(vovworld)- ມີບໍ່ເທົ່າໃດຄົນທີ່ຮູ້ວ່າ ຢູ່ ຖະຫນົນ ດາວຢູຍຕື ຕັ້ງຢູ່ໃຈກາງຄຸ້ມຖະຫນົນເກົ່າ ຮ່າໂນ້ຍ ເຄີຍແມ່ນຖະຫນົນທີ່ຄັບຄາຫນາແຫນ້ນ ດ້ວຍການເຄື່ອນໄຫວລະຫລິ້ນບັນເທິງສະຫງວນໃຫ້ແກ່ໄວຫນຸ່ມໃນຍາມຄ່ຳຄືນນັ້ນ ແຕ່ຍັງແມ່ນສະຖານທີ່ສະແດງລາຍການດົນຕີພື້ນເມືອງທີ່ດູດດື່ມ ດ້ວຍການຂັບກາຈູ, ຂັບເສີມ, ຂັບແຈ່ວ, ຂັບຕ່ວງ.. ໂດຍໄດ້ຮັບການສ້າງຕັ້ງຂຶ້ນເມື່ອເດືອນ 5/2015, ລາຍການສະແດງດົນຕີພື້ນເມືອງຢູ່ຄຸ້ມຖະຫນົນເກົ່າ ຮ່າໂນ້ຍ ຖືກຈັດຂຶ້ນ ເດືອນລະເທື່ອ ດ້ວຍຈຸດປະສົງຢາກແນະນຳ ໂດຍສັງເຂບໃຫ້ຜູ້ຊົມກ່ຽວກັບດົນຕີພື້ນເມືອງໃນເມື່ອກ່ອນຂອງເຂດດິນທັງລອງ - ຮ່າໂນ້ຍ ກໍຄືປະກອບສ່ວນເຂົ້າໃນການຮັກສາ ແລະ ໂຄສະນາຄຸນຄ່າຂອງດົນຕີພື້ນເມືອງຫວຽດນາມ.
ບັນດານັກສິລະປິນສະແດງສິລະປະພື້ນເມືອງ
ພາບ:vov
|
ແຕ່ 20 ໂມງ 30 ນາທີ ຂອງວັນເສົາປະຈຳອາທິດ, ບັນຍາກາດຢູ່ສູນພົວພັນແລກປ່ຽນວັດທະນະທຳຄຸ້ມຖະຫນົນເກົ່າທີ່ເຮືອນເລກທີ 50 ຖະໜົນດາວຢູຍຕື, ຮ່າໂນ້ຍ ແມ່ນຟົດຟື້ນທີ່ສຸດ ດ້ວຍສຽງກອງ, ສຽງຄ້ອງດັ່ງກ້ອງກັງວານໄປ ໄດ້ເຮັດໃຫ້ຜູ້ຊົມຫລົງລືມຄວາມອຶກກະທຶກຄຶກໂຄມໃນບັນດາຖະຫນົນຍ່າງ. ໃນຫ້ອງຫນຶ່ງເຮັດດ້ວຍໄມ້ ມີເນື້ອທີ່ປະມານ 80 ຕາແມັດ ຢູ່ຊັ້ນ 3, ມີແຂກເຂົ້າມາຊົມກວ່າ 100 ຄົນພວມເຈືອຈານເຂົ້າກັບບັນຍາກາດໃຫມ່. ເວທີສະແດງບໍ່ໃຫຍ່ ແລະ ບໍ່ທັນສະໄຫມຄືດັ່ງຢູ່ໂຮງລະຄອນອື່ນທີ່ປະດັບປະດາດ້ວຍໄຟແສງສີຢ່າງຫລວງຫລາຍ. ຢູ່ທີ່ເວທີສະແດງນີ້ພຽງແຕ່ປູສາດສອງສາມຜືນ ແລະໄຟແສງສີປະດັບປະດາກໍ່ບໍ່ທັນສະໄຫມປານໃດ. ອ້າຍ John Diamond, ນັກທຸລະກິດ ມາຈາກສະວິດ ພວມເຮັດວຽກຢູ່ ຮ່າໂນ້ຍ ແມ່ນຜູ້ນິຍົມດົນຕີພື້ນເມືອງຂອງຫວຽດນາມ ພວມຕັ້ງໃຈຊົມລາຍການສິລະປະ ໃຫ້ຮູ້ວ່າ:
