ການຮ່ວມມືກ່ຽວກັບທະເລໃນຂົງເຂດຊ່ວຍບັນເທົາທຸກໂດຍມະນຸດສະທຳ ແລະ ຜ່ອນເບົາໄພທຳມະຊາດ ແມ່ນເນື້ອໃນທີ່ີຖືກເຕື້ອງເຖິງທີ່ເວທີປາໄສທະເລ ອາຊຽນ ຄັ້ງທີ 5 (AMF-5) ແລະເວທີປາໄສທະເລ ອາຊຽນ ເປີດກ້ວາງຄັ້ງທີ 3 (EAMF – 3) ຊຶ່ງຈັດຂຶ້ນໃນວັນທີ 27 ແລະ 28/8 ຢູ່ນະຄອນດານັ້ງ. ໂດຍແມ່ນເສັ້ນທາງທະເລທີ່ສຳຄັນເຊື່ອມຕໍ່ລະຫວ່າງມະຫາສະໝຸດປາຊີຝິກ ແລະ ມະຫາສະໝຸດອິນເດຍ, ທະເລຕາເວັນອອກ ບໍ່ພຽງແຕ່ມີເຮືອ, ກຳປັ່ນແລ່ນໄປມາຢ່າງຫຼວງຫຼາຍເທົ່ານັ້ນ, ຫາກຍັງແມ່ນແຫ່ງໄດ້ຮັບຄວາມສ່ຽງຈາກໄພທຳມະຊາດອີກດ້ວຍ ຊຶ່ງໄດ້ເປັນການນາບຂູ່ຕໍ່ຊີວິດອິນຊີຂອງຊາວປະມົງທີ່ເຄື່ອນໄຫວປະກອບອາຊີບຫາປາຢູ່ທະເລ. ຍ້ອນເຫດນີ້ເອງ, ການຮ່ວມມືໃນຂົງເຂດຊອກຫາ ແລະ ກູ້ໄພກູ້ຊີບໃຫ້ແກ່ມະນຸດ ແລະ ເຮືອກຳປັ່ນຖືກຮັບເຄາະຮ້າຍບົນທະເລ ແມ່ນຖືກຖືວ່າແມ່ນຂົງເຂດຮ່ວມມືທີ່ສຳຄັນທີ່ສຸດ, ປະກອບສ່ວນປັບປຸງສະພາບແວດລ້ອມສັນຕິພາບຢູ່ ທະເລຕາເວັນອອກ.
ເວທີປາໄສທະເລ ອາຊຽນ ຄັ້ງທີ 5 (AMF-5)
|
ເວທີປາໄສທະເລ ອາຊຽນ ແລະ ເວທີປາໄສທະເລ ອາຊຽນ ເປີດກ້ວາງປິນີ້ ມີການເຂົ້າຮ່ວມຂອງ10 ປະເທດອາຊຽນ ແລະ 8 ປະເທດຄູ່ຮ່ວມມືລະດັບສູງໃນອາຊີຕາເວັນອອກເຊັ່ນ: ຈີນ, ຍີປຸ່ນ, ສ.ເກົາຫຼີ, ອິນເດຍ, ອົດສະຕາລີ, ນິວຊີແລນ, ລັດເຊຍ ແລະ ອາເມລິກາ.
ນັບຕັ້ງແຕ່ໄດ້ຮັບການສ້າງຕັ້ງເມື່ອປີ 2010, ພ້ອມກັບ 11 ກົນໄກກ່ຽວກັບການຮ່ວມມືບົນທະເລໃນອາຊຽນດ້ວຍບັນດາການເຄື່ອນໄຫວຮ່ວມມືລົງເລິກຂະແໜງລະອຽດຜ່ານຂົງເຂດຕ່າງໆນັ້ນ, ເວທີປາໄສທະເລ ອາຊຽນ ຍັງແມ່ນແຫ່ງແລກປ່ຽນບັນຫາຕ່າງໆແນໃສ່ຊ່ວຍບັນດາປະເທດພາຄີສົມທົບກັນຢ່າງດີກວ່າໃນຂົງເຂດຮ່ວມມືບົນທະເລ, ຄືການເຊື່ອມຕໍ່ບັນດາຂົງເຂດການປະມົງ, ຮັບມືກັບໄພທຳມະຊາດ.....ນີ້ຍັງແມ່ນແຫ່ງເພື່ອເປັນທີ່ປຶກສາແກ່ລັດຖະບານກ່ຽວກັບບັນດາມາດຕະການທີ່ອາດເປັນໄປໄດ້ . ເພາະສະນັ້ນ, ບັນດາເວທີປາໄສນີ້ ເຄີຍເລັ່ງໃສ່ດ້ານການຮ່ວມມື, ຫາກບໍ່ພຽງແຕ່ຢຸດຢູ່ໃນບັນຫາຄວາມໝັ້ນຄົງຢູ່ທະເລເທົ່ານັ້ນ.
