ໃນອາທິດຜ່ານມາ, ລະບົບກະຈາຍສຽງພາກພາສາຕ່າງປະເທດແຫ່ງຊາດ, ວິທະຍຸກະຈາຍສຽງ ຫວຽດນາມ ໄດ້ຮັບໂທລະສັບ, ອີແມວ, ຈົດໝາຍ 142 ສະບັບຈາກຜູ້ຟັງຢູ່ຫລາຍປະເທດໃນໂລກ. ໃນນັ້ນ, ລາຍການກະຈາຍສຽງພາກພາສາລາວ ໄດ້ຮັບໂທລະສັບ, ອີແມວ, ຈົດໝາຍ 4 ສະບັບຈາກຜູ້ຟັງລາວ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີບາງເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ. ເຊີນທ່ານຕິດຕາມຮັບຟັງ.
*****
ເພື່ອນ ວົງໄຊ ທິບປະວົງ ຢູ່ນະຄອນຫລວງ ວຽງຈັນ ໄດ້ສົ່ງ ອີແມວມາຍັງລາຍການດ້ວຍເນື້ອໃນວ່າ: ຂ້າພະເຈົ້າຮູ້ວ່າ, ສຳລັບຊາວ ຫວຽດນາມ ເປັນຈຳນວນຫຼວງຫລາຍ, ຜູ້ນຳ ກູບາ Fidel Castro Ruz ໄດ້ຮັບຖືເປັນສັນຍາລັກແຫ່ງລັດທິວິລະຊົນປະຕິວັດ, ເຈດຈຳນົງອົງອາດກ້າແກ່ນ ແລະ ຄວາມມຸ້ງຫວັງເພື່ອອິດສະລະພາບ ແລະ ຄວາມຜາສຸກ. ການຈາກໄປຂອງປະທານ Fidel Castro Ruz ແມ່ນຄວາມເສຍຫາຍອັນໃຫຍ່ຫລວງ ບໍ່ພຽງແຕ່ສຳລັບປະເທດ ກູບາເທົ່ານັ້ນ ຫາກຍັງສຳລັບປະຊາຊົນ ຫວຽດນາມອີກດ້ວຍ. ຜ່ານລາຍການ ຂ້າພະເຈົ້າຢາກເຂົ້າໃຈເພີ່ມກ່ຽວກັບນ້ຳໃຈພິເສດເຊິ່ງປະທານ Fidel Castro Ruz ສະຫງວຽນໃຫ້ແກ່ ຫວຽດນາມ.
ທ່ານປະທານປະເທດ ເຈີ່ນດ້າຍກວາງ ແລະ ທ່ານປະທານ Fidel Castro
(ພາບ: TTXVN)
ເພື່ອນ ວົງໄຊ ທິບປະວົງ ທີ່ຮັກແພງ! ເມື່ອຍັງມີຊີວິດ, ທ່ານປະທານ Fidel Castro ຍາມໃດກໍ່ສະຫງວນອາລົມຈິດພິເສດໃຫ້ແກ່ ຫວຽດນາມ. ພາຍຫຼັງການປະຕິວັດ ກູບາ ຍາດໄດ້ໄຊຊະນະ, ກູບາ ແມ່ນປະເທດທຳອິດທີ່ໄດ້ສ້າງຕັ້ງຄະນະກຳມະການສາມັກຄີກັບແນວໂຮມ ປົດປ່ອຍຊາດພາກໃຕ້ ຫວຽດນາມ. ແລະ ໃນຕະຫຼອດໄລຍະສົງຄາມ ກໍ່ຄືພາຍຫຼັງທີ່ ຫວຽດນາມ ຍາດໄດ້ໄຊຊະນະເມື່ອປີ 1975, ກູບາ ຍັງຄົງສືບຕໍ່ໃຫ້ການສະໜັບສະໜູນ ຫວຽດນາມໃນຫຼາຍດ້ານ. ປີ 1973, Fidel Castro