(vovworld)- ຫວຽດນາມ ແມ່ນປະເທດມີຫລາຍງານບຸນ ດ້ວຍການເຄື່ອນໄຫວອຸດົມສົມບູນ ແລະຫລາຍຮູບຫລາຍສີ, ພິເສດ ໃນລະດູບານໃຫມ່ ແມ່ນຈຸດເວລາ ງານບຸນຕ່າງໆໄດ້ຈັດຂຶ້ນໃນທົ່ວປະເທດຫວຽດນາມ. ປະຊາຊົນ ແມ່ນພາກສ່ວນຕົ້ນຕໍ ຂອງງານບຸນ, ປະກອບສ່ວນສຳຄັນເຂົ້າໃນຜົນສຳເລັດຂອງງານບຸນ. ບົດຂຽນຂອງນັກຂ່າວ ງອກແອງທີ່ມີຫົວຂໍ້ວ່າ: ການອະນຸລັກຮັກສາວັດທະນະທຳຫວຽດນາມ ໃນງານບຸນທີ່ເປັນມູນເຊື້ອ.
ງານບຸນລີມ |
ຕາມການສະຖິຕິຂອງກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ແລ້ວ, ປະຈຸບັນ ທົ່ວປະເທດມີປະມານ 8.000 ງານບຸນ (ໃນນັ້ນ ກວ່າ 7000 ງານບຸນພື້ນເມືອງ, ກວ່າ 330 ງານບຸນປະຫວັດສາດປະຕິວັດ, ກວ່າ 540 ງານບຸນສາສະຫນາ ແລະ 10 ງານບຸນແມ່ນມາຈາກຕ່າງປະເທດ). ຄວາມຕ້ອງການຈັດຕັ້ງງານບຸນໄດ້ແຜ່ລາມອອກສູ່ບັນດາທ້ອງຖິ່ນເກືອບທັງໝົດໃນທົ່ວປະເທດ, ພິເສດແມ່ນງານບຸນວັດທະນະທຳທ່ອງທ່ຽວ. ການອະນຸລັກຮັກສາ ແລະ ຈັດຕັ້ງງານບຸນທີ່ເປັນມູນເຊື້ອ ດ້ວຍການເຂົ້າຮ່ວມຢ່າງກວ້າງຂວາງຂອງປະຊາຊົນທຸກຊັ້ນວັນນະ ປະກອບສ່ວນຢ່າງຕັ້ງຫນ້າເຂົ້າໃນການພົວພັນແລກປ່ຽນ, ການເຊື່ອມຕົວເຂົ້າກັບບັນດາພື້ນຖານວັດທະນະທຳຂອງໂລກ. ທ່ານ ຫງວຽນງອກທ້ຽນ, ລັດຖະມົນຕີກະຊວງວັດທະນະທຳ ກິລາ ແລະ ທ່ອງທ່ຽວ ຫວຽດນາມ ໃຫ້ຮູ້ວ່າ:
“ພວກເຮົາຈັດຕັ້ງບັນດາງານບຸນດ້ວຍຈຸດປະສົງແມ່ນດຶງດູດນັກທ່ອງທ່ຽວເຂົ້າຮ່ວມເປັນຈຳນວນຫລວງຫລາຍ. ບັນດາຄຸນຄ່າດ້ານວັດທະນະທຳທີ່ເປັນມູນເຊື້ອຂອງຊາດ ພວກເຮົາຕ້ອງອະນຸລັກຮັກສາ ແລະ ເສີມຂະຫຍາຍ. ບັນດາການອະນຸລັກຮັກສາ ແລະ ເສີມຂະຫຍາຍໃນຍຸກປະຈຸບັນແມ່ນເໝາະສົມກັບທ່າອ່ຽງເຊື່ອມໂຍງຫາກບໍ່ແມ່ນການອະນຸລັກຮັກສາ ແລະ ເສີມຂະຫຍາຍຄືກ່ອນນີ້.”
