ປີ 2016, ໂດຍປະຕິບັດຕາມສານກ່ຽວກັບການສ້າງລັດຖະບານແຫ່ງການສ້າງສັນ, ກະທຳນັ້ນ, ຂະແໜງການທູດຫວຽດນາມຍາດໄດ້ຜົນງານຫຼາຍຢ່າງ, ຍົກສູງປະສິດທິຜົນວຽກງານພົວພັນຕ່າງປະເທດ ແລະ ເຊື່ອມໂຍງເຂົ້າກັບສາກົນ. ບໍ່ພຽງແຕ່ເປີດກ້ວາງການພົວພັນກັບທຸກໆປະເທດເທົ່ານັ້ນ, ຫວຽດນາມຍັງແມ່ນສະມາຊິກທີ່ມີຄວາມຮັບຜິດຊອບຂອງວົງຄະນະຍາດສາກົນ. ທົ່ວຂະແໜງໄດ້ສ້າງທິດທາງພັດທະນາສອດຄ່ອງກັບກຳນົດທິດສ້າງລັດຖະບານແຫ່ງການສ້າງສັນ, ກະທຳ, ສັດຊື່ບໍລິສຸດເພື່ອນຳຜົນປະໂຫຍດມາໃຫ້ປະເທດຊາດ. ປີ 2017 ໝັ້ນໝາຍຈະສ້າງຫຼັກໝາຍໃໝ່ໃຫ້ແກ່ການທູດຫວຽດນາມ.
ທ່ານເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງທີ່ ກອງປະຊຸມວຽກງານການທູດຄັ້ງທີ 29 |
ອາດຈະຢືນຢັນໄດ້ວ່າ ບໍ່ມີຍາມໃດທີ່ຫວຽດນາມພັດມີສາຍພົວພັນທີ່ກ້ວາງໃຫຍ່ຄືໃນປະຈຸບັນ. ປະເທດຊາດພວມກ້າວເຂົ້າສູ່ໄລຍະພັດທະນາໃໝ່ກ່ຽວກັບຄຸນນະພາບ, ມີຄວາມໝາຍຍຸດທະສາດ ແລະ ໄດ້ວາງອອກບັນດາຄວາມຮຽກຮ້ອງຕ້ອງການປ່ຽນແປງໃໝ່ຈາກຈີນຕະນາການຕະຫຼອດຮອດວິທີເຮັດວຽກ.
ປ່ຽນແປງໃໝ່ຈີນຕະນາການວຽກງານການທູດ
ບົນຈິດໃຈລັດຖະບານແຫ່ງການສ້າງສັນ, ສັດຊື່ບໍລິສຸດ, ກະທຳຢ່າງຂ້ຽວຂາດ, ຮັບໃຊ້ປະຊາຊົນ, ການທູດຫວຽດນາມໄດ້ ປ່ຽນແປງໃໝ່ຈີນຕະນາການຄຸ້ມຄອງໃນເງື່ອນໄຂປະເທດຊາດເຊື່ອມໂຍງເຂົ້າກັບສາກົນນັບມື້ນັບເລິກເຊິ່ງກ້ວາງຂວາງ. ຈິດໃຈນີ້ໄດ້ຖືກເຊື່ອມຊຶມ, ຊາບຊຶມ ແລະ ຫັນມາເປັນບັນດາການກະທຳລະອຽດ, ເປັນຂໍ້ລິເລີ່ມລະອຽດ, ໝາກຜົນລະອຽດ. ດ້ວຍວິທີສຳພັດລະຫວ່າງຂະແໜງ, ຫຼາຍຂະແໜງ, ຫຼາຍຝ່າຍ, ທ່ວງທັນກັບຈັ່ງຫວະຂອງຍຸກສະໄໝ, ບັນດາອົງການສຳນັກງານຜູ້ຕາງໜ້າການທູດຂອງຕ່າງປະເທດໃນໄລຍະທີ່ຜ່ານມາ, ຍາມໃດກໍຊອກຫາ, ປະຕິບັດວຽກງານເປັນເສນາທິການເປັນຢ່າງດີ. ທ່ານເອກອັກຄະລັດຖະທູດຫວຽດນາມປະຈຳຈີນ ດັ້ງມິນຄອຍ ຖືວ່າ :