“ຂ້າພະເຈົ້າຮູ້ຈັກເຖິງລາຍການນີ້ຜ່ານການແນະນຳຂອງເພື່ອນຜູ້ຫນຶ່ງ. ນີ້ເປັນຄັ້ງທີ 3 ທີ່ຂ້າພະເຈົ້າມານີ້. ຂ້າພະເຈົ້ານິຍົມຊົມຊອບລາຍການສິລະປະນີ້ທີ່ສຸດ ຍ້ອນລາຍການສະແດງດົນຕີພື້ນເມືອງນີ້ແມ່ນເຕັມໄປດ້ວຍສີສັນຫວຽດນາມ. ເຖິງວ່າ ຂ້າພະເຈົ້າບໍ່ເຂົ້າໃຈເນື້ອໃນຂອງເພງກໍຕາມ ແຕ່ຂ້າພະເຈົ້າມີຄວາມປະທັບໃຈຕໍ່ບັນດາເຄື່ອງດົນຕີ ແລະ ທຳນອງເພງ”
ເຖິງວ່າບໍ່ມີ micro, ເຄື່ອງດົນຕີກໍ່ບໍ່ທັນສະໄຫມຄືຢູ່ເວທີສະແດງໃນໂຮງລະຄອນອື່ນກໍຕາມ, ແຕ່ນັກສິລະປິນດີເດັ່ນ ດວານແທງບີງ ພວມນັ່ງເທິງສາດ ພວມຂັບກາຈູດ້ວຍສຽງທີ່ອ່ອນຫວານນີ້ມນວນ ປະສານພ້ອມກັບສຽງດົນຕີພື້ນເມືອງຫລາຍປະເພດ ອັນ ໄດ້ເຮັດໃຫ້ຜູ້ຊົມຄືດັ່ງໄດ້ກັບຄືນຮັບຟັງສຽງດົນຕີພື້ນເມືອງກ່ອນນີ້ນັບຮ້ອຍປີ.
“ເວທີສະແດງນີ້ແມ່ນດີທີ່ສຸດສຳລັບຜູ້ເສບດົນຕີພື້ນເມືອງຄືພວກຂ້າພະເຈົ້າ ແລະ ເໝາະສົມກັບລາຍການສິລະປະຂັບກາຈູ, ຂັບຕວ່າງ, ຂັບເຈົາວັນ, ຂັບເສີມ. ບໍ່ຈັບ micoro, ພວກຂ້າພະເຈົ້າຮ້ອງເພງໂດຍກົງ ດ້ວຍນ້ຳສຽງຂອງຕົນ ບໍ່ຕ້ອງນຳໃຊ້ອຸປະກອນໃດ.”
ລາຍການຂັບເຈົາວັນ
|
ບໍ່ພຽງແຕ່ແມ່ນສະຖານທີ່ເຕົ້າໂຮມບັນດານັກສິລະປິນດີເດັ່ນເທົ່ານັ້ນ, “ລາຍການສະແດງດົນຕີພື້ນເມືອງຢູ່ຄຸ້ມຖະຫນົນເກົ່າ” ຍັງແມ່ນສະຖານທີ່ເພື່ອໃຫ້ລຸ້ນຫນຸ່ມຄືນັກສິລະປິນດີເດັ່ນ ບີກລຽນ ມີຄວາມໃກ້ຊິດສະຫນິດສະຫນົມກັບສາທາລະນະຊົນກວ່າ. ລາຍການຂັບເຈົາວັນໂດຍນັກສິລະປິນ ບີກລຽນ ສະແດງ ເຮັດໃຫ້ບັນຍາກາດຢູ່ທີ່ນີ້ຟົດຟື້ນມ່ວນຊື່ນຫຼາຍຂຶ້ນ. ຜູ້ຊົມນັບທັງຜູ້ເຖົ້າຜູ້ແກ່ ໄວຫນຸ່ມ ລ້ວນແຕ່ຕົບມືຊົມເຊີຍຕາມຈັງຫວະສຽງດົນຕີ.
