ລາຍການນີ້ເພື່ອແນໃສ່ຮັບໃຊ້ນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດເມື່ອມາຢ້ຽມຢາມນະຄອນຫຼວງ. ບົດຂຽນ  “ລາຍການ “ວີນຍານເຂດບ້ານນາຫວຽດນາມ“ ນຳເອົາດົນຕີພື້ນເມືອງຫວຽດນາມມາໃຫ້ຜູ້ຊົມ“ ຂອງ ບູ່ຍຮັ່ງນັກຂ່າວວິທະຍຸກະຈາຍສຽງຫວຽດນາມ.

ອະລຸນໃໝ່

ທ່ີທ່ານຫາກໍ່ຮັບຟັງຜ່ານໄປແລ້ວນັ້ນແມ່ນບັນດານ້ຳສຽງໃນລາຍການ “ວິນຍານເຂດບ້ານນາ ຫວຽດນາມ“, ເຊິ່ງແມ່ນລາຍການສະແດງດົນຕີພື້ນເມືອງ, ແຫ່ງທີ່ຜູ້ຊົມມີໂອກາດໄດ້ພົບປະກັບບັນດານັກສິລະປະ, ສິລະປະກອນທີ່ມີຄວາມເກັ່ງກ້າສາມາດຂອງ ຫວຽດນາມ, ເຂົາເຈົ້າເຄີຍໄດ້ໄປສະແດງຢູ່ festival ດົນຕີສາກົນຫຼາຍຄັ້ງແລ້ວ. ເຄື່ອງດົນຕີພື້ນເມືອງທີ່ເຂົາເຈົ້າເຄີຍໃຊ້ມີຫຼາຍປະເພດເຊັ່ນ: ພິນສາຍດຽວ, ສີຊໍ, ພິນ 16 ສາຍ, ພິນ 36 ສາຍ, ປີ່, ຂຸ່ຍ, ກອງ ແລະ ເຄື່ອງດົນຕີທີ່ເຮັດດ້ວຍໄມ້ໄຜ່, ໄມ້ເຮ້ຍ, ໄມ້ທີ່ເປັນເອກະລັກສະເພາະເກືອບ 20 ປະເພດ. ພິເສດແມ່ນບັນດາເຄື່ອງໃຊ້ໃນຊີວິດປະຈຳຄື: ໝໍ້,  ຟອຍກວາດກໍ່ປະກົດໃນ “ວິນຍານເຂດບ້ານນາ ຫວຽດນາມ“ ຄືດັ່ງເຄື່ອງດົນຕີປະເພດໜຶ່ງ. ນັກປະພັນດົນຕີ ມາຍຕວຽດຮວາ, ຜູ້ອຳນວຍການສູນຄົ້ນຄ້ວາອະນຸລັກຮັກສາ ແລະ ເສີມຂະຫຍາຍດົນຕີພື້ນເມືອງ ໃຫ້ຮູ້ວ່າ

 “ພວກຂ້າພະເຈົ້າປະຕິບັດລາຍການນີ້ດ້ວຍຄວາມປາຖະໜາຢາກນຳເອົາຄຸນຄ່າທີ່ເປັນມູນເຊື້ອຂອງດົນຕີ ຫວຽດນາມເຖິງນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດ. ໃນລາຍການດົນຕີ ພື້ນເມືອງ “ວິນຍານເຂດບ້ານນາ ຫວຽດນາມ“, ພວກຂ້າພະເຈົ້າໄດ້ສ້າງບັນຍາກາດເຂດບ້ານນາທາງພາກເໜືອ ດ້ວຍບັນດາເຄື່ອງດົນຕີ, ການອອກແບບ, ການຈັດວາງເວທີສະແດງ, ສຽງປະກອບ ແລະ ແສງສີ“.

ງານບຸນໝູ່ບ້ານ

“ວິນຍານເຂດບ້ານນາ ຫວຽດນາມ“ ແມ່ນເລື່ອງລາວດົນຕີທີ່ສົມບູນ ເຊິ່ງໄດ້ຮັບການເຊື່ອມຕໍ່ກັນຜ່ານ 7 ພາກ: ອະລຸນໃໝ່, ຕະຫຼາດເຂດບ້ານນາ, ຍາມເກັບກ່ຽວ, ຍາມສວາຍ, ອາຊີບຫັດຖະກຳ, ນາງສາວສະຜົມ, ງານບຸນໝູ່ບ້ານ. ລາຍການສະແດງໃຫ້ເຫັນຊີວິດການເປັນຢູ່, ການອອກແຮງງານ, ການດຳເນີນຊີວິດທາງດ້ານວັດທະນະທຳ, ການເຫຼື້ອມໄສເຊື່ອຖືຂອງປະຊາຊົນຢູ່ເຂດທົ່ງພຽງທາງພາກເໜືອ ຫວຽດນາມໃນຕະຫຼອດວັນ ນັບແຕ່ຍາມຮຸ່ງເຊົ້າຕະຫຼອດຮອດຍາມກາງຄືນ. ນັກປະພັນດົນຕີ ມາຍຕວຽດຮວາ ໃຫ້ຮູ້ຕື່ມອີກວ່າ:

  “ຜ່ານ 7 ພາກນັ້ນ, ຜູ້ຊົມຈະເຫັນໄດ້ສິ່ງທຳມະດາລຽບງ່າຍທີ່ສຸດຂອງປະຊາຊົນເຂດບ້ານນາທາງພາກເໜືອ ຫວຽດນາມ. ໃນໂຮງລະຄອນ ຮົ່ງຮ່າ, ດ້ວຍເວລາສະແດງພຽງ 50 ນາທີເທົ່ານັ້ນ, ແຕ່ພວກຂ້າພະເຈົ້າພັດຢາກແນະນຳຜະລິດຕະພັນດ້ານວັດທະນະທຳເຖິງນັກທ່ອງທ່ຽວເມື່ອເຂົາເຈົ້າມາຢ້ຽມຢາມ ຮ່າໂນ້ຍ“.

ຍາມເກັບກ່ຽວ

ລາຍການໄດ້ນຳໃຊ້ທັງ 4 ຮູບການດົນຕີພື້ນເມືອງຢ່າງຄ່ອງແຄ້ວຄື: ຂັບເຈົ່າວັນບູຊາເຈົ້າແມ່ ແລະ ຂັບກວານຫໍ້. ຜ່ານສິລະປະດົນຕີ, ສົມທົບກັບການສະແດງເວທີ ດ້ວຍກິລິຍາທ່າທາງຊື່ຕົງ, ໃກ້ຊິດຕິດແທດກັບທຳມະຊາດ, ລາຍການສະແດງໄດ້ສ້າງຄວາມປະທັບໃຈໃຫ້ແກ່ຜູ້ຊົມ. ນັກປະພັນດົນຕີ ມາຍຕວຽດຮວາ, ແບ່ງປັນວ່າ

          “ວິນຍານເຂດບ້ານນາ ຫວຽດນາມ“ ແມ່ນລາຍການສັງລວມ, ບໍ່ພຽງແຕ່ມີການສະແດງດົນຕີທຳມະດາເທົ່ານັ້ນ, ຫາກຍັງມີບັນດາເຄື່ອງດົນຕີສຳຮອງຄືແສງສີ, ຜ້າກັ້ງ…ພວກຂ້າພະເຈົ້າຕ້ອງອອກແບບ, ແຕ້ມຜ້າກັ້ງດ້ວຍມືເພື່ອສ້າງຄວາມປ່ຽນໃໝ່ໃນການສຳຜັດດ້ວຍຕາໃຫ້ແກ່ຜູ້ຊົມ; ຊຳ້ບໍ່ໜຳພວກຂ້າພະເຈົ້າຍັງມີສຽງປະກອບທີ່ເຄີຍມີຢູ່ເຂດຊົນນະບົດຄື: ສຽງແມງໄມ້, ສຽງນົກຮ້ອງ, ສຽງນ້ຳໄຫຼ… ນັ້ນແມ່ນຈຸດທີ່ເປັນເອກະລັກສະເພາະເຊິ່ງໄດ້ພາໃຫ້ຜູ້ຊົມຮູ້ສຶກຄືວ່າຕົນເອງພວມກັບຄືນໄລຍະຍັງເປັນເດັກນ້ອຍ.ພິເສດແມ່ນບັນດາຜູ້ທີ່ໄດ້ຍ້າຍໄປຈາກບ້ານເກີດເມືອງນອນ“.

ຍາມສວາຍ

            “ວິນຍານເຂດບ້ານນາ ຫວຽດນາມ“ ແມ່ນໝາກຜົນແຫ່ງການອອກແຮງງານດ້ານສິລະປະຂອງບັນດານັກສິລະປິນ,  ນັກສິລະປະກອນ, ນັກຄົ້ນຄ້ວາດົນຕີພື້ນເມືອງ ຫວຽດນາມ, ດ້ວຍຄວາມຫວັງຢາກນຳເອົາສິ່ງທີ່ມ່ວນ ແລະ ດີງາມຂອງວັດທະນະທຳພື້ນເມືອງມາໃຫ້ຜູ້ຊົມ. ນັກສິລະປະຕີກອງ ຟ້າມດິ່ງຢຸງ, ຢູ່ໂຮງລະຄອນຕຸກກະຕາ ທັງລອງ, ໃຫ້ຮູ້ວ່າ:

       “ແນວຄວາມຄິດຂອງກຸ່ມແມ່ນຈັດລາຍການດົນຕີພື້ນເມືອງເພື່ອໂຄສະນາເຖິງນັກທ່ອງທ່ຽວກໍ່ຄືຜູ້ຊົມພາຍໃນປະເທດ ກ່ຽວກັບດົນຕີໃນເຂດທົ່ງພຽງ. ນັບແຕ່ນີ້, ລາຍການຈະເພີ່ມທັງດ້ານເນື້ອໃນ, ພາຫະນະອຸປະກອນເພື່ອຮັບໃຊ້ຜູ້ຊົມໃຫ້ດີກວ່າອີກ“.

