ໃນອາທິດຜ່ານມາ, ລະບົບກະຈາຍສຽງພາກພາສາຕ່າງປະເທດແຫ່ງຊາດ, ວິທະຍຸກະຈາຍສຽງ ຫວຽດນາມ ໄດ້ຮັບໂທລະສັບ, ອີແມວ, ຈົດໝາຍ 200 ສະບັບຈາກຜູ້ຟັງຢູ່ຫລາຍປະເທດໃນໂລກ. ໃນນັ້ນ, ລາຍການກະຈາຍສຽງພາກພາສາລາວ ໄດ້ຮັບໂທລະສັບ, ອີແມວ, ຈົດໝາຍ 7 ສະບັບຈາກຜູ້ຟັງລາວ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີບາງເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ. ເຊີນທ່ານຕິດຕາມຮັບຟັງ.
*****
ເພື່ອນ ຈັນທະວີ ແຂວງ ຫົວພັນ; ເພື່ອນ ພູຄຳ ແລະ ເພື່ອນ ປີສະມອນ ແກ້ວດວງເດີ ແຂວງ ວຽງຈັນ ໄດ້ໂທລະສັບມາລາຍການ ອວຍພອນ 62 ປີແຫ່ງວັນປົດປ່ອຍນະຄອນຫລວງ ຮ່າໂນ້ຍ (10/10). ໂດຍຜ່ານທາງລາຍການ ຜູ້ຟັງຫລາຍທ່ານໄດ້ອວຍພອນໃຫ້ກຳລັງປະກອບອາວຸດ, ຊາວ ຮ່າໂນ້ຍ ກໍ່ຄືປະຊາຊົນໃນທົ່ວປະເທດບັນລຸໄດ້ຜົນງານຫລາຍຢ່າງໃນພາລະກິດພັດທະນາເສດຖະກິດ - ສັງຄົມ, ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການຍົກສູງ, ສົມເປັນນະຄອນເພື່ອສັນຕິພາບ.
(ນະຄອນຫລວງ ຮ່າໂນ້ຍ)
ລາຍການພາກພາສາລາວ, VOV5 ຂໍຂອບໃຈຜູ້ຟັງທຸກໆທ່ານທີ່ມີຄວາມເອົາໃຈໃສ່, ໂທລະສັບ, ສົ່ງຂໍ້ຄວາມມາລາຍການ ອວຍພອນວັນປົກປ່ອຍນະຄອນຫລວງ. ເພື່ອຕອບສະໜອງຄວາມສົນໃຈຂອງຜູ້ຟັງ, ໃນລາຍການດົນຕີຕາມຄຳຂໍເດືອນ 10, ພວກເຮົາຈະຈັດບັນດາບົດເພງກ່ຽວກັບ ຮ່າໂນ້ຍ ຄືດັ່ງຄຳຂອບອົກຂອບໃຈຢ່າງຈິງໃຈເພື່ອມອບໃຫ້ທ່ານຜູ້ຟັງ, ເຊີນທ່ານຕິດຕາມຮັບຟັງ.
*****
ເພື່ອນ ບຸນທະວີ ອິນທະວົງ ຢູ່ນະຄອນຫລວງ ວຽງຈັນ ໂທລະສັບມາຍັງລາຍການໂດຍຖາມວ່າ: ຫວ່າງແລ້ວນີ້, ສະຖານທູດ ຫວຽດນາມ ປະຈຳ ລາວ ຈັດຕັ້ງພິທີມອບຫຼຽນໄຊ, ຫຼຽນກາມິດຕະພາບຂອງ ສສ. ຫວຽດນາມ ທີ່ສະຫງວນໃຫ້ພະນັກງານກະຊວງປ້ອງກັນຄວາມສະຫງົບ ລາວ? ຂ້າພະເຈົ້າຢາກຮູ້ວ່າ ມີຜູ້ໃດໄດ້ຮັບຫຼຽນໄຊໃນຄັ້ງນີ້?