“ຂ້າພະເຈົ້າມີຄວາມໂຊກດີເມື່ອໄດ້ເຂົ້າຮ່ວມລາຍການ ສະແດງສິລະປະກັບນັກສິລະປິນລຸ້ນກອ່ນ. ເມື່ອມານີ້ ຂ້າພະເຈົ້າໄດ້ຮ່ຳຮຽນຕື່ມອີກກ່ຽວກັບວິທີການສະແດງ, ເຕັກນິກການຂັບແຈ່ວ, ຂັບເສີມ. ພິເສດໄດ້ຮັບການຊົມເຊີຍ ລະດົມກຳລັງໃຈຈາກຜູ້ຊົມ, ຂ້າພະເຈົ້າເຫັນວ່າຕົນເອງ ຕ້ອງມານະພະຍາຍາມຫລາຍກວ່າອີກ.”
ໃນເວລາກວ່າຫນຶ່ງຊົ່ວໂມງ, ດ້ວຍສຽງດົນຕີ ສຽງຂັບຮ້ອງມ່ວນອ່ອນຊອນຂອງບັນດານັກສິລະປິນດີເດັ່ນໄດ້ເຮັດໃຫ້ຜູ້ຊົມມີຄວາມຮູ້ສຶກທີ່ແຕກຕ່າງກັນ.
ໂດຍແມ່ນຜູ້ຊົມຫນຸ່ມ ແລະ ແມ່ນຜູ້ມາຊົມລາຍການສະແດງດົນຕີພື້ນເມືອງເປັນຄັ້ງທຳອິດ, ແຕ່ ເພື່ອນມີງລອງ ມີຄວາມນິຍົມຊົມຊອບທີ່ສຸດ. ມີງລອງໃຫ້ຮູ້ວ່າ:
“ມື້ນີ້ ນ້ອງມາຊົມລາຍການສະແດງດົນຕີພື້ນເມືອງເປັນຄັ້ງທຳອິດ ແລະ ເຫັນວ່າ ບັນດາລາຍການດົນຕີພື້ນເມືອງນີ້ ມ່ວນທີ່ສຸດ. ລາຍການສະແດງດົນຕີພື້ນເມືອງຄືແນວນີ້ເປັນການສະແດງໃຫ້ເຫັນສິ່ງຍອດຍິ່ງທາງດ້ານວັດທະນະທຳຮ່າໂນ້ຍ ຊື່ງຜູ້ຫນຸ່ມຄືຂ້າພະເຈົ້າມີຄວາມໂຊກດີໄດ້ຮັບຊົມ.”
ເຮັດແນວໃດເພື່ອໃຫ້ນັບມື້ນັບມີເພື່ອນຫນຸ່ມຫລາຍຄົນຄື ມີງລອງ ເຖິງວ່າ ມາຮັບຊົມເປັນຄັ້ງທຳອິດກໍຕາມ ແຕ່ມີຄວາມຮູ້ສຶກປະທັບໃຈທີ່ສຸດຍ້ອນຄຸນຄ່າຂອງບັນດາລາຍການດົນຕີພື້ນເມືອງ. ນັ້ນແມ່ນຈຸດປະສົງຂອງນັກດົນຕີ ຫວູເຍີດເຕີນ, ຜູ້ກຳກັບການສະແດງລາຍການສິລະປະນີ້.
