(vovworld) - ວັນທີ 16/6, ທ່ານປະທານປະເທດ ຫວຽດນາມ ເຈີ່ນດ້າຍກວາງ ແລະ ພັນລະຍາ ສິ້ນສຸດການຢ້ຽມຢາມທາງລັດຖະກິດ ເປັນເວລາ 5 ວັນເຖິງ ສປປ ລາວ ແລະ ລາຊະອານາຈັກ ກຳປູເຈຍ. ນີ້ແມ່ນການປະຕິບັດງານຢູ່ຕ່າງປະເທດຄັ້ງທຳອິດຂອງທ່ານປະທານປະເທດ ເຈີ່ນດ້າຍກວາງ ໃນຖານະເປັນປະທານປະເທດ. ບັນດາໝາກຜົນທີ່ບັນລຸໄດ້ໃນການຢ້ຽມຢາມຄັ້ງນີ້ມີຄວາມໝາຍອັນໃຫຍ່ຫຼວງສຳລັບການພົວພັນມິດຕະພາບທີ່ມີລັກສະນະຍຸດທະສາດພິເສດລະຫວ່າງ ຫວຽດນາມ - ລາວ - ກຳປູເຈຍ.
ສື່ມວນຊົນລາວໃຫ້ຂ່າວຢ່າງຫຼວງຫຼາຍກ່ອນການຢ້ຽມຢາມລາວ ຂອງປະທານປະເທດ ຫວຽດນາມ ເຈີ່ນດ້າຍກວາງ
(ພາບ:Mybinh)
ການຢ້ຽມຢາມ ສປປ ລາວ ແລະ ລາຊະອານາຈັກ ກຳປູເຈຍ ຂອງທ່ານປະທານປະເທດ ຫວຽດນາມ ເຈີ່ນດ້າຍກວາງ ໄດ້ດຳເນີນໄປຕາມຄຳເຊື້ອເຊີນຂອງທ່ານເລຂາທິການໃຫຍ່, ປະທານປະເທດ ສປປ ລາວ ບຸນຍັງ ວໍລະຈິດ ແລະ ພະບາດສົມເດັດ ພະບໍຣົມມະນຽດ ໂນໂຣດົມ ສີຫາໂມນີ ແຫ່ງຣາຊະອານາຈັກ ກຳປູເຈຍ. ການຢ້ຽມຢາມໄດ້ດຳເນີນໃນລະຫວ່າງວັນທີ 12 – 16/6/2016. ແລະໃນສະພາບການທີ່ ຫວຽດນາມ ແລະ ລາວ ກະກຽມສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ (5/9/1962 -5/9/2017) ແລະ 40 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື (18/7/1977 – 18/7/2017), ສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ 2 ຝ່າຍ ຫວຽດນາມ - ກຳປູເຈຍ (24/6/1967 – 24/6/2017).
