(vovworld)- ການເຫລື້ອມໃສໄຫວ້ບູຊາເຈົ້າຊີວິດຮຸ່ງ ແມ່ນສະແດງໃຫ້ເຫັນຢ່າງຈະແຈ້ງທີ່ສຸດໃນມື້ຈັດພິທີໄຫວ້ບູຊາເຈົ້າຊີວິດຮຸ່ງ ຊື່ງດຳເນີນໃນວັນທີ 10/3 ໄລ່ຕາມຈັນທະປະຕິທິນ ປະຈຳປີ. ພິທີການທີ່ເປັນມູນເຊື້ອນີ້ຖືກຈັດຂຶ້ນຢູ່ເຂດປູຊະນີຍະສະຖານ ວິຫານຮຸ່ງ ຢູ່ເທິງພູ ເຫງ໋ຍຫລີງ ຂຶ້ນກັບນະຄອນ ຫວຽດຈີ, ແຂວງ ຟູທໍ້. ພິທີໄຫວ້ບູຊາເຈົ້າຊີວິດຮຸ່ງແມ່ນຕິດພັນກັບການເຫລື້ອມໃສໄຫວ້ບູຊາເຈົ້າຊີວິດຮຸ່ງ, ແມ່ນໂອກາດເພື່ອໃຫ້ປະຊາຊົນຫວຽດນາມ ກວ່າ 93 ລ້ານຄົນຢູ່ພາຍໃນປະເທດ ແລະ 4,5 ລ້ານຄົນຢູ່ ຕ່າງປະເທດ ພ້ອມກັນອ່ວາຍຫນ້າເມືອຫາກົກເຄົ້າເຫງົ້າກໍ, ອາໄລຫາຄຸນງາມຄວາມດີໃນການສ້າງສາປະເທດຊາດຂອງບັນດາເຈົ້າຊີວິດຮຸ່ງ.
ງານບຸນວິຫານຮຸ່ງ
ພາບ:ອິນເຕີແນັດ
|
ວັນຈັດພິທີໄຫວ້ບູຊາ ເຈົ້າຊີວິດຮຸ່ງ ປະຈຳປີ ແມ່ນວັນເພື່ອໃຫ້ປະຊາຊົນຫວຽດນາມ ໝົດທຸກຄົນ ເຖິງວ່າ ພວມດຳລົງຊີວິດຢູ່ໃສ ກໍລ້ວນແຕ່ອວ່າຍຫນ້າເມືອຫາກົກເຄົ້າເຫງົ້າກໍຂອງຊາດ. ໃນວັນນີ້, ປະຊາຊົນໃນທົ່ວປະເທດໄດ້ເຂົ້າຮ່ວມບັນດາການເຄື່ອນໄຫວສະແດງຄວາມເຄົາລົບນັບຖື, ຄວາມຮູ້ບຸນຄຸນຕໍ່ບັນດາເຈົ້າຊີວິດຮຸ່ງທີ່ໄດ້ມີຄຸນງາມຄວາມດີໃນການສ້າງສາປະເທດຊາດ ແລະ ບັນພະບຸລຸດລຸ້ນຕ່າງໆ ຍາມໃດກໍ່ສຸດຈິດສຸດໃຈເພື່ອປະຊາຊົນ, ປົກປັກຮັກສາປະເທດຊາດ.
ຄວາມເປັນເອກະລັກສະເພາະໃນການເຫລື້ອມໃສໄຫວ້ບູຊາເຈົ້າຊີວິດຮຸ່ງ
ງານບຸນໄຫວ້ບູຊາເຈົ້າຊີວິດຮຸ່ງ ແມ່ນຕິດພັນກັບການເຫລື້ອມໃສໄຫວ້ບູຊາເຈົ້າຊີວິດຮຸ່ງ, ແມ່ນຮູບການເຫລື້ອມໃສພື້ນເມືອງໄດ້ຖ່າຍທອດມາແຕ່ດົນນານຢູ່ຫວຽດນາມ. ໃນງານບຸນໄຫວ້ບູຊາເຈົ້າຊີວິດຮຸ່ງ, ປະຊາຊົນໄດ້ຈັດພິທີຖະຫວາຍທູບທຽນອາໄລຫາບັນດາເຈົ້າຊີວິດຮຸ່ງ, ພິທີໄຫວ້ບູຊາພະບີດາຂອງຊາດ ຫລາກລອງກວນ, ຖະຫວາຍທູບທຽນອາໄລຫາພະມານດາຂອງຊາດ ແລະ ຈັດຕັ້ງການແຂ່ງຂັນ ຫໍ່, ຕົ້ນເຂົ້າຕົ້ມ, ເຮັດເຂົ້າໜົມໄຢ່, ຂັບເພງພື້ນເມືອງ ແລະ ຂັບຊວານ ຟູທໍ້.
