(ພາບປະກອບ)
ເທບສຽງປະກອບ
ໃນໂອກາດງານບຸນ, ເມື່ອສຽງຄ້ອງດັງກ້ອງກັງວານ, ບັນດານາງສາວຊາວເຜົ່າ K'Ho ສວຍງາມໃນຊຸດອາພອນທີ່ເປັນມູນເຊື້ອ, ດ້ວຍບັນດາວາດຟ້ອນທີ່ອ່ອນຊ້ອນ, ງ່າຍດາຍ, ສ້າງເປັນຄວາມງາມແບບດູດດື່ມ, ໃກ້ຊິດຕິດແທດກັບທຳມະຊາດ. ສ່ວນບັນດາຜູ້ຊາຍເປື່ອຍໂຕບໍ່ໃສ່ເສື້ອ, ນຸ່ງກະຕຽວ, ອວດຮູບຮ່າງລ້ຳສັນ, ໃນວາດຟ້ອນທີ່ເຂັ້ມແຂງ, ເດັດດຽວ, ສະແດງໃຫ້ເຫັນພະລັງຊີວິດທີ່ແຮງກ້າ. ບັນດາວາດຟ້ອນຂອງຊາວເຜົ່າ K'Ho ຍາມໃດກໍ່ຕິດພັນກັບດົນຕີ, ຄ້ອງ ແລະ ກອງ. ສຽງຄ້ອງ, ສຽງກອງດັງກ້ອງກັງວານໄປທົ່ວເຂດພູຜາປ່າໄມ້, ຄືດັ່ງກະຕຸກຊຸກຍູ້, ດຶງດູດຜູ້ຊົມເຂົ້າຮ່ວມ. ທຸກຄົນໂດຍບໍ່ຈຳແນກເຖົ້າແກ່, ໜຸ່ມນ້ອຍ, ບ່າວ, ສາວກໍ່ລ້ວນແຕ່ເຂົ້າຮ່ວມການຟ້ອນໄດ້. ໜຶ່ງໃນບັນດາປັດໃຈທີ່ສາມາດດຶງດູດທຸກຄົນເຂົ້າຮ່ວມການຟ້ອນ, ນັ້ນແມ່ນລັກສະນະທຳມະດາສາມັນ, ຟ້ອນງ່າຍ ແລະ ສ້າງຄວາມດູດດື່ມ. ທຸກຄົນຈັບມືກັນສ້າງເປັນວົງມົນຟ້ອນເຕັ້ນຢູ່ອ້ອມຕົ້ນເນັວ (ຕົ້ນໄມ້ໄຜ່ປັກຢູ່ເດີນບ້ານ) ແລະ ກອງໄຟ. ບັນດາວາດຟ້ອນພື້ນເມືອງນີ້ໄດ້ເຮັດໃຫ້ທຸກຄົນຫຍັບມໍ່ໃກ້ກັນກວ່າ ແລະ ຜູ້ເຂົ້າຮ່ວມກໍ່ນັບມື້ນັບຫຼາຍ. ພິເສດ, ການເຕັ້ນດີດຂອງບັນດາຜູ້ຕີຄ້ອງ ແລະເສບດົນຕີກໍ່ປະກອບສ່ວນເຮັດໃຫ້ບັນຍາການຂອງງານບຸນຟົດຟື້ນ ແລະ ສ້າງຄວາມຈັບອົກຈັບໃຈກວ່າອີກ .ຍ້ອນເຫດນັ້ນ, ບັນດາວາດຟ້ອນພື້ນເມືອງຂອງຊາວເຜົ່າ K'Ho, ນອກຈາກຄວາມໝາຍດ້ານຈິດວີນຍານແລ້ວ, ຍັງມີລັກສະນະປະຊາຄົມສູງອີກດ້ວຍ. ທ່ານ ລືວແຢງແຢວນ, ນັກຄົ້ນຄ້ວາສິລະປະຟ້ອນພື້ນເມືອງຂອງຊາວເຜົ່າເຂດໄຕງວຽນ, ໃຫ້ຮູ້ວ່າ:
‘’ສິລະປະຟ້ອນພື້ນເມືອງຂອງຊົນເຜົ່າໃນເຂດ ໄຕງວຽນເວົ້າລວມ ແລະ ຊາວເຜົ່າ K'Ho ເວົ້າສະເພາະ ແມ່ນຮູບການສິລະປະທີຍາມໃດກໍ່ຕິດພັນກັບດົນຕີຄ້ອງ, ຜ່ານວາດຟ້ອນສະແດງໃຫ້ເຫັນທຸກດ້ານໃນການດຳລົງຊີວິດ, ເຊັ່ນການ ອອກແຮງງານທຳການຜະລິດ, ຄວາມໃກ້ຊິດຕິດພັນກັບທຳມະຊາດ, ໝູ່ບ້ານຂອງຊາວເຜົ່າ, ຜ່ານຈິດສຳນຶກຂອງຫຼາຍລຸ້ນຄົນ”.