ປັບປຸງການພົວພັນທີ່ເປັນມູນເຊື້ອອັນດີງາມ
ໃນ 5 ວັນດຳເນີນການຢ້ຽມຢາມ ລາວ ແລະ ກຳປູເຈຍ, ທ່ານປະທານປະເທດ ເຈີ່ນດ້າວກວາງ ມີການເຈລະຈາ, ພົບປະເຈລະຈາສຳຄັນຄັ້ງຕ່າງໆກັບການນຳຂັ້ນສູງ 2 ປະເທດ ແລະ ບັນດາການເຄື່ອນໄຫວອື່ນຕາມຕາຕະລາງເຮັດວຽກ. ໝາກຜົນຂອງບັນດາການເຈລະຈາ, ການພົບປະໄດ້ຢັ້ງຢືນແນວທາງການຕ່າງປະເທດຂອງ ຫວຽດນາມ ຖື 2 ປະເທດ ລາວ ແລະ ກຳປູເຈຍ ເປັນສຳຄັນແຖວໜ້າ. ສ່ວນການນຳຂັ້ນສູງ ລາວ ແລະ ກຳປູເຈຍ ກໍ່ໄດ້ຢັ້ງຢືນວ່າ: ຍາມໃດກໍ່ຖື ຫວຽດນາມ ແມ່ນຄູ່ຮ່ວມມືສຳຄັນ ມີລັກສະນະທີ່ເປັນມູນເຊື້ອ ແລະ ພິເສດ, ແມ່ນການພົວພັນແບບພິເສດທີ່ໄດ້ຮັບການສ້າງຂຶ້ນດ້ວຍການເສຍສະຫຼະເລືອດເນື້ອຂອງປະຊາຊົນ 3 ປະເທດ. ໃນການຢ້ຽມຢາມ ລາວ, ທ່ານປະທານປະເທດ ເຈີ່ນດ້າຍກວາງ ເນັ້ນໜັກກັບການນຳລາວ ກ່ຽວກັບຄວາມສຳຄັນເປັນຕາຍຂອງການພົວພັນ ຫວຽດນາມ - ລາວ. ການພົວພັນນັ້ນໄດ້ຮັບການສ້າງຂຶ້ນດ້ວຍເລືອດເນື້ອເຫື່ອແຮງຂອງນັກຮົບປະຕິວັດລຸ້ນຕ່າງໆຂອງ 2 ປະເທດ, ໄດ້ກາຍເປັນຊັບສົມບັດອັນລຳ້ຄ່າຂອງ 2 ຊາດ. ພະບາດສົມເດັດ ແລະ ການນຳຂັ້ນສູງ ກຳປູເຈຍຢັ້ງຢືນວ່າ: ຖ້າບໍ່ມີວັນທີ 7/1/1979 ນັ້ນ, ປະເທດກຳປູເຈຍ ກໍ່ຈະບໍ່ມີວັນນີ້. ກຳປູເຈຍ ຍາມໃດກໍ່ຈົດຈຳການອູ້ມຊູຊ່ວຍເຫຼືອຂອງບັນດານັກຮົບອາສາສະໝັກ ຫວຽດນາມ ໃນການປົດປ່ອຍປະຊາຊົນ ກຳປູເຈຍ ໃຫ້ຫລຸດພົ້ນອອກຈາກລະບອບດັບສູນເຊື້ອຊາດ ຂະແມແດງ ເມື່ອປີ 1979 ແລະ ຍາມໃດກໍ່ຖືການເສຍສະຫຼະເລືອດເນື້ອຂອງ ຫວຽດນາມ ເພື່ອຊ່ວຍປະຊາຊົນ ກຳປູເຈຍ ນັ້ນແມ່ນຄຸນງາມຄວາມດີອັນລຳ້ຄ່າ. ທ່ານປະທານປະເທດ ຫວຽດນາມ ກໍ່ຄືການນຳ ລາວ ແລະ ກຳປູເຈຍ ຢັ້ງຢືນຕ້ອງສືບຕໍ່ມານະພະຍາຍາມເພື່ອກໍ່ສ້າງ, ເພີ່ມພູນຄູນສ້າງການພົວພັນນັ້ນໃຫ້ນັບມື້ນັບພັດທະນາ, ນຳມາເຊິ່ງປະສິດທິຜົນອັນແທດຈິງໃຫ້ແກ່ປະຊາຊົນ ຫວຽດນາມ, ລາວ ແລະ ກຳປູເຈຍ. ທ່ານປະທານປະເທດ ເຈີ່ນດ້າຍກວາງ ແລະ ການນຳ 2 ປະເທດ ລາວ ແລະ ກຳປູເຈຍ ເຫັນດີເປັນເອກະສັນຕ້ອງສຶກສາອົບຮົມໃຫ້ລຸ້ນໜຸ່ມສືບທອດ ແລະ ເສີມຂະຫຍາຍມູນເຊື້ອຄວາມສາມັກຄີມິດຕະພາບອັນສູງສົ່ງນີ້.
