ປີ 2016, ການທູດວັດທະນະທຳໄດ້ຕັ້ງໜ້າປະກອບສ່ວນຈັດຕັ້ງຫຼາຍເຫດການສຳເລັດຜົນ ຊຶ່ງໄດ້ໂຄສະນາພາບພົດປະເທດຊາດ, ປະຊາຊົນ ແລະ ວັດທະນະທຳຫວຽດນາມໃຫ້ແກ່ເພື່ອນມິດສາກົນ. ຍ້ອນສາມາດເສີມຂະຫຍາຍກຳລັງແຮງສັງລວມ, ໃນນັ້ນມີ ການທູດວັດທະນະທຳ, ຮູບພາບປະເທດຫວຽດນາມຮັກຫອມສັນຕິພາບ, ມີພື້ນຖານວັດທະນະທຳເຂັ້ມຂົ້ນສີສັນ ແລະ ພວມເຊື່ອມໂຍງຢ່າງແຂງແຮງໄດ້ຮັບການຮັບຮູ້ຈາກໂລກຢ່າງຈະແຈ້ງກວ່າ.
ລາຍການພົບປະແລກປ່ຽນສະແດງສິລະປະ
|
ປີ 2016, ວຽກງານ ການທູດວັດທະນະທຳໄດ້ຮັບການຜັນຂະຫຍາຍຢ່າງແຂງແຮງ. ນີ້ແມ່ນປີທີ່ບັນດາຄຸນຄ່າວັດທະນະທຳຂອງຫວຽດນາມສືບຕໍ່ໄດ້ຮັບການເຊີດຊູ. ການທູດວັດທະນະທຳກໍໜູນຊ່ວຍຢ່າງຕັ້ງໜ້າໃຫ້ແກ່ບັນດາອົງການສຳນັກງານຕາງໜ້າຂອງຫວຽດນາມຢູ່ຕ່າງປະເທດ ຈັດຕັ້ງບັນດາການເຄື່ອນໄຫວໂຄສະນາພາບພົດຫວຽດນາມອອກສູ່ໂລກພາຍນອກ.
ຄຸນຄ່າວັດທະນະທຳຫວຽດນາມໄດ້ຮັບການເຊີດຊູ
ພ້ອມກັບບັນດາສຳເນົາເອກະສານຂອງຫວຽດນາມຄື ພະລາດຊະວັງທັງລອງ, ກຳແພງລາດຊະວົງໂຮ່, ຂັບຊວານ, ປະເພນີການເຫຼື້ອມໃສບູຊາເຈົ້າຊີວິດຮຸ່ງ, ສິລະປະເດີນກາຕາຍຕືພາກໃຕ້ໄດ້ຮັບການຮັບຮູ້ຈາກອົງການ UNESCO ແມ່ນມໍລະດົກວັດທະນະທຳວັດທະນະທຳມີຮູບຮ່າງ ແລະ ບໍ່ມີຮູບຮ່າງແຕ່ຊຸມປີກ່ອນນີ້, ປີ 2016 ຂັບວີ້ຢ້ຳ ເງະຕິ້ງ, ການເຫຼື້ອມໃສບູຊາພະແມ່ສືບຕໍ່ໄດ້ຮັບການເຊີດຊູ ຈາກອົງການ UNESCO ກາຍເປັນມໍລະດົກວັດທະນະທຳບໍ່ມີຮູບຮ່າງຂອງມວນມະນຸດ.
ຕາມທ່ານ ຝ້າມແຊງເຈົາ ຫົວໜ້າກົມພົວພັນວັດທະນະທຳກັບຕ່າງປະເທດ UNESCO, ເລຂາທິການໃຫຍ່ຫ້ອງການ UNESCO ປະຈຳປາຣີແລ້ວ, ນີ້ແມ່ນການຮັບຮູ້ ແລະ ຕີລາຄາສູງຂອງວົງຄະນະຍາດສາກົນ. ບໍ່ພຽງແຕ່ມີຄຸນຄ່າສູງທາງດ້ານກົດໝາຍເທົ່ານັ້ນ, ບັນດາມໍລະດົກວັດທະນະທຳຂອງຫວຽດນາມທີ່ໄດ້ຮັບການເຊີດຊູຈາກອົງການ UNESCO ນັ້ນ, ຍັງຢືນຢັນບັນດາຄຸນຄ່າທີ່ຫາຍາກ, ມີສີສັນສະເພາະຂອງຫວຽດນາມ, ນັ້ນແມ່ນສີສັນວັດທະນະທຳທີ່ອຸດົມສົມບູນ, ຫຼາຍຮູບຫຼາຍແບບ, ຫຼາຍຊັ້ນ. ທ່ານ ຝ້າມແຊງເຈົາ ກ່າວວ່າ :
“ ຫວຽດນາມກໍໂຊກດີ ຊຶ່ງມີມໍລະດົກທຳມະຊາດ ແລະ ວັດທະນະທຳຫຼາຍແຫ່ງໂດຍປູ່ຍ່າຕາຍາຍປະໄວ້ໃຫ້ ກໍຄືທຳມະຊາດດົນບັນດານໃຫ້. ດ້ວຍບັນດາມໍລະດົກເຊັ່ນນັ້ນ, ນີ້ກໍແມ່ນຄວາມເອກອ້າງທະນົງໃຈຂອງຊາດ, ຜ່ານນັ້ນພວກເຮົາຕ້ອງເຮັດແນວໃດເພື່ອໂຄສະນາດ້ານການທ່ອງທ່ຽວ, ເພື່ອດຶງດູດແຂກທ່ອງທ່ຽວມາຫວຽດນາມຫຼາຍຂຶ້ນ, ປະກອບສ່ວນເຂົ້າໃນການພັດທະນາເສດຖະກິດສັງຄົມຂອງແຕ່ລະທ້ອງຖິ່ນ ແລະ ທັງປະເທດຊາດ ”
ປີ 2016, ເປັນຄັ້ງທຳອິດທີ່ຜູ້ຕາງໜ້າຂອງຫວຽດນາມ, ຮອງສາດສະດາຈານ, ປອ, ຮອງຫົວໜ້າສະຖາບັນຄົ້ນຄ້ວາວັດທະນະທຳສິລະປະຫວຽດນາມ ທ່ານນາງ ຫງວຽນທິຮ່ຽນ ໄດ້ຜ່ານຜ່າ ຜູ້ສະໝັກເລືອກຕັ້ງ 2 ຄົນອື່ນໃນພາກພື້ນອາຊີ-ປາຊີຟິກເພື່ອກາຍເປັນຊາວຫວຽດນາມຄົນທຳອິດໄດ້ຮັບເລືອກຕັ້ງເຂົ້າຄະນະທີ່ປຶກສາ ມໍລະດົກວັດທະນະທຳບໍ່ມີຮູບຮ່າງຂອງ UNESCO.
ບັນລຸຜົນສຳເລັດເຫຼົ່ານັ້ນ, ກໍຍ້ອນຫວຽດນາມມີແນວທາງການຕ່າງປະເທດຢ່າງຖືກຕ້ອງ, ມີແນວທາງເຊື່ອມໂຍງເຂົ້າກັບສາກົນ, ໃນນັ້ນມີແນວທາງເຊື່ອມໂຍງດ້ານວັດທະນະທຳ. ຫວຽດນາມໄດ້ປະສົບຜົນສຳເລັດອັນດີງາມໃນການອະນຸລັກຮັກສາ, ປະຕິສັງຂອນມໍລະດົກ ແລະ ພ້ອມກັນນັ້ນ ກໍຂຸດຄົ້ນມໍລະດົກເພື່ອຮັບໃຊ້ການພັດທະນາປະເທດຊາດແບບຍືນຍົງ. ຜູ້ປະສານງານຂອງ ສ.ປ.ຊ ປະຈຳຫວຽດນາມ Pratibha Mehta ຖືວ່າ
