(vovworld) – ເຫດການເຮືອບິນ MH17 ຖືກຍິງຕົກພວມເຮັດໃຫ້ວິກິດການຢູ່ ຢູແກຼນ ເຄັ່ງຮ້ອນກ່ວາເວລາໃດໝົດ. ຢູແກຼນ ເຄີຍເປັນບັນຫາຂອງບັນດາປະເທດມະຫາອຳນາດ, ແຕ່ເຖິງຢ່າງໃດກໍ່ຕາມ, ເຫດການລູກສອນໄຟຍິງຕົກເຮືອບິນພົນລະເຮືອນທີ່ເຮັດໃຫ້ຜູ້ໂດຍສານ 298 ຄົນຖືສັນຊາດຂອງຫຼາຍປະເທດເສຍຊີວິດນັ້ນໄດ້ພາໃຫ້ວິກິດການນີ້ແຜ່ລາມອອກຢ່າງກ້ວາງຂວາງໃນຂອບເຂດທົ່ວໂລກ. ເຫດການເຮືອບິນ MH17 ຕົກພວມເຮັດໃຫ້ສະພາບການຢູ່ ຢູແກຼນ ປ່ຽນແປງໄປນຳ. ບົດຂຽນ “ຈຸດປະສົງດ້ານການເມືອງເບື້ອງຫຼັງອຸບັດຕິເຫດເຮືອບິນ MH17 ຕົກ” ຂອງນັກຂ່າວວິທະຍຸກະຈາຍສຽງ ຫວຽດນາມ.
ຄວາມ, ຕົກສະເງີ້, ຄວາມເຈັບປວດ ແລະ ຄວາມຄຽດແຄ້ນແມ່ນອາລົມຈິດ ຂອງປະຊາຄົມສາກົນເມື່ອໄດ້ເຫັນປະຈັກຕາເຮືອບິນ MH17 ຂອງມາເລເຊຍ ຖືກຍິງຕົກເມື່ອວັນທີ 17/7 ຜ່ານມາ, ໃນຂະນະທີ່ພວມເດີນທາງຜ່ານເຂດນານຟ້າຂອງ ຢູແກຼນ, ເຮັດໃຫ້ 298 ຄົນເສຍຊີວິດ. 5 ມື້ໄດ້ຜ່ານໄປແລ້ວ, ແຕ່ເບິ່ງຄືວ່າທຸກໆຄວາມມານະພະຍາຍາມສືບສວນເພື່ອຊອກຫາຄວາມຈິງຍັງຊັກຊ້າຢູ່, ຊ້ຳບໍ່ໜຳຍັງປະສົບກັບສິ່ງກີດຂວາງຫຼາຍຢ່າງ. ແທນທີຮ່ວມມືຢ່າງແໜ້ນແຟ້ນນຳກັນ, ບັນດາຝ່າຍທີ່ກ່ຽວຂ້ອງພັດຖົກຖຽງກັນຢ່າງຂ້ຽວຂາດ.
ພາບປະກອບ
ການຕໍ່ສູ້ທາງຂໍ້ມູນຂ່າວບໍ່ທັນມີຄຳຕອບ
ໃນຂະນະທີ່ຝ່າຍແຍກຕົວອອກຢູ່ພາກຕາເວັນອອກຖະແຫຼງວ່າລັດຖະບານ ຢູແກຼນ ໄດ້ສ້າງແຜນການໃຫ້ແກ່ການບຸກໂຈມຕີນັ້ນ Kiev ພັດກ່າວຫາຝ່າຍແຍກຕົວອອກຕ້ອງຮັບຜິດຊອບຕໍ່ເຫດການດັ່ງກ່າວ. ອາເມລິກາ ແລະ ຝ່າຍຕາເວັນຕົກພ້ອມກັນ “ບຸກໂຈມຕີ” ລັດເຊຍ ເມື່ອຖືວ່າ ມົດສກູ ອາດຈະສະກັດກັ້ນການປະທະກັນຢູ່ ຢູແກຼນ ໄດ້ແຕ່ພັດບໍ່ປະຕິບັດ. ທ່ານປະທານາທິບໍດີ ລັດເຊຍ Vladimir Putin ຢືນຢັນວ່າ: ອາເມລິກາ ຕ້ອງຮັບຜິດຊອບເມື່ອສົ່ງສັນຍານໃຫ້ Kiev ດຳເນີນການປາບປາມຝ່າຍແຍກຕົວອອກຢູ່ພາກຕາເວັນອອກ. ພ້ອມກັບບັນດາຄຳກ່າວຫາກັນ, ບັນດາຝ່າຍທີ່ກ່ຽວຂ້ອງຍັງຍົກອອກມາບັນດາພະຍານຫຼັກຖານເພື່ອຖີ້ມໂທດໃຫ້ກັນ.