ການເຫລື້ອມໃສໄຫວ້ບູຊາເຈົ້າຊີວິດຮຸ່ງ ແມ່ນມໍລະດົກວັດທະນະທຳບໍ່ມີຮູບຮ່າງແຫ່ງຊາດ ແລະ ໄດ້ຮັບການຮັບຮອງຈາກ UNESCO ວ່າ, “ການເຫລື້ອມໃສໄຫວ້ບູຊາເຈົ້າຊີວິດຮຸ່ງ” ແມ່ນມໍລະດົກວັດທະນະທຳໂລກ ເມື່ອວັນທີ 6/12/2012. ໃນສຳເນົາຮັບຮອງການເຫລື້ອມໃສໄຫວ້ບູຊາເຈົ້າຊີວິດຮຸ່ງ, UNESCO ຊີ້ແຈ້ງວ່າ: ການເຫລື້ອມໃສໄຫວ້ບູຊາເຈົ້າຊີວິດຮຸ່ງ ແມ່ນການສະແດງຄວາມເຄົາລົບນັບຖືຕໍ່ບັນດາບັນພະບຸລຸດ ແລະ ຈາກນັ້ນ ຍົກສູງຄວາມເອກອ້າງທະນົງໃຈຂອງຊາດ ແລະ ສະຫນິດຕິດພັນວົງຄະນາຍາດ. ທ່ານຫງວຽນຄັກທ່ວນ ນັກຄົ້ນຄ້ວາປະຫວັດສາດ ໃຫ້ຮູ້ວ່າ:
“ຢູ່ໃນໂລກ ຫວຽດນາມ ແມ່ນປະເທດພິເສດທີ່ສຸດ, ມີປະຊາຄົມດ້ວຍ 54 ຊົນເຜົ່າແຕກຕ່າງກັນ, ແຕ່ 54 ຊົນເຜົ່າທັງໝົດລ້ວນແຕ່ເຄົາລົບນັບຖືເຈົ້າຊີວິດດຽວ ນັ້ນແມ່ນເຈົ້າຊີວິດຮຸ່ງ ແລະ ໄດ້ຮັບຖືວ່າແມ່ນຜູ້ມີຄຸນງາມຄວາມດີໃນການສ້າງສາປະເທດຊາດ. ປະຊາຊົນຫວຽດນາມ ຍາມໃດກໍ່ມີຄວາມເອກອ້າງທະນົງໃຈວ່າມີກົກເຄົ້າເຫງົ້າກໍດຽວ ດ້ວຍເລື່ອງເທບນິຍາຍ ພະບິດາ ຫລາກລອງກວນ ເອົາພະມານດາເອົາເກີ ແລ້ວເກີດລູກໄດ້ 100 ຄົນ, 50 ຄົນໄປຕາມແມ່ຂຶ້ນພູ, ສ່ວນ 50 ຄົນໄປຕາມພໍ່ລົງທະເລ ສ້າງເປັນຊາດຫວຽດນາມ.”
