ບຸນປີໃໝ່ປະຈຳຊາດຫຼືບຸນເຕັດແມ່ນຊ່ວງເວລາທີ່ຊາວຫວຽດນາມທຸກໆຄົນມັກເຕົ້າໂຮມກັນກັບຄອບຄົວ. ແຕ່ລະປີເມື່ອລະດູບານໃໝ່, ບຸນເຕັດວຽນມາ, ບໍ່ພຽງແຕ່ຊາວຫວຽດນາມມີຄວາມເບີກບານມ່ວນຊື່ນຕ້ອນຮັບເທົ່ານັ້ນ, ຫາກຍັງມີຊາວຕ່າງປະເທດຢູ່ຫວຽດນາມກໍຄ່ອຍຖ້າຕ້ອນຮັບອີກດ້ວຍ.
ເພື່ອນ Lou Vargas,ຊາວຝະລັ່ງ ແລະ ເພື່ອນ Hitomi Okamara ຖືສັນຊາດຍີປຸ່ນຕ້ອນຮັບບຸນເຕັດຢູ່ຫວຽດນາມ |
ໂດຍມີຄວາມຮັກແພງປະເທດຫວຽດນາມຜ່ານປຶ້ມອ່ານ, ໜັງສືພິມ, ຟິມຮູບເງົາຢູ່ຝະລັ່ງ, Lou Vargas ໄດ້ເລືອກເອົາພະແນກຫວຽດນາມວິທະຍາ, ມະຫາວິທະຍາໄລຮ່າໂນ້ຍເພື່ອຊອກຮູ້ກ່ຽວກັບວັດທະນະທຳ ແລະ ຊາວຫວຽດນາມ. ໂດຍໄດ້ຮັບປະທານບັນດາເຍື່ອງອາຫານຫວຽດນາມ, ໄດ້ຮັບຟັງໝູ່ເພື່ອນເລົ່າເຖິງ ບຸນເຕັດຫວຽດນາມ, ດັ່ງນັ້ນ, Lou Vargas ຕົກລົງຕ້ອນຮັບບຸນເຕັດຢູ່ຫວຽດນາມເພື່ອມີໂອກາດຊອກຮູ້ກ່ຽວກັບວັດທະນະທຳຫວຽດນາມ. Lou Vargas ໃຫ້ຮູ້ວ່າ :
“ ຂ້າພະເຈົ້າຫວັງຊອກຮູ້ກ່ຽວກັບຮີດຄອງປະເພນີຂອງຊາວຫວຽດນາມໃນຍາມບຸນເຕັດ. ຂ້າພະເຈົ້າກໍຢາກຮູ້ຈັກວ່າ ໃນຄອບຄົວຊາວຫວຽດນາມ ແມ່ນຈັດບຸນເຕັດຄືແນວໃດ”
ກໍເຊັ່ນກັບ Lou Vargas, ເພື່ອນ Hitomi Okamara ຖືສັນຊາດຍີປຸ່ນ ໃຫ້ຮູ້ວ່າ ລາວກໍຢາກເຂົ້າໃຈຕື່ມກ່ຽວກັບວັດທະນະທຳ ແລະ ປະເພນີຕ້ອນຮັບບຸນເຕັດຂອງຊາວຫວຽດນາມ. Hitomi Okamara ເວົ້າວ່າ:
“ ຂ້າພະເຈົ້າຢາກຊອກຮູ້ກ່ຽວກັບບຸນເຕັດຂອງຊາວຫວຽດນາມແມ່ນຄືແນວໃດ. ອາຫານຂອງຫວຽດນາມກໍມີຫຼາຍເຍື່ອງເຊັ່ນ: ເຂົ້າຕົ້ມ, ແກງໜໍ່ໄມ້, ຢໍໝູ… ຊາວຫວຽດນາມເຄີຍອອກເດີນທາງໃນມື້ຕົ້ນລະດູບານໃໝ່ເພື່ອຊອກຫາຄວາມໂຊກດີມາໃຫ້ຄອບຄົວ ແລະ ຕົນເອງ ”
ສຳລັບເພື່ອນ Shehan Ruwanma Perera ຖືສັນຊາດ ສີລັງກາແລ້ວ, ການຕ້ອນຮັບບຸນເຕັດຢູ່ຫວຽດນາມບໍ່ພຽງແຕ່ຊ່ວຍບັນດາເພື່ອນໄດ້ ຊອກຮູ້ກ່ຽວກັບວັດທະນະທຳຫວຽດນາມເທົ່ານັ້ນ, ຫາກຍັງແມ່ນໂອກາດເພື່ອແນະນຳກ່ຽວກັບວັດທະນະທຳອາຫານການກິນຂອງສີລັງກາໃຫ້ໝູ່ເພື່ອນຂອງຕົນອີກດ້ວຍ.