ແຫຼ່ງຂ່າວດ້ານປ້ອງກັນຄວາມສະຫງົບ ຢູແກນ ຢືນຢັນວ່າ: ທະຫານແຕກທັບສະໜັບສະໜູນ ລັດເຊຍ ຢູ່ພາກຕາເວັນອອກປະເທດນີ້ໄດ້ຮັບລູກສອນໄພ BUK – M1 ຂຶ້ນກັບລະບົບລູກສອນໄຟພາທາງດ້ວຍ ຣາດາ SA – 11 ຈາກລັດເຊຍ, ພ້ອມກັບຊ່ຽວຊານໜ່ວຍໜຶ່ງອີກ. ສືບລາຊະການລັບ ຢູແກຼນ ຢືນຢັນວ່າ: ເຂົາເຈົ້າມີເທບອັດສຽງການໂອ້ລົມລະຫວ່າງກຳລັງແຍກຕົວອອກກັບບັນດາ ນາຍທະຫານສືບລາຊະການລັບກອງທັບ ລັດເຊຍ, ຊຳ້ບໍ່ໜຳຍັງມີພະຍານຫຼັກຖານກ່ຽວກັບລະບົບຍິງເຮືອບິນທີ່ທັນສະໄໝໂດຍ ລັດເຊຍ ຜະລິດເຊິ່ງຝ່າຍແຍກຕົວອອກພວມນຳໃຊ້. ໃນຂະນະນັ້ນ, ສືບລາຊະການລັບກະຊວງປ້ອງກັນປະເທດ ລັດເຊຍ ໃຫ້ຮູ້ວ່າ: ສຳເນົາເອກະສານການບິນຂອງ ລັດເຊຍ ໃຫ້ຮູ້ວ່າ: ມີເຮືອບິນ Su 25 ຂອງ ຢູແກຼນ ບິນໃກ້ກັບເຮືອບິນ MH17 ຂອງບໍລິສັດການບິນມາເລເຊຍ ແອລາຍ ກ່ອນທີ່ເຮືອບິນ Boeing 777 ລຳນີ້ຕົກ. ເຖິງຢ່າງໃດກໍ່ຕາມ, ມາຮອດປະຈຸບັນ, ທຸກໆພະຍານຫຼັກຖານນີ້ຍັງບໍ່ທັນໄດ້ຮັບການກວດກາ ແລະ ຫາງສຽງຍັງລໍຄອຍຄຳຕອບຊັດເຈນຈາກຄະນະກຳມະການກວດກາສາກົນ.
ຈຸດປະສົງດ້ານການເມືອງເບື້ອງຫຼັງອຸບັດຕິເຫດ MH17
ວັນທີ 21/7, ປະທານາທິບໍດີລັດເຊຍ V. Putin ໄດ້ຖະແຫຼງວ່າ, ບໍ່ມີໃຜໄດ້ສວຍໃຊ້ອຸບັດຕິເພດ MH17 ເພື່ອຈຸດປະສົງທາງການເມືອງຂອງຕົນຢູ່ ຢູແກຼນ. ອາດເຫັນໄດ້ວ່າ, ເບື້ອງຫຼັງຄຳກ່າວຫາ, ຖະແຫຼງການເຫຼົ່ານັ້ນລ້ວນແຕ່ມີທັດສະນະ, ຫຼັກໝັ້ນທີ່ຂັນແຂງຂອງຝ່າຍຕ່າງໆ.
