ຫວຽດນາມໄດ້ກ້າວເຂົ້າສູ່ປີ 2016 ຢ່າງເປັນທາງການດ້ວຍຫຼາຍກາລະໂອກາດ ແລະ ສິ່ງທ້າທາຍໃນວິວັດທະນາການເຊື່ອມໂຍງເຂົ້າກັບສາກົນ. ນັ້ນແມ່ນ ການເຊື່ອມໂຍງເຂົ້າກັບອາຊຽນ, ເຊື່ອມໂຍງເສດຖະກິດທົ່ວໂລກໂດຍຜ່ານບັນດາລະບອບລະບຽບການເສດຖະກິດ, ບັນດາສັນຍາການຄ້າ 2 ຝ່າຍ ແລະ ຫຼາຍຝ່າຍ. ໃນວິວັດການເຊື່ອມໂຍງນັ້ນ, ລະອຽດໃນປີ 2016, ຂະແໜງການທູດຫວຽດນາມສືບຕໍ່ເສີມຂະຫຍາຍທ່າແຮງນຳໜ້າ, ເປີດຊ່ອງທາງ, ສ້າງເງື່ອນໄຂເພື່ອໃຫ້ວິສາຫະກິດຫວຽດນາມເຊື່ອມໂຍງເຂົ້າກັບສາກົນ, ປະກອບສ່ວນຮັກສາສະພາບແວດລ້ອມເປັນປົກກະຕິໃຫ້ແກ່ການພັດທະນາປະເທດຊາດ.
ທ່ານລັດຖະມົນຕີກະຊວງການຄ້າ ແລະ ອຸດສາຫະກຳຫວຽດນາມ ວູ້ຮຸຍຮ່ວາງ ພ້ອມກັບລັດຖະມົນຕີປະເທດຕ່າງໆໃນການປະຊຸມຂ່າວປະກາດສຳເລັດການເຈລະຈາ TPP |
ໃນໂລກໂລກາພິວັດດ້ວຍການອາໄສຕໍ່ກັນທີ່ນັບມື້ນັບໃຫຍ່ຫຼວງລະຫວ່າງບັນດາປະເທດນັ້ນ, ການເຊື່ອມໂຍງເຂົ້າກັບສາກົນໄດ້ກາຍເປັນການເລືອກເຟັ້ນໂດຍພາວະວິໄສ ແລະ ຈຳເປັນຕ້ອງເປັນໄປ. ຄືດັ່ງຜູ້ພາທາງປະກອບສ່ວນນຳກຳປັ່ນຫວຽດນາມອອກສູ່ທະເລ, ການທູດຫວຽດນາມໄດ້ກຳນົດຢ່າງຖືກຕ້ອງ, ໃກ້ຊິດຕິດແທດກັບຂະບວນການເຄື່ອນໄຫວຂອງໂລກ, ຍາມໃດກໍມານະພະຍາຍາມຈົນສຸດຄວາມສາມາດຂອງຕົນເພື່ອກຳນົດທີ່ຕັ້ງບົດບາດຂອງປະເທດຊາດໃນພາກພື້ນ ແລະ ສາກກົນເພື່ອນຳມາເຊິ່ງຜົນປະໂຫຍດດີທີ່ສຸດ.
ຄວາມມານະພະຍາຍາມເຊື່ອມໂຍງເຂົ້າກັບພາກພື້ນ, ສ້າງສະພາບແວດລ້ອມເປັນປົກກະຕິ
ປະຊາຄົມອາຊຽນໄດ້ຮັບການສ້າງຕັ້ງຂຶ້ນຢ່າງເປັນທາງການ. ນີ້ແມ່ນເຫດການທີ່ສຳຄັນຂອງ 10 ປະເທດອາຊຽນ, ອັນໄດ້ນຳກາລະໂອກາດທີ່ດີມາສູ່ປະຊາຊົນປະມານ 630 ລ້ານຄົນຂອງ 10 ປະເທດ. ຕາມທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິງມິນ ແລ້ວ, ສຳລັບຫວຽດນາມ, ນີ້ກໍແມ່ນຜົນງານທີ່ສຳຄັນພາຍຫຼັງ 20 ປີທີ່ຫວຽດນາມມານະພະຍາຍາມປະກອບສ່ວນໃຫ້ແກ່ປະຊາຄົມດ້ວຍຖານະເປັນສະມາຊິກທີ່ຕັ້ງໜ້າ, ມີຄວາມຮັບຜິດຊອບ. ປະຊາຄົມອາຊຽນ ໄດ້ຮັບການສ້າງຕັ້ງຂຶ້ນ, ກ່ອນອື່ນໝົດ ແມ່ນສ້າງເງື່ອນໄຂສະດວກໃຫ້ແກ່ແຕ່ລະປະເທດ ມີສະພາບແວດລ້ອມແຫ່ງສາມັກຄີ, ສັນຕິພາບເພື່ອພັດທະນາ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິງມິນ ກ່າວວ່າ :
