(vovworld) - ໃນອາທິດຜ່ານມາ, ລະບົບກະຈາຍສຽງພາກພາສາຕ່າງປະເທດແຫ່ງຊາດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ, ອີແມວ ໂທລະສັບ ຫຼາຍສະບັບຈາກຜູ້ຝັງຢູ່ຫຼາຍປະເທດໃນໂລກ. ໃນນັ້ນລາຍການຈາຍສຽງພາກພາສາລາວ ໄດ້ຮັບອີແມວ, ໂທລະສັບ 5 ສະບັບຈາກທ່ານຜູ້ຟັງລາວ. ເນື້ອໃນຕົ້ນຕໍກ່ຽວຂ້ອງເຖິງບັນດາການເຄື່ອນໄຫວສະເຫຼີມສະຫຼອງ 71 ປີແຫ່ງວັນປະທານ ໂຮ່ຈີມິນ ອ່ານຖະແຫຼງການປະກາດເອກະລາດສະຖາປະນາປະເທດ ສາທາລະນະລັດ ປະຊາທິປະໄຕ ຫວຽດນາມ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ.
ປະທານ ໂຮ່ຈີມິນ ອ່ານປະກາດຖະແຫຼງເອກະລາດສະຖາປານາປະເທດ ສ.ປ ຫວຽດນາມ
(ພາບປະກອບ)ເພື່ອນ ວັນນິດາ, ແຂວງ ໄຊສົມບູນ ໄດ້ໂທລະສັບຫາລາຍການໂດຍຖາມວ່າ: “ຂ້າພະເຈົ້າໄດ້ຮູ້ວ່າ, ວັນທີ 2/9 ແມ່ນວັນບຸນເອກະລາດຂອງ ຫວຽດນາມ. ດັ່ງນັ້ນ, ໃນວັນນີ້ປະຊາຊົນ ຫວຽດນາມ ເຄີຍຈັດຕັ້ງການເຄື່ອນໄຫວໃດແດ່? ພິເສດ, ຂ້າພະເຈົ້າຢາກຖາມວ່າໃນວັນນີ້, ພາກພາສາລາວ ມີບົດຂຽນໃດແດ່ກ່ຽວກັບເຫດການດັ່ງກ່າວ?”
ເພື່ອນ ວັນນິດາ ທີ່ຮັກແພງ, ປະຊາຊົນ ຫວຽດນາມ ຖືວັນທີ 2/9 (ວັນຊາດປະເທດ ສສ. ຫວຽດນາມ) ແມ່ນວັນບຸນເອກະລາດ. ນີ້ແມ່ນໜຶ່ງໃນບັນດາເຫດການສຳຄັນໃນປີ. ເພື່ອສະເຫຼີມສະຫຼອງວັນປະຫວັດສາດນີ້, ໃນທົ່ວທຸກແຖບຖິ່ນຂອງປະເທດຊາດ ໄດ້ຈັດຕັ້ງການເຄື່ອນໄຫວຕ່າງໆຄື: ການສະແດງສິລະປະຢູ່ບັນດາສະຖານທີ່ສາທາລະນະ, ການວາງສະແດງ, ການເຄື່ອນໄຫວລະຫຼິ້ນບັນເທິງຕ່າງໆ. ສຳລັບລະບົບບັນດາລາຍການກະຈາຍສຽງພາກພາສາຕ່າງປະເທດແຫ່ງຊາດເວົ້າລວມ ແລະ ລາຍການພາກພາສາລາວເວົ້າສະເພາະ ຈະມີຫຼາຍຂ່າວກ່ຽວກັບການເຄື່ອນໄຫວສະເຫຼີມສະຫຼອງ 71 ປີແຫ່ງວັນຊາດ 2/9. ນອກຈາກນັ້ນ, ພວກເຮົາຍັງມີບົດຂຽນ: “ການປະຕິວັດເດືອນ 8 ແລະ ບົດຮຽນກ່ຽວກັບການກຳແໜ້ນກາລະໂອກາດ” ແລະ “ຂີດໝາຍການປະຕິວັດເດືອນສິງຫາຜ່ານບັນດາວັດຖຸພັນປະຫວັດສາດ”. ບັນດາບົດຂຽນດັ່ງກ່າວຈະເຮັດໃຫ້ພວກທ່ານມີຄວາມເຂົ້າໃຈຕື່ມອີກກ່ຽວກັບໄຊຊະນະອັນຍິ່ງໃຫຍ່ຂອງປະຊາຊົນ ຫວຽດນາມ.