ປະຈຸບັນ, ຕາມວົງການນັກໄຈ້ແຍກແລ້ວ, ວິກິດການຢູ່ ຢູ ແກຼນ ຈະຂຶ້ນກັບຂໍ້ສະຫຼຸບການສືບສວນສຸດທ້າຍຂອງເຫດຍິງເຮືອບິນຕົກ. ບາງເທື່ອຈະມີ 2 ກໍລະນີ. ທີໜຶ່ງແມ່ນ, ຖ້າມີພະຍານຫຼັກຖານຢ່າງພຽງພໍກ່ຽວກັບເລື່ອງອຳນາດການປົກຄອງຢູແກຼນ ເປັນຕົວການໃນອຸບັດຕິເຫດ MH17, ອາເມລິກາ ແລະ ຝ່າຍຕາເວັນຕົກຈະຕ້ອງກ່າວປະນາມຢ່າງແຮງ, ຊຳ້ບໍ່ໜຳອາດຈະຮຽກຮ້ອງລົງໂທດໃນລະດັບ ສປຊ ສຳລັບອຳນາດການປົກຄອງຢູແກຼນ. ເຖິງວ່າຍັງຄົງສືບຕໍ່ຮຽກຮ້ອງຝ່າຍຕ່າງໆຊຸກຍູ້ການເຈລະຈາ ແລະ ຮຽກຮ້ອງລັດເຊຍ ບໍ່ໄດ້ສະໜັບສະໜູນກຳລັງແຍກຕົວອອກກໍ່ຕາມ, ແຕ່ປະຕິກິລີຍາ ແລະ ວິທີການໜູນຊ່ວຍອຳນາດການປົກຄອງ Kiev ຈະບໍ່ແຂງແຮງຄືກ່ອນນີ້ອີກ. ທີສອງ, ຖ້າຫາກໃນກໍລະນີອຸບັດຕິເຫດເຮືອບິນຕົກແມ່ນຂຶ້ນກັບຄວາມຮັບຜິດຊອບຂອງກຳລັງແຍກຕົວອອກທີ່ນິຍົມລັດເຊຍ, ອຳນາດການປົກຄອງ Kiev ຈະຕ້ອງເປີດກວ້າງການປາບປາມຢູ່ ຢູແກຼນ ຕາເວັນອອກ. ນີ້ກໍ່ແມ່ນຄວາມຈິງທີ່ພວມດຳເນີນຢູ່ໃນເຂດທີ່ການປະທະກັນສອງຝ່າຍພວມປິນຂັ້ນໄດ.
ສະພາບການເມືອງໂລກພາຍຫຼັງ ອຸບັດຕິເຫດ MH17
ເຖິງວ່າຂໍ້ສະຫຼຸບການສືບສວນຈະຄືແນວໃດກໍ່ຕາມ, ແນ່ນອນວ່າສະພາບການເມືອງຢູ່ ຢູແກຼນກໍ່ມີການປ່ຽນແປງຢ່າງໃຫຍ່ຫຼວງໃນຊຸມມື້ຈະມາເຖິງ. ວິກິດການຢູ່ ຢູແກຼນ ເຄີຍແມ່ນບັນຫາຂອງລັດເຊຍ, ອາເມລິກາ ແລະ ຝ່າຍຕາເວັນຕົກ. ແຕ່ພາຍຫຼັງເຫດການເຮືອບິນ MH17 ຕົກເຮັດໃຫ້ 298 ຄົນທີ່ຖືສັນຊາດຂອງຫຼາຍປະເທດໃນໂລກຖືກເສຍຊີວິດນັ້ນ ໄດ້ເຮັດໃຫ້ວິກິດການນີ້ແຜ່ລາມອອກຢ່າງວ່ອງໄວໃນທົ່ວໂລກ. ຄວາມຊັກຊ້າ. ການຮ່ວມມືບໍ່ມີປະສິດທິຜົນໃນວຽກງານສືບສວນສາຍເຫດອາດຈະພາໃຫ້ບັນດາປະເທດຝ່າຍຕາເວັນຕົກທີ່ມີພົນລະເມືອງເສຍຊີວິດຍື່ນມືເຂົ້າ ແລະ ໜູນຊ່ວຍດ້ານການທະຫານໃຫ້ແກ່ອຳນາດການປົກຄອງ Kiev.
