ຄັດສະເໜີບາງເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ
Tran Tuan -
ໃນອາທິດຜ່ານມາ, ລາຍການພາກພາສາ ລາວ, ລະບົບກະຈາຍສຽງພາກພາສາຕ່າງປະເທດແຫ່ງຊາດ, ວິທະຍຸກະຈາຍສຽງ ຫວຽດນາມ ສືບຕໍ່ໄດ້ຮັບ ໂທລະສັບ, ອີແມວ, ຈົດໝາຍຈາກທ່ານຜູ້ຟັງທີ່ຝາກມາລາຍການດ້ວຍເນື້ອໃນດູດດຶມຫລາຍຢ່າງ ກ່ຽວກັບການເຄື່ອນໄຫວພົບປະແລກປ່ຽນມິດຕະພາບ, ການຮ່ວມມືວັດທະນະທຳ, ສິລະປະລະຫວ່າງ 2 ປະເທດ ຫວຽດນາມ - ລາວ, ລາວ - ຫວຽດນາມ. ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີບາງເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ.
ເພື່ອນ ວັນລາດາບຸດ ຢູ່ແຂວງ ຜົ້ງສາລີ ໄດ້ສົ່ງອີແມວມາຍັງລາຍການ ດ້ວຍເນື້ອໃນວ່າ: “ຂອບໃຈລາຍການພາກພາສາລາວ, ລະບົບກະຈາຍສຽງພາກພາສາຕ່າງປະເທດແຫ່ງຊາດ, VOV ໄດ້ແນະນຳໃຫ້ຂ້າພະເຈົ້າບາງຈຸດພົ້ນເດ່ັນກ່ຽວກັບສະຖານທີ່ທ່ອງທ່ຽວຢູ່ແຂວງ ດ້ຽນບຽນ, ຫວັງວ່າ ໃນການໄປຢ້ຽມຢາມແຂວງ ດ້ຽນບຽນ ທີ່ຈະມາເຖິງຂອງຂ້າພະເຈົ້າ ແລະ ຄອບຄົວຈະມີຄວາມສະດວກ ແລະ ຈັບອົກຈັບໃຈ”
ສູນກາງຄະນະຊາວໜຸ່ມກອມມູນິດ ໂຮ່ຈີມິນ ແລະ ສູນກາງຄະນະ
ຊາວໜຸ່ມປະຊາຊົນປະຕິວັດ ລາວ ຈະສົມທົບກັນເຄື່ອນໄຫວຫລາຍຢ່າງ
(ພາບ: TTXVN)
ໃນຈົດໝາຍຝາກມາລາຍການ, ເພື່ອ ປານຸສອນ ຈິນດາວົງ ຢູ່ແຂວງ ບໍລິຄຳໄຊ ແລະ ເພື່ອນ ເພັດສະຫວັນ ສົມສະນິດ ຢູ່ແຂວງ ອັດຕະປື ຂຽນວ່າ: ປີ 2016 ຜ່ານມາ, ສູນກາງຄະນະຊາວໜຸ່ມກອມມູນິດ ໂຮ່ຈີມິນ ແລະ ສູນກາງຄະນະຊາວໜຸ່ມປະຊາຊົນປະຕິວັດ ລາວໄດ້ຈັດຕັ້ງການເຄື່ອນໄຫວແທດຈິງຫລາຍຢ່າງ, ປະກອບສ່ວນຢ່າງຕັ້ງໜ້າເຂົ້າໃນການພັດທະນານ້ຳໃຈມິດຕະພາບແບບພິເສດຂອງປະຊາຊົນ ແລະ ຊາວໜຸ່ມ 2 ປະເທດ.ສະນັ້ນ ໃນປີ 2017 ມີບັນດາການເຄື່ອນໄຫວພົ້ນເດັ່ນໃດແດ່ ?