“ ສຳນັກງານຜູ້ຕາງໜ້າການທູດຫວຽດນາມຢູ່ຕ່າງປະເທດແມ່ນຂົວເຊື່ອມຕໍ່ດ້ານການທູດລະຫວ່າງຫວຽດນາມກັບປະເທດຕ່າງໆໃນໂລກ, ນອກຈາກນັ້ນ ຍັງແມ່ນກຳລັງໜູນເພື່ອຊຸກຍູ້ການພັດທະນາຂອງປະເທດຊາດອີກດ້ວຍ. ຂ້າພະເຈົ້າຖືວ່າ ສະພາບການໂລກມີການຜັນແປຢ່າງວ່ອງໄວ ແລະ ສັບສົນ, ສຳນັກງານຜູ້ຕາງໜ້າການທູດຫວຽດນາມຢູ່ຕ່າງປະເທດມີການພົວພັນ ແລກປ່ຽນ ຕີລາຄາຢ່າງໃກ້ຊິດກ່ວາ. ໜ້າທີ່ຂອງບັນດາອົງການ ສຳນັກງານຜູ້ຕາງໜ້າການທູດຫວຽດນາມຢູ່ຕ່າງປະເທດ ແມ່ນຕ້ອງເຫັນປະຈັກຕາການປ່ຽນແປງ, ການພັດທະນາຂອງປະເທດປະຈຳຖິ່ນ, ຈາກນັ້ນ ກໍຕີລາຄາສະພາບການໂລກ ແລະ ພາກພື້ນ, ເປັນເສນາທິການໃຫ້ການນຳພັກ, ລັດກ່ຽວກັບນະໂຍບາຍການຕ່າງປະເທດຢ່າງທັນການ ”
ໃນສະພາວະເຊື່ອມໂຍງຢ່າງເລິກເຊິ່ງກ້ວາງຂວາງ, ຫວຽດນາມໄດ້ຖືກຕົກຢູ່ໃນສະພາບຂາດຄວາມເປັນເຈົ້າການ ແລະ ຈະຕ້ອງຮັບບັນດາຜົນກະທົບຈາກພາຍນອກ, ຕ້ອງຕອບສະໜອງບັນດາຄຳໝັ້ນສັນຍາສາກົນຊຶ່ງໄດ້ເຂົ້າຮ່ວມ. ຕາມທ່ານເອກອັກຄະລັດຖະທູດຫວຽດນາມປະຈຳອາເມລິກາ ຝ້າມກວາງວິງ ແລ້ວ, ຍິ່ງກ່ວາເວລາໃດໝົດ, ບັນດາສຳນັກງານຜູ້ຕາງໜ້າການທູດ, ວິສາຫະກິດ ຕ້ອງກຳແໜ້ນສະພາບການເຄື່ອນໄຫວ, ບໍ່ປະໃຫ້ຊອງວ່າງທາງດ້ານກົດໝາຍຂອງປະເທດປະຈຳຖິ່ນກາຍເປັນໂອກາດໃຫ້ແກ່ບັນດາກຸ່ມສະແຫວງຫາຜົນປະໂຫຍດ. ຍົກຕົວຢ່າງຄື ບັນຫາຕ້ານການຂາຍບຸບລາຄາຢູ່ອາເມລິກາໃນຕະຫຼອດໄລຍະທີ່ຜ່ານມາ. ທ່ານເອກອັກຄະລັດຖະທູດຫວຽດນາມປະຈຳອາເມລິກາ ຝ້າມກວາງວິງ ເນັ້ນໜັກວ່າ :
“ ພວກເຮົາຕ້ອງສືບຕໍ່ປະສານສົມທົບເພື່ອຊຸກຍູ້ການພົວພັນລວມກ່ຽວກັບການພົວພັນ 2 ຝ່າຍ, ພ້ອມກັນນັ້ນ ກໍເປີດກ້ວາງ ແລະ ເອື້ອອຳນວຍຄວາມສະດວກສຳລັບບັນດາປະເພດສິນຄ້າສົ່ງມາຂາຍໃຫ້ຕະຫຼາດຫວຽດນາມ. ກະຊວງການຕ່າງປະເທດ, ບັນດາສຳນັກງານຜູ້ຕາງໜ້າການທູດຫວຽດນາມຢູ່ຕ່າງປະເທດຄວນເສີມຂະຫຍາຍຄວາມສາມາດບົ່ມຊ້ອນ, ທ່າແຮງຫຼາຍກວ່າອີກ, ພ້ອມກັນນັ້ນ, ເມື່ອເກີດການຂັດແຍ້ງນັ້ນ, ກໍເຂົ້າຮ່ວມການຕໍ່ສູ້, ແກ້ໄຂການຂັດແຍ້ງເຫຼົ່ານັ້ນ. ລະຫວ່າງບັນດານັກການທູດ, ຜູ້ວາງນະໂຍບາຍ, ບັນດາວິສາຫະກິດຄວນສົມທົບກັນຢ່າງແໜ້ນແຟ້ນກວ່າອີກ ”
ຍົກສູງພາບພົດ, ທີ່ຕັ້ງບົດບາດຂອງຫວຽດນາມ
