(vovworld) - ອາທິດຜ່ານມາ, ລາຍການພາກພາສາ ລາວ, ວິທະຍຸກະຈາຍສຽງ ຫວຽດນາມ ໄດ້ຮັບອີແມວ, ໂທລະສັບ ແລະ ຄຳວິຈານໃນເວັບໄຊ ກໍ່ຄື Facebook ຫຼາຍສະບັບຈາກທ່ານຜູ້ຟັງ ລາວ ແລະ ຫວຽດນາມ. ໃນນັ້ນ, ມີຜູ້ຟັງຫຼາຍທ່ານໄດ້ສົນໃຈເຖິງການເສັງ “ຊອກຮູ້ປະຫວັດສາດການພົວພັນພິເສດ ຫວຽດນາມ -ລາວ”. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກຂ້າພະເຈົ້າຂໍແນະນຳກ່ຽວກັບການເສັງດັ່ງກ່າວເພື່ອໃຫ້ຜູ້ຟັງ, ຜູ້ອ່ານໄດ້ຮັບຊາບ.
ອາທິດຜ່ານມາ, ເພື່ອນ ມີນາ ແກ້ວມາລີວົງ, ໄດ້ສົ່ງອີແມວມາຂອບໃຈບັນນາທິການຂອງພາກພາສາ ລາວ ທີ່ໄດ້ສະໜອງຂໍ້ມູນຂ່າວໃຫ້ລາວກ່ຽວກັບເກາະ ນາມຢູ. ເພື່ອນໃຫ້ຮູ້ວ່າ, ບັນດາຂໍ້ມູນຂ່າວນັ້ນມີປະໂຫຍດຫຼາຍສຳລັບການທ່ອງທ່ຽວໃນໄລຍະຈະມາເຖິງຂອງຄອບຄົວຕົນ.
ໃນອາທິດ, ເພື່ອນ ໄພລົດ, ອຳພາວັນ, ວອນແສງ ກໍ່ໄດ້ໂທລະສັບ, ສົ່ງອີແມວມາຍັງລາຍການອວຍພອນ 42 ປີແຫ່ງວັນປົດປ່ອຍພາກໃຕ້, ທ້ອນໂຮມປະເທດຊາດເປັນເອກະພາບ, ໃນນັ້ນ, ເພື່ອນໄພລົດໄດ້ຂຽນວ່າ: “ເນື່ອງໃນໂອກາດສະເຫຼີມສະຫຼອງ 42 ປີແຫ່ງວັນປົດປ່ອຍພາກໃຕ້, ທ້ອນໂຮມປະເທດຊາດເປັນເອກະພາບຂອງ ຫວຽດນາມ, ຂ້າພະເຈົ້າຂໍອວຍພອນໃຫ້ປະເທດຂອງພວກເພື່ອນນັບມື້ນັບຮັ່ງມີສວຍງາມເຂັ້ມແຂງ, ວັດທະນາຖາວອນ, ສັງຄົມສີວິໄລ ແລະ ປະຊາຊົນຍາມໃດກໍ່ອິ່ມໜຳສຳລານສົມບຸນພູມສຸກ.”
ຂໍຂອບໃຈເພື່ອນ ໄພລົດ, ອຳພາວັນ ແລະ ວອນແສງ ຫຼາຍໆ ທີ່ໄດ້ສົ່ງຄຳອວຍພອນອັນດີງາມສະຫງວນໃຫ້ປະເທດຊາດ ແລະ ປະຊາຊົນ ຫວຽດນາມ ຫຼາຍໆ. ພວກຂ້າພະເຈົ້າກໍ່ອວຍພອນໃຫ້ພວກເພື່ອນຈົ່ງມີສຸຂະພາບເຂັ້ມແຂງ ແລະ ຕິດຕາມລາຍການວິທະຍຸພາກພາສາລາວ ຂອງພວກເຮົາເປັນປະຈຳ.