ປະທານປະເທດ ຫວຽດນາມ ພ້ອມກັບພັນລະຍາ ພົບປະເຈລະຈາກັບພະບາດສົມເດັດ ພະບໍຣົມມະນຽດ ໂນໂຣດົມ ສີຫາໂມນີ ແຫ່ງຣາຊະອານາຈັກ ກຳປູເຈຍ
ສືບຕໍ່ພັດທະນາການພົວພັນຮ່ວມມືຮອບດ້ານລະຫວ່າງຫວຽດນາມ-ລາວ-ກຳປູເຈຍ
ໄປຄຽງຄູ່ກັບຜົນງານອັນໃຫຍ່ຫຼວງກ່ຽວກັບດ້ານການເມືອງ, ການທູດ, ທ່ານປະທານປະເທດ ເຈີ່ນດ້າຍກວາງ ໄດ້ປຶກສາຫາລືເນື້ອໃນດ້ານເສດຖະກິດຢ່າງເລິກເຊິ່ງ, ກ້ວາງຂວາງກັບການນຳລາວ ແລະ ກຳປູເຈຍ. ການນຳຂັ້ນສູງຂອງລາວ ແລະ ກຳປູເຈຍ ຢັ້ງຢືນວ່າບັນດາໂຄງການລົງທຶນຂອງ ຫວຽດນາມ ເຂົ້າລາວ ແລະ ກຳປູເຈຍ ໄດ້ປະກອບສ່ວນໃຫ້ແກ່ການເຕີບໂຕຢູ່ແຕ່ລະປະເທດ, ສ້າງວຽກເຮັດງານທຳ, ປະກອບສ່ວນລົບລ້າງຄວາມອຶດຫິວ, ຫລຸດຜ່ອນຄວາມທຸກຍາກ ແລະ ຍົກສູງຊີວິດການເປັນຢູ່ໃຫ້ແກ່ປະຊາຊົນ.
ກ່ຽວກັບດ້ານການຄ້າ, ການນຳ ລາວ ແລະ ກຳປູເຈຍ ລ້ວນແຕ່ຖືວ່າ: ຄວາມສາມາດບົ່ມຊ້ອນຍັງໃຫຍ່ຫຼວງຢູ່, ຕ້ອງມານະພະຍາຍາມກ່ວາອີກເພື່ອເຮັດໃຫ້ເງິນການຄ້າເຕີບໂຕ. ນອກນັ້ນ, ເລື່ອງເຊື່ອມຕໍ່ໂຄງລ່າງຄົມມະນາຄົມເວົ້າສະເພາະ ກໍ່ຄືການເຊື່ອມຕໍ່ 2 ພື້ນຖານເສດຖະກິດ ກັບ ຫວຽດນາມ ແລະ ເຊື່ອມຕໍ່ເສດຖະກິດ 3 ປະເທດໃນຂອບເຂດ CLV (ກຳປູເຈຍ, ລາວ, ຫວຽດນາມ), CLMV (ກຳປູເຈຍ, ລາວ, ມຽນມາ, ຫວຽດນາມ) ກໍ່ໄດ້ນຳມາປຶກສາຫາລື ແລະ ເຫັນດີເປັນເອກະພາບ. ລາວປາດຖະໜາຢາກເປີດກ້ວາງຮູບແບບ “ປະຕູດຽວ, ຈອດເທື່ອດຽວ” ເຊິ່ງປະຈຸບັນພວມໄດ້ຮັບການນຳໃຊ້ຢ່າງມີປະສິດທິຜົນຢູ່ດ່ານຊາຍແດນສາກົນ ລາວບາວ - ແດນສະຫວັນ. ສຳລັບລາວແລ້ວ, 2 ຝ່າຍໄດ້ເຫັນດີເປັນເອກະສັນສູ້ຊົນປະຕິບັດແຜນການຮ່ວມມືລະຫວ່າງ 2 ລັດຖະບານໃນປີ 2016 ແລະ ສັນຍາຮ່ວມມື 2 ຝ່າຍ ຫວຽດນາມ - ລາວ ໄລຍະ 2016 – 2020 ຢ່າງມີໄຊ. ສຳລັບກຳປູເຈຍ, 2 ຝ່າຍເຫັນດີເປັນເອກະສັນຜັນຂະຫຍາຍບັນດາໝາກຜົນທີ່ບັນລຸໄດ້ທີ່ກອງປະຊຸມຄະນະກຳມະການປະສົມ ຫວຽດນາມ - ກຳປູເຈຍ ຄັ້ງທີ 14 ແລະ ກອງປະຊຸມຮ່ວມມືບັນດາແຂວງເຂດຊາຍແດນຄັ້ງທີ 8 ຢ່າງມີປະສິດທິຜົນ.