“ ຫວຽດນາມຍາມໃດກໍອະນຸລັກ ແລະ ເສີມຂະຫຍາຍບັນດາຄຸນຄ່າວັດທະນະທຳຂອງຕົນ, ຊຶ່ງແມ່ນພື້ນຖານວັດທະນະທຳທີ່ເປັນໜ້າເອກອ້າງທະນົງໃຈ. ຂ້າພະເຈົ້າຖືວ່າ ຫວຽດນາມຍັງມີບັນດາຄຸນຄ່າວັດທະນະທຳຫຼາຍເກີນໄປທີ່ຕ້ອງໂຄສະນາຢ່າງກ້ວາງຂວາງຍ້ອນວັດທະນະທຳຫວຽດນາມເປັນເອກະລັກສະເພາະ. ຄຸນຄ່າວັດທະນະທຳຫວຽດນາມໄດ້ຮັບການຫຼໍ່ຫຼອມຜ່ານຫຼາຍໆລຸ່ນຄົນ. ສີສັນວັດທະນະທຳຫວຽດນາມຍັງຖືກສະແດງອອກຜ່ານບັນດາມໍລະດົກວັດທະນະທຳເຊັ່ນ ອ່າວຫ້າລອງ, ປູຊະນີຍະສະຖານ ມີ້ເຊີນ…ວັດທະນະທຳຍັງສະແດງໃຫ້ເຫັນຜ່ານຊີວິດປະຈຳວັນ. ບັນດາສີສັນວັດທະນະທຳເຫຼົ່ານັ້ນ ໄດ້ປະກອບສ່ວນອັນໃຫຍ່ຫຼວງເຂົ້າໃນການສ້າງກຳລັງແຮງຫວຽດນາມ ”
ຮັດແໜ້ນນ້ຳໃຈສາມັກຄີ ໄມຕີຈິດມິດຕະພາບ
ປີ 2016 ກໍແມ່ນປີທີ່ຫວຽດນາມຍູ້ແຮງການພົວພັນແລກປ່ຽນວັດທະນະທຳກັບຫຼາຍປະເທດໃນໂລກ. ໂດຍຜ່ານບັນດາການເຄື່ອນໄຫວ ພົວພັນແລກປ່ຽນວັດທະນະທຳ, ສິລະປະ, ງານວາງສະແດງ, ຊຸມວັນວັດທະນະທຳຫວຽດນາມຢູ່ປະເທດຕ່າງໆ, ປະຊາຊົນຢູ່ປະເທດປະຈຳຖິ່ນມີຄວາມເຂົ້າໃຈກ່ວາກ່ຽວກັບປະຫວັດສາດຂອງຫວຽດນາມ, ວັດທະນະທຳຫວຽດນາມ ເພື່ອຈາກນັ້ນສ້າງການຮ່ວມມືທີ່ເລິກເຊິ່ງກ້ວາງຂວາງກວ່າໃນຫຼາຍຂົງເຂດ. ປີ 2016, ຫວຽດນາມກໍຂຸ້ນຂ້ຽວກະກຽມໃຫ້ແກ່ບັນດາເຫດການໂຄສະນາວັດທະນະທຳຫວຽດນາມໂດຍຜ່ານປີ APEC 2017. ທ່ານນາງ ເອກອັກຄະລັດຖະທູດ ຫງວຽນງຽດງາ, ທີ່ປຶກສາຂັ້ນສູງຄະນະເລຂາ APEC 2017 ຢືນຢັນວ່າ :
“ ໂດຍແມ່ນປະເທດເຈົ້າພາບຈັດ APEC , ພວກຂ້າພະເຈົ້າຖືເປັນສຳຄັນທີ່ສຸດເພື່ອຜັນຂະຫຍາຍ, ເຮັດແນວໃດເພື່ອເຊີດຊູຮູບພາບ ແລະ ວັດທະນະທຳຫວຽດນາມ, ກຳລັງແຮງທີ່ອ່ອນໂຍນຂອງຫວຽດນາມ, ສະແດງໃຫ້ເຫັນມູນເຊື້ອວັດທະນະທຳມະນຸດ, ຄຸນຄ່າວັດທະນະທຳຂອງຫວຽດນາມ. ຍິ່ງມີການພົວພັນແລກປ່ຽນ, ຍິ່ງຮ່ວມສຳພັນ, ເຂົ້າໃຈວັດທະນະທຳ, ເຄົາລົບຊຶ່ງກັນແລະກັນນັ້ນ, ກໍຈະມີເງື່ອນໄຂເພີ່ມທະວີການເຈລະຈາ ແລະ ຮ່ວມມືເພື່ອຮັກສາສັນຕິພາບ ”
ໃນປະຫວັດສາດຂອງຊາດຫວຽດນາມ, ພື້ນຖານການທູດຫວຽດນາມ, ການທູດວັດທະນະທຳໄດ້ຖືກນຳໃຊ້ຫຼາຍຄັ້ງຢ່າງສຳເລັດຜົນເພື່ອແກ້ໄຂການປະທະກັນ ແລະ ສ້າງການພົວພັນມິດຕະພາບຢ່າງໝັ້ນຄົງກັບບັນດາປະເທດ. ເພາະສະນັ້ນ, ການສ້າງຍຸດທະສາດຍາວນານໃຫ້ແກ່ການທູດວັດທະນະທຳ, ສ້າງແຫຼ່ງກຳລັງຕື່ມອີກໃຫ້ແກ່ທີ່ຕັ້ງບົດບາດຂອງຫວຽດນາມບົນເວທີ່ສາກົນ ສືບຕໍ່ແມ່ນກຳນົດທິດບຸລິມະສິດໃຫ້ແກ່ວຽກງານການຕ່າງປະເທດຫວຽດນາມໃນປີ 2017.