(vovworld)- ວັນທີ 8/5/1954, ມື້ຫນຶ່ງພາຍຫລັງໄດ້ຮັບໄຊຊະນະດ້ຽນບຽນຝູ, ກອງປະຊຸມເຊີແນວຢຸດຕິສະພາວະການຮົບ ແລະ ສ້າງສັນຕິພາບຢູ່ອິນດູຈີນຄືນໃຫມ່ຖືກໄຂຂຶ້ນ. ພາຍຫລັງ 75 ມື້ແຫ່ງການເຈລະຈາ ພ້ອມກັບການເຄື່ອນໄຫວພົບປະທາງການທູດຢ່າງລຽນຕິດ, ວັນທີ 20/7/1954, ສັນຍາ ເຊີແນວ ກ່ຽວກັບການຢຸດຕິສະພາວະການຮົບຢູ່ ຫວຽດນາມ, ລາວ ແລະ ກຳປູເຈຍ ໄດ້ຮັບການລົງນາມ. ເປັນຄັ້ງທຳອິດໃນປະຫວັດສາດ, ບັນດາປະເທດໃຫຍ່ໄດ້ຍອມຮັບຮູ້ບັນດາສິດແຫ່ງຊາດພື້ນຖານຂອງຫວຽດນາມ ຊື່ງລວມມີ: ເອກະລາດ, ອະທິປະໄຕ,ເອກະພາບ ແລະ ຜືນແຜ່ນດິນອັນຄົບຖ້ວນ. ລັດຖະບານ ຝລັ່ງ ຕ້ອງຖອນກຳລັງທະຫານອອກຈາກຫວຽດນາມ. ເນື່ອງໃນໂອກາດສະເຫລີມສະຫລອງ 60 ປີ ແຫ່ງວັນເຊັນສັນຍາ ເຊີແນວ, ພວກເຮົາຂໍຄັດສະເຫນີບົດຂຽນຂອງທ່ານຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ ຟ້າມບີງມີງ ທີ່ພາດຫົວຂໍ້ວ່າ: ກອງປະຊຸມເຊີແນວ 1954- ບົດຮຽນໃຫຍ່ໃຫ້ແກ່ວຽກງານການຕ່າງປະເທດຫວຽດນາມ.
ກອງປະຊຸມເຊີແນວປີ 1954
ພາບເອກະສານ
|
ກອງປະຊຸມເຊີແນວ ກ່ຽວກັບອິນດູຈີນ ໂດຍມີການເຂົ້າຮວ່ມຂອງ 9 ຄະນະຜູ້ແທນຢ່າງເປັນທາງການຄື: ອັງກິດ, ຝລັ່ງ, ອາເມລິກາ, ສະຫະພາບໂຊວຽດເກົ່າ, ຈີນ, ສາທາລະນະລັດປະຊາທິປະໄຕ ຫວຽດນາມ, ລາຊະອານາຈັກລາວ, ລາຊະອານາຈັກ ກຳປູເຈຍ ແລະ ອຳນາດການປົກຄອງ ບ໋າວດ້າຍ. ສັນຍາ ເຊີແນວ ໄດ້ຮັບການລົງນາມ ດ້ວຍບັນດາເອກະສານຕົ້ນຕໍຄື: ຖະແຫລງການສຸດທ້າຍຂອງກອງປະຊຸມເຊີແນວ ກ່ຽວກັບບັນຫາສ້າງສັນຕິພາບຢູ່ ອິນດູຈີນ ຄືນໃຫມ່, ສັນຍາ 3 ສະບັບກ່ຽວກັບການຢຸດຕິສະພາວະການຮົບ ຢູ່ ຫວຽດນາມ ,ລາວ, ກຳປູເຈຍ. ສັນຍາໄດ້ຮັບຮູ້ບັນດາປະເທດມີຄຳໝັ້ນສັນຍາເຄົາລົບເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນຂອງຫວຽດນາມ ແລະ ບໍ່ແຊກແຊງເຂົ້າວຽກງານພາຍໃນຂອງຫວຽດນາມ; ຂີດຂັ້ນການທະຫານ(ເສັ້ນຂະຫນານ 17) ພຽງແຕ່ມີຄວາມໝາຍຊົ່ວຄາວເທົ່ານັ້ນ ຫາກບໍ່ໄດ້ຮັບຖືວ່າ ແມ່ນເສັ້ນຂີດຂັ້ນທາງດ້ານການເມືອງ ຫລືຜືນແຜ່ນດິນ ແລະ ຫວຽດນາມ ຈະຈັດຕັ້ງການເລືອກຕັ້ງທົ່ວປະເທດໂຮມປະເທດຊາດເປັນເອກະພາບໃນເດືອນ 7/1956.
