(VOV5)- ງານວາງສະແດງພາບສີຂັດມັນ “ພິທີເຂົ້າຊົງ” ຂອງຈິດຕະກອນ ເຈີນຕ້ວນລອງ ຖືກໄຂຂຶ້ນໃນຕອນບ່າຍວັນທີ 8/3 ຢູ່ຫໍພິພິທະພັນວິຈິດສິນຫວຽດນາມ ທີ່ເຮືອນເລກທີ 66 ຖະໜົນຫງວຽນທ້າຍຫອກ, ເມືອງບາດີງ, ຮ່າໂນ້ຍ.
ນີ້ແມ່ນງານວາງສະແດງຈິດຕະກຳກ່ຽວກັບການເຫຼື້ອມໃສບູຊາພະແມ່ຄັ້ງທຳອິດພາຍຫຼັງທີ່ມໍລະດົກ “ ປະຕິບັດການເຫຼື້ອມໃສບູຊາພະແມ່ຕາມຝູຂອງຊາວຫວຽດນາມ ” ໄດ້ຮັບການເຊີດຊູໃນບັນຊີລາຍຊື່ “ມໍລະດົກວັດທະນະທຳບໍ່ມີຮູບຮ່າງເປັນຕົວແທນຂອງມວນມະນຸດ ”
ພາຍຫຼັງສຸມຈິດສຸມໃຈມາເປັນເວລາ 20 ປີ, ຈິດຕະກອນ ເຈີນຕ້ວນລອງ ໄດ້ເຮັດສຳເລັດຊຸດພາບສີຂັດມັນກ່ຽວກັບຫົວເລື່ອງ “ພິທີເຂົ້າຊົງ ” ຊຶ່ງລວມມີພາບສີຂັດມັນ 26 ແຜ່ນ.
ດ້ວຍຫົວເລື່ອງ “ນາງທຽມ” ຊຶ່ງສຸມໃສ່ພັນລະນາການເຄື່ອນໄຫວໃນພິທີເຂົ້າຊົງດ້ວຍພາບສີຂັດມັນ 26 ແຜ່ນ, ຜູ້ຊົມສາມາດເຂົ້າໃຈກ່ຽວກັບບັນຍາກາດໃນບັນດາຫ້ອງບູຊາ ຊຶ່ງສະແດງໃຫ້ເຫັນໂລກແຫ່ງຈິດວິນຍານທີ່ມີຫຼາກຫຼາຍສີສັນຂອງຊາວຫວຽດນາມ.
ເມື່ອເຫັນໄດ້ເຖິງປະເພນີການເຄົາລົບບູຊາພະແມ່ຜ່ານພາບສີຂັດມັນຂອງ ເຈີນຕ້ວນລອງ, ຜູ້ຊົມຖືກຫຼົງໄຫຼຕໍ່ບັນຍາກາດສັກສິດຂອງໂລກເທວະດາຟ້າແຖນຊຶ່ງໄດ້ປົກຄຸມບັນດາຮູບພາບນາງທຽມ, ທ້າວທຽມ.
ຜ່ານສີມືອັນຄ່ອງແຄ້ວຂອງຈິດຕະກອນ, ຮູບພາບນາງທຽມ, ທ້າວທຽມໄດ້ສວມບົດເປັນບັນດາພະອໍລະອັນ, ນາງເທວະດາດ້ວຍຊຸດອາພອນ, ການກະທຳ, ກິລີຍາທ່າທາງທີ່ແຕກຕ່າງກັນໃນພິທີເຂົ້າຊົງ. ນີ້ແມ່ນບັນດາພາບສີຂັດມັນກ່ຽວກັບພິທີເຂົ້າຊົງຊຸດທຳອິດຂອງພື້ນຖານວິຈິດຕະກຳຫວຽດນາມນັບແຕ່ກອ່ນເປັນຕົ້ນມາ.
ທ່ານເອກອັກຄະລັດຖະທູດ ຝ້າມແຊງເຈົາ, ຜູ້ຕາງໜ້າພິເສດຂອງນາຍົກລັດຖະມົນຕີຫວຽດນາມກ່ຽວກັບບັນດາບັນຫາອຸຍແນັສໂກ ມາຢ້ຽມຊົມງານວາງສະແດງ ແລະ ແບ່ງປັນວ່າ: “ຈິດຕະກອນ ເຈີນຕ້ວນລອງໄດ້ປະສົບຜົນສຳເລັດເມື່ອແນະນຳກ່ຽວກັບຫົວເລື່ອງ ພິທີເຂົ້າຊົງ. ບັນດາພາບສີຂັດມັນງາມຫຼາຍ, ງາມທັງດ້ານສີສັນ ແລະ ງາມກ່ຽວກັບວິທີການສະແດງ. ນີ້ແມ່ນງານວາງສະແດງທີ່ມີຄວາມດຶງດູດໃຈຢ່າງແຂງແຮງ. ຂ້າພະເຈົ້າຕີລາຄາສູງງານວາງສະແດງຄັ້ງນີ້ ”
ທ່ານເອກອັກຄະລັດຖະທູດ ຝ້າມແຊງເຈົາ, ຜູ້ຕາງໜ້າພິເສດຂອງນາຍົກລັດຖະມົນຕີຫວຽດນາມກ່ຽວກັບບັນດາບັນຫາອຸຍແນັສໂກ ມາຢ້ຽມຊົມງານວາງສະແດງ.
|
ງານວາງສະແດງພາບສີຂັດມັນ “ພິທີເຂົ້າຊົງ” ສາມາດດຶງດູດວົງການຈິດຕະກອນ, ຜູ້ນິຍົມຈິດຕະກຳ ແລະ ແຂກທ່ອງທ່ຽວມາຢ້ຽມຊົມຢ່າງຫຼວງຫຼາຍ.
|
ພາບສີຂັດມັນຈຳນວນໜຶ່ງໃນງານວາງສະແດງພາບສີຂັດມັນ “ພິທີເຂົ້າຊົງ” ຂອງຈິດຕະກອນ ເຈີນຕ້ວນລອງ
|
ຈິດຕະກອນ ເຈີນຕ້ວນລອງພ້ອມກັບພາບຈິດຕະກຳຂອງຕົນ.
|