(vovworld)- ມີຖະຫນົນນ້ອຍສາຍຫນຶ່ງຢູ່ໃຈກາງ ນະຄອນ ໂຮ່ຈິມີນ - ນັ້ນແມ່ນຖະຫນົນ ຫງວຽນວັນບີງ. ປະຈຸບັນ ຖະຫນົນສາຍນີ້ມີຊື່ວ່າ “ ຖະຫນົນປື້ມນະຄອນ ໂຮ່ຈິມີນ”. ເພາະວ່າ ໃນກວ່າຫນຶ່ງປີຜ່ານມາ, ຖະຫນົນສາຍນີ້ໄດ້ກາຍເປັນສະຖານທີ່ວາງສະແດງປື້ມ ແລະ ບັນດາຜະລິດຕະພັນວັດທະນະທຳທີ່ຕິດພັນກັບປື້ມ, ພ້ອມທັງແມ່ນບ່ອນເຕົ້າໂຮມ, ພົວພັນແລກປ່ຽນຂອງບັນດາຜູ້ນິຍົມອ່ານປື້ມ. ໃນລາຍການວັດທະນະທຳພາກນີ້ ພວກເຮົາຂໍແນະນຳບົດຂຽນຂອງນັກຂ່າວ ຮ່ວາງຫາຍ ທີ່ມີຫົວຂໍ້ວ່າ: ຖະຫນົນປື້ມ - ຖະຫນົນແຫ່ງລະດູບານໃຫມ່.
ຈຳນວນປື້ມນຳມາວາງສະແດງຢູ່ຖະຫນົນ ຫງວຽນວັນບີງ ແມ່ນນັບໝື່ນໆຫົວ. ປື້ມວາງເຕັມ 2 ສອງຟາກທາງ ແລະ ປະດັບປະດາຢູ່ເທິງປ້າຍໂຄສະນາເຄື່ອນທີ່ຢູ່ໃຈກາງນະຄອນ. ມີປື້ມຫນາ, ປື້ມປາງຄົບປະເພດ, ປື້ມຫນ້າປົກແຂງ, ຫນ້າປົກອ່ອນ, ນັບທັງປື້ມພາບເລື່ອງສຳລັບເດັກນ້ອຍທີ່ມີສີສັນຫລາກຫລາຍກໍໄດ້ວາງສະແດງຄືດັ່ງຄຳເຊື້ອເຊີນແຂກເຂົ້າຊົມ. ສະນັ້ນ ຜູ້ອ່ານທຸກຄົນທີ່ມາຢ້ຽມຊົມຖະຫນົນປື້ມສາຍນີ້ຜູ້ໃດກໍຢາກຊື້ໃຫ້ຕົນເອງປື້ມຫົວຫນຶ່ງ, ພິເສດແມ່ນໄວຫນຸ່ມ. ເອື້ອຍ ແຄງມີງ ຜູ້ອ່ານຢູ່ ນະຄອນໂຮ່ຈິມີນ ໃຫ້ຮູ້ວ່າ:
ຖະຫນົນປື້ມຫງວຽນວັນບີງ
|
“ຂ້າພະເຈົ້າເຫັນວ່າ ຖະຫນົນປື້ມໄດ້ສ້າງຄວາມດູດດື່ມທີ່ສຸດ, ຢູ່ທີ່ນີ້ຂ້າພະເຈົ້າໄດ້ອ່ານປື້ມຫລາຍປະເພດ ແລະ ອາດຈະຊື້ປື້ມຫລາຍຫົວໃຫ້ຕົນ. ຫວັງວ່າ ຈະ ມີຖະຫນົນປື້ມຫລາຍສາຍຄືແນວນີ້ເພື່ອໃຫ້ເພື່ອນຫນຸ່ມສາມາດອ່ານປື້ມໄດ້ຫລາຍກວ່າ.”