ຜົນປະໂຫຍດແຫ່ງຊາດ, ຊົນຊາດ ແມ່ນຈຸດໝາຍ, ແມ່ນຫລັກການສູງສຸດ
ທີ່ກອງປະຊຸມເຊີແນວ, ເປັນຄັ້ງທຳອິດພື້ນຖານການທູດທີ່ຫນຸ່ມແຫນ້ນຂອງຫວຽດນາມ ໄດ້ເຂົ້າຮ່ວມເວທີປາໄສການເຈລະຈາຫລາຍຝ່າຍທີ່ສັບສົນ, ຖືກການຄອບງຳຈາກບັນດາປະເທດໃຫຍ່. ໃນສະພາບການນັ້ນ, ຄວາມຮັບຮູ້ຢ່າງເລິກເຊິ່ງກ່ຽວກັບຜົນປະໂຫຍດແຫ່ງຊາດ, ຊົນຊາດ ແມ່ນບ່ອນອີງໃຫ້ແກ່ວຽກງານຕໍ່ສູ້ທາງການທູດ, ຫວຽດນາມໄດ້ຕໍ່ສູ້ໃຫ້ແກ່ມາດຕະການຮອບດ້ານ, ຖືເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນແມ່ນຜົນປະໂຫຍດສູງສຸດ ແລະ ແມ່ນຈຸດໝາຍພື້ນຖານຕ້ອງບັນລຸໄດ້ໃນກອງປະຊຸມເຊີແນວ.
ໂດຍຢືດໝັ້ນຈຸດໝາຍນີ້, ຫວຽດນາມ ໄດ້ຕໍ່ສູ້ໃຫ້ນັບທັງມາດຕະການດ້ານການທະຫານ ແລະ ການເມືອງ. ແນວຮົບດ້ານການທະຫານແມ່ນຢຸດຍິງ, ຖອນກຳລັງທະຫານຕ່າງປະເທດອອກຈາກຫວຽດນາມ ແລະ ສ້າງສັນຕິພາບຢູ່ອິນດູຈີນ ຄືນໃຫມ່. ແນວຮົບການເມືອງ ແມ່ນຮັບປະກັນສັນຕິພາບ, ເອກະລາດ, ເອກະພາບ ແລະ ຜືນແຜ່ນດິນອັນຄົບຖ້ວນຂອງຫວຽດນາມ, ລາວ ແລະ ກຳປູເຈຍ, ຢຸດຕິລະບອບຫົວເມືອງຂຶ້ນຂອງພວກລ່າເມືອງຂຶ້ນຝລັ່ງ ຢູ່ ອິນດູຈີນ.