ພິທີຊັກທຸງຢູ່ສະໜາມຫຼວງ ບາດິ່ງ
|
ສ່ວນເພື່ອນ ປາຄຳ ວິໄລຫອມ, ຢູ່ນະຄອນຫຼວງ ວຽງຈັນ ຢາກຊອກຮູ້ກ່ຽວກັບສະໜາມຫຼວງ ບາດິ່ງ, ເພື່ອນໄດ້ຂຽນວ່າ: “ຂ້າພະເຈົ້າແມ່ນນັກສຶກສາພະແນກປະຫວັດສາດ, ມະຫາວິທະຍາໄລແຫ່ງຊາດ ລາວ. ຂ້າພະເຈົ້າພວມຂຽນບົດກ່ຽວກັບວັນຊາດ ຫວຽດນາມ (2/9). ມີບົດໜັງສືພິມຫຼາຍບົດໄດ້ເວົ້າເຖິງກ່ຽວກັບເຫດການປະຫວັດສາດສຳຄັນນີ້ຂອງ ຫວຽດນາມ ແຕ່ພັດບໍ່ມີຂໍ້ມູນຂ່າວກ່ຽວກັບສະໜາມຫຼວງ ບາດິ່ງ, ບ່ອນທີ່ປະທານ ໂຮ່ຈີມິນ ໄດ້ອ່ານຖະແຫຼງການປະກາດເອກະລາດສະຖາປະນາປະເທດ ສາທາລະນະລັດ ປະຊາທິປະໄຕ ຫວຽດນາມ. ຜ່ານລາຍການ, ຂ້າພະເຈົ້າຢາກຊອກຮູ້ກ່ຽວກັບສະຖານທີ່ປະຫວັດສາດທີ່ໂດ່ງດັ່ງນີ້.”
ເພື່ອນ ປາຄຳ ວິໄລຫອມ ທີ່ຮັກແພງ, ກ່ອນນີ້ 71 ປີ, ຕອນທ່ຽງວັນທີ 2/9/1945 ຢູ່ສະໜາມຫຼວງ ບາດິ່ງ ປະຫວັດສາດ, ປະທານ ໂຮ່ຈີມິນ ໄດ້ອ່ານຖະແຫຼງການປະກາດເອກະລາດສະຖາປະນາປະເທດ ສາທາລະນະລັດ ປະຊາທິປະໄຕ ຫວຽດນາມ (ປະຈຸບັນແມ່ນປະເທດ ສສ. ຫວຽດນາມ) ຕໍ່ໜ້າການເປັນສັກຂີພິຍານຂອງປະຊາຊົນ ຮ່່າໂນ້ຍ ແລະ ເພື່ອນມິດສາກົນນັບ 500.000 ຄົນ. ພາຍຫຼັງຖະແຫຼງການປະກາດເອກະລາດ, ສະໜາມຫຼວງ ບາດິ່ງ ໄດ້ກ້າວເຂົ້າສູ່ປະຫວັດສາດຂອງຊາດ ຫວຽດນາມ, ກາຍເປັນບ່ອນສະຖາປະນາປະເທດ ຫວຽດນາມ ໃໝ່ເຊິ່ງໄດ້ຮັບການຮູ້ຈັກຈາກທົ່ວໂລກ. ສະໜາມຫຼວງ ບາດິ່ງ ແມ່ນສະໜາມຫຼວງໃຫຍ່ທີ່ສຸດຂອງ ຫວຽດນາມ, ນອນໃນຖະໜົນຮູ່ງເວືອງ ແລະ ຢູ່ຕໍ່ໜ້າສຸສານປະທານ ໂຮ່ຈີມິນ. ປະຈຸບັນ, ສະໜາມຫຼວງ ບາດິ່ງ ມີເນື້ອທີ່ຍາວ 320 ມ, ກ້ວາງ 100 ມ, ປູກຫຍ້າເປັນ 240 ຕາກາໂຣ, ທີ່ຂັ້ນກັນດ້ວຍທາງກ້ວາງ 1,4ມ. ຢູ່ໃຈກາງສະໜາມຫຼວງແມ່ນເສົາທຸງຊາດສູງ 