(vovworld) ອາທິດຜ່ານມາ, ພາກພາສາລາວ, ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວ, ໂທລະສັບ 11 ສະບັບທີ່ທ່ານຜູ້ຟັງລາວ ແລະ ຫວຽດນາມ ຝາກເຖິງລາຍການ. ໃນນັ້ນ, ທ່ານຜູ້ຟັງໄດ້ມີຄວາມເອົາໃຈໃສ່ເຖິງໂຄງການຮ່ວມມືກະສິກຳລະຫວ່າງ 2 ປະເທດ, ວັດທະນະທຳ ຫວຽດນາມ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຕອບບາງເນື້ອໃນຈົດໝາຍທີ່ທ່ານຜູ້ຟັງມີຄວາມສົນໃຈ.
ເພື່ອນ ເຈີ່ນບີ່ງ, ນັກສຶກສາມະຫາວິທະຍາໄລ ແຫ່ງຊາດ ລາວ ໄດ້ເອົາໃຈໃສ່ເປັນພິເສດເຖິງການຮ່ວມມືໃນຂົງເຂດກະສິກຳລະຫວ່າງ ຫວຽດນາມ - ລາວ, ໃນອີແມວຝາກເຖິງລາຍການ, ເພື່ອນໄດ້ຂຽນວ່າ: “ຂ້າພະເຈົ້າໄດ້ຮັບຟັງໝູ່ໃນຫ້ອງດຽວ ເຊິ່ງເປັນຊາວແຂວງຫົວພັນເວົ້າວ່າ, ອາທິດຜ່ານມາ, ຢູ່ແຂວງ ໄດ້ຈັດຕັ້ງພິທີເລີ່ມລົງມືກໍ່ສ້າງສູນເຕັກນິກກະສິກຳ. ພິເສດ, ນີ້ແມ່ນກິດຈະກຳໂດຍ ຫວຽດນາມ ແລະ ລາວສົມທົບກັນກໍ່ສ້າງ. ຜ່ານລາຍການ, ຂ້າພະເຈົ້າຢາກຮູ້ແຈ້ງກ່ວາກ່ຽວກັບກິດຈະກຳນີ້ໄດ້ບໍ່? ”
ພິທີເລີ່ມລົງມືກໍ່ສ້າງສູນບໍລິການເຕັກນິກກະສິກຳ ແຂວງ ຫົວພັນ
|
ເພື່ອນເຈີ່ນບີ່ງ ທີ່ຮັກແພງ, ຕອນເຊົ້າວັນທີ 18/2 ຢູ່ແຂວງ ຫົວພັນ, ໄດ້ຈັດຕັ້ງພິທີເລີ່ມລົງມືກໍ່ສ້າງສູນບໍລິການເຕັກນິກກະສິກຳ ແຂວງ ຫົວພັນ, ນີ້ແມ່ນໂຄງການທີ່ມີຂອບຂະໜາດໃຫຍ່ໃນຂົງເຂດຮ່ວມມືດ້ານກະສິກຳລະຫວ່າງ 2 ປະເທດຫວຽດນາມ ແລະ ລາວ ຢູ່ແຂວງ ຫົວພັນ. ເພື່ອແນໃສ່ເພີ່ມທະວີວຽກງານສົ່ງເສີມກະສິກຳ ແລະ ຖ່າຍທອດຄວາມກ້າວໜ້າດ້ານເຕັກນິກໃຫ້ແກ່ຊາວກະສິກອນ, ຊຸກຍູ້ການພັດທະນາກະສິກຳ - ປ່າໄມ້, ປັບປຸງຊີວິດການເປັນຢູ່ຂອງປະຊາຊົນຢູ່ແຂວງ ຫົວພັນ, ເຊິ່ງແມ່ນຖານທີ່ໝັ້ນຂອງການປະຕິວັດ ລາວ ແລະ ບັນດາແຂວງໃກ້ຄຽງ. ໂດຍນອນໃນເນື້ອທີ 12 ເຮັກຕາ ຢູ່ບ້ານ ອົງ, ເມືອງ ຊຳເໜືອ, ສູນບໍລິການເຕັກນິກກະສິກຳແຂວງ ຫົວພັນ ມີຍອດເງິນລົງທຶນ 43,6 ຕື້ດົ່ງ (ເທົ່າກັບເກືອບ 2 ລ້ານ USD), ໃນນັ້ນມີທຶນຊ່ວຍເຫຼືອລ້າຂອງລັດຖະບານ ຫວຽດນາມ ທີ່ສະຫງວນໃຫ້ລັດຖະບານລາວແມ່ນ 39,4 ຕື້ດົ່ງ, ສ່ວນຍັງເຫຼືອແມ່ນທຶນສົມທົບຂອງລັດຖະບານລາວ. ໂຄງການລວມມີ 2 ພາກສ່ວນແມ່ນການກໍ່ສ້າງກິດຈະກຳສຳນັກງານສູນບໍລິການກະສິກຳ ແຂວງ ຫົວພັນ ແລະ ການເພີ່ມທະວີກຳລັງຄວາມສາມາດໃຫ້ພະນັກງານສົ່ງເສີມກະສິກຳ ແລະ ຊາວກະສິກອນທ້ອງຖິ່ນ. ສູນບໍລິການກະສິກຳ ແຂວງ ຫົວພັນ ລວມມີອາຄານເຮັດວຽກ 2 ຊັ້ນ, ຫໍປະຊຸມ 100 ທີ່ນັ່ງ, ຫໍວາງສະແດງ ແລະ ແນະນຳບັນດາຜະລິດຕະພັນກະສິກຳຂອງທ້ອງຖິ່ນ, ຫໍພັກ 2 ຊັ້ນຫຼັງໜຶ່ງ, ສາງວັດຖຸອຸປະກອນກະສິກຳຫຼັງໜຶ່ງ, ຟາມລ້ຽງໄກ່ສາມາດລ້ຽງໄກ່ແຕ່ 800 – 1000 ໂຕ, ຟາມລ້ຽງງົວ ແລະ ບັນດາກິດຈະກຳສຳຮອງອື່ນໆ ເພື່ອຮັບໃຊ້ການເຄື່ອນໄຫວຂອງສູນ.
+++
ໃນອີແມວສົ່ງເຖິງລາຍການ, ເພື່ອນ ທິດາ ໄດ້ແບ່ງປັນວ່າ: ກ່ອນນີ້ 2, 3 ວັນ, ມີເພື່ອນ ຫວຽດນາມ ຜູ້ໜຶ່ງໄດ້ຝາກແຜ່ນ ຊີດີບັນດາບົດເພງຂອງ ຫວຽດນາມ ໃຫ້ຂ້າພະເຈົ້າ, ໃນນັ້ນ, ຂ້າພະເຈົ້າຮູ້ສຶກປະທັບໃຈທີ່ສຸດທີ່ແຜ່ນຊີດີບົດຂັບກ່ອມຂອງ ຫວຽດນາມ, ຍ້ອນວ່າຂ້າພະເຈົ້າແມ່ນຄົນລາວເຊື້ອຊາດ ຫວຽດນາມ, ພໍ່ແມ່ຂ້າພະເຈົ້າເຄີຍຍ້າຍໄປດຳລົງຊີວິດ ແລະ ທຳມາຫາກິນ ຢູ່ ປາກເຊ ແຕ່ຄາວຍັງໜຸ່ມ. ເຖິງວ່າໄດ້ດຳລົງຊີວິດໃນດິນແດນ ລາວ ແລະ ມີຄວາມລື້ື້ງເຄີຍກັບວັດທະນະທຳ ລາວ ກໍ່ຕາມແຕ່ຍາມໃດຂ້າພະເຈົ້າກໍ່ເຄົາລົບ ແລະ ຢາກຮັກສາບັນດາມູນເຊື້ອວັດທະນະທຳຂອງຊາດໄວ້. ແມ່ຍ່າ ແມ່ນຜູ້ລ້ຽງດູຂ້າພະເຈົ້າແຕ່ຄາວຍັງນ້ອຍ, ສຽງຂັບກ່ອມຂອງແມ່ຍ່າ ໄດ້ຝັງເລິກໃນໃຈຂ້າພະເຈົ້ານັບແຕ່ຄາວນັ້ນເຖິງປະຈຸບັນ. ສຳລັບຂ້າພະເຈົ້າແລ້ວ, ສຽງຂັບກ່ອມຂອງແມ່ຍ່າ ຄືດັ່ງກຳລັງໜູນປຸກລະດົມຂ້າພະເຈົ້າໃນຍາມປະສົບກັບຄວາມຫຍຸ້ງຍາກ. ແຕ່ເປັນໜ້າວິຕົກວັງວົນຫຼາຍເມື່ອເຫັນວ່າປະຈຸບັນ, ມີຫຼາຍຄົນໄດ້ກ່ອມລູກດ້ວຍການເປີດແຜນຊີດີຟັງ ແທນທີຈະຂັບກ່ອມໃຫ້ລູກຟັງ. ຂ້າພະເຈົ້າກໍ່ຮູ້ແລ້ວວ່າການເຊື່ອມໂຍງ ແລະ ພັດທະນາແມ່ນຈຳເປັນ, ແຕ່ພວກເຮົາກໍ່ຕ້ອງຮັກສາໄດ້ບັນດາສີສັນອັນດີງາມຂອງຊາດໄວ້ເພື່ອຖ່າຍທອດໃຫ້ຄົນລຸ້ນຫຼັງ.
ເພື່ອນ ທິດາ ທີ່ຮັກແພງ, ພວກເຮົາເຄີຍມີຄຳເວົ້າທີ່ວ່າ “ເຊື່ອມໂຍງ ແຕ່ບໍ່ໄດ້ລະລາຍ”, ໃນໄລຍະແຫ່ງການເຊື່ອມໂຍງພວກເຮົາຈະຮ່ຳຮຽນເອົາບັນດາສິ່ງທີ່ດີງາມຂອງໂລກ ແຕ່ໄປຄຽງຄູ່ກັນນັ້ນກໍ່ຕ້ອງຮັກສາບັນດາສີສັນອັນດີງາມຂອງຊາດໄວ້ ແລະ ເລື່ອງຮັກສາວັດທະນະທຳອັນດີງາມຂອງຊາດ ນັ້ນແມ່ນຄວາມຮັບຜິດຊອບຂອງໄວໜຸ່ມແຕ່ລະຄົນ. ປະຈຸບັນ, ກະຊວງວັດທະນະທຳ ກິລາ ແລະ ທ່ອງທ່ຽວ ຫວຽດນາມ ໄດ້ ແລະ ພວມສົມທົບກັບຫຼາຍທ້ອງຖິ່ນ, ບັນດາເຂດພາກຈັດຕັ້ງງານມະໂຫລານ, ໂຄສະນາເພື່ອແນໃສ່ອະນຸລັກຮັກສາວັດທະນະທຳທີ່ເປັນເອກະລັກສະເພາະຂອງ ຫວຽດນາມ ໄວ້, ໃນນັ້ນມີຂັບກ່ອມ. ເນື່ອງໃນໂອກາດນີ້, ຜູ້ຈັດທຳລາຍການຂໍຝາກໃຫ້ເພື່ອນທິດາ ແລະ ບັນດາທ່ານຜູ້ຟັງທັງຫຼາຍບົດກ່ອມທີ່ເວົ້າເຖິງ: ບຸນຄຸນອັນໃຫຍ່ຫຼວງຂອງພໍ່. ຫວັງວ່າ, ບົດກ່ອມນີ້ຈະຊ່ວຍໃຫ້ເພື່ອນ ທິດາ ຫວນຄືນໄລຍະທີ່ຕົນຍັງເປັນເດັກນ້ອຍ.
ບົດກ່ອມ ເວົ້າເຖິງບຸນຄຸນອັນໃຫຍ່ຫຼວງຂອງພໍ່
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການ ໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດ ມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການຂອງພວກເຮົາໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼື ໂທລະສັບມາໂດຍກົງກໍ່ໄດ້ ຕາມເບີໂທ 0084.438.256.631 ຫຼື ອີແມວ laovov5@gmail.com. ທ່ານຜູ້ຟັງກໍ່ສາມາດ Comment ໃນເວັບໄຊ vovworld.vn ຂອງພວກເຮົາ.