“ ຂ້າພະເຈົ້າໄດ້ເຄີຍປຸງແຕ່ງບາງເຍື່ອງອາຫານຂອງສີລັງກາໃຫ້ເພື່ອນຫວຽດນາມກິນແລ້ວ, ແຕ່ອາຫານຂອງປະເທດຂ້າພະເຈົ້າແມ່ນເຜັດທີ່ສຸດ ແລະ ເຄັມອີກ ”
ກໍໄດ້ຕ້ອນຮັບບຸນເຕັດຢູ່ຫວຽດນາມເຊັ່ນດຽວກັນ, ແຕ່ຊາວຕ່າງປະເທດຫຼາຍຄົນພັດເລືອກເອົາການໄປທ່ອງທ່ຽວ ແລະ ຕ້ອນຮັບບຸນເຕັດກັບຊາວຫວຽດນາມເພື່ອຄົ້ນຫາຄວາມອົບອຸ່ນຢູ່ຕາມຄອບຄົວຊາວຫວຽດນາມ. ອ້າຍ Soren Drott ຖືສັນຊາດອົດສະຕາລີ ໃຫ້ຮູ້ວ່າ :
“ ຂ້າພະເຈົ້າສົນໃຈຫຼາຍກ່ຽວກັບຮີດຄອງປະເພນີຂອງຊາວຫວຽດນາມໃນວັນບຸນເຕັດ. ຂ້າພະເຈົ້າມັກອາຫານຫວຽດນາມ, ເຂົ້າຕົ້ມແຊບຫຼາຍ ”
ສຳລັບທ່ານ Bobby, ນັກທ່ອງທ່ຽວຊາວຝະລັ່ງ ໄດ້ມາຫວຽດນາມຫຼາຍຄັ້ງແລ້ວ, ທ່ານໃຫ້ຮູ້ວ່າ ທ່ານມີຄວາມປະທັບໃຈທີ່ສຸດເມື່ອໄປຢາມນະຄອນໂຮ່ຈິມິນ ເພາະໃນຍາມບຸນເຕັດ, ຢູ່ທຸກແຫ່ງຫົນ ກໍລ້ວນແຕ່ມີດອກໄມ້ສົດ. ມີທັງຖະໜົນດອກໄມ້, ງານບຸນດອກໄມ້ ເປັນໜ້າຈັບໃຈອີຫຼີ. ທ່ານ Bobby ເວົ້າວ່າ :
“ ຂ້າພະເຈົ້າມັກມາທ່ຽວຢູ່ນະຄອນໂຮ່ຈິມິນ, ພິເສດແມ່ນໃນຍາມບຸນເຕັດ. ທຸກໆຄົນກໍລ້ວນແຕ່ເຕົ້າໂຮມກັບຄອບຄົວຂອງຕົນຢ່າງອົບອຸ່ນທີ່ສຸດ. ສິ່ງນີ້ແມ່ນພິເສດທີ່ສຸດສຳລັບຊາວຫວຽດນາມ. ຂ້າພະເຈົ້າຊົມຊອບບັນຍາກາດຍາມບຸນເຕັດຫວຽດນາມ, ຢູ່ຕາມທ້ອງຖະໜົນມີດອກໄມ້ນາໆຊະນິດ, ທຸກໆຄົນຕ່າງກໍເວົ້ານົວຫົວມ່ວນ ໃບໜ້າຍິ້ມແຍ້ມແຈ່ມໃສ ”
ສ່ວນ Colin ນັກທ່ອງທ່ຽວຊາວອາເມລິກາໃຫ້ຮູ້ວ່າ :
“ ນີ້ແມ່ນຊ່ວງເວລາທີ່ຈັບໃຈ ແລະ ມ່ວນຊື່ນທີ່ສຸດ. ຂ້າພະເຈົ້າຮູ້ສຶກໄດ້ເຖິງຄວາມແຕກຕ່າງກັນທາງດ້ານວັດທະນະທຳລະຫວ່າງຊາວຫວຽດນາມ ແລະ ອາເມລິກາ. ນະຄອນໂຮ່ຈິມິນແມ່ນແຫ່ງເປັນໜ້າຖະຫນຸຖະໜອມ, ປະຊາຊົນມີຈິດໃຈຮັກແພງແຂກ. ຂ້າພະເຈົ້າມີຄວາມຫວັງໃຫ້ນະຄອນນີ້ມີການປ່ຽນແປງ ແລະ ພັດທະນາຫຼາຍຂຶ້ນ ”
ປີໃໝ່ໄດ້ວຽນມາດ້ວຍຄວາມປະທັບໃຈ ແລະ ເບີກບານມ່ວນຊື່ນຫຼາຍຢ່າງຊຶ່ງບໍ່ພຽງແຕ່ສຳລັບຊາວຫວຽດນາມເທົ່ານັ້ນ, ຫາກຍັງສຳລັບຊາວຕ່າງປະເທດຢູ່ຫວຽດນາມອີກດ້ວຍ. ການຕ້ອນຮັບບຸນເຕັດຢູ່ຫວຽດນາມໄດ້ເປັນການຜູກຮັດມະນຸດດ້ວຍກັນເຖິງແມ່ນວ່າ ເຂົາເຈົ້າຈະຢູ່ແຫ່ງຫົນໃດກໍຕາມ.