ແມ່ນປະມຸກລັດຕ່າງປະເທດຜູ້ທຳອິດ ແລະ ເປັນຜູ້ໜຶ່ງດຽວໄດ້ມາຢ້ຽມຢາມເຂດປົດປ່ອຍ ຫວຽດນາມ. ຢູ່ທີ່ນີ້ຮູບພາບທ່ານຍົກສູງຄັນທຸງຂອງແນວໂຮມປົດປ່ອຍຊາດພາກໃຕ້ ຫວຽດນາມ ໄດ້ກາຍເປັນແຫຼ່ງປຸກລະດົມກຳລັງໃຈໃຫ້ບັນດານັກຮົບປະຕິວັດ ຫວຽດນາມ ເວລານັ້ນ. ຄຳເວົ້າອະມະຕະຂອງ Fidel Castro ທີ່ວ່າ: “ເພື່ອ ຫວຽດນາມ, ກູບາ ພ້ອມແລ້ວທີ່ຈະສະຫງວນທັງເລືອດເນື້ອຂອງຕົນ” ໄດ້ຮັບການພິສູດ ແລະ ກ້າວເຂົ້າສູ່ປະຫວັດສາດແຫ່ງສາຍພົວພັນລະຫວ່າງສອງປະເທດ. ຫວຽດນາມ ແລະ ກູບາ ມີສາຍພົວພັນຖານອ້າຍນ້ອງອັນສະໜິດຕິດພັນກັນ ເຊິ່ງໄດ້ຮັບການສ້າງຕັ້ງ ແລະ ພັດທະນາໃນຕະຫຼອດ 50 ປີຜ່ານມາ. ໃນຕະຫຼອດໄລຍະສົງຄາມ, ຍາມໃດ ກູບາ ກໍ່ສະໜັບສະໜູນ ຫວຽດນາມ ທັງດ້ານວັດຖຸ ແລະ ຈິດໃຈ. ປະຊາຊົນ ຫວຽດນາມ ຮັກແພງ ປະທານ Fidel Castro ຄືດັ່ງປະຊາຊົນ ກູບາ ຮັກແພງປະທານ ໂຮ່ຈີມິນ.ຫລາຍທົດສະວັດໄດ້ຜ່ານພົ້ນໄປແລ້ວ, ແຕ່ຮູບພາບປະເທດ ກູບາ ທີ່ຍາມໃດກໍ່ພ້ອມແລ້ວທີ່ຈະແບ່ງທຸກແບ່ງສຸກໃຫ້ແກ່ປະຊາຊົນ ຫວຽດນາມ ແລະ ພິເສດແມ່ນຮູບພາບຜູ້ນຳທີ່ຍິ່ງໃຫຍ່ Fidel Castro, ເພື່ອນມິດຜູ້ສະໜິດສະໜົມຂອງ ຫວຽດນາມ ຍັງຄົງ ຝັງເລິກໃນດວງໃຈຂອງຊາວຫວຽດນາມລຸ້ນຕ່າງໆຢູ່.
*****
ໃນອາທິດຜ່ານມາ, ເພື່ອນ ແອນລີ ສີຫາຈັກ ແລະ ເພື່ອນ ວິຕາຊີ ພົມປັນຢາ ຢູ່ແຂວງ ອຸດົມໄຊ ສົ່ງອີແມວມາຍັງລາຍການດ້ວຍເນື້ອໃນວ່າ: ຫວ່າງແລ້ວນນີ້, ແຂວງ ອຸດົມໄຊ ໄດ້ດຳເນີນພິທີມອບ-ຮັບສະຖານີວິທະຍຸກະຈາຍສຽງ, ໂທລະພາບແຂວງ ອຸດົມໄຊ ໂດຍລັດຖະບານ ຫວຽດນາມ ອຸປະຖຳໃຫ້ລັດຖະບານ ລາວ. ຂ້າພະເຈົ້າໄດ້ຮັບຮູ້ວ່າ ກິດຈະກຳດັ່ງກ່າວ ເພື່ອແນໃສ່ປະກອບສ່ວນສຳຄັນເຂົ້າໃນການປະຕິບັດໜ້າທີ່ດ້ານການເມືອງ ໂຄສະນາບັນດານະໂຍບາຍກົດໝາຍເຖິງປະຊາຊົນ, ຜ່ານທາງລາຍການ ຂ້າພະເຈົ້າຢາກຮູ້ຕື່ມອີກກ່ຽນກັບກິດຈະກຳດັ່ງກ່າວ ?