ຫນຶ່ງໃນບັນດາສິ່ງທີ່ນຳມາເຊິ່ງຄວາມດູດດື່ມຂອງງານບຸນ ນັ້ນແມ່ນການຈັດຕັ້ງລາຍການສະແດງສິລະປະ, ບັນດາການລະຫລິ້ນພື້ນເມືອງ ແລະ ກິລາ. ບັນດາການເຄື່ອນໄຫວນີ້ໄດ້ສ້າງບັນຍາກາດຟົດຟື້ນ, ຄວາມຈູບຈ້າວຫ້າວຫັນໃຫ້ແກ່ປະຊາຊົນ, ແລະ ນັກທ່ອງທ່ຽວເຂົ້າຮ່ວມງານບຸນ. ຜ່ານນັ້ນ ຍັງອະນຸລັກຮັກສາບັນດາຄຸນຄ່າວັດທະນະທຳຂອງຊາດ. ຜົນສຳເລັດຂອງງານບຸນກໍແມ່ນການນຳງານບຸນກັບຄືນສູ່ກົກເຄົ້າເງົ້າກໍຂອງມັນ, ຊື່ງແມ່ນສະຖານທີ່ມີການເຂົ້າຮ່ວມຢ່າງເປັນເຈົ້າການ, ມີຫົວຄິດປະດິດສ້າງຂອງປະຊາຊົນເປັນຈຳນວນຫລວງຫລາຍ. ຮອງສາດສະດາຈານ, ປອ ດັ້ງວັນບາຍ, ຮອງປະທານສະມາຄົມມໍລະດົກວັດທະນະທຳຫວຽດນາມ ຖືວ່າ:
“ໃນງານບຸນມີເຂດວັດທະນະທຳກ້ວາງຂວາງ ເພື່ອສຶກສາອົບຮົມມູນເຊື້ອ ກິນເຂົ້າຄິດຮອດຄຸນນາ ກິນປາຄິດຮອດຄຸນນ້ຳ. ການສຶກສາມໍລະດົກຕ້ອງກາຍເປັນໂຄງການຂອງຊາດ. ຍ້ອນມີການສຶກສາມໍລະດົກນັ້ນ ບັນດາແບບຢ່າງດີເດັ່ນຊື່ງຄົນລຸ້ນກອ່ນຍົກອອກມາໃນງານບຸນຈະຊືມເລິກເຂົ້າຈິດໃຈຂອງແຕ່ລະບຸກຄົນ, ສະກັດກັ້ນການເສື່ອມທາດຂາດຄຸນດ້ານຄຸນສົມບັດ, ທຳລາຍສີສັນວັດທະນະທຳໃນວິວັດການເຊື່ອມໂຍງ”
ການຂັບແຈ່ວໃນງານບຸນ
|
ງານບຸນໄດ້ສ່ອງແສງເຖິງບັນດາການດຳເນີນຊີວິດ, ຄວາມມຸ້ງຫວັງພ້ອມກັບຄວາມເກັ່ງກ້າສາມາດຂອງປະຊາຊົນໃນຫລາຍດ້ານຂອງຊີວິດການເປັນຢູ່; ພ້ອມກັນນັ້ນ ຜ່ານງານບຸນພູມປັນຍາ, ສິນລະທຳ, ອາລົມຈິດຂອງປະຊາຊົນໄດ້ຮັບການເຊີດຊູ. ຜ່ານການຈັດຕັ້ງງານບຸນ ປະຊາຊົນໄດ້ຊົມໃຊ້ ແລະ ມີຫົວຄິດປະດິດສ້າງໃນດ້ານວັດທະນະທຳກວ່າ. ທ່ານນາງ ຟ້າມທິລານແອງ, ຫົວຫນ້າຂະແຫນງຄຸ້ມຄອງມໍລະດົກ, ພະແນກວັດທະນະທຳ, ກິລາຮ່າໂນ້ຍ ໃຫ້ຮູ້ວ່າ:
“ເສີມຂະຫຍາຍຄຸນຄ່າຂອງງານບຸນໃນຊີວິດ, ພວກເຮົາຕ້ອງເພີ່ມທະວີວຽກງານໂຄສະນາ, ພິເສດແມ່ນໂຄສະນາຜ່ານບັນດາພາຫະນະສື່ມວນຊົນ. ການໂຄສະນາບໍ່ພຽງແຕ່ເພື່ອໃຫ້ປະຊາຊົນເຂົ້າຮ່ວມງານບຸນເທົ່ານັ້ນ ຫາກຍັງໂຄສະນາເພື່ອໃຫ້ປະຊາຊົນມີສະຕິໃນການຮັກສາວິຖີຊີວິດດ້ານວັດທະນະທຳ, ສີວິໄລໃນການດຳເນີນງານບຸນ. ເມື່ອປະຊາຊົນຮັບຮູ້ໄດ້ຄຸນຄ່າຂອງງານບຸນ, ຮູ້ຈັກເຖິງສິ່ງທີ່ດີງາມ ນັ້ນກໍແມ່ນເຂົາເຈົ້າໄດ້ປະກອບສ່ວນເຂົ້າໃນການອະນຸລັກຮັກສາ, ເສີມຂະຫຍາຍຄຸນຄ່າຂອງງານບຸນ.”
ຫວຽດນາມ ມີ 54 ຊົນເຜົ່າ. ແຕ່ລະຊົນເຜົ່າໃນປະເທດຫວຽດນາມ ມີບັນດາງານບຸນທີ່ແຕກຕ່າງກັນ, ນັ້ນແມ່ນສີສັນ, ຮີດຄອງປະເພນີ, ແມ່ນຈຸດພິເສດສະເພາະ ຂອງແຕ່ລະຊົນເຜົ່າ. ງານບຸນໄດ້ສືບທອດຈາກຄົນລຸ້ນນີ້ໄປສູ່ຄົນລຸ້ນອື່ນ, ແມ່ນຄວາມງາມດ້ານວັດທະນະທຳຂອງຄົນລຸ້ນກ່ອນທີ່ມີມານັບພັນປີ. ເລື່ອງຈັດຕັ້ງບັນດາການເຄື່ອນໄຫວຂອງງານບຸນຢ່າງມີປະສິດທິຜົນ ແມ່ນມີຄຸນປະໂຫຍດໃນການຂຸດຄົ້ນຄວາມສາມາດບົ່ມຊ້ອນດ້ານການທ່ອງທ່ຽວ ແລະ ຍັງປະກອບສ່ວນຢ່າງຕັ້ງຫນ້າເຂົ້າໃນການພົວພັນແລກປ່ຽນດ້ານວັດທະນະທຳຫວຽດນາມ ກັບບັນດາພື້ນຖານວັດທະນະທຳໃນພາກພື້ນ ແລະ ໃນໂລກ.