(vovworld)- ບັນດາການປະຊຸມໃນຂອບເຂດກອງປະຊຸມເຈົ້າຫນ້າທີ່ອະວຸໂສຄັ້ງທີ 1 ແມ່ນເວທີປາໄສຮ່ວມມືເສດຖະກິດ ອາຊີ ປາຊີຟີກ (APEC) ພວມດຳເນີນຢູ່ນະຄອນ ຍາຈາງ ແຂວງ ແຄງຮ່ວາ, ປະເທດຫວຽດນາມ. ນີ້ແມ່ນການເຄື່ອນໄຫວເປີດສາກມີຄວາມໝາຍສຳຄັນທີ່ສຸດ, ປະກອບສ່ວນກຳນົດທິດການເຄື່ອນໄຫວໃຫ້ທັງປີ APEC 2017 ຊື່ງຫວຽດນາມ ເປັນເຈົ້າພາບຈັດຕັ້ງ. ດ້ວຍຫົວຂໍ້ວ່າ “ສ້າງກຳລັງຫນູນໃຫມ່, ພ້ອມກັນເພີ່ມພູນຄູນສ້າງໃຫ້ອະນາຄົດລວມ”, APEC 2017 ຈະສ້າງບາດກ້າວຫັນປ່ຽນໃຫມ່ໃຫ້ແກ່ການເຕີບໂຕ, ດ້ານການຄ້າ ແລະ ການລົງທຶນໃນສະພາບເສດຖະກິດໂລກມີການຜັນແປຫລາຍຢ່າງ.
ທ່ານ Raul Salazar, ຫົວຫນ້າຄະນະຜູ້ແທນບັນດາເຈົ້າຫນ້າທີ່
ອະວຸໂສ (SOM) APEC ຂອງເປຣູ
ພາບ:APEC 2016
|
ໃນສະພາບການວິກິດການປະຕິວັດອຸດສາຫະກຳຄັ້ງທີ 4 ພວມເຮັດໃຫ້ໂລກມີການປ່ຽນແປງຢ່າງວ່ອງໄວ, ການຜັນແປ ແລະ ສິ່ງທ້າທາຍເພີ່ມຂຶ້ນໄດ້ກະທົບ ຢ່າງເລິກເຊິ່ງ, ກວ້າງຂວາງເຖິງພື້ນຖານເສດຖະກິດໂລກທັງໝົດ.
ຕາມການສະຖິຕິແລ້ວ, ປີ 2016 ການເຕີບໂຕດ້ານເສດຖະກິດທົ່ວໂລກໄດ້ຫລຸດລົງຢູ່ໃນລະດັບຕ່ຳສຸດ ນັບແຕ່ພາຍຫລັງວິກິດການເສດຖະກິດເມື່ອປີ 2008 – 2009, ບັນລຸພຽງ 2,2%. ຄຽງຄູ່ກັນນັ້ນ, ໝາກຜົນຂອງສະພາບໂລກາພິວັດບໍ່ໄດ້ຮັບການຈັດແບ່ງຢ່າງສະໝ່ຳສະເຫມີລະຫວ່າງບັນດາພາກພື້ນ, ບັນດາພື້ນຖານເສດຖະກິດ ໄດ້ເຮັດໃຫ້ທ່າອ່ຽງຄັດຄ້ານການຄ້າເສລີເພີ່ມຂຶ້ນຢ່າງແຮງຢູ່ຫລາຍພາກພື້ນໃນໂລກ, ພິເສດ ຢູ່ບັນດາພື້ນຖານເສດຖະກິດໃຫຍ່ຢູ່ ອາເມລິກາ ແລະ ເອີລົບ, ບັນດາປະເທດມີທ່າອ່ຽງນຳໃຊ້ນະໂຍບາຍອາລັກຂາ. ໃນຂະນະນັ້ນ, ພື້ນຖານເສດຖະກິດທົ່ວໂລກພັດຂາດການຊີ້ນຳນຳພາເພື່ອສະກັດກັ້ນທ່າອ່ຽງດ້ານການຄ້າເສລີ. ເພາະສະນັ້ນ, ຫົວເລື່ອງຂອງປີ APEC 2017 ແມ່ນ“ສ້າງກຳລັງຫນູນໃຫມ່, ພ້ອມກັນເພີ່ມພູນຄູນສ້າງໃຫ້ອະນາຄົດລວມ”, ໄດ້ສ່ອງແສງໃຫ້ເຫັນຄວາມມຸ່ງມາດປາດຖະຫນາລວມຂອງ 21 ພື້ນຖານເສດຖະກິດສະມາຊິກ APEC, ເພື່ອສ້າງກຳລັງຫນູນຕື່ມອີກໃຫ້ແກ່ການເຕີບໂຕໃຫມ່ໃນສະພາບການໃຫມ່.