24 ມ. ນີ້ແມ່ນບ່ອນເຄີຍດຳເນີນບັນດາການເດີນຂະບວນ, ສວນສະໜາມເນື່ອງໃນໂອກາດບັນດາວັນບຸນໃຫຍ່ຂອງ ຫວຽດນາມ. ນີ້ກໍ່ແມ່ນສະຖານທີ່ຢ້ຽມຢາມ, ບັນເທິງ, ຢ່ອນອາລົມຂອງແຂກທ່ອງທ່ຽວ ແລະ ປະຊາຊົນ ຮ່າໂນ້ຍ. ສະໜາມຫຼວງ ບາດິ່ງ ກ່ອນນີ້ມີຊື່ວ່າ: Rond Point Pugininer. ເມື່ອທ່ານໝໍ ເຈີ່ນວັນລາຍ ຮັບດຳລົງຕຳແໜ່ງເປັນປະທານຄະນະກຳມະການຮ່າໂນ້ຍ ແຕ່ວັນທີ 20/7 – 19/8/1945, ທ່ານໄດ້ປ່ຽນຊື່ເປັນສະໜາມຫຼວງ ບາດິ່ງ ເພື່ອແນໃສ່ອາໄລຫານຳ້ໃຈບໍ່ຍອມຈຳນົນຕ້ານສັດຕູຜູ້ຮຸກຮານຂອງປະຊາຊົນ ຫວຽດນາມ ໃນການລຸກຮືຂຶ້ນ ບາດິ່ງ (1886 – 1887). ຫວັງວ່າ, ຂໍ້ມູນຂ່າວດັ່ງກ່າວຈະຊ່ວຍໃຫ້ເພື່ອນ ປາຄຳ ມີຄວາມເຂົ້າໃຈສ່ວນໃດສ່ວນໜຶ່ງກ່ຽວກັບສະຖານທີ່ປະຫວັດສາດນີ້.
ນອກຈາກຂ່າວ ແລະ ບົດຈະອອກອາກາດໃນອາທິດ, ທ່ານຜູ້ຟັງສາມາດຮັບຟັງລາຍການເພງກ່ຽວກັບວັນຊາດ ຫວຽດນາມ, ຍ້ອງຍໍປະທານ ໂຮ່ຈີມິນ ແລະ ປະເທດ ຫວຽດນາມ ທີ່ໄດ້ອອກອາກາດເວລາ 18 ໂມງ 30 ນາທີ ໃນຄື້ນ: 7285 KHz ແລະ ໃນເວລາ 21 ໂມງ ໃນຄື້ນ 1242 KHz.
ດັ່ງທີ່ກ່າວມາຂ້າງເຖິງແມ່ນເນື້ອໃນຄຳເຫັນຂອງທ່ານຜູ້ຟັງ ບາງທ່ານທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຝັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຫາລາຍການເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບ ມື້ນັບດີກວ່າເກົ່າ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov5@gmail.com. ທ່ານຜູ້ຟັງກໍສາມາດເຂົ້າເວັບໄຊ vovworld.vn ຫຼື vov5.vn ເພື່ອແລກປ່ຽນຄຳເຫັນ ແລະ ຈຳວິຈານຂອງຕົນຜ່ານບັນດາລາຍການທີ່ໄດ້ລົງໃນເວັບໄຊດັ່ງກ່າວ.