ເພື່ອນ ປານຸສອນ ຈິນດາວົງ ແລະ ເພື່ອນ ເພັດສະຫວັນ ສົມສະນິດ ທີ່ຮັກແພງໃນປີ 2017 ແມ່ນປີທີ່ມີຄວາມໝາຍສຳຄັນພິເສດທີ່ສຸດ, ໃນຂະນະທີ່ ພັກ, ລັດ ແລະ ປະຊາຊົນ 2 ປະເທດພວມແຂ່ງຂັນກັນ, ຈັດຕັ້ງການເຄື່ອນໄຫວຫລາຍຢ່າງ ເພື່ອສະເຫຼີມສະຫຼອງ 40 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ ແລະ 55 ປີແຫ່ງວັນສ້າງຕັ້ງການພົວພັນທາງການທູດ ແລະ. ສູນກາງຄະນະຊາວໜຸ່ມກອມມູນິດ ໂຮ່ຈີມິນ ແລະ ສູນກາງຄະນະຊາວໜຸ່ມປະຊາຊົນປະຕິວັດ ລາວ ຈະສົມທົບກັນຜັນຂະຫຍາຍການເຄື່ອນໄຫວຫລາຍຢ່າງ ເພື່ອຂ່ຳນັບຮັບຕ້ອນປີສາມັກຄີມິດຕະພາບ ຫວຽດນາມ - ລາວ 2017. 2 ຝ່າຍສືບຕໍ່ໂຄສະນາ, ສຶກສາອົບຮົມໃຫ້ຊາວໜຸ່ມ, ເຍົາວະຊົນ 2 ປະເທດກ່ຽວກັບການພົວພັນມິດຕະພາບທີ່ເປັນມູນເຊື້ອລະຫວ່າງ 2 ປະເທດ ຫວຽດນາມ - ລາວ. ສູນກາງຄະນະຊາວໜຸ່ມກອມມູນິດ ໂຮ່ຈີມິນ ສືບຕໍ່ສົມທົບກັບສູນກາງຄະນະຊາວໜຸ່ມປະຊາຊົນປະຕິວັດ ລາວ ຈັດຕັ້ງບັນດາຊຸດບຳລຸງກ່ຽວກັບວຽກງານຊາວໜຸ່ມໃຫ້ແກ່ພະນັກງານຄະນະຊາວໜຸ່ມ ລາວ. ໃນປີ 2017 2 ຝ່າຍຈະສືບຕໍ່ຈັດຕັ້ງລາຍການພົບປະນັກທຸລະກິດໜຸ່ມ ຫວຽດນາມ - ລາວ ຢູ່ ລາວ ເພື່ອນຳການເຄື່ອນໄຫວນີ້ ກ້າວເຂົ້າສູ່ລວງເລິກ ແລະ ມີປະສິດທິຜົນແທດຈິງກ່ວາອີກ. ຄຽງຂ້າງນັ້ນ ຈະຍູ້ແຮງການເຄື່ອນໄຫວພົບປະແລກປ່ຽນມິດຕະພາບລະຫວ່າງບັນດາຊາວໜຸ່ມຂັ້ນກະຊວງ 2 ປະເທດ ເພື່ອແລກປ່ຽນບົດຮຽນກ່ຽວກັບວຽກງານຊາວໜຸມ ແລະ ຂະບວນການຊາວໜຸ່ມ, ອະນຸຊົນ, ກໍ່ຄືຈັດຕັ້ງບັນດາການເຄື່ອນໄຫວອາສາສະໝັກ ເພື່ອສະຫວັດດີການສັງຄົມຢູ່ ລາວ. ປີ 2017 2 ຝ່າຍຈະລົງນາມໃນຂໍ້ຕົກລົງຮ່ວມມືໄລຍະ 2017 – 2022, ໃນນັ້ນ ຈະສຸມໃສ່ເຂົ້າໃນບັນດາເນື້ອໃນລະອຽດ, ແທດຈິງ ເພື່ອແນໃສ່ຍົກສູງປະສິດທິຜົນແຫ່ງການຮ່ວມມືລະຫວ່າງຄະນະຊາວໜຸ່ມ 2 ປະເທດ ຫວຽດນາມ - ລາວ.
ການປະກວດສຽງເພງ ຫວຽດນາມ - ອາຊຽນ 2017 ຮອບຊິງຊະນະເລີດ
ສ່ວນໃນອີແມວຂອງເພື່ອນ ຫງວຽນຮ່ວາຍນາມ ເຊິ່ງແມ່ນຊາວ ຫວຽດນາມ ອາໄສຢູ່ນະຄອນຫລວງ ວຽງຈັນ ດ້ວຍເນື້ອໃນວ່າ: “ຜ່ານມາ ຢູ່ນະຄອນຫລວງ ວຽງຈັນ ໄດ້ດຳເນີນການປະກວດສຽງເພງ ຫວຽດນາມ - ອາຊຽນ 2017 ຮອບຊິງຊະນະເລີດ. ຍ້ອນຄ້າງຄາກັບວຽກງານ ດັ່ງນັ້ນ ຂ້າພະເຈົ້າບໍ່ໄດ້ໄປຊົມ, ສະນັ້ນ ຂໍໃຫ້ພວກອ້າຍເອື້ອຍລາຍການພາກພາສາ ລາວ ຊ່ວຍໃຫ້ຂ້າພະເຈົ້າຮູ້ຕື່ມອີກກ່ຽວກັບໝາກຜົນຂອງການປະກວດດັ່ງກ່າວ”.