ສະນັ້ນ ນັບແຕ່ມື້ດຳເນີນກອງປະຊຸມ, ຄະນະຜູ້ແທນຫວຽດນາມ ໄດ້ເປັນເຈົ້າການຜັນຂະຫຍາຍການເຄື່ອນໄຫວທາງການທູດຫລາຍຢ່າງ ແລະ ຂົນຂວາຍສາກົນ. ໄປຄຽງຄູ່ກັບການຕໍ່ສູ້ຢູ່ເທິງໂຕະເຈລະຈາ, ຄະນະຜູ້ແທນຫວຽດນາມ ໄດ້ຕັ້ງຫນ້າ ເຮັດວຽກກັບຄະນະຜູ້ແທນ ໂຊວຽດເກົ່າ, ຈີນ ແລະ ຝລ່ັງ, ໄດ້ຈັດການປະຊຸມຂ່າວ, ພົບປະກັບອົງການຈັດຕັ້ງມະຫາຊົນນັບຮ້ອຍຄະນະ ແລະ ວົງການການເມືອງ ຝລ່ັງ ເພື່ອສະແດງເຈດຕະນາດີ ແລະ ຄວາມຕັດສິນໃຈຂອງຫວຽດນາມ, ກ່າວຕູ່ຫາການກະທຳກະຫາຍສົງຄາມ ແລະ ກົນອຸບາຍທຳລາຍຂອງບັນດາກຳລັງທີ່ເປັນປໍລະປັກ. ບັນດາການເຄື່ອນໄຫວດັ່ງກ່າວໄດ້ປະກອບສ່ວນເຮັດໃຫ້ລັດຖະບານ ຝລ່ັງ ຕ້ອງຍອມຮັບວິທີການກ່ຽວກັບມາດຕະການທັງໝົດສຳລັບຫວຽດນາມ ແລະ ອິນດູຈີນ. ບັນດາເອກະສານກອງປະຊຸມກໍໄດ້ຊີ້ແຈ້ງວາ: ເສັ້ນຂີດຂັ້ນທີ່ແບ່ງແຍກ 2 ພາກ ຄືພາກເຫນືອ ແລະ ພາກໃຕ້ຂອງຫວຽດນາມ ແມ່ນຊົ່ວຄາວ ແລະ ພາຍຫລັງ 2 ປີ, ພາກເຫນືອ ແລະ ພາກໃຕ້ຫວຽດນາມ ຈະຈັດຕັ້ງການເລືອກຕັ້ງທົ່ວປະເທດເພື່ອໂຮມປະເທດຊາດເປັນເອກະພາບ.
ຮັກສາເອກະລາດ, ເປັນເຈົ້າຕົນເອງໃນວຽກງານການຕ່າງປະເທດ
ກອງປະຊຸມເຊີແນວ ຖືກຈັດຂຶ້ນຕາມຂໍ້ລິເລີ່ມຂອງບັນດາປະເທດໃຫຍ່. ເພື່ອຜົນປະໂຫຍດຂອງຕົນ, ບັນດາປະເທດໃຫຍ່ ໄດ້ຊອກທຸກວິທີເພື່ອບັງຄັບ ແລະ ແກ່ດຶງຫວຽດນາມ ຍອມຮັບມາດຕະການມີຜົນປະໂຫຍດໃຫ້ແກ່ເຂົາເຈົ້າ. ສາທາລະນະລັດປະຊາທິປະໄຕຫວຽດນາມ ເຂົ້າຮ່ວມກອງປະຊຸມດ້ວຍຖານະຂອງຜູ້ໄດ້ຮັບໄຊຊະນະຢູ່ບັ້ນຮົບ ດ້ຽນບຽນຝູ ສະນັ້ນ ໄດ້ກຳນົດຈຸດໝາຍເຈລະຈາຢ່າງຈະແຈ້ງ. ເຖິງຢ່າງໃດກໍຕາມ, ບັນດາບາດກ້າວລະອຽດທີ່ກ່ຽວຂ້ອງເຖິງຮູບການເຈລະຈາ, ຈຸດເວລາເປີດສາກ ແລະ ສິ້ນສຸດການເຈລະຈາ, ຈັດແບ່ງວຽກງານສົມທົບກັບບັນດາກຳລັງໃນການເຈລະຈາ ຍາມໃດກໍຖືກປະເທດໃຫຍ່ແຊກແຊງ ແລະ ກະທົບເຖິງ. ສິ່ງດັ່ງກ່າວໄດ້ສົ່ງຜົນສະທ້ອນອັນໃຫຍ່ຫລວງຕໍ່ຄວາມມານະພະຍາຍາມເປັນເຈົ້າການໃນວິວັດການເຈລະຈາ. ສະນັ້ນ ບົດຮຽນກ່ຽວກັບການຮັກສາເອກະລາດ, ເປັນເຈົ້າຕົນເອງໃນການເຈລະຈາດ້ານການທູດ ຢູ່ ເຊີແນວ ປີ 1954 ຍິ່ງມີຄວາມໝາຍກວ່າ.
