(vovworld)- ປີ 2014-2015 ແມ່ນໄລຍະສຸດທ້າຍສຳລັບ ອາຊຽນ ເພື່ອກ້າວໄປເຖິງຈຸດໝາຍສ້າງປະຊາຄົມເສດຖະກິດ ອາຊຽນ(AEC). ນີ້ກໍແມ່ນຈຸດເວລາສະດວກທີ່ສຸດເພ່ື່ອໃຫ້ບັນດາວິສາຫະກິດຫວຽດນາມ ຮັບເອົາຜົນປະໂຫຍດຄວາມສາມາດບົ່ມຊ້ອນຂອງ AEC ເພື່ອເພີ່ມທະວີທີ່ຕັ້ງບົດບາດ, ຊ່ວຍພື້ນຖານເສດຖະກິດຫວຽດນາມ ມີກຳລັງແກ້ງແຍ້ງສູງກວ່າ. ໃນລາຍການສະຖານະການການເມືອງພາກນີ້ ພວກເຮົາຄັດສະຫນີບັນດາຄຳເຫັນຂອງຜູ້ຊ່ຽວຊານກ່ຽວກັບບັນຫາດັ່ງກ່າວທີ່ເວທີປາໄສສົ່ງເສີມການສົ່ງອອກ ຫວຽດນາມ ປີ 2014 ຊື່ງຖືກຈັດຂຶ້ນຫວ່າງແລ້ວນີ້ຢູ່ ຮ່າໂນ້ຍ .
 |
10 ປີຜ່ານມາ, ວົງເງິນການຄ້າຫວຽດນາມ ເພີ່ມຂຶ້ນທົບເກືອບ 4 ເທົ່າ, ຈາກ 9 ຕື້ USD ໃນປີ 2003 ຂຶ້ນເຖິງ ເກືອບ 40 ຕື້ USD ໃນປີ 2013. ພິເສດ, ໃນຊຸມປີມໍ່ໆມານີ້, ອາຊຽນ ຖືກຈັດເຂົ້າໝວດບັນດາຕະຫລາດສົ່ງອອກຕົ້ນຕໍຢ່າງລຽນຕິດຂອງຫວຽດນາມ. ປີ 2013, ອາຊຽນ ແມ່ນຕະຫລາດສົ່ງອອກໃຫຍ່ອັນດັບ 3 ຂອງຫວຽດນາມ, ພຽງຖັດຈາກ ອາເມລິກາ, ອີຢູ, ດ້ວຍວົງເງິນເກືອບ 18,5 ຕື້ USD. ໃນ 3 ເດືອນຕົ້ນປີນີ້, ວົງເງິນສົ່ງອອກຂອງຫວຽດນາມ ໄປຍັງ ອາຊຽນ ຄາດວ່າບັນລຸ 4,7 ຕື້ USD, ເພີ່ມຂຶ້ນ 6,4% ເມື່ອທຽບໃສ່ໄລຍະດຽວກັນຂອງປີກາຍ.
ສືບຕໍ່ຍູ້ແຮງການສົ່ງອອກໄປຍັງ ອາຊຽນ ກ່ອນປະຊາຄົມເສດຖະກິດ ອາຊຽນໄດ້ຮັບການສ້າງຕັ້ງຂຶ້ນ
ຕາມການຄາດຄະເນແລ້ວ, ກ່ອນ AEC ໄດ້ຮັບການສ້າງຕັ້ງຂຶ້ນ, ການສົ່ງອອກຂອງຫວຽດນາມ ໄປຍັງ ອາຊຽນ ຈະສືບບັນລຸລະດັບການເຕີບໂຕເປັນປົກກະຕິ ຍ້ອນໄດ້ຊົມໃຊ້ບຸລິມະສິດພາສີ ດ້ວຍກວ່າ 99% ປະເພດ. ຄຽງຄູ່ກັນນັ້ນ, ມີຫລາຍເນື້ອໃນກ່ຽວກັບຮັບປະກັນການຈໍລະຈອນສິນຄ້າຢ່າງເສລີທີ່ໄດ້ໝັ້ນໝາຍໃນສັນຍາການຄ້າອາຊຽນ (ATIGA) ຊື່ງໄດ້ຮັບການປະຕິບັດຈາກບັນດາປະເທດສະມາຊິກຄື: ຫັນພາສີເປັນເສລີ, ລົບລ້າງຮົ້ວກີດຂວາງປອດພາສີ, ປັບປຸງຄຳຮຽກຮ້ອງກ່ຽວກັບຂໍ້ກຳນົດຕົ້ນກຳເນີດຂອງສິນຄ້າ; ສ້າງຄວາມສະດວກດ້ານການຄ້າ, ຫັນລະບຽບພາສີເປັນທັນສະໄຫມ ແລະ ງ່າຍດາຍ.