ເຊີດຊູຈຸດປະສົງມະນຸດສະທຳ ແລະ ສ້າງຄວາມເຊື່ອໝັ້ນ.
ໃນຕົວຈິງ, ຖ້າຫາກມີສະພາບແວດລ້ອມທະເລແຫ່ງສັນຕິພາບ, ບໍ່ມີການຂັດແຍ້ງກ່ຽວກັບອະທິປະໄຕນັ້ນ, ກໍເປັນເລື່ອງທີ່ສະດວກສະບາຍແກ່ການຮ່ວມມືລະຫວ່າງບັນດາປະເທດ. ແຕ່ເມື່ອເກີດຄວາມສັບສົນ, ມີການຂັດແຍ້ງກ່ຽວກັບອະທິປະໄຕນັ້ນ, ການສ້າງສະພາບແວດລ້ອມການເມືອງ, ຄວາມເຊື່ອໝັ້ນຕໍ່ກັນເພື່ອສ້າງເງື່ອນໄຂສະດວກໃຫ້ແກ່ການຮ່ວມມືບົນທະເລໄດ້ຮັບການຜັນຂະຫຍາຍ ແມ່ນສິ່ງທີ່ຈຳເປັນທີ່ສຸດ.
ດ້ວຍຈຸດພິເສດສະເພາະແມ່ນເສັ້ນທາງທະເລທີ່ສຳຄັນ, ແມ່ນເຂດຫາປາຂອງຊາວປະມົງຫຼາຍປະເທດໃນພາກພື້ນ, ຍ້ອນສາຍເຫດຕ່າງໆ ໄດ້ພາໃຫ້ປະຊາຊົນບັນດາປະເທດອາດຈະຮັບເຄາະຮ້າຍບົນທະເລ. ເພາະສະນັ້ນ, ການສ້າງກົນໄກຮ່ວມມືສົມທົບກັນເພື່ອຊອກຫາ, ກູ້ໄພກູ້ຊີບ ແມ່ນສິ່ງຈຳເປັນ ແລະ ແທດເໝາະ, ຊຶ່ງມີຄວາມໝາຍບໍ່ພຽງແຕ່ໃນດ້ານມະນຸດສະທຳເທົ່ານັ້ນ, ຫາກຍັງເພື່ອແນໃສ່ສ້າງຄວາມເຊື່ອໝັ້ນຕໍ່ກັນອີກດ້ວຍ. ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວ່າງວິງ ເນັ້ນໜັກວ່າ :
“ ສຳລັບບັນດາຜູ້ຄົນ ແລະ ເຮືອກຳປັ່ນເມື່ອຮັບເຄາະຮ້າຍບົນທະເລນັ້ນ, ເຂົາເຈົ້າແມ່ນບັນດາຜູ້ບໍ່ມີການກະທຳຜິດ. ບໍ່ອາດປ່ອບປະໃຫ້ສິ່ງນີ້, ສິ່ງນັ້ນໃນພາກພື້ນສົ່ງຜົນສະທ້ອນເຖິງເປົ້າໝາຍ ຊ່ວຍບັນເທົາທຸກໂດຍມະນຸດສະທຳ. ມະນຸດ ແລະ ເຮືອກຳປັ່ນເມື່ອເດີນທະເລ ອາດຈະຮັບເຄາະຮ້າຍຍ້ອນສະຖານະການຄວາມເຄັ່ງຕຶງໃນພາກພື້ນຫຼືຍ້ອນໄພພິບັດທຳມະຊາດ, ໂລກລະລາດ....ສຳລັບ ສິ່ງທັງໝົດເຫຼົ່ານັ້ນ, ຈຸດປະສົງເພື່ອມະນຸດສະທຳແມ່ນຕ້ອງຮັບຖືເປັນສິ່ງສຳຄັນອັນດັບໜຶ່ງ. ເຮັດແນວໃດເພື່ອໃຫ້ປະຊາຊົນ, ຊາວປະມົງເມື່ອເດີນທະເລຖືກຮັບເຄາະຮ້າຍນັ້ນ, ລ້ວນແຕ່ໄດ້ຮັບການຊ່ວຍກູ້ໂດຍມະນຸດສະທຳ”
ສ້າງກົນໄກສົມທົບຢ່າງມີປະສິດທິຜົນໃນການໜູນຊ່ວຍໂດຍມະນຸດສະທຳບົນທະເລ