            ເຂົ້າຮ່ວມລາຍການ, ນັກສິລະປະພິນສາຍດຽວ ຟ້າມຈາງ, ຢູ່ໂຮງຮຽນເວທີສະແດງຮູບເງົາ, ແບ່ງປັນວ່າ:

           “ວິນຍານເຂດບ້ານນາແມ່ນລາຍການດົນຕີພື້ນເມືອງຂອງ ຫວຽດນາມ. ສຳລັບຂ້າພະເຈົ້າແລ້ວ, ນີ້ແມ່ນລາຍການທີ່ອຸດົມສົມບຸນເຊິ່ງຂ້າພະເຈົ້າມີຄວາມນິຍົມຊົມຊອບທີ່ສຸດນັບແຕ່ກ່ອນມາຮອດປັດຈຸບັນ. ເມື່ອເຂົ້າຮ່ວມລາຍການ, ຂ້າພະເຈົ້າກໍ່ສາມາດຮຳ່ຮຽນເອົາບັນດາບົດຮຽນອັນລ້ຳຄ່າກ່ຽວກັບການສະແດງດົນຕີພື້ນເມືອງຈາກພວກອ້າຍເອື້ອຍນ້ອງສິນລະປິນ“.

ລາຍການ “ວິນຍານເຂດບ້ານນາຫວຽດນາມ“ ໃນວັນທີ 15/9 ຜ່ານມາໄດ້ຮັບຄວາມຍ້ອງຍໍຈາກຜູ້ຊົມ. ພິເສດ, ຜູ້ຕາງໜ້າບັນດາບໍລິສັດທ່ອງທ່ຽວມີຄວາມນິຍົມທີ່ສຸດ ເພາະວ່ານີ້ແມ່ນລາຍການດົນຕີທີ່ເຂັ້ນຂຸ້ນໄປດ້ວຍສີສັນພື້ນເມືອງ ຫວຽດນາມ ເພື່ອສາມາດແນະນຳເຖິງນັກທ່ອງທ່ຽວທີ່ມາຈາກປະເທດຕ່າງໆໃນໂລກ. ເອື້ອຍ ຮ່ວາງທິມາຍເຮືອງ, ບໍລິສັດທ່ອງທ່ຽວ 365 Travel, ໃຫ້ຮູ້ວ່າ:

 “ຂ້າພະເຈົ້າໄດ້ຊົມລາຍການສະແດງ “ວິນຍານເຂດບ້ານນາ ຫວຽດນາມ“ ແລະເຫັນວ່ານີ້ແມ່ນລາຍການສະແດງທີ່ເຕັມໄປດ້ວຍຄວາມສາມາດບົ່ມຊ້ອນສຳລັບນັກທ່ອງທ່ຽວ. ແມ່ນຜະລິດຕະພັນດົນຕີພື້ນເມືອງທີ່ບັນດານັກສິລະປິນໄດ້ສຸມຈິດສຸມໃຈທີ່ສຸດ. ດ້ວຍບັນດາເຄື່ອງດົນຕີທີ່ຜະລິດຈາກໄມ້ໄຜ່ໄມ້ເຮ້ຍນັ້ນ, ແຕ່ມັນໄດ້ສ້າງຄວາມປະທັບໃຈທີ່ສຸດໃຫ້ແກ່ຜູ້ຊົມ. ນີ້ແມ່ນລາຍການທີ່ນັກທ່ອງທ່ຽວຈະເລືອກເຟັ້ນເມື່ອມາຢ້ຽມຢາມ ຮ່າໂນ້ຍ“

ລາຍການ “ວິນຍານເຂດບ້ານນາຫວຽດນາມ“ ສະແດງໃນເວລາ 50 ນາທີ ແລະ ຖືກຈັດຕັ້ງໃນວັນອັງຄານ, ວັນສຸກ ແລະ ວັນເສົາ, ເວລາ 18 ໂມງ 15 ນາທີ, ເລີ່ມແຕ່ເດືອນຕຸລາ 2017 ຢູ່ໂຮງລະຄອນ ຮົ່ງຮາ, ຮ່າໂນ້ຍ. ເມື່ອຊົມລາຍການ “ວິນຍານເຂດບ້ານນາຫວຽດນາມ“, ນັກທ່ອງທ່ຽວໄດ້ເຊື່ອມຕົວເຂົ້າບັນຍາກາດສິລະປະ, ຮັບຮູ້ໄດ້ຄວາມງາມດ້ານວິນຍານ, ອາລົມຈິດຂອງຊາວ ຫວຽດນາມ ໃນເຂດທົ່ງພຽງພາກເໜືອຂອງ ຫວຽດນາມ.