ທ່ານນາງ ຟ້າມທິຮົ່ງແທງ, ຮອງຫົວຫນ້າກົມອາຊີ - ປາຊີຟີກ ສັງກັດກະຊວງອຸດສາຫະກຳ ແລະ ການຄ້າຫວຽດນາມ ຖືວ່າ: ບັນດາວິສາຫະກິດ ຄວນສືບຕໍ່ຍູ້ແຮງການສົ່ງອອກບັນດາປະເພດສິນຄ້າມີອັດຕາສ່ວນໃຫຍ່ໃນວົງເງິນສົ່ງອອກໄປຍັງ ອາຊຽນຄື: ເຄື່ອງອາໄລ່, ຄອມພິວເຕີ, ຜະລິດຕະພັນເອເລັກໂຕນິກ ແລະ ເຄື່ອງອາໄລ່, ພາຫະນະຂົນສົ່ງ, ກົນຈັກ, ເຫລັກກ້າ, ເຂົ້າສານ ແລະ ອື່ນໆ. ຄຽງຄູ່ກັນນັ້ນ, ຄວນຍາດແຍ່ງບັນດາທ່າໄດ້ປຽບຂອງສິນຄ້າຫວຽດນາມ ຢູ່ໝວດຕະຫລາດຄື: ລາວ, ກຳປູເຈຍ, ມຽນມາ.
ຮັບເອົາກາລະໂອກາດເພື່ອໝູນໃຊ້ບັນດາທ່າໄດ້ປຽບຢ່າງສຸດຂີດເມື່ອ AEC ໄດ້ຮັບການສ້າງຕັ້ງຂຶ້ນ
ຕາມທ່ານ ໂດ໋ທັງຫາຍ, ຮອງລັດຖະມົນຕີກະຊວງອຸດສາຫະກຳການຄ້າຫວຽດນາມແລ້ວ, ເມື່ອ AEC ໄດ້ຮັບການສ້າງຕັ້ງຂຶ້ນໃນປີ 2015, ອາຊຽນ ຈະກາຍເປັນເຂດເສດຖະກິດມີກຳລັງແກ້ງແຍ້ງສູງ. ບັນດາວິສາຫະກິດຫວຽດນາມ ຖ້າເຫັນໄດ້ຜົນປະໂຫຍດຄວາມສາມາດບົ່ມຊ້ອນຈາກ AEC, ຂອບຂະຫນາດດ້ານເສດຖະກິດບໍ່ພຽງແຕ່ເພີ່ມຂຶ້ນສຳລັບກຸ່ມຕະຫລາດອາຊຽນເທົ່ານັ້ນ ຫາກນັບທັງບັນດາຕະຫລາດຊື່ງ ອາຊຽນ ໄດ້ລົງນາມໃນສັນຍາການຄ້າເສລີຄື: ຈີນ, ສເກົາຫລີ,ຍີ່ປຸ່ນ, ອິນເດຍ, ອົດສະຕາລີ ແລະ ນິວເຊີແລນ. ຫວຽດນາມ ຈະມີກາລະໂອກາດໃຫຍ່ເພື່ອສົ່ງອອກບັນດາປະເພດສິນຄ້າຕົ້ນຕໍຄື: ຕຳ່ແຜ່ນຕັດຫຍິບ, ເຂົ້າສານ, ສິນໃນນຳ້, ເຄື່ອງອາໄລ່ເອເລັກໂຕນິກ.
ເຫັນດີກັບທັດສະນະນີ້, ທ່ານ ເຈີນແທງຫາຍ, ຮອງຫົວຫນ້າກົມສົ່ງອອກ ສັງກັດກະຊວງອຸດສາຫະກຳ ແລະ ການຄ້າຫວຽດນາມ ຖືວ່າ: ເມື່ອ AEC ໄດ້ຮັບການສ້າງຕັ້ງຂຶ້ນ, ບັນດາວິສາຫະກິດຫວຽດນາມ ສາມາດສົ່ງສິນຄ້າໄປຂາຍຢູ່ບັນດາປະເທດ ອາຊຽນ ຄືດັ່ງຂາຍສິນຄ້າຢູ່ພາຍໃນປະເທດ. ວິສາຫະກິດຫວຽດນາມ ຢາກຍາດແຍ່ງບັນດາກາລະໂອກາດດີ ຊື່ງປະຊາຄົມເສດຖະກິດ ອາຊຽນ ນຳມາໃຫ້ ຕ້ອງຍົກສູງຄຸນນະພາບ ແລະ ກຳລັງແກ້ງແຍ້ງຂອງສິນຄ້າສົ່ງອອກເປັນປະຈຳ.