ໃນຕົວຈິງ, ໄລຍະທີ່ຜ່ານມາ, ການຮ່ວມມືໃນຂົງເຂດກູ້ໄພກູ້ຊີບໃຫ້ແກ່ເຮືອ, ກຳປັ່ນບົນທະເລ ໄດ້ຮັບການຜັນຂະຫຍາຍຢ່າງມີປະສິດທິຜົນຈາກບັນດາປະເທດອາຊຽນ. ບັນດາການຝຶກຊ້ອມລະຫວ່າງບັນດາປະເທດອາຊຽນນຳກັນ ແລະ ລະຫວ່າງອາຊຽນກັບບັນດາຄູ່ຮ່ວມມືໃນພາກພື້ນໄດ້ຖືກດຳເນີນເປັນປະຈຳ. ປີ 2013, ກອງປະຊຸມສຳມະນາ “ ເພີ່ີມທະວີການຮ່ວມມືອາຊຽນ-ຈີນໃນການຊອກຫາ ແລະ ກູ້ໄພກູ້ຊີບສຳລັບມະນຸດ ແລະ ເຮືອກຳປັ່ນຖືກເຄາະຮ້າຍເມືອ່ເດີນເຮືອຢູ່ທະເລຕາເວັນອອກ” ທີ່ຈັດຂຶ້ນຢູ່ຫວຽດນາມ ກໍໄດ້ຮັບຄວາມເອົາໃຈໃສ່ຢ່າງຫຼວງຫຼາຍຈາກບັນດາປະເທດທັງຢູ່ພາຍໃນ ແລະ ນອກພາກພື້ນ. ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວ່າງວິງໃຫ້ຮູ້ຕື່ມອີກວ່າ :
“ ບັນດາຝ່າຍຕ້ອງແບ່ງປັນນະໂຍບາຍຕໍ່ກັນເພື່ອມີກົນໄກສົມທົບ. ຕ້ອງກຳນົດຫົວໜ່ວຍປະຈຳການຂອງແຕ່ລະປະເທດໃນພາກພື້ນ ເພື່ອສາມາດຕິດຕໍ່ສື່ສານນຳກັນໄດ້ໂດຍໄວທີ່ສຸດ ຂະນະທີ່ມີຂ່າວກ່ຽວກັບພົນລະເມືອງ, ຊາວປະມົງຂອງປະເທດໃດໜຶ່ງຖືກເຄາະຮ້າຍບົນທະເລ. ຄວນສ້າງກົນໄກຮ່ວມມືໃນພາກພື້ນ. ກົນໄກນີ້ບໍ່ພຽງແຕ່ຊ່ວຍກູ້ມະນຸດ, ເຮືອກຳປັ່ນເມື່ອຮັບເຄາະຮ້າຍເມື່ອເດີນທະເລເທົ່ານັ້ນ, ຫາກຍັງໜູນຊ່ວຍດ້ານກຳລັງຄວາມສາມາດໃຫ້ແກ່ບັນດາປະເທດພາຄີອີກດ້ວຍ ” .
ໂດຍແມ່ນປະເທດຕັ້ງຢູ່ແຄມທະເລ, ດ້ວຍຄວາມຫວັງ ແລະ ມີເຈດຕະນາດີຊຸກຍູ້ການສ້າງຄວາມເຊື່ອໝັ້ນ ແລະ ການຮ່ວມມືພາກພື້ນເພື່ອສັນຕິພາບ, ສະຖຽນລະພາບລວມຢູ່ ທະເລຕາເວັນອອກ, ຫວຽດນາມຖືເປັນສຳຄັນຍິ່ງການຊຸກຍູ້ການຮ່ວມມືໃນພາກພື້ນກ່ຽວກັບການຊອກຫາ, ກູ້ໄພກູ້ຊີບສຳລັບມະນຸດ ແລະ ກຳປັ່ນເມື່ອຖືກເຄາະຮ້າຍບົນທະເລ. ເລື່ອງເປັນເຈົ້າພາບຈັດຕັ້ງບັນດາ ເວທີປາໄສທະເລອາຊຽນຄັ້ງນີ້ ແມ່ນຄວາມມານະພະຍາຍາມສືບຕໍ່ຜັນຂະຫຍາຍປະຕິບັດຄວາມຫວັງຂອງຫວຽດນາມໃນຂົງເຂດນີ້. ສະພາບແວດລ້ອມແຫ່ງສັນຕິພາບ, ສະຖຽນລະພາບເພື່ອພັດທະນາ ແມ່ນຄວາມຫວັງຂອງທຸກໆປະເທດໃນພາກພື້ນ, ນັບທັງບັນດາປະເທດບໍ່ມີທະເລ .