ທີ່ກອງປະຊຸມວຽກງານການທູດຄັ້ງທີ 29 ຊຶ່ງຖືກດຳເນີນເມື່ອເດືອນ 9/2016, ທ່ານເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງໄດ້ເນັ້ນໜັກວ່າ ໃນໄລຍະໃໝ່, ບັນດານັກການທູດຕ້ອງເປັນຜູ້ຕາງໜ້າກ່ຽວກັບພາບພົດ, ຜົນປະໂຫຍດຢ່າງແທ້ຈິງຂອງຫວຽດນາມຢູ່ປະເທດປະຈຳຖິ່ນ. ນັກການທູດອາຊີບຂອງຍຸກສະໄໝໃໝ່ຈະຕ້ອງສວມບົດບາດເປັນນັກເສດຖະສາດ, ນັກຮຽນຮູ້, ສົ່ງເສີມການລົງທຶນ, ນັກວັດທະນະທຳຫວຽດນາມ. ນັ້ນແມ່ນບັນດາໜ້າທີ່, ພາລະກຳອັນສູງສົ່ງແຕ່ມີຄວາມໜັກໜາບໍ່ແມ່ນໜ້ອຍ. ທ່ານເລຂາທິການໃຫຍ່ພັກກອມມູນິດຫວຽດນາມຫງວຽນຟູ້ຈ້ອງ ກ່າວວ່າ :
“ ໃນໂລກໜຶ່ງທີ່ເຕັມໄປດ້ວຍການຫັນປ່ຽນ, ວຽກງານການທູດຄວນສືບຕໍ່ເສີມຂະຫຍາຍມູນເຊື້ອ, ສ້າງຂະແໜງການທູດທີ່ເຂັ້ມຂົ້ນໄປດ້ວຍສີສັນຫວຽດນາມ. ກວ່າ 70 ປີທີ່ຜ່ານມາ, ການເຄື່ອນໄຫວພົວພັນຕ່າງປະເທດໄດ້ສ້າງພື້ນຖານການທູດທີ່ເປັນເອກະລັກ ເຂັ້ມຂົ້ນໄປດ້ວຍສີສັນ “ຕົ້ນໄມ້ໄຜ່ຫວຽດນາມ ” - ອ່ອນໂຍນ, ແຕ່ແຂງແກ່ນ, ເມດຕາຈິດ ແລະ ອົງອາດກ້າແກ່ນ, ມີຄວາມມານະອົດທົນ, ຮູ້ບຸກຮູ້ຖອຍ, ເຂົ້າໃຈຕົນເອງ ແລະ ເຂົ້າໃຈໝູ່…ສະແດງໃຫ້ເຫັນຈິດວິນຍານ ແລະ ຄວາມສະຫງ່າອົງອາດຂອງຊາດຫວຽດນາມ. ຂ້າພະເຈົ້າຫວັງວ່າ ຖັນແຖວພະນັກງານເຮັດວຽກງານການຕ່າງປະເທດ ຈະມານະພະຍາຍາມສູ້ຊົນເພື່ອພາລະກິດພັດທະນາ ແລະ ການຍືນຍົງຄົງຕົວຂອງປະເທດຊາດ”
ໄຊຊະນະຫຼືປະລາໄຊຂອງວຽກງານການທູດ ກໍຂຶ້ນກັບກຳລັງແຮງຢ່າງແທ້ຈິງ ແລະ ທີ່ຕັ້ງບົດບາດ. ກຳລັງແຮງຢ່າງແທ້ຈິງ ແລະ ທີ່ຕັ້ງບົດບາດຢູ່ນີ້ ບໍ່ພຽງແຕ່ສະແດງອອກຜ່ານກຳລັງແຮງດ້ານວັດຖຸເທົ່ານັ້ນ, ຫາກຍັງສະແດງອອກຜ່ານກຳລັງແຮງອ່ອນໂຍນອີກດ້ວຍ. ນັ້ນແມ່ນຄວາມຊອບທຳໃນພາລະກິດຂອງຫວຽດນາມ, ແມ່ນກຳລັງແຮງມະຫາສາມັກຄີທົ່ວປວງຊົນທັງຊາດ. ນັ້ນຍັງແມ່ນການປະຕິບັດແນວທາງ ແລະ ນະໂຍບາຍການຕ່າງປະເທດຢ່າງຄ່ອງແຄ້ວ, ເສີມຂະຫຍາຍບັນດາຄຸນຄ່າວັດທະນະທຳຊຶ່ງລວມມີບັນດາຄຸນຄ່າມີຮູບຮ່າງ ແລະ ບໍ່ມີຮູບຮ່າງ, ຄຸນຄ່າທາງດ້ານຈິດໃຈ ແລະ ຄຸນຄ່າມະນຸດຫວຽດນາມເພື່ອສ້າງເຄື່ອງໝາຍການຄ້າໃຫ້ແກ່ປະເທດຊາດ.
ພ້ອມກັບການສ້າງລັດຖະບານແຫ່ງສ້າງສັນ, ຂະແໜງການທູດກໍພວມມານະພະຍາຍາມສ້າງທີ່ຕັ້ງທາງດ້ານການເມືອງ-ການປ້ອງກັນຄວາມສະຫງົບໃນຍຸດທະສາດລະດັບພາກພື້ນ ແລະ ທົ່ວໂລກ, ຮັບປະກັນຜົນປະໂຫຍດຂອງປະເທດຊາດ.