“ພາສີຖືກຫລຸດຜ່ອນ ແຕ່ຍັງຄົງມີຮົ້ວກີດຂວາງອື່ນຄື: ຂໍ້ກຳນົດກ່ຽວກັບຕົ້ນກຳເນີດຂອງສິນຄ້າ. ໝາຍຄວາມວ່າ ປະລິມານສິນຄ້າຫນ້ອຍສຸດ 40% ຜະລິດພາຍໃນກຸ່ມ ອາຊຽນ ຈື່ງໄດ້ຮັບບຸລິມະສິດ. ຖ້າຫາກນຳເຂົ້າອຸປະກອນຫລາຍເກີນຈາກບັນດາປະເທດນອກກຸ່ມ ອາຊຽນ ຈະບໍ່ໄດ້ຊົມໃຊ້ພາສີບຸລິມະສິດ. ເມື່ອບໍ່ຕອບສະຫນອງໄດ້ຂໍ້ກຳນົດຕົ້ນກຳເນີດສິນຄ້າ, ພາສີຂາເຂົ້າແມ່ນບໍ່ມີຄວາມໝາຍ. ນອກນັ້ນ ບາງມາດຕະການອື່ນຄື: ຕ້ານການອຸດຫນຸນ, ຕ້ານການຂາຍບຸບລາຄາ ກໍແມ່ນຮົ້ວກີດຂວາງດ້ານການຄ້າ ຊື່ງວິສາຫະກິດຄວນໃສ່ໃຈ.”
ດຣ ຫງວຽນດືກແທ່ງ, ຜູ້ອຳນວຍການສູນຄົ້ນຄ້ວາເສດຖະກິດ ແລະ ນະໂຍບາຍ, ສັງກັດມະຫາວິທະຍາໄລແຫ່ງຊາດຮ່າໂນ້ຍ ຖືວ່າ:
“ຫວຽດນາມ ຄວນຮັບເອົາກາລະໂອກາດນັ້ນ ຜ່ານການປະຕິຮູບ ແລະ ສ້າງເຂດວິສາຫະກິດທີ່ແຂງແຮງຢ່າງພຽງພໍ. ທິດສົ່ງອອກ ຕ້ອງແມ່ນກຳລັງຄວາມສາມາດແທ້ຈິງຂອງວິສາຫະກິດ, ຕ້ອງຊອກໄດ້ປະເພດສິນຄ້າສະເພາະຕ່າງຫາກ ເພື່ອສົ່ງອອກໃນວິວັດການແກ້ງແຍ້ງ.”
ຄຽງຄູ່ບັນດາຫນ້າທີ່ດັ່ງກ່າວ, ການສ້າງຍຸດທະສາດພັດທະນາຮ່ວມສຳພັນພາຍໃນກຸ່ມ ສ້າງລະບົບການຜະລິດໃຫຍ່ ເພື່ອມີຄວາມສາມາດຮັບບັນດາໃບສັ່ງຊື້ສິນຄ້າໃຫຍ່, ສ້າງມູນຄ່າເພີ່ມເຂົ້າຮ່ວມລະບົບການຜະລິດພາກພື້ນ ກໍແມ່ນຄຳຮຽກຮ້ອງທີ່ວາງອອກສຳລັບວິສາຫະກິດຫວຽດນາມ.
AEC ແມ່ນເຂດເສດຖະກິດທີ່ກ້ວາງໃຫຍ່. ເລື່ອງບັນດາວິສາຫະກິດຫວຽດນາມ ຍູ້ແຮງການສົ່ງອອກໄປຍັງ ອາຊຽນ ແລະ ໝູນໃຊ້ກາລະໂອກາດທີ່ດີ ຊື່ງ AEC ນຳມາໃຫ້ ຈະຊ່ວຍພື້ນຖານເສດຖະກິດຫວຽດນາມ ມີກຳລັງແກ້ງແຍ້ງສູງກວ່າ, ຍົກສູງທີ່ຕັ້ງບົດບາດຂອງຫວຽດນາມ ໃນພາກພື້ນ.