(ພິທີມອບຫຼຽນໄຊ . ພາບ: TTXVN)
ວັນທີ 29/09 ຜ່ານມາ, ໂດຍຮັບການມອບໝາຍສິດຈາກປະທານປະເທດ ສາທາລະນະລັດ ສັງຄົມນິຍົມ ຫວຽດນາມ, ສະຖານທູດ ຫວຽດນາມ ປະຈຳ ລາວ ໄດ້ຈັດຕັ້ງພິທີມອບຫຼຽນໄຊ, ຫຼຽນກາມິດຕະພາບຂອງສາທາລະນະລັດ ສັງຄົມນິຍົມ ຫວຽດນາມ ທີ່ສະຫງວນໃຫ້ບັນດາພະນັກງານກະຊວງປ້ອງກັນຄວາມສະຫງົບ ລາວ. ນີ້ແມ່ນລາງວັນອັນສູງສົ່ງຂອງລັດ ຫວຽດນາມ ເພື່ອສະແດງຄວາມຮູ້ບຸນຄຸນຕໍ່ການຜູ້ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນການກໍ່ສ້າງ, ປັງປຸງ ແລະ ເພີ່ມທະວີສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ 2 ປະເທດ ຫວຽດນາມ ແລະ ລາວ. ທີ່ພິທີ, ທ່ານ ຫງວຽນແມ້ງຮຸ່ງ ເອກອັກຄະລັດຖະທູດ ຫວຽດນາມ ປະຈຳ ລາວ ໄດ້ມອບຫຼຽນໄຊມິດຕະພາບໃຫ້ທ່ານພັນເອກ ກຽງຄຳ ອິນເພງທະວົງ ຫົວໜ້າອົງການຕາງໜ້າກະຊວງປ້ອງກັນຄວາມສະຫງົບລາວ ປະຈຳ ຫວຽດນາມ. ທ່ານເອກອັກຄະລັດຖະທູດ ກໍ່ມອບຫຼຽນໄຊມິດຕະພາບໃຫ້ທ່ານພັນຕີ ຄຳເວີນ ໄຊຍະຈັກ ຮອງຫົວໜ້າອົງການຕາງໜ້າກະຊວງປ້ອງກັນຄວາມສະຫງົບ ລາວ ປະຈຳ ຫວຽດນາມ ແລະ ທ່ານພັນຕີ ແສງພິລາ ພະນັກງານອົງການຕາງໜ້າກະຊວງປ້ອງກັນຄວາມສະຫງົບ ລາວ ປະຈຳ ຫວຽດນາມ ຍ້ອນມີການປະກອບສວ່ນຢ່າງຕັ້ງໜ້າເຂົ້າໃນການກໍ່ສ້າງ, ປັບປຸງສາຍພົວພັນມິດຕະພາບ, ການຮ່ວມມືຮອບດ້ານລະຫວ່າງ 2 ປະເທດ ຫວຽດນາມ ແລະ ລາວ.
*****
ເພື່ອນ ມາລີວົງ, ນັກສຶກສາມະຫາວິທະຍາໄລສັບພະວິຊາ ຮ່າໂນ້ຍ ສົ່ງຂໍ້ຄວາມມາລາຍການໂດຍຖາມວ່າ: ຂ້າພະເຈົ້າໄດ້ຮູ້ວ່າ ຢູ່ ຫວຽດນາມ ໄດ້ອອກອາກາດຊ່ອງໂທລະພາບແຫ່ງຊາດ ລາວ, ແຕ່ຂ້າພະເຈົ້າບໍ່ຮູ້ຈະອອກອາກາດໃນຊ່ອງໃດ? ນອກນັ້ນຊ່ອງໂທລະພາບ ລາວ ກໍ່ມີລາຍການຂ່າວເປັນພາສາ ຫວຽດນາມ ແຕ່ຂ້າພະເຈົ້າບໍ່ຮູ້ເວລາອອກອາກາດລາຍການນີ້, ດັ່ງນັ້ນຈຶ່ງຂໍທາງວິທະຍຸແນະນຳໃຫ້ແດ່?
ເພື່ອນ ມາລີວົງ ທີ່ຮັກແພງ, ນັບແຕ່ເວລາ 21 ໂມງ 00 ວັນທີ 23/09/2016, ໂທລະພາບ SCTV ຫວຽດນາມ ໄດ້ອອກອາກາດຊ່ອງໂທລະພາບແຫ່ງຊາດ ລາວ - LNTV1 ໃນລະບົບໂທລະພາບດິຈິຕອນ SCTV. ຕາມນັ້ນແລ້ວ, SCTV ອອກອາກາດຊ່ອງໂທລະພາບແຫ່ງຊາດ ລາວ ໃນຊ່ອງ SCTV5 ຂອງລະບົບໂທລະພາບດິຈິຕອນ. ກ່ອນໜ້ານັ້ນ, ວັນທີ 02/09/2015 ໂທລະພາບແຫ່ງຊາດ ລາວ ໄດ້ ອອກອາກາດລາຍການຂ່າວເປັນພາສາ ຫວຽດນາມ.ໂດຍ ໂທລະພາບແຫ່ງຊາດ ລາວ ຈັດທຳ ແລະ ໄດ້ຖ່າຍທອດສົດໃນເວລາ 18 ໂມງ 00 – 18 ໂມງ 15 ແຕ່ວັນຈັນມາຮອດວັນສຸກ. ນີ້ແມ່ນຊ່ອງສື່ຂ່າວທີ່ມີປະສິດທິຜົນ ເພື່ອໃຫ້ປະຊາຄົມຊາວ ຫວຽດນາມ ຢູ່ ລາວ ມີຄວາມເຂົ້າໃຈກ່ຽວກັບແນວທາງ ແຜນນະໂຍບາຍ, ນະໂຍບາຍຂອງພັກແລະ ລັດ ລາວ ຢ່າງເລິກເຊິ່ງກ່ວາອີກ.
*****
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການ ໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດ ມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການຂອງພວກເຮົາໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼື ໂທລະສັບມາໂດຍກົງກໍ່ໄດ້ ຕາມເບີໂທ 0084.438.256.631 ຫຼື ອີແມວ laovov5@gmail.com. ທ່ານຜູ້ຟັງກໍ່ສາມາດ Comment ໃນເວັບໄຊ vovworld.vn ຂອງພວກເຮົາ.