ແນວຄວາມຄິດສ້າງຕັ້ງຖະຫນົນປື້ມແມ່ນຂອງ ປອ ກວກທູຫງວຽດ, ອະດີດ ຜູ້ອຳນວຍການ ສຳນັກພິມຈຳຫນ່າຍຫນຸ່ມ ນະຄອນ ໂຮ່ຈິມີນ . ຍ້ອນມີຄວາມເມົາມົວ ແລະ ສະຫນິດຕິດພັນກັບປື້ມມາເປັນເວລາຫລາຍປີ, ຍາມໃດເອື້ອຍກໍມີຄວາມໄຝ່ຝັນຢາກມີຖະຫນົນປື້ມສາຍຫນຶ່ງຢູ່ໃຈກາງນະຄອນ. ເອື້ອຍ ກວກທູ ຫງວຽດ ແບ່ງປັນວ່າ:
“ຂ້າພະເຈົ້າ ແມ່ນຊາວ ໄຊງ່ອນ, ສະນັ້ນ ນັບແຕ່ຄາວຍັງນ້ອຍຂ້າພະເຈົ້າໄດ້ມີຄວາມປະທັບໃຈທີ່ສຸດຕໍ່ບັນດາຄຸ້ມຖະຫນົນທີ່ມີຮ້ານຂາຍປື້ມຫລາຍຮ້ານຄື: ຖະຫນົນ ເລເລີ້ຍ, ຫງວຽນເຫ້ວ, ດັ້ງທິຍູ…ໄດ້ສ້າງເປັນຂີດໝາຍໃຫ້ຂ້າພະເຈົ້າ. ເມື່ອເປັນພະນັກງານບໍລິຫານ ແລະໄດ້ໄປປະຕິບັດງານຢູ່ຕ່າງປະເທດຫລາຍເທື່ອ, ບັນດາຄຸ້ມຖະຫນົນປື້ມຢູ່ ຍີ່ປຸ່ນ, ຝລັ່ງ ຂ້າພະເຈົ້າ ມີຄວາມປະທັບໃຈ ທີ່ສຸດ. ສະນັ້ນ ຂ້າພະເຈົ້າຈຶ່ງມີແນວຄວາມຄິດຢາກສ້າງຕັ້ງຖະຫນົນປື້ມສາຍຫນຶ່ງຢູ່ ນະຄອນໂຮ່ຈິມີນ. ແນວຄວາມຄິດນັ້ນຂ້າພະເຈົ້າໄດ້ແບ່ງປັນໃຫ້ໝູ່ເພື່ອນ ແລະ ໄດ້ຮັບການສະຫນັບສະຫນູນຈາກ ຜູ້ຮ່ວມງານຫລາຍຄົນ. ຫລັງຈາກນັ້ນກໍໄດ້ຮັບຄວາມເອົາໃຈໃສ່, ສ້າງເງື່ອນໄຂຈາກການນຳນະຄອນໃນການສ້າງຕັ້ງຖະຫນົນປື້ມສາຍນີ້.”
