ້າງເທິງນີ້ ຈະຊ່ວຍໃຫ້ເພື່ອນພອນທະວີ ສາມາດປຽບທຽບກັບຊາວເຜົ່າມົ້ງຢູ່ລາວ ຈະແຈ້ງກວ່າ.
ພວກຂ້າພະເຈົ້າຂໍຂອບໃຈທ່ານຜູ້ຟັງທີ່ໄດ້ຮັບຟັງລາຍຂອງພາກພາສາລາວເປັນປະຈຳ ແລະ ປະກອບຄຳເຫັນໃຫ້ລາຍການ. ຍ້ອນເວລາອອກອາກາດຍັງຈຳກັດຢູ່ ສະນັ້ນພວກຂ້າພະເຈົ້າບໍ່ທັນຕອບຄຳຖາມທັງໝົດທີ່ທ່ານຜູ້ຟັງຝາກມາລາຍການ. ໃນໄລຍະຈະມາເຖິງ ພວກຂ້າພະເຈົ້າຈະພະຍາຍາມຕອບທັງໝົດຄຳຖາມຊື່ງທ່ານຜູ້ຟັງມີຄວາສົນໃຈ.
ທ່ານຢ່າລືມຂຽນຈົດໝາຍມາໃຫ້ລາຍການເດີ!
ໂດຍຈ່າຫນ້າຊອງວ່າ: ວິທະຍຸກະຈາຍສຽງຫວຽດນາມ ພາກພາສາລາວ ເຮືອນເລກທີ 45 ຖະຫນົນ Ba Trieu Ha Noi, ຫລືໂທມາໂດຍກົງກໍ່ໄດ້ ຕາມເບີໂທລະສັບ 0084-4-38256631. Email: Laovov@yahoo.com.
ສຸດທ້າຍ, ພວກຂ້າພະເຈົ້າ ຂໍອວຍພອນໃຫ້ທ່ານຜູ້ຟັງ, ຜູ້ອ່ານຈົ່ງມີສຸຂະພາບເຂັ້ມແຂງ ແລະ ປະສົບຜົນສຳເລັດໃນວຽກງານຂອງຕົນ.