ເພື່ອໃຫ້ APEC ຮ່ວມມືຢ່າງມີປະສິດທິຜົນ, ແທດຈິງກວ່າ
ໃນສະພາບການຢູ່ພາຍໃນປະເທດ ແລະ ສາກົນ ມີການປ່ຽນແປງຢ່າງວ່ອງໄວ, ຄຽງຂ້າງບັນດາການບຸລິມະສິດ ຊື່ງຫວຽດນາມ ວາງຈຸດສຸມ ແມ່ນ APEC 2017 ຊຸກຍູ້ວິວັດການພັດທະນາ, ການຮ່ວມມື APEC ຢ່າງແທດຈິງ ແລະ ມີປະສິດທິຜົນກວ່າ, ສຳເລັດບັນດາເປົ້າໝາຍ Bogor ກ່ຽວກັບການຄ້າເສລີ ແລະ ການລົງທຶນໃນປີ 2020, ຫວຽດນາມ ໄດ້ພ້ອມກັບບັນດາພື້ນຖານເສດຖະກິດສະມາຊິກຖືຈຸດສຸມເຂົ້າໃນການຊຸກຍູ້ການເຕີບໂຕແບບຍືນຍົງ ແລະ ມີຫົວຄິດປະດິດສ້າງ, ຫນູນຊ່ວຍຍົກສູງກຳລັງຄວາມສາມາດແກ້ງແຍ້ງ, ມີຫົວຄິດປະດິດສ້າງຂອງບັນດາວິສາຫະກິດຂະຫນາດນ້ອຍ ແລະ ນ້ອຍທີ່ສຸດ ໃນສັງກະລາດດີຈີຕອນ, ເປັນຕົ້ນແມ່ນວິສາຫະກິດໂດຍແມ່ຍິງນຳພາ, ເພີ່ມທະວີການເຊື່ອມຕໍ່, ຮັດແຄບຊ່ອງຫວ່າງ, ເພີ່ມທະວີການຄ້ຳປະກັນດ້ານສະບຽງອາຫານ, ຊຸກຍູ້ການສ້າງຄວາມເຂັ້ມແຂງດ້ວຍຕົນເອງຂອງປະຊາຄົມ. ທ່ານ Raul Salazar, ຫົວຫນ້າຄະນະຜູ້ແທນບັນດາເຈົ້າຫນ້າທີ່ອະວຸໂສ (SOM) APEC ຂອງ ເປຣູ ຖືວ່າ:
“ຂ້າພະເຈົ້າຄິດວ່າ ບັນດາການກຳນົດທິດບຸລິມະສິດຄັ້ງນີ້ ແມ່ນສຳຄັນທີ່ສຸດ. ບັນຫາທຳອິດ ນັ້ນແມ່ນເລື່ອງໝູນໃຊ້ບັນດາຂໍ້ລິເລີ່ມ ແລະ ເຕັກໂນໂລຊີໃຫມ່. ຂ້າພະເຈົ້າຖືວ່າ ຫວຽດນາມ ໄດ້ເລືອກເຟັ້ນບັນຫານີ້ ແມ່ນຖືກຕ້ອງທີ່ສຸດ ເພາະວ່າ ນີ້ແມ່ນວິທີເພື່ອໃຫ້ພວກເຮົາຊ່ວຍສັງຄົມພັດທະນາຕາມທິດຮອບດ້ານກວ່າ. ພວກຂ້າພະເຈົ້າກໍຕີລາຄາສູງເລື່ອງຫວຽດນາມ ວາງທິດທາງບຸລິມະສິດຈຸດສຸມເຂົ້າຕະຫລາດສະບຽງອາຫານ ເພາະສິ່ງນີ້ແມ່ນສຳຄັນທີ່ສຸດສຳລັບບັນດາພື້ນຖານເສດຖະກິດໃຫມ່.”