ນັກທ່ອງທ່ຽວແວ່ຢ້າມຖະຫນົນປື້ມ
|
ໄລຍະຕົ້ນປີ 2016, ຖະຫນົນປື້ມໄດ້ຮັບການສ້າງຕັ້ງຂຶ້ນ ດ້ວຍ ຮ້ານຂາຍປື້ມ 19 ຮ້ານ ແລະ ຮ້ານຂາຍປື້ມພ້ອມກັບກາເຟ 2 ຮ້ານ, ເຂດວາງສະແດງປື້ມເກົ່າແຫ່ງຫນຶ່ງໄດ້ຮັບການອອກແບບຢ່າງງາມຕາ. ບັນດາຫົວຫນ່ວຍເຂົ້າຮ່ວມຖະຫນົນປື້ມໄດ້ຮັບການຄັດເລືອກຢ່າງລະອຽດລະອໍ ສ່ວນຫລາຍແມ່ນບັນດາສຳນັກພິມຈຳຫນ່າຍປື້ມ ທີ່ມີຊື່ສຽງ ແລະ ມີຄຸນນະພາບສູງຄື: ສຳນັກພິມຈຳຫນ່າຍຫນຸ່ມ, ສຳນັກພິມຈຳຫນ່າຍວັດທະນະທຳ ວັນນະສິນ ນະຄອນ ໂຮ່ຈິມີນ, ສຳນັກພິມຈຳຫນ່າຍ ກີມດົງ ພ້ອມກັບບັນດາວິສາຫະກິດພິມຈຳຫນ່າຍປື້ມຄື: ຈີຫວຽດ, ຫຍ໋ານາມ… ເຖິງວ່າແມ່ນ ຖະຫນົນປື້ມ, ແຕ່ຢູ່ທີ່ນີ້ ບໍ່ພຽງແຕ່ແມ່ນບ່ອນຄ້າຂາຍປື້ມເທົ່ານັ້ນ, ຫາກຍັງແມ່ນບ່ອນເຕົ້າໂຮມ, ພົວພັນແລກປ່ຽນຂອງບັນດາຜູ້ ນິຍົມ ອ່ານປື້ມໃນທົ່ວປະເທດອີກດ້ວຍ. ອ້າຍຫງວຽນດີງຮຸ່ງ ໃຫ້ຮູ້ວ່າ:
“ຂ້າພະເຈົ້າ ມາຈາກ ນະຄອນ ດາຫນັງ. ເມື່ອມາຢ້ຽມຊົມຖະຫນົນສາຍນີ້ ຂ້າພະເຈົ້າເຫັນວ່າ ຖະຫນົນສາຍນີ້ແມ່ນສະຫງົບງຽບທີ່ສຸດ, ມີປື້ມຫລາຍປະເພດ ແລະ ຮ້ານຂາຍປື້ມຫລາຍຮ້ານໄດ້ຮັບການປະດັບປະດາຢ່າງສວຍງາມ. ຂ້າພະເຈົ້າຮູ້ສຶກມີຄວາມສະຫວາດສະເຫວີຍທີ່ສຸດເມື່ອຢູ່ໃຈກາງນະຄອນທີ່ອຶກກະທຶກຄຶກໂຄມຄືແນວນັ້ນ.”
ບໍລິເວນວາງສະແດງ ແລະ ຂາຍປື້ມຢູ່ຖະຫນົນສາຍນີ້ບໍ່ກວ້າງປານໃດ ແຕ່ກໍສາມາດຈັດຕັ້ງບັນດາການເຄື່ອນໄຫວພົວພັນແລກປ່ຽນກັບນັກປະພັນ ການແນະນຳບັນດາຜະລິດຕະພັນ, ວາງສະແດງພາບສິລະປະ, ເດີນແບບອາພອນສະໄຫມ, ບັນດາ talkshow ກ່ຽວຂ້ອງເຖິງປື້ມ. ເອື້ອຍ ຫວູຫາຍລີ, ຜູ້ອ່ານມາຈາກນະຄອນຫລວງ ຮ່າໂນ້ຍ ມີຄວາມແປກປະຫລາດໃຈເມື່ອເຫັນວ່າ ຢູ່ ໃຈກາງນະຄອນທີ່ອຶກກະທຶກຄຶກໂຄມກວ່າໝູ່ໃນທົ່ວປະເທດ ພັດມີຖະຫນົມປື້ມທີ່ຫນ້າປະທັບໃຈຄືແນວນີ້. ເອື້ອຍ ຫວູຫາຍລີ ແບ່ງປັນວ່າ:
“ຂ້າພະເຈົ້າມາຈາກຮ່າໂນ້ຍ. ເມື່ອມາຢ້ຽມຢາມຖະຫນົນປື້ມສາຍນີ້ ຂ້າພະເຈົ້າກໍຢາກຊອກຫາສິ່ງທີ່ຕົນເອງໄດ້ອ່ານໃນເມື່ອກ່ອນແຕ່ໄດ້ຫລົງລືມໝົດແລ້ວ. ຂ້າພະເຈົ້າມີຄວາມສົນໃຈທີ່ສຸດເຖິງປື້ມເກົ່າ, ປື້ມວັດທະນະທຳລັດເຊຍ. ຂ້າພະເຈົ້າຮູ້ສຶກແປກປະຫລາດໃຈທີ່ສຸດ ເມື່ອເຫັນວ່າ ຢູ່ໃຈກາງນະຄອນ ໂຮ່ຈິມີນ ຍັງຄົງຊອກໄດ້ບັນດາປື້ມຊື່ງຕົນເອງນິຍົມ.”