ເພື່ອນ ຫງວຽນຮ່ວາຍນາມ ທີ່ຮັກແພງ ! ການປະກວດສຽງເພງ ຫວຽດນາມ - ອາຊຽນ 2017 ໄດ້ຈັດຕັ້ງເພື່ອແນໃສ່ປຸກລະດົມຂະບວນການວັດທະນະທຳ, ສິລະປະຂອງຊາວ ຫວຽດນາມ ຢູ່ພາຍໃນ ແລະ ຕ່າງປະເທດ, ສ້າງຄວາມສາມັກຄີ, ການຮ່ວມມືລະຫວ່າງຊາວ ຫວຽດນາມ ຢູ່ບັນດາປະເທດ ອາຊຽນ. ພາຍຫລັງຮອບຄັດເລືອກຄະນະຈັດຕັ້ງເລືອກເຟັ້ນເອົານັກຮ້ອງສຽງດີທີ່ສຸດ16 ຄົນເຂົ້າຮ່ວມຮອບຊິງຊະນະເລີດ, ໃນນັ້ນ ມີນັກຮ້ອງໄທ 7 ຄົນ, ລາວ 4 ຄົນ ແລະ ຫວຽດນາມ 5 ຄົນ.
ທີ່ຮອບຊິງຊະນະເລີດ, ນັກຮ້ອງ 16 ຄົນໄດ້ສະແດງຫລາຍລາຍການເພງ ທີ່ເຂັ້ມຂົ້ນໄປດ້ວຍວັດທະນະທຳຂອງຊາດ, ສະແດງໃຫ້ເຫັນນ້ຳໃຈຮັກບ້ານເກີດເມືອງນອນ. ສິ້ນສຸດການປະກວດ ຄະນະຈັດຕັ້ງໄດ້ມອບລາງວັນທີ 1 ໃຫ້ແກ່ນັກຮ້ອງ ໄທ; ສອງລາງວັນທີ 2 ແມ່ນໄດ້ແກ່ນັກຮ້ອງ ຫວຽດນາມ ແລະ ນັກຮ້ອງ ໄທ; ສາມລາງວັນທີ 3 ແມ່ນໄດ້ແກ່ນັກຮ້ອງ ຫວຽດນາມ 2 ຄົນ ແລະ ນັກຮ້ອງ ລາວ 1 ຄົນ; ສ່ວນນັກຮ້ອງທີ່ຍັງເຫຼືອ 10 ຄົນແມ່ນໄດ້ລາງວັນຊົມເຊີຍ.
ນັກຮ້ອງທັງໝົດດັ່ງກ່າວ ຈະມີໂອກາດເຂົ້າຮ່ວມການປະກວດສຽງເພງ ຫວຽດນາມ ທົ່ວໂລກ, ຄາດຄະເນວ່າ ຈະດຳເນີນໃນທ້າຍປີ 2017 ຢູ່ປະເທດ ເຊັກໂກ. ຜົນສຳເລັດຂອງການປະກວດສຽງເພງ ຫວຽດນາມ - ອາຊຽນ 2017 ໄດ້ປະກອບສ່ວນຍົກສູງຊີວິດທາງດ້ານຈິດໃຈຂອງປະຊາຄົມຊາວ ຫວຽດນາມ ອາໄສຢູ່ຕ່າງປະເທດ, ສ້າງຄວາມສາມັກຄີ, ການຮ່ວມມືທີ່ສະໜິດຕິດພັນຂອງຊາວ ຫວຽດນາມ ໃນພາກພື້ນ ອາຊຽນ ແລະ ລະດົມກຳລັງໃຈພໍ່ແມ່ປະຊາຊົນຊາວ ຫວຽດນາມ ອ່ວາຍໜ້າເມືອຫາບ້ານເກີດເມືອງນອນ, ປະເທດຊາດ.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການ ໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດ ມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການຂອງພວກເຮົາໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼື ໂທລະສັບມາໂດຍກົງກໍ່ໄດ້ ຕາມເບີໂທ 0084.438.256.631 ຫຼື ອີແມວ laovov5@gmail.com. ທ່ານຜູ້ຟັງກໍ່ສາມາດ Comment ໃນເວັບໄຊ vovworld.vn ຂອງພວກເຮົາ.
Tran Tuan