“ພາຍຫລັງຈັດຕັ້ງລາຍການມາເປັນເວລາກວ່າ 1 ປີ, ມາຮອດປະຈຸບັນ ລາຍການສະແດງດົນຕີພື້ນເມືອງມີຄວາມກົມກ່ຽວດ້ານວິຊາສະເພາະ. ເຖິງວ່າຍັງປະສົບກັບຄວາມຫຍຸ້ງຍາກ ແລະ ຂໍ້ຄົງຄ້າງຈຳນວນຫນຶ່ງກ່ຽວກັບດ້ານການເງິນ ແລະ ການໂຄສະນາກໍຕາມ ແຕ່ ພວກຂ້າພະເຈົ້າຈະມານະພະຍາຍາມຈົນສຸດຄວາມສາມາດຂອງຕົນ ດ້ວຍຄວາມປາດຖະຫນາຢາກຮັກສາຈຸດວັດທະນະທຳພື້ນເມືອງຂອງຫວຽດນາມ ແລະ ແຜ່ຂະຫຍາຍໃຫ້ລຸ້ນຫນຸ່ມ ແລະ ຄົນລຸ້ນຫລັງ.”
ເມື່ອຮອດ 10 ໂມງຄ່ຳ, ລາຍການສະແດງດົນຕີໄດ້ອັດລົງ ແຕ່ມັນໄດ້ສ້າງຄວາມປະທັບໃຈຫລາຍຢ່າງໃຫ້ແກ່ຜູ້ຊົມ. ຢູ່ນະຄອນຫລວງແຫ່ງຫນຶ່ງທີ່ນັບມື້ນັບທັນສະໄຫມ, “ລາຍການສະແດງດົນຕີພື້ນເມືອງຢູ່ຄຸ້ມຖະຫນົນເກົ່າຮ່າໂນ້ຍ” ເປັນການຕິດພັນລະຫວ່າງອະດີດຕະການ ແລະ ທັນສະໄຫມ, ນຳມາໃຫ້ລຸ້ນຄົນອະນາຄົດກໍຄືເພື່ອນມິດສາກົນ ມີຄວາມເຂົ້າໃຈກ່ຽວກັບຈຸດວັດທະນະທຳຂອງເຂດດິນ ທັງລອງ ແຫ່ງອະລິຍະທຳນັບພັນປີ.
“ລາຍການສະແດງດົນຕີພື້ນເມືອງຢູ່ຄຸ້ມຖະຫນົນເກົ່າຮ່າໂນ້ຍ” ໄດ້ຮັບການຈັດຕັ້ງຂຶ້ນໃນເວລາ 20 ໂມງ 30 ນາທີຂອງວັນສຸກປະຈຳອາທິດໃນສັບປະດາທີສອງຂອງທຸກເດືອນ. ຖ້າຫາກທ່ານມີໂອກາດມາຢ້ຽມຢາມນະຄອນຫລວງ ຮ່າໂນ້ຍ ໃນໂອກາດນີ້, ທ່ານຢ່າລືມແວ່ຢາມສູນພົວພັນແລກປ່ຽນວັດທະນະທຳຄຸ້ມເມືອງເກົ່າ ຢູ່ເຮືອນເລກທີ 50 ຖະຫນົນດາວຢູຍຕື, ຮ່ວານກຽມ ເພື່ອເຫັນໄດ້ເຖິງຄວາມເປັນເອກະລັກສະເພາະຂອງດົນຕີພື້ນເມືອງທີ່ມາແຕ່ດົນນານຂອງຫວຽດນາມ.
ກາຈູ “ຈາງອານຮ່ວາຍໂກ໋”
ບົດເພງ ກາຈູ “ຈາງອານຮ່ວາຍໂກ໋” ໂດຍນັກສິລະປິນດີເດັ່ນ ດວານແທງບີງ ແລະ ນັກສີລະປີນປະຊາຊົນ ແມ້ງຮວັກ ສະແດງ . ກາຈູ ແມ່ນປະເພດສິລະປະຂັບເພງພື້ນເມືອງທີ່ໄດ້ຮັບຄວາມນິຍົມຢູ່ພາກເຫນືອ ແລະ ເຂດທາງທິດເຫນືອພາກກາງ ຫວຽດນາມ ນັບແຕ່ສັດຕະວັດທີ 15 ແລະ ກໍແມ່ນປະເພດສິລະປະໄດ້ຮັບການສະແດງໃນພະລາດຊະວັງ ແລະ ກໍໄດ້ຮັບການິຍົມຊົມຊອບຈາກນັກຮຽນຮູ້ເປັນຈຳນວນຫລວງຫລາຍ. ກາຈູ ແມ່ນການປະສົມປະສານລະຫວ່າງ ບົດກາບກອນ ແລະ ດົນຕີ. ສຽງດົນຕີທີ່ນຳໃຊ້ໃນບົດເພງ ກາຈູ “ຈາງອານຮ່ວາຍໂກ໋” ແມ່ນເສບຕາມບົດກາບກອນ “ຈາງອານຮ່ວາຍໂກ” ຂອງນັກກະວີ ຫງວຽນກົງຈື, ຊື່ງແມ່ນເຈົ້າອາມາດໃນສະໄຫມລາດຊະວົງຫງວຽນ. ມີຫລາຍຄຳເຫັນຖືວ່າ ຈາງອານໃນບົດເພງນີ້ແມ່ນ ເມືອງຫລວງເກົ່າ ຮວາລື ຢູ່ ແຂວງ ນີງບີງ. ເມື່ອ ເຈົ້າຊີວິດ ລີທາຍໂຕ ຍ້າຍພະລາດຊະວັງຈາກຮວາລື ແຂວນິງບີ້ງມາຕັ້ງຢູ່ ທັງລອງ ແລະ ປ່ຽນຊື່ ຮວາລື ເປັນຈາງອານ. ໃນບົດກາບກອນຂອງຕົນ, ຫງວຽນກົງຈື ຄິດເຖິງເຂດດິນກ່ຽວກັບເມືອງຫລວງເກົ່າດ້ວຍທິວທັດທຳມະຊາດສວຍງາມແລະ ສະງົບສຸກ.”
ຂັບເຈົາວັນ “ໂກໂດຍເທື້ອງງ່ານ”
ບົດເຈົາວັນ “ໂກໂດຍເທື້ອງງ່ານ” ຜ່ານການສະແດງຂອງກຸ່ມນັກສິລະປິນ ພ້ອມກັບວາດຟ້ອນພື້ນເມືອງ ສະແດງຕາມສຽງຂັບຮ້ອງຂອງນັກສິລະປິນ ບີກລຽນ. ຂັບເຈົາວັນ ແມ່ນປະເພດສິລະປະເພງພື້ນເມືອງທີ່ຕິດພັນກັບພິທີເຂົ້າຊົງ, ຊື່ງແມ່ນການເຫລື້ອມໃສພື້ນເມືອງຂອງຫວຽດນາມ. “ໂກໂດຍເທື້ອງງ່ານ” ແມ່ນຫນຶ່ງໃນບັນດາບົດເຈົາວັນທີ່ມີຊື່ສຽງຢູ່ຫວຽດນາມ. ໂກໂດຍເທື້ອງງ່ານ ເຄີຍເປັນເຊີນຕິງກົງຈົວ, ຊື່ງແມ່ນນາງເທວະດາໃນເລື່ອງລາວທີ່ສືບມາແຕ່ບູຮານນະການກ່ຽວກັບການເຫລື້ອມໃສບູຊາພະແມ່ ຢູ່ຫວຽດນາມໄດ້ຮຽນຫລັກທຳມະເພື່ອມາຊ່ວຍປະຊາຊົນ”