(vovworld) - ໃນລະຫວ່າງວັນທີ 30 – 31/03, ທີ່ນະຄອນ ເຫວ້ ຈະດຳເນີນກອງປະຊຸມຮ່ວມມື ອາຊີ - ເອີລົບ (ASEM) ກ່ຽວກັບການສຶກສາແບບມີຫົວຄິດປະດິດສ້າງ ແລະ ກໍ່ສ້າງແຫຼ່ງຊັບພະຍາກອນມະນຸດ ເພື່ອການພັດທະນາແບບຍືນຍົງ. ກອງປະຊຸມແມ່ນຂໍ້ລິເລີ່ມຂອງ ຫວຽດນາມ ດ້ວຍການອຸປະຖຳຈາກ 5 ປະເທດສະມາຊິກລວມມີ: ໂປໂລຍ, ອິນເດຍ, ອິນໂດເນເຊຍ, ຍີ່ປຸ່ນ ແລະ ສ.ເກົາຫຼີ. ກໍ່ສ້າງແຫຼ່ງຊັບພະຍາກອນມະນຸດ ເພື່ອການພັດທະນາແບບຍືນຍົງແມ່ນຈຸດສຸມໃນຍຸດທະສາດພັດທະນາເສດຖະກິດສັງຄົມຂອງ ຫວຽດນາມ ແລະ ດ້ວຍການຍົກອອກຂໍ້ລິເລີ່ມຈັດຕັ້ງກອງປະຊຸມນີ້, ຫວຽດນາມ ປາດຖະໜາຢາກແລກປ່ຽນບົດຮຽນ ແລະ ພຶດຕິກຳຕົວຈິງຈາກບັນດາປະເທດລະຫວ່າງ 2 ທະວີບ, ເພື່ອຮັບໃຊ້ໃຫ້ແກ່ເປົ້າໝາຍເຊື່ອມໂຍງ ແລະ ພັດທະນາແບບຍືນຍົງ.
(ພາບປະກອບ)
ນີ້ແມ່ນກອງປະຊຸມລະດັບລະຫວ່າງພາກພື້ນທີ່ມີຄວາມສຳຄັນທີ່ສຸດໃນຂອບເຂດ ASEM ໂດຍ ຫວຽດນາມ ເປັນປະເທດເຈົ້າພາບຈັດຕັ້ງໃນປີ 2017, ເພື່ອຜັນຂະຫຍາຍຂໍ້ລິເລີ່ມຂອງນາຍົກລັດຖະມົນຕີ ຊຶ່ງໄດ້ຮັບຮອງເອົາທີ່ກອງປະຊຸມຂັ້ນສຸງ ASEM 11 ແລະ ກໍ່ແມ່ນຂໍ້ລິເລີ່ມທຳອິດກ່ຽວກັບການສຶກສາ ແລະ ການພັດທະນາແຫຼ່ງຊັບພະຍາກອນມະນຸດໃນທົດສະວັດທີ 3 ຂອງ ASEM.
ກອງປະຊຸມຖືກດຳເນີນໄປໃນສະພາວະບັນດາປະເທດຊຸກຍູ້ການສຶກສາແບບມີຫົວຄິດປະດິດສ້າງ, ພັດທະນາບັນດາທັກສະໃນສະຕະວັດທີ 21 ເພື່ອກໍ່ສ້າງແຫຼ່ງຊັບພະຍາກອນມະນຸດມີຄຸນນະພາບສູງ, ຕອບສະໜອງຄວາມຮຽກຮ້ອງຕ້ອງການໃໝ່ຂອງການປະຕິວັດອຸດສາຫະກຳຄັ້ງທີ 4, ກອງປະຊຸມປະກອບສ່ວນຊຸກຍູ້ການຮ່ວມມື ອາຊີ - ເອີລົບ ແກ້ໄຂບັນດາບັນຫາທີ່ກ່ຽວຂ້ອງເຖິງການສຶກສາ, ແຮງງານ, ວຽກເຮັດງານທຳ, ນຳສະເໜີກ່ຽວກັບວິໄສທັດການສຶກສາ ແລະ ພັດທະນາຊັບພະຍາກອນມະນຸດຂອງ ASEM, ໂຄງການບັນດາທັກສະໃໝ່ຂອງ ASEM, ມຸ່ງໄປເຖິງການເຕີບໂຕຢ່າງໝັ້ນຄົງ ແລະ ຮອບດ້ານ, ປະກອບສ່ວນຢ່າງມີປະສິດທິຜົນເຂົ້າໃນການຜັນຂະຫຍາຍໂຄງການດຳເນີນງານ 2030 ເພື່ອການພັດທະນາແບບຍືນຍົງ.