ຖະຫນົນປື້ມ ນະຄອນ ໂຮ່ຈິມີນ ໄດ້ກາຍເປັນຈຸດນັດພົບອັນດູດດື່ມຂອງນັກທ່ອງທ່ຽວຢູ່ພາຍໃນ ແລະ ຕ່າງປະເທດ. ປະຊາຊົນນະຄອນ ໂຮ່ຈິມີນ ມີຄວາມປະທັບໃຈທີ່ສຸດເມື່ອໄດ້ເຫັນ ທ່ານນາຍົກລັດຖະມົນຕີ ໄອແລນ ແລະ ພັນລະຍາ ດື່ມກາເຟ ຢູ່ ຖະຫນົນປື້ມ ຫລື ໄດ້ເຫັນທ່ານນາງຫົວຫນ້າສະຖານກົງສູນໃຫຍ່ ອາເມລິກາ ນຸ່ງຊຸດເສື້ອຍາວ ຫວຽດນາມ ໄປຢ້ຽມຊົມຖະຫນົນປື້ມ. ແລະ ເມື່ອມາຢ້ຽມຢາມ ນະຄອນໂຮ່ຈິມີນ, ລັດຖະມົນຕີການຕ່າງປະເທດ ອັງກິດ ກໍໄດ້ແວ່ຢາມຖະຫນົນປື້ມສາຍນີ້.
ຜົນສຳເລັດຂອງຖະຫນົນປື້ມສາຍທຳອິດຂອງທົ່ວປະເທດໄດ້ສ້າງເງື່ອນໄຂມໃຫ້ການເປີດກວ້າງຮູບແບບນີ້, ກ່ອນອື່ນໝົດແມ່ນສ້າງຖະຫນົນປື້ມຢູ່ເມືອງ 5, ຊື່ງແມ່ນສູນເສດຖະກິດໃຫຍ່ຂອງນະຄອນ ໂຮ່ຈິມີນ. ຈາກຮູບແບບນີ້, ນະຄອນ ດາຫນັງ ພວມກໍ່ສ້າງສວນປື້ມ, ສ່ວນນະຄອນ ຮ່າໂນ້ຍ ຫາກໍ່ສ້າງຕັ້ງຄຸ້ມຖະຫນົນປື້ມທຳອິດຂອງນະຄອນຫລວງເມື່ອເດືອນ 12/2016. ໃນ 10 ເຫດການດີເດັ່ນທີ່ໄດ້ຮັບການຄັດເລືອກໃນປີ 2016 ຂອງນະຄອນ ໂຮ່ຈິມີນ ມີຊື່ ຖະຫນົນປື້ມ. ເປັນທີ່ຈະແຈ້ງແລ້ວວ່າ ຖະຫນົນປື້ມນະຄອນ ໂຮ່ຈິມີນ ໄດ້ຕອບສະຫນອງຄວາມຕ້ອງການກ່ຽວກັບດ້ານວັດທະນະທຳອ່ານໃຫ້ແກ່ປະຊາຊົນຢ່າງທັນການ ແລະ ກໍເປັນຈຸດທີ່ດີງາມໃນລະດູບານໃຫມ່ຢູ່ນະຄອນໂຮ່ຈິມີນ.