“ ຄວາມສະດວກທີ່ສຸດ ແມ່ນສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບ, ບົນພື້ນຖານປະຊາຊົນໄດ້ຮັບການຮັບປະກັນມີຊີວິດໃນສັນຕິພາບ, ສະຖຽນລະພາບ, ບັນດາປະເທດກໍພ້ອມກັນແບ່ງປັນຄວາມຮັບຜິດຊອບ. ບັນດາກົນໄກຮ່ວມມືໃນບັນດາຂົງເຂດການເມືອງ, ການປ້ອງກັນຄວາມສະຫງົບ ກໍໄດ້ຮັບການຮັບປະກັນເພື່ອໃຫ້ປະຊາຊົນມີຊີວິດໃນສະພາບແວດລ້ອມແຫ່ງໄມຕີຈິດມິດຕະພາບ ມີບັນດາກົນໄກຮ່ວມມືເພື່ອແກ້ໄຂບັນດາບັນຫາເມື່ອເກີດຂຶ້ນ. ອາດເວົ້າໄດ້ວ່າ ປະຊາຄົມອາຊຽນ ມີຜົນປະໂຫຍດຫຼາຍຢ່າງໃນສະເພາະໜ້າ ແລະ ຍາວນານ, ວຽກງານຂອງພວກເຮົາແມ່ນເຮັດແນວໃດເພື່ອໃຫ້ປະຊາຊົນໄດ້ຊົມໃຊ້ບັນດາຜົນປະໂຫຍດທີ່ໄດ້ນຳມາເຊິ່ງໃຫ້ນັ້ນ ກໍແມ່ນເປົ້າໝາຍຂອງບັນດາການນຳອາຊຽນມຸ່ງໄປເຖິງ, ໂດຍຖືປະຊາຊົນເປັນໃຈກາງ ”
ປະຊາຄົມອາຊຽນໄດ້ຮັບການສ້າງຕັ້ງຂຶ້ນ, ແຕ່ມີຄວາມຈິງປະການໜຶ່ງໃນປະຈຸບັນ ແມ່ນລະດັບຄວາມຮັບຮູ້ຂອງປະຊາຊົນ ແລະ ວິສາຫະກິດຫວຽດນາມ ແມ່ນຍັງບໍ່ທັນນອນຢູ່ແຖວໜ້າຂອງອາຊຽນ. ຕາມຜົນຂອງການສຳຫຼວດຄັ້ງຫຼ້າສຸດແລ້ວ, ມີເຖິງ 63%ຈຳນວນວິສາຫະກິດຫວຽດນາມຖືວ່າ ປະຊາຄົມເສດຖະກິດອາຊຽນ ບໍ່ມີຜົນສະທ້ອນສົມຄວນເຖິງການເຄື່ອນໄຫວຜະລິດ ດຳເນີນທຸລະກິດຂອງຕົນ. ນີ້ກໍແມ່ນຄວາມເປັນຫ່ວງຢ່າງໃຫຍ່ຫຼວງຂອງຂະແໜງການທູດຫວຽດນາມ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິງມິນ ຖືວ່າ :
“ ສິ່ງນີ້ກໍສ້າງສິ່ງທ້າທາຍຢ່າງໃຫຍ່ຫຼວງ ຖ້າຫາກພວກເຮົາບໍ່ກຳແໜ້ນກາລະໂອກາດທີ່ ປະຊາຄົມອາຊຽນນຳມາໃຫ້, ພວກເຮົາຈະຖືກສູນເສຍກາລະໂອກາດ ແລະ ຕ້ອງປະເຊີນໜ້າກັບສິ່ງທ້າທາຍຫຼາຍກວ່າເກົ່າ. ປີ 2016, ພ້ອມກັບແຜນນະໂຍບາຍເພີ່ມທະວີການໜູນຊ່ວຍໃຫ້ບັນດາວິສາຫະກິດເປີດກ້ວາງກາລະໂອກາດກັບບັນດາຄູ່ຮ່ວມມື, ພວກເຮົາເພີ່ມທະວີການໂຄສະນາກ່ຽວກັບ ປະຊາຄົມອາຊຽນເພື່ອນຳວິສາຫະກິດ, ປະຊາຊົນມຸ່ງໄປສູ່ ປະຊາຄົມເສດຖະກິດທີ່ພວມພັດທະນາ ແລະ ໃນປີ 2016 ເຂົ້າສູ່ພາກປະຕິບັດ ”
ສືບຕໍ່ເຮັດໜ້າທີ່ນຳໜ້າ, ເປີດຊ່ອງທາງ
