(vovworld)- ເຖິງວ່າຫ່າງໄກກັບເຂດດິນຕໍ່ແຜ່ນນັບຮ້ອຍໄມທະເລກໍ່ຕາມ ແຕ່ເມືອງເກາະເຈື່ອງຊາ ແຂວງ ແຄງຮ່ວາ ໄດ້ຕ້ອນຮັບບຸນເຕັດປີລະກາຢ່າງເບີກບານມ່ວນຊື່ນ ອົບອຸ່ນ ດ້ວຍເຄື່ອງຂອງຄົບທຸກຢ່າງ. ຜ່ານຜ່າຄວາມຫຍຸ້ງຍາກ, ອາກາດທີ່ຮ້າຍແຮງ, ຢູ່ຫ່າງໄກກັບຄອບຄົວ… ແຕ່ພະນັກງານ, ນັກຮົບ ແລະ ປະຊາຊົນເມືອງເກາະເຈື່ອງຊາ ໄດ້ພ້ອມກັນຕ້ອນຮັບບຸນເຕັດຢ່າງເບີກບານມ່ວນຊື່ນ. ບົດຂຽນຂອງນັກຂ່າວ ຫວີງຟອງ.
|
ເຊື່ອມຕົວເຂົ້າກັບບັນຍາກາດຕ້ອນຮັບບຸນເຕັດປີລະກາຂອງຊາດ, ບັນດາພະນັກງານ, ນັກຮົບ ແລະ ປະຊາຊົນເມືອງເກາະ ເຈື່ອງຊາ