ບັນດາທິດບຸລິມະສິດຂອງປີ APEC 2017 ຊື່ງຫວຽດນາມ ຍົກອອກມາໄດ້ຕອບສະຫນອງຢ່າງຖືກຕ້ອງກັບບັນດາບັນຫາຂອງສະພາບການເສດຖະກິດທົ່ວໂລກ ຊື່ງພື້ນຖານເສດຖະກິດສະມາຊິກທັງໝົດມີຄວາມສົນໃຈ. ສະນັ້ນ ບັນດາການກຳນົດທິດບຸລິມະສິດນີ້ໄດ້ຮັບຄວາມເຫັນດີເຫັນພ້ອມ ໃນ APEC ຢ່າງວ່ອງໄວ. ອາດຈະເຫັນໄດ້ຢ່າງຈະແຈ້ງວ່າ ພາຍຫລັງວິກິດການເສດຖະກິດທົ່ວໂລກສອງຄັ້ງນັ້ນ, ເລື່ອງຊອກໄດ້ບັນດາກຳລັງຫນູນເຕີບໂຕໃຫມ່ ແມ່ນສຳຄັນທີ່ສຸດ. ຫນຶ່ງໃນບັນດາກຳລັງຫນູນໃຫມ່ ນັ້ນແມ່ນ ຍົກສູງກຳລັງຄວາມສາມາດຂອງບັນດາວິສາຫະກິດຂະຫນາດກາງ, ນ້ອຍ ແລະ ນ້ອຍສຸດ, ພິເສດແມ່ນວິສາຫະກິດໂດຍແມ່ຍິງນຳພາ. ສະນັ້ນ ເລື່ອງຫວຽດນາມ ມີຂໍ້ລິເລີ່ມຈັດຕັ້ງກອງປະຊຸມໂອ້ລົມສົນທະນານະໂຍບາຍກັບບັນດາວິສາຫະກິດ ໂດຍແມ່ຍິງເປັນເຈົ້າຂອງໃນຂອບເຂດປີ APEC 2017 ໄດ້ຮັບຄວາມເຫັນດີເຫັນພ້ອມ ແລະ ຄວາມເອົາໃຈໃສ່ຈາກບັນດາພື້ນຖານເສດຖະກິດສະມາຊິກ APEC, ແລະຖືວ່າ ນີ້ແມ່ນບາດລ້ຽວໃຫມ່, ປະກອບສ່ວນຊຸກຍູ້ບົດບາດແມ່ຍິງເວົ້າລວມໃນສັງກະລາດດີຈີຕອນເວົ້າລວມ ແລະ ໃນການພັດທະນາບັນດາວິສາຫະກິດ ນ້ອຍ ແລະ ນ້ອຍສຸດ ແລະ ຂະຫນາດກາງເວົ້າສະເພາະ. ທ່ານ Allan Boollard, ຜູ້ອຳນວຍການຝ່າຍບໍລິຫານຄະນະເລຂາທິການ APEC ສາກົນ ກໍຖືວ່າ:
“APEC ລໍຖ້າການເຂົ້າຮ່ວມຂອງແມ່ຍິງເຂົ້າໃນກຳລັງແຮງງານ. ໃນບັນດາການແລກປ່ຽນ, APEC ໄດ້ເຕື້ອງເຖິງບັນດານະໂຍບາຍຫນູນຊ່ວຍ, ສ້າງເງື່ອນໄຂໃຫ້ແກ່ແມ່ຍິງ ກໍຄື ເຮັດແນວໃດເພື່ອຊຸກຍູ້ການພັດທະນາຂອງພາກພື້ນແລະ ທິດທາງຂອງ APEC ແມ່ນຕ້ອງສຸມໃສ່ເພື່ອຫນູນຊ່ວຍບັນດາພື້ນຖານເສດຖະກິດຍັງບໍ່ທັນພັດທະນາໃນພາກພື້ນ ເພື່ອໝູນໃຊ້ແຫລ່ງກຳລັງຈາກແມ່ຍິງ ແລະ ວິສາຫະກິດຂະຫນາດນ້ອຍ. ຄວາມຈິງ ມີແມ່ຍິງຫລາຍຄົນໄດ້ປະສົບຜົນສຳເລັດເມື່ອເຂົາເຈົ້າມີແຫລ່ງການເງິນຮັບໃຊ້ບັນດາໂຄງການ, ຫລືລະດົມທຶນຈາກອິນເຕີແນັດ.”