ກ່ຽວກັບດ້ານການສຶກສາ, ວັດທະນະທຳ - ສັງຄົມ, ຫວຽດນາມ ແລະ ລາວ ເຫັນດີເປັນເອກະສັນສົມທົບກັນຈັດຕັ້ງສັບປະດາວັດທະນະທຳລາວ ຢູ່ ຫວຽດນາມ, ສົມທົບກັນຜັນຂະຫຍາຍການກໍ່ສ້າງບັນດາກິດຈະກຳກ່ຽວກັບນຳ້ໃຈມິດຕະພາບ 2 ປະເທດ, ໃນນັ້ນມີສວນສາທາລະນະປະທານ ໂຮ່ຈີມິນ ຢູ່ນະຄອນຫຼວງ ວຽງຈັນ.
ໃນບັນດາບັນຫາສາກົນ, ທັງ ລາວ ແລະ ກຳປູເຈຍ ລ້ວນແຕ່ເຫັນດີເປັນເອກະສັນກັນໂດຍຖືວ່າ: ສະພາບການຢູ່ພາກພື້ນຍັງມີການຜັນແປສັບສົນຫຼາຍຢ່າງ, ຕ້ອງສົ່ງເສີມການແກ້ໄຂບັນດາການຂັດແຍ້ງກັນດ້ວຍມາດຕະການສັນຕິພາບ, ລວມທັງການເຈລະຈາ ແລະ ທາບທາມຄວາມເຫັນ, ຄວາມລະງັບໃຈ, ບໍ່ນຳໃຊ້ ແລະ ນາບຂູ່ນຳໃຊ້ກຳລັງອາວຸດ, ເໝາະສົມກັບບັນດາຫຼັກການທີ່ໄດ້ຮັບຮູ້ຢ່າງກ້ວາງຂວາງຂອງກົດໝາຍສາກົນເຊິ່ງລວມມີ: ສົນທິສັນຍາ ສປຊ ປີ 1982 ກ່ຽວກັບກົດໝາຍວ່າດ້ວຍທະເລ (UNCLOS). 2 ຝ່າຍໃຫ້ຄຳໝັ້ນສັນຍາສືບຕໍ່ຮ່ວມມືຢ່າງແໜ້ນແຟ້ນນຳກັນ ແລະ ກັບບັນດາປະເທດສະມາຊິກອື່ນຂອງຄະນະກຳມະການແມ່ນຳ້ຂອງສາກົນ ເພື່ອແນໃສ່ຮັບປະກັນການຄຸ້ມຄອງ ແລະ ນຳໃຊ້ແຫຼ່ງນຳ້ແມ່ນຳ້ຂອງແບບຍືນຍົງ.
ບັນດາຜົນງານທີ່ບັນລຸໄດ້ໃນການຢ້ຽມຢາມລາວ ແລະ ກຳປູເຈຍ ຂອງທ່ານປະທານປະເທດ ເຈີ່ນດ້າຍກວາງ ແມ່ນສຳຄັນທີ່ສຸດ ແລະ ຮອບດ້ານ. ໝາກຜົນນີ້ໄດ້ສ້າງພື້ນຖານຢ່າງໝັ້ນຄົງເພື່ອນຳການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ຫວຽດນາມ ກັບ ລາວ ແລະ ການພົວພັນຖານບ້ານໃກ້ເຮືອນຄຽງອັນດີງາມ, ນຳ້ໃຈມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ແບບຍືນຍົງຍາວນານກັບ ກຳປູເຈຍ ໃຫ້ນັບມື້ນັບພັດທະນາ.