ສິ່ງທີ່ອັນຕະລາຍນັ້ນແມ່ນ, ປະຈຸບັນມີຫຼາຍສັນຍານສະແດງໃຫ້ເຫັນວ່າ, ບັນດາປະເທດມະຫາອຳນາດຢູ່ເອີລົບພວມສະໜັບສະໜູນອາເມລິກາເມື່ອຖືວ່າກຳລັງແຍກຕົວອອກນິຍົມລັດເຊຍ ແມ່ນຕົວການໃນເຫດຍິງເຮືອບິນ MH17 ຕົກ. ເບິ່ງຄືວ່າບັນດາຄຳສັ່ງລົງໂທດ, ຂວຳ້ບາດດ້ານການຄ້າພວມລໍຖ້າໂອກາດເພື່ອເລັ່ງໃສ່ລັດເຊຍ. ແຕ່ການລົງໂທດທີ່ນັບມື້ນັບເພີ່ມຂຶ້ນນັ້ນຈະເຮັດໃຫ້ລັດເຊຍທໍ້ຖອຍໄດ້ຫຼືບໍ? ນັ້ນແມ່ນຄຳຖາມທີ່ສາມາດຕອບໄຫ້ຢ່າງງ່າຍດາຍ. ເມື່ອຜົນສະທ້ອນຂອງລັດເຊຍຢູ່ ຢູແກຼນຕາເວັນອອກ ແລະ ເລື່ອງສະກັດກັ້ນບໍ່ໃຫ້ຢູແກຼນ ເຂົ້າເປັນສະມາຊິກ NATO ແມ່ນຜົນປະໂຫຍດແຫ່ງຊາດ, ຄວາມເປັນຕາຍຂອງລັດເຊຍ, ຍ້ອນເຫດນັ້ນບໍ່ມີໃຜຈະຄິດໄດ້ວ່າ ຄວາມເຄັ່ງຕຶງດ້ານການເມືອງຢູ່ຢູແກຼນຈະຫຼຸດລົງໃນຊຸມມື້ຈະມາເຖິງ. ເມື່ອຫຼັກໝັ້ນຂອງຝ່າຍຕ່າງໆນັບມື້ນັບຂັນແຂງກວ່າ, ການປະທະກັນຢູ່ ຢູແກຼນຈະນັບມື້ນັບຕົກຢູ່ໃນສະພາບວິກິດການຢ່າງຮ້າຍແຮງກວ່າ.. ແຕ່ສິ່ງທີ່ອັນຕະລາຍກວ່ານັ້ນແມ່ນທັງລັດເຊຍ ແລະ ຝ່າຍຕາເວັນຕົກລ້ວນແຕ່ບໍ່ຄິດໄລ່ຊັ່ງຊາໄດ້ວ່າຂອບເຂດການບຸກໂຈມຕີຂອງຝ່າຍລຸກຮຶ້ຂຶ້ນອາດຈະກາຍຂ້າມພືນແຜ່ນດິນຂອງຢູແກຼນ. ຖ້າເປັນແນວນັ້ນ, ການປະທະກັນດ້ວຍກຳລັງອາວຸດທາງອາກາດ ຫຼືໃສ່ເປົ້າໝາຍບົນໜ້າດິນຈະກໍ່ຜົນຮ້າຍຢ້ອນຫຼັງຍາກທີ່ຈະຄາດຄະເນລ່ວງໜ້າໄດ້.