ເພື່ອນ ແອນລີ ສີຫາຈັກ ແລະ ເພື່ອນ ວິຕາຊີ ພົມປັນຢາ ທີ່ຮັກແພງ! ວັນທີ 30/11 ຢູ່ແຊວງ ອຸດົມໄຊ ພາກເໜືອຂອງ ລາວ ໄດ້ດຳເນີນພິທີມອບ-ຮັບສະຖານີວິທະຍຸກະຈາຍສຽງ, ໂທລະພາບແຂວງ ອຸດົມໄຊ. ນີ້ແມ່ນໜຶ່ງໃນບັນດາໂຄງການໄດ້ຮັບການປະຕິບັດຕາມສັນຍາຮ່ວມມືດ້ານເສດຖະກິດ, ວັດທະນະທຳ, ການສຶກສາ, ວິທະຍາສາດເຕັກນິກປີ 2013 ທີ່ໄດ້ຮັບການລົງນາມລະຫວ່າງ 2 ປະເທດ ຫວຽດນາມ ແລະ ລາວ. ກິດຈະກຳນີ້ ມີຄວາມໝາຍສຳຄັນໃນປະຫວັດແຫ່ງການພົວພັນມິດຕະພາບ ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວ - ຫວຽດນາມ ໃນຂົງເຂດຖະແຫຼງຂ່າວ - ສື່ສານ. ເລື່ອງນຳບັນດາລະບົບອຸປະກອນຂອງສະຖານີເຂົ້າໃຊ້ການ ຈະສາມາດສົ່ງຄື້ນກະຈາຍສຽງ ແລະ ໂທລະພາບຂອງສູນກາງຂອງລາວ, ແຂວງ ອຸດົມໄຊ ແລະ ຂອງ ຫວຽດນາມ ໄດ້, ປະກອບສ່ວນສຳຄັນຍົກສູງຄຸນນະພາບການສົ່ງຄຶື້ນບັນດາລາຍການກະຈາຍສຽງ, ໂທລະພາບ ຕອບສະໜອງຄວາມຮຽກຮ້ອງຕ້ອງການຂອງຜູ້ຟັງ, ຜູ້ຊົມ. ກິດຈະກຳກໍ່ປະກອບສ່ວນສຳຄັນເຂົ້າໃນການປະຕິບັດໜ້າທີ່ດ້ານການເມືອງ ໂຄສະນາບັນດານະໂຍບາຍກົດໝາຍເຖິງປະຊາຊົນ. ກິດຈະກຳກໍ່ສ້າງສະຖານີວິທະຍຸກະຈາຍສຽງ, ໂທລະພາບແຂວງ ອຸດົມໄຊ ມີມູນຄ່າກໍ່ສ້າງ 105 ຕື້ດົ່ງ ດ້ວຍການລົງທຶນຄົບຊຸດ, ກ້າວໜ້າ ເໝາະສົມກັບແຜນພັດທະນາຕາໜ່າງກະຈາຍສຽງ - ໂທລະພາບແຫ່ງຊາດ ລາວ, ເໝາະສົມກັບວິວັດທະນາການພັດທະນາກະຈາຍສຽງ - ໂທລະພາບ ເຊິ່ງໄດ້ໃຫ້ຄຳໝັ້ນສັນຍາໃນພາກພື້ນ.
*****
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການ ໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດ ມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການຂອງພວກເຮົາໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼື ໂທລະສັບມາໂດຍກົງກໍ່ໄດ້ ຕາມເບີໂທ 0084.438.256.631 ຫຼື ອີແມວ laovov5@gmail.com. ທ່ານຜູ້ຟັງກໍ່ສາມາດ Comment ໃນເວັບໄຊ vovworld.vn ຂອງພວກເຮົາ.