ການເຄື່ອນໄຫວໃນພິທີໄຫວ້ບູຊາເຈົ້າຊີວິດຮຸ່ງ
|
ການເຫລື້ອມໃສໄຫວ້ບູຊາເຈົ້າຊີວິດຮຸ່ງຕິດພັນກັບປະຊາຄົມ
ການເຫລື້ອມໃສໄຫວ້ບູຊາເຈົ້າຊີວິດຮຸ່ງ ແມ່ນສັນຍາລັກຂອງຄວາມເຄົາລົບນັບຖື, ຄວາມຮູ້ບຸນຄຸນ ຈາລຶກຄຸນງາມຄວາມດີຂອງບັນດາເຈົ້າຊີວິດຮຸ່ງ, ຜູ້ທີ່ມີຄຸນງາມຄວາມດີໃນການສ້າງສາປະເທດຊາດ. ປະຈຸບັນ ໄລ່ສະເພາະບໍລິເວນແຂວງ ຟູທໍ້ ມີ 326 ປູຊະນີຍະສະຖານໄຫວ້ບູຊາເຈົ້າຊີວິດຮຸ່ງ ແລະ ບຸກຄົນທີ່ມີຊື່ສຽງກ່ຽວຂອ້ງເຖິງສະໄຫມເຈົ້າຊີວິດຮຸ່ງ. ໃນທົ່ວເຂດດິນແດນຫວຽດນາມ, ປະຈຸບັນ ມີສະຖານທີ່ 1.400 ແຫ່ງ ຕັ້ງປູຊະນີຍະສະຖານໄຫວ້ບູຊາບັນດາເຈົ້າຊີວິດຮຸ່ງ ແລະ ບັນດາບຸກຄົນທີ່ມີຊື່ສຽງກ່ຽວຂ້ອງເຖິງສະໄຫມເຈົ້າຊີວິດຮຸ່ງ. ການເຫລື້ອມໃສໄຫວ້ບູຊາເຈົ້າຊີວິດຮຸ່ງ ນັບມື້ນັບຊຶມເລິກເຂົ້າລະບົບແນວຄິດຂອງປະຊາຊົນຫວຽດນາມ, ປຸກລຸກຄວາມສະຫນິດຕິດພັນ, ຄວາມສາມັກຄີຂອງຊາວຫວຽດນາມ. ໃນມື້ຈັດພິທີໄຫວ້ບູຊາເຈົ້າຊີວິດຮຸ່ງ, ພິທີກຳໄຫວ້ບູຊາເຈົ້າຊີວິດຮຸ່ງ ບໍ່ພຽງແຕ່ໄດ້ຮັບການຈັດຕັ້ງຂຶ້ນຢ່າງສົມກຽດຢູ່ເທິງພູ ເຫງ໋ຍຢູງ ຂຶ້ນກັບນະຄອນ ຫວຽດຈີ ແຂວງ ຟູທໍ້ ເທົ່ານັ້ນ ຫາກຍັງດຳເນີນຢູ່ບັນດາວິຫານໄຫວ້ບູຊາເຈົ້າຊີວິດຮຸ່ງຢູ່ບັນດາທ້ອງຖິ່ນໃນທົ່ວປະເທດອີກດ້ວຍ. ປະຊາຊົນບັນດາເຂດພາກເຄີຍຈັດງານບຸນເພື່ອຖະຫວາຍທູບທຽນ, ເຂົ້າຮ່ວມບັນດາການເຄື່ອນໄຫວໃນງານບຸນທີ່ຈັດຂຶ້ນຢູ່ ວິຫານຮຸ່ງ. ອ້າຍ ຫງວຽນວັນຟອງ, ນັກທ່ອງທ່ຽວໄປຢ້ຽມຢາມ ວິຫານຮຸ່ງ ແບ່ງປັນວ່າ:
“ຂ້າພະເຈົ້າມາຈາກ ນະຄອນ ຫາຍຟ່ອງ. ຂ້າພະເຈົ້າໄປຢ້ຽມຢາມວິຫານຮຸ່ງມາເປັນ 2 ຄັ້ງແລ້ວ. ຂ້າພະເຈົ້າມານີ້ເມື່ອອ່ວາຍຫນ້າເມືອຫາກົກເຄົ້າເຫງົ້າກໍ, ທົບທວນຄືນປະຫວັດສາດ, ຕົ້ນກຳເນີດຂອງຊາດ.”
ວັນຈັດພິທີໄຫວ້ບູຊາເຈົ້າຊີວິດຮຸ່ງ ແມ່ນວັນບຸນຂອງຊາດຫວຽດນາມ. ນີ້ບໍ່ພຽງແຕ່ແມ່ນໂອກາດເພື່ອສະແດງໃຫ້ເຫັນມູນເຊື້ອ “ກິນເຂົ້າຄິດຮອດຄຸນນາ ກິນປາຄິດຮອດຄຸນນ້ຳ” ເທົ່ານັ້ນ ຫາກເປັນການປັບປຸງຈິດໃຈສາມັກຄີ, ສະຕິຂອງວົງຄະນາຍາດໃນດວງໃຈຂອງປະຊາຊົນຫວຽດນາມແຕ່ລະຄົນອີກດ້ວຍ.