ໃນປີ 2015, ກະຊວງການຕ່າງປະເທດ ແລະ ອົງການສຳນັກງານຕາງໜ້າການທູດຢູ່ຕ່າງປະເທດໄດ້ຕັ້ງໜ້າໜູນຊ່ວຍບັນດາວິສາຫະກິດຢູ່ພາຍໃນປະເທດ ເປີດກ້ວາງການພົວພັນກັບບັນດາຄູ່ຮ່ວມມືປະເທດຕ່າງໆ ໂດຍຜ່ານຮູບການເຊື່ອມຕໍ່ຂໍ້ມູນຂ່າວສານຂອງວິສາຫະກິດທັງຢູ່ພາຍໃນ ແລະ ຕ່າງປະເທດ, ຜ່ານບັນດາເວທີປາໄສລົງທຶນ, ຊຸກຍູ້ການຄ້າ. ພ້ອມກັນນັ້ນ, ບັນດາອົງການສຳນັກງານຕາງໜ້າການທູດຢູ່ພາຍໃນ ແລະ ຕ່າງປະເທດ ໄດ້ຕັ້ງໜ້າໜູນຊ່ວຍບັນດາວິສາຫະກິດເປີດກ້ວາງການເຄື່ອນໄຫວຜະລິດດຳເນີນທຸລະກິດ, ລົງທຶນຢູ່ຕ່າງປະເທດ, ໂດຍສະເພາະແມ່ນເມື່ອປະສົບກັບບັນຫາຫຍຸ້ງຍາກ ສັບສົນຢູ່ປະເທດຕ່າງໆ.
ໃນປີທີ່ຜ່ານມາ, ຫວຽດນາມໄດ້ຍົກລະດັບຂອບເຂດການພົວພັນຮ່ວມມືຍຸດທະສາດກັບມາເລເຊຍ, ອັນໄດ້ຍົກຍອດຈຳນວນຄູ່ຮ່ວມມືຍຸດທະສາດຂຶ້ນເຖິງ 15 ປະເທດ, ຄູ່ຮ່ວມມືຮອບດ້ານຂຶ້ນເຖິງ 11 ປະເທດ. ການສ້າງບັນດາສາຍພົວພັນນີ້ ໄດ້ປະກອບສ່ວນເຂົ້າໃນການສ້າງສັນຕິພາບ ສະຖຽນລະພາບເພື່ອໃຫ້ປະເທດຊາດພັດທະນາ. ກ່ຽວກັບແຜນນະໂຍບາຍຂອງຫວຽດນາມໃນປີ 2016, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິງມິນ ຢືນຢັນວ່າ :
“ ໃນໄລຍະໃໝ່, ແຜນນະໂຍບາຍເຊື່ອມໂຍງເຂົ້າກັບສາກົນຂອງຫວຽດນາມຈະຖືກຍູ້ແຮງກວ່າອີກ. ຫວຽດນາມສືບຕໍ່ມານະພະຍາຍາມ ນຳບັນດາການພົວພັນກັບຕ່າງປະເທດເຂົ້າສູ່ລວງເລິກ, ພັດທະນາການພົວພັນກັບບັນດາຄູ່ຮ່ວມມືສຳຄັນ ແລະ ບັນດາປະເທດເພື່ອນມິດທີ່ເປັນມູນເຊື້ອ. ໃນການພົວພັນດ້ານການທູດຫຼາຍຝ່າຍ, ຫວຽດນາມສືບຕໍ່ຮັກສາບົດບາດເປັນສະມາຊິກທີ່ເປັນເຈົ້າການ, ຕັ້ງໜ້າ ແລະ ມີຄວາມຮັບຜິດຊອບຂອງອາຊຽນ, ພ້ອມກັນນັ້ນ ກໍເຂົ້າຮ່ວມບັນດາກົນໄກຫຼາຍຝ່າຍອື່ນຢ່າງຕັ້ງໜ້າກວ່າອີກ ”
ປີ 2016, ການທູດຫວຽດນາມສືບຕໍ່ປະຕິບັດແຜນນະໂຍບາຍເຊື່ອມໂຍງເຂົ້າກັບສາກົນຢ່າງຮອບດ້ານ. ບໍ່ພຽງແຕ່ເປີດກ້ວາງການພົວພັນກັບທຸກໆປະເທດ, ບໍ່ພຽງແຕ່ເຂົ້າຮ່ວມວຽກງານທີ່ກ່ຽວຂ້ອງເຖິງຜົນປະໂຫຍດສະເພາະຂອງຕົນເທົ່ານັ້ນ, ຫວຽດນາມຍັງເປັນສະມາຊິກທີ່ມີຄວາມຮັບຜິດຊອບຂອງປະຊາຄົມໂລກ ແລະ ຍັງເຂົ້າຮ່ວມບັນດາບັນຫາອື່ນຂອງໂລກອີກດ້ວຍ.