ຮູ້ວິທີເອົາຊະນະເທື່ອລະກ້າວ, ຍາດແຍ່ງການສະຫນັບສະຫນູນຂອງຫາງສຽງສາກົນ
ໂດຍເຂົ້າໃຈຢ່າງຈະແຈ້ງກ່ຽວກັບຄວາມສາມາດຂອງຕົນ ແລະ ຜົນປະໂຫຍດຂອງບັນດາປະເທດໃຫຍ່, ຊື່ງລວມມີ: ໂຊວຽດ, ຈີນ ແລະ ເຂົ້າໃຈສະພາວະການໂລກຢ່າງຈະແຈ້ງ, ຫວຽດນາມ ໄດ້ຕົກລົງເຊັນສັນຍາເຊີແນວ ດ້ວຍບັນດາມາດຕາ ບໍ່ເຕື້ອງເຖິງໄຊຊະນະຂອງຕົນຢູ່ສະຫນາມຮົບຢ່າງຄົບຖ້ວນ. ຂໍ້ຕົກລົງນີ້ແມ່ນແບບຢ່າງກ່ຽວກັບບົດຮຽນໄຊຊະນະຂອງວຽກງານການຕ່າງປະເທດຫວຽດນາມໃນແຕ່ລະບາດກ້າວ.
ນອກຈາກ ການສົມທົບຢ່າງແຫນ້ນແຟ້ນ ລະຫວ່າງການຕໍ່ສູ້ທາງການທູດກັບການຕໍ່ສູ້ ທາງຫາງສຽງ, ຍາດແຍ່ງການສະຫນັບສະຫນູນຂອງປະຊາຄົມໂລກ ແມ່ນບົດຮຽນອັນລຳ້ຄ່າຕະຫລອດການ. ທີ່ກອງປະຊຸມເຊີແນວ, ຄວາມມານະພະຍາຍາມສູ້ຊົນເພື່ອສັນຕິພາບ, ຍາດເອົາເອກະລາດແຫ່ງຊາດ, ເອກະພາບ ແລະ ຜືນແຜ່ນດິນອັນຄົບຖ້ວນຂອງຫວຽດນາມ ສອດຄອ່ງກັບຄວາມມຸ່ງມາດປາດຖະຫນາລວມຂອງມວນມະນຸດທີ່ກ້າວຫນ້າ, ນັບທັງປະຊາຊົນກ້າວຫນ້າຂອງຝລ່ັງ.
60 ປີໄດ້ຜ່ານໄປ, ສະພາບການໂລກ ແລະ ພາກພື້ນ ກໍຄືທີ່ຕັ້ງຂອງຫວຽດນາມ ມີການປ່ຽນແປງຫລາຍຢ່າງ. ສັນຕິພາບ,ການຮ່ວມມື ແລະ ພັດທະນາໄດ້ກາຍເປັນທ່າອ່ຽງ ແລະ ຄວາມມຸ່ງຫວັງອັນໃຫຍ່ຫລວງ. ເຖິງຢ່າງໃດກໍຕາມ, ບັນດາການກະທົບທີ່ສັບສົນຂອງສະພາບການໂລກ ຍັງວາງອອກບັນດາສິ່ງທ້າທາຍບໍ່ແມ່ນຫນ້ອຍຕໍ່ຄວາມສະຫງົບປອດໄພ ແລະ ການພັດທະນາຂອງປະເທດຊາດ. ໃນສະພາບການນັ້ນ ບັນດາບົດຮຽນຈາກກອງປະຊຸມ ເຊີແນວ ຍັງຄົງຮັກສາຄຸນຄ່າເໝືອນເດີມໃນການສ້າງສັນຕິພາບ,ປົກປັກຮັກສາປະເທດຊາດປະຈຸບັນ.