ບົດບາດຂອງການສຶກສາ ແລະ ແຫຼ່ງຊັບພະຍາກອນມະນຸດໃນສັງກາດດິຈິຕອນ ແລະ ເຕັກໂນໂລຢີຂໍ້ມູນຂ່າວ
ວິວັດການເຊື່ອມໂຍງເຂົ້າກັບສາກົນຂອງ ຫວຽດນາມ ພວມດຳເນີນໄປນັບມື້ນັບເລິກເຊິ່ງກ້ວາງຂວາງ ແລະ ນຳມາເຊິ່ງບັນດາຜົນງານຢ່າງໃຫຍ່ຫລວງທີ່ບໍ່ອາດປະຕິເສດໄດ້. ໃນຂົງເຂດການສຶກສາບຳລຸງສ້າງ, ນອກຈາກເລື່ອງຊ່ວຍ ຫວຽດນາມ ຮັບເອົາວິທະຍາສາດ - ເຕັກໂນໂລຢີໃໝ່ ແລະ ທັກສະການຄຸ້ມຄອງທີ່ກ້າວໜ້າໃນຫລາຍຂົງເຂດ, ວິວັດການເຊື່ອມໂຍງຍັງຄົງປະກອບສ່ວນກໍ່ສ້າງໃຫ້ ຫວຽດນາມ ຖັນແຖວຊັບພະຍາກອນມະນຸດມີລະດັບຄວາມຮູ້ ແລະ ກຳລັງຄວາມສາມາດທັງດ້ານວິຊາການ ແລະ ທັງການຄຸ້ມຄອງ.
ເຖິງຢ່າງໃດກໍ່ຕາມ, ການເຊື່ອມໂຍງຍັງຄົງກໍ່ກຳລັງດັນໃຫຍ່ຫລວງຕໍ່ການສຶກສາຂອງ ຫວຽດນາມ ນັ້ນແມ່ນຕ້ອງຍົກສູງຄຸນນພາບການກໍ່ສ້າງຢ່າງບໍ່ຢຸດຢັ້ງ ເພື່ອກໍ່ສ້າງແຫຼ່ງຊັບພະຍາກອນມະນຸດທີ່ມີລັກສະນະແກ່ງແຍ້ງ. ໃນສະພາວະຄວາມຮຽກຮ້ອງການກໍ່ສ້າງຕ້ອງເໝາະສົມກັບມາດຕະຖານລວມຂອງພາກພື້ນ ແລະ ສາກົນ, ກຳລັງແຮງງານ ຫວຽດນາມ ພາຍຫລັງໄດ້ຮັບການກໍ່ສ້າງ ຕ້ອງສາມາດແກ່ງແຍ້ງ ບໍ່ພຽງແຕ່ຢູ່ຕະຫລາດແຮງງານຕ່າງປະເທດເທົ່ານັ້ນ ຫາກຍັງສາມາດແກ່ງແຍ້ງຢູ່ໃນຕະຫລາດແຮງງານ ຫວຽດນາມ ອີກດ້ວຍ. ເມື່ອເນັ້ນໜັກເຖິງສິ່ງດັ່ງກ່າວ, ທ່ານ ເຈີ່ນວັນຍຸງ ອະດີດຮອງລັດຖະມົນຕີກະຊວງສຶກສາ ແລະ ກໍ່ສ້າງ ຫວຽດນາມ, ເລຂາທິການໃຫຍ່ສະພາວຸດທິການສຶກສາແຫ່ງຊາດຖືວ່າ:
“ໃນສະໄໝເຊື່ອມໂຍງປະຈຸບັນ ພົນລະເມືອງໃນທົ່ວໂລກຄວນມີ 2 ທັກສະ ນັ້ນແມ່ນພາສາອັງກິດ ແລະ ເຕັກໂນໂລຢີຂໍ້ມູນຂ່າວສານ. ນັ້ນແມ່ນ 2 ເຄື່ອງມືທີ່ມີຄວາມສຳຄັນໃນຍຸກສະໄໝ. ເຕັກໂນໂລຢີຂໍ້ມູນຂ່າວສານໄດ້ເຂົ້າສູ່ທຸກດ້ານຂອງຊີວິດສັງຄົມ ຫວຽດນາມ. ສຳລັບປະເທດ ຫວຽດນາມ, ເຖິງວ່າລາຍຮັບຍັງບໍ່ທັນສູງກໍ່ຕາມ ແຕ່ດ້ວຍການນຳໃຊ້ຄອມພິວເຕີຢ່າງທົ່ວເຖິງ ແລະ ບາງບໍລິສັດໄດ້ເລີ່ມຄົ້ນຄວ້າ ແລະ ຂາຍຊອບແວໃນໂລກ, ນັ້ນແມ່ນສິ່ງທີ່ລ້ຳຄ່າ. ເຖິງຢ່າງໃດກໍ່ຕາມ, ສຳລັບພາສາອັງກິດ ຂ້າພະເຈົ້າຖືວ່າ ແມ່ນຄວາມຕ້ອງການຢ່າງຮີບດ່ວນ, ມີລັກສະນະຍຸດທະສາດ. ”
ເມື່ອຮັບຮູ້ໄດ້ເຖິງສິ່ງນີ້, ໃນຊຸມປີທີ່ຜ່ານມາ, ຫວຽດນາມໄດ້ປະກາດໃຊ້ບັນດານະໂຍບາຍທີ່ກ່ຽວຂ້ອງເຖິງການ ຍົກສູງຄຸນນະພາບແຫຼ່ງຊັບພະຍາກອນມະນຸດ, ຕອບສະໜອງຄວາມຮຽກຮ້ອງຕ້ອງການໃນການເຊື່ອມໂຍງເຂົ້າກັບສາກົນ. ທ່ານ ເລດົງເຟືອງ ຜູ້ອຳນວຍການສູນຄົ້ນຄ້ວາສຶກສາຊັ້ນສູງ ແລະ ອາຊີວະສຶກສາ, ສະຖາບັນວິທະຍາສາດສຶກສາຫວຽດນາມ ຢືນຢັນວ່າ : (ເທບ)
“ ລັດຖະບານໄດ້ປະກາດໃຊ້ແຜນກຳນົດພັດທະນາແຫຼ່ງຊັບພະຍາກອນມະນຸດ ກໍຄືບັນດາຂະແໜງການ, ທ້ອງຖິ່ນຕ່າງໆ. ແຜນກຳນົດທັງໝົດເຫຼົ່ານັ້ນ ແມ່ນມຸ່ງໄປສູ່ເລື່ອງເຮັດແນວໃດເພື່ອໃຫ້ລະບົບການສຶກສາ ແລະ ກໍ່ສ້າງຫວຽດນາມແທດເໝາະຄວາມຮຽກຮ້ອງຕ້ອງການທາງດ້ານແຫຼ່ງຊັບພະຍາກອນມະນຸດໃນໄລຍະໃໝ່. ພ້ອມກັນນັ້ນ, ກະຊວງສຶກສາ ແລະ ກໍ່ສ້າງ ກໍມີຄວາມຕັ້ງໜ້າໃນການນຳສະເໜີຕໍ່ລັດຖະບານກ່ຽວກັບການສ້າງບັນດາຍຸດທະສາດພັດທະນາການສຶກສາ ມຸ່ງໄປສູ່ການຍົກລະດັບການສຶກສາ. ນອກຈາກນັ້ນ, ສະພາແຫ່ງຊາດກໍໄດ້ຮັບຮອງເອົາກົດໝາຍວ່າດ້ວຍການສຶກສາຊັ້ນສູງ, ໃນນັ້ນ, ເນັ້ນໜັກເຖິງການລົງທຶນ, ຍົກສູງຄຸນນະພາບການສຶກສາ ແລະ ບຳລຸງສ້າງເພື່ອຕອບສະໜອງຕາມມາດຕະຖານສາກົນ ”
ຍູ້ແຮງການຮ່ວມມືສາກົນໃນການພັດທະນາແຫຼ່ງຊັບພະຍາກອນມະນຸດ
ໂດຍທາບທາມພຶດຕິກຳຕົວຈິງ ແລະ ບົດຮຽນ, ປະສົບການຂອງບັນດາປະເທດພັດທະນາອາຊີ ແລະ ເອີລົບ, ຊຶ່ງພົ້ນເດັ່ນຂຶ້ນແມ່ນໃນການຊຸກຍູ້ການສຶກສາແບບມີຫົວຄິດປະດິດສ້າງ ແລະ ແຫຼ່ງຊັບພະຍາກອນທີ່ມີຄຸນນະພາບສູງ, ພິເສດແມ່ນໃນການນຳໃຊ້ເຕັກໂນໂລຢີຂໍ້ມູນຂ່າວສານ, ການສຶກສາລະຫວ່າງຊາດ, ການບຳລຸງສ້າງວິຊາຊີບ, ມະຫາວິທະຍາໄລ….ແມ່ນການກຳນົດທິດບຸລິມະສິດຂອງຫວຽດນາມເພື່ອໃຫ້ຮັບໃຊ້ເປົ້າໝາຍຍົກສູງຄຸນນະພາບແຫຼ່ງຊັບພະຍາກອນມະນຸດ. ເພາະສະນັ້ນ, ການເປັນເຈົ້າພາບຈັດຕັ້ງກອງປະຊຸມຮ່ວມມືອາແຊມກ່ຽວກັບການສຶກສາແບບມີຫົວຄິດປະດິດສ້າງ ແລະ ກໍ່ສ້າງແຫຼ່ງຊັບພະຍາກອນມະນຸດເພື່ອການພັດທະນາແບບຍືນຍົງ, ຫວຽດນາມຢາກສົ່ງສານກ່ຽວກັບແຜນນະໂຍບາຍຢ່າງເປັນເຈົ້າການ, ຕັ້ງໜ້າເຊື່ອມໂຍງເຂົ້າກັບສາກົນ, ເຂົ້າຮ່ວມການນຳສະເໜີທິດທາງຮ່ວມມືໃນອາແຊມໃນຂົງເຂດການສຶກສາ ແລະ ພັດທະນາແຫຼ່ງຊັບພະຍາກອນມະນຸດ, ພ້ອມກັນນັ້ນ ກໍຍາດແຍ່ງການສະໜັບສະໜູນ, ປະສານສົມທົບກັນຂອງບັນດາສະມາຊິກຊຸກຍູ້ຄວາມເອົາໃຈໃສ່ຂອງຫວຽດນາມກ່ຽວກັບການປ່ຽນແປງໃໝ່, ມີຫົວຄິດປະດິດສ້າງ, ສຶກສາ ແລະ ພັດທະນາແຫຼ່ງຊັບພະຍາກອນມະນຸດ./.