ການປະຊຸມຂ່າວ ກ່ຽວກັບການເສັງ “ຊອກຮູ້ປະຫວັດສາດການພົວພັນແບບພິເສດ ຫວຽດນາມ - ລາວ”
|
ໃນອາທິດ, ເພື່ອນ ລັດດາພອນ, ວິລາວັນ, ໄພວອນ ພົມວິສານ, ຫງວຽນເຍີດລີງ, ເຈີ່ນວັນແທ່ງ… ໄດ້ໂທລະສັບ ແລະ ຂຽນອີແມວຫາລາຍການ, ໃນນັ້ນເພືອນ ໄພວອນ ພົມວິສານ, ນັກສຶກສາສະຖາບັນການຕ່າງປະເທດ ໄດ້ຂຽນວ່າ: “2, 3 ວັນກ່ອນນີ້, ຂ້າພະເຈົ້າໄດ້ຍິນວ່າຢູ່ ຫວຽດນາມ ໄດ້ປຸກລະດົມການເສັງ “ຊອກຮູ້ປະຫວັດສາດການພົວພັນແບບພິເສດ ຫວຽດນາມ - ລາວ”, ຂ້າພະເຈົ້າຢາກເຂົ້າຮ່ວມການເສັງນີ້ຫຼາຍ, ສະນັ້ນຫາອ້າຍເອື້ອຍບັນນາທິການແນະນຳລະອຽດກ່ຽວກັບການເສັງດັ່ງກ່າວໃຫ້ໄດ້ບໍ່?”
ເພື່ອນ ລັດດາພອນ, ວິລາວັນ, ໄພວອນ ພົມວິສານ, ຫງວຽນເຍີດລີງ, ເຈີ່ນວັນແທ່ງ ແລະ ບັນດາທ່ານຜູ້ຟັງ, ຜູ້ອ່ານທີ່ຮັກແພງ! ຫວ່າງແລ້ວນີ້, ຄະນະໂຄສະນາສຶກສາສູນກາງ ຫວຽດນາມ ໄດ້ສົມທົບກັບບັນດາອົງການກ່ຽວຂ້ອງຈັດຕັ້ງການປະຊຸມຂ່າວ ແນະນຳກ່ຽວກັບການເສັງ “ຊອກຮູ້ປະຫວັດສາດແຫ່ງການພົວພັນແບບພິເສດ ຫວຽດນາມ - ລາວ” ປີ 2017. ທີ່ການປະຊຸມຂ່າວ, ທ່ານ ຟ້າມວັນລີງ, ຮອງຫົວໜ້າຄະນະໂຄສະນາສຶກສາສູນກາງ, ຫົວໜ້າຄະນະຊີ້ນຳການເສັງໃຫ້ຮູ້ວ່າ: ການເສັງນີ້ແມ່ນການເຄື່ອນໄຫວແທດຈິງເພື່ອຕອບສະຫນອງ “ປີສາມັກຄີມິດຕະພາບ ຫວຽດນາມ - ລາວ 2017”, ສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ ແລະ 40 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ. ນີ້ແມ່ນຄັ້ງທີ 2 ການເສັງຊອກຮູ້ກ່ຽວກັບການພົວພັນແບບພິເສດ ຫວຽດນາມ - ລາວ ໄດ້ຮັບການຈັດຕັ້ງ. ການເສັງຄັ້ງທຳອິດໄດ້ຈັດຕັ້ງກ່ອນນີ້ 5 ປີ, ເນື່ອງໃນໂອກາດ 50 ປີແຫ່ງວັນສ້າງຕັ້ງການພົວພັນທາງການທູດ ແລະ 35 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມືລະຫວ່າງ 2 ປະເທດ, ແລະໄດ້ຮັບບົດເສັງກ່ວາ 3 ລ້ານບົດ. ການເສັງນີ້ຈະປະກອບສ່ວນໂຄສະນາ, ສຶກສາມູນເຊື້ອການປະຕິວັດ, ພິເສດແມ່ນມຸ່ງໄປເຖິງລຸ້ນໜຸ່ມຂອງ 2 ປະເທດ, ໂຄສະນາກ່ຽວກັບນ້ຳໃຈມິດຕະພາບແບບພິເສດ ຫວຽດນາມ -ລາວ, ລາວ - ຫວຽດນາມ ໃນວິວັດການຕໍ່ສູ້ປົດປ່ອຍຊາດ ແລະ ສ້າງສາປະເທດຊາດ, ປະກອບສ່ວນເຮັດໃຫ້ການພົວພັນລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດ ຫວຽດນາມ - ລາວເລິກເຊິ່ງຂຶ້ນຕື່ມເພີ່ມພູນຄູນສ້າງຄວາມເຂົ້າອົກເຂົ້າໃຈ, ນ້ຳໃຈມິດຕະພາບລະຫວ່າງ 2 ຊາດ ຫວຽດນາມ - ລາວ. ການເສັງນີ້ໄດ້ຮັບການຈັດຕັ້ງດ້ວຍ 2 ຮູບການຄື: ເສັງປາລະໄນ ແລະ ເສັງຂຽນ. ການເສັງປາລະໄນໄດ້ຮັບການຈັດຕັ້ງປະຈຳອາທິດໃນບັນດາສື່ເອເລັກໂຕນິກຄື: ໜັງສືພິມວາລະສານເອເລັກໂຕນິກຂອງພັກກອມມູນິດ ຫວຽດນາມ http://vietlao.dangcongsan.vn, ສື່ເອເລັກໂຕນິກເຍີນເຢີນ www.nhandan.org.vn; ສື່ເອເລັກໂຕນິກ ກວນໂດ້ຍເຍີນເຢີນ: www.qdnd.vn; ສື່ເອເລັກໂຕນິກວາລະສານໂຄສະນາສຶກສາ: www.tuyengiao.vn; ສື່ເອເລັກໂຕນິກ ຕ່ຽນຟອງ: www.tienphong.vn; ສື່ເອເລັກໂຕນິກແທງນຽນ: www.thanhnien.vn; ສື່ເອເລັກໂຕນິກ ຕ໋ວຍແຈ໋: www.tuoitre.vn. ແຕ່ລະອາທິດ, ຄະນະຈັດຕັ້ງຈະຕັ້ງຄຳຖາມປາລະໄນ 3 ຂໍ້ດ້ວຍຄຳຕອບທີ່ມີຢູ່ແລ້ວເພື່ອໃຫ້ເລືອກເອົາ. ຄະນະຈັດຕັ້ງກໍ່ໄດ້ກະກຽມຄຳຖາມກ່ວາ 100 ຂໍ້ໃຫ້ການເສັງຄັ້ງນີ້ ແລະ ຄາດວ່າ ການເສັງນີ້ຈະແກ່ຍາວເປັນເວລາ 7 ເດືອນ. ສຳລັບການເສັງຂຽນ, ຄະນະຈັດຕັ້ງໄດ້ຮຽກຮ້ອງ, ຕ້ອງແມ່ນບັນດາບົດຂຽນທີ່ຍັງບໍ່ທັນໄດ້ຮັບການລົງພິມ, ບໍ່ວ່າໃນໜັງສືພິມ, ສື່ເອເລັກໂຕນິກ, ວາລະສານ, ປື້ມໃດ ແລະ ສະແດງບັນດາເນື້ອໃນກ່ຽວຂ້ອງເຖິງການພົວພັນທີ່ສະໜິດແໜ້ນ ຫວຽດນາມ - ລາວ. ເປົ້າໝາຍເຂົ້າຮ່ວມການເສັງແມ່ນພົນລະເມືອງ ຫວຽດນາມ ແລະ ຕ່າງປະເທດທຸກຄົນ, ສົ່ງເສີມບັນດາພົນລະເມືອງ ຫວຽດນາມ ແລະ ລາວທີ່ພວມດຳລົງຊີວິດ, ຮ່ຳຮຽນ, ເຮັດວຽກຢູ່ຕ່າງປະເທດ ແລະ ເພື່ອນມິດສາກົນເຂົ້າຮ່ວມການເສັງ. ແຕ່ລະຄົນໄດ້ເຂົ້າຮ່ວມການເສັງດ້ວຍ 2 ຮູບການດັ່ງກ່າວ, ບໍ່ຈຳກັດປະລິມານບົດເສັງ. ການເສັງເລີ່ມແຕ່ວັນທີ 2/5/2017 ແລະ ສິ້ນສຸດລົງເມື່ອວັນທີ 22/12/2017.
ດັ່ງທີ່ກ່າວມາຂ້າງເທິງແມ່ນເນື້ອໃນຈົດໝາຍ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການ ໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດ ມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການຂອງພວກເຮົາໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼື ໂທລະສັບມາໂດຍກົງກໍ່ໄດ້ ຕາມເບີໂທ 0084.438.256.631 ຫຼື ອີແມວ laovov5@gmail.com. ທ່ານຜູ້ຟັງກໍ່ສາມາດ Comment ໃນເວັບໄຊ vovworld.vn ຂອງພວກເຮົາ.