ກາລະໂອກາດເພື່ອໃຫ້ຫວຽດນາມ ສ້າງການພົວພັນຮ່ວມມືດຳເນີນທຸລະກິດ
APEC 2017, ຄຽງຄູ່ກັບກາລະໂອກາດໂຄສະນາປະເທດຊາດ, ດຶງດູດການທ່ອງທ່ຽວ, ຊອກໄດ້ຄູ່ຮ່ວມມືແລ້ວ, ຫວຽດນາມ ມີເງື່ອນໄຂຕື່ມອີກເພື່ອສ້າງການພົວພັນດຳເນີນທຸລະກິດກັບບັນດາຄູ່ຮ່ວມມືແຖວຫນ້າຢູ່ພາກພື້ນ. ມີວິສາຫະກິດສາກົນ ປະມານ 1000 ແຫ່ງຢູ່ບັນດາປະເທດສະມາຊິກ APEC ມາຫວຽດນາມ ໃນໂອກາດດຳເນີນກອງປະຊຸມສຸດຍອດ APEC ຈະນຳມາເຊິ່ງກາລະໂອກາດໃຫມ່ຫລາຍຢ່າງ. ທ່ານ ຮ່ວາງວັນຢູງ, ປະທານ ສະພາໃຫ້ຄຳປຶກສານັກທຸລະກິດ APEC (ABAC) ຫວຽດນາມ ຢືນຢັນວ່າ:
“ນັບແຕ່ປີ 2016 ມາຮອດປະຈຸບັນ, ຫວຽດນາມ ຮ່ວມມືກັບບັນດາຄູ່ຮ່ວມມືສາກົນນັບມື້ນັບເລິກເຊິ່ງກວ້າງຂວາງ, ພິເສດ ກັບບັນດາປະເທດສະມາຊິກ APEC. ພ້ອມກັບການຮ່ວມມືນັ້ນ, ວິສາຫະກິດຫວຽດນາມ ນັບມື້ນັບພັດທະນາ. ເລື່ອງເປັນເຈົ້າພາບຈັດຕັ້ງ APEC 2017 ຄັ້ງນີ້ ແມ່ນກາລະໂອກາດເພື່ອໃຫ້ຫວຽດນາມ ຊອກແຫລ່ງລົງທຶນໃຫມ່, ນຳມາເຊິ່ງ ມູນຄ່າສ່ວນເກີນສູງກວ່າ, ຍົກສູງກຳລັງຄວາມສາມາດການແກ້ງແຍ້ງຂອງວິສາຫະກິດຫວຽດນາມ, ຊື່ງແມ່ນຕະຫລາດ ມີຈຳນວນວິສາຫະກິດຂະຫນາດກາງ ແລະ ນ້ອຍກວມເຖິງ 98%”
ປີ APEC 2017 ຫາກໍ່ເລີ່ມຕົ້ນ. ດ້ວຍຫົວຂໍ້ ແລະ ບັນດາການກຳນົດທິດ, APEC 2017 ໝັ້ນໝາຍຈະສ້າງບາດກ້າວຫັນປ່ຽນໃຫມ່ໃຫ້ແກ່ການເຕີບໂຕ, ການຄ້າ ແລະ ການລົງທຶນ, ເພື່ອໃຫ້ APEC ກາຍເປັນອົງການນຳຫນ້າໃນການກະຕຸກຊຸກຍູ້ການເຕີບໂຕທົ່ວໂລກ.