ຊາວເຜົ່າ K'Ho ເຄີຍຈັດຕັ້ງພິທີບູຊາຕ່າງໆໃນປີ, ພິເສດແມ່ນໃນງານບຸນທີ່ກ່ຽວຂ້ອງເຖິງຕົ້ນເຂົ້າ. ບັນດາບົດຟ້ອນໃນງານບຸນກໍ່ແມ່ນພິທີສະແດງຄວາມຮູ້ບຸນຄູນຕໍ່ຟ້າແຖນ. ບັນດາວາດຟ້ອນດ້ວຍການເຂົ້າຮ່ວມຂອງຊາວເຜົ່າເປັນຈຳນວນຫຼວງຫຼາຍ, ສະແດງໃຫ້ເຫັນການພົວພັນລະຫວ່າງຄົນກັບຄົນ, ລະຫວ່າງຄົນກັບທຳມະຊາດ, ແມ່ນລົມຫາຍໃຈແຫ່ງການດຳລົງຊີວິດ. ບັນດາວາດຟ້ອນພື້ນເມືອງທີ່ເປັນເອກະລັກສະເພາະຂອງຊາວເຜົ່າ K'Ho ຍັງສະແດງໃຫ້ເຫັນຄວາມມຸງມາດປາຖະໜາຢາກບືນຕົວຂຶ້ນສິ່ງທີ່ຈົບງາມທີ່ສຸດໃນການດຳລົງຊີວິດ, ຊ່ວຍເຂົາເຈົ້າມີຄວາມໃກ້ຊິດຕິດພັນ, ຮັກແພງກັນກວ່າອີກ. ອ້າຍ K'ban, ຊົນເຜົ່າ K'Ho, ໃຫ້ຮູ້ວ່າ:
“ເລື່ອງຈັດຕັ້ງການຟ້ອນລຳທຳເພງໃນງານບຸນກໍ່ແມ່ນໂອກາດເພື່ອເຕົ້າໂຮມກັນ, ຫຼືຕ້ອນຮັບແຂກມາຢາມ. ພາຍຫຼັງອອກແຮງງານທຳການຜະລິດຢ່າງອິດເມື່ອຍ, ເຂົາເຈົ້າກໍ່ເຕົ້າໂຮມກັນເຂົ້າຮ່ວມການເຄື່ອນໄຫວສິລະປະຢູ່ທີ່ນີ້. ດ້ວຍຈຸດປະສົງ ສ້າງຄວາມສະໜິດຕິດພັນ, ແລະຄວາມສາມັກຄີລະຫວ່າງທຸກຄົນນຳກັນ”.
(ພາບປະກອບ)
ປະຈຸບັນ, ບັນດາກຸ່ມຊາວເຜົ່າ K'Ho ທີ່ພວມດຳລົງຊີວິດຢູ່ຫຼາຍທ້ອງຖີ່ນ ໄດ້ສ້າງຕັ້ງບັນດາສະໂມສອນ, ກອງຟ້ອນພື້ນເມືອງ, ເພື່ອແນໃສ່ຮັກສາ ແລະ ເສີມຂະຫຍາຍວັດທະນະທຳທີ່ເປັນມູນເຊື້ອອັນດີງາມຂອງຊົນເຜົ່າຕົນ. ເອື້ອຍ K'Lien ຜູ້ທີ່ເຂົ້າຮ່ວມກອງຟ້ອນຢູ່ໝູ່ບ້ານວັດທະນະທຳທ່ອງທ່ຽວບັນດາເຜົ່າ ຫວຽດນາມ, ແບ່ງປັນວ່າ:
“ຂ້າພະເຈົ້າຮູ້ສຶກມ່ວນຫຼາຍ, ຍ້ອນໄດ້ສືບທອດສີສັນວັດທະນະທຳທີ່ມີມາແຕ່ສະໄໝກ່ອນຂອງຊົນເຜົ່າຕົນ. ສຳລັບຂ້າພະເຈົ້າ, ໄດ້ເຂົ້າຮ່ວມກອງຟ້ອນແມ່ນມີຄວາມໝາຍທີ່ສຸດ, ຍ້ອນໄດ້ປະກອບສ່ວນຮັກສາວັດທະນະທຳໃຫ້ລຸ້ນຫຼັງ ແລະແນະນຳໃຫ້ແຂກທ່ອງທ່ຽວມີຄວາມເຂົ້າໃຈກວ່າກ່ຽວກັບວັດທະນະທຳທີ່ເປັນມູນເຊື້ອຂອງຊົນເຜົ່າ K'Ho”.
ຖ້າຫາກມາຢ້ຽມຢາມໝູ່ບ້ານວັດທະນະທຳທ່ອງທ່ຽວບັນດາເຜົ່າ ຫວຽດນາມ, ຫຼື້ຢ້ຽມຢາມບັນດາໝູ່ບ້ານຂອງຊາວເຜົ່າ K'Ho ຢູ່ແຂວງເລິມດົ່ງ ກົງກັບໂອກາດງານບຸນຂອງຊາວເຜົ່າ K'Ho, ຢູ່ອ້ອມກອງໄຟແດງ, ພ້ອມກັບໄຫເຫຼົ້າ, ແລະສຽງຄ້ອງດັງກ້ອງກັງວານໄປທົ່ວເຂດພູຜາປ່າໄມ້ນັ້ນ, ນັກທ່ອງທ່ຽວສາມາດເຂົ້າຮ່ວມບັນດາວາດຟ້ອນພື້ນເມືອງທີ່ເປັນເອກະລັກສະເພາະຂອງຊາວເຜົ່າ K'Ho ໄດ້. ບັນດາວາດຟ້ອນນີ້ຈະຊ່ວຍບັນເທົາຄວາມໝົ່ນໝອງ, ຄວາມອິດເມື່ອຍ, ສ້າງພະລັງຊີວິດໃໝ່ໃຫ້ແກ່ທຸກຄົນ. ສິ່ງດັ່ງກ່າວໄດ້ສ້າງຄວາມດຶງດູດນັກທ່ອງທ່ຽວເມື່ອມາຢ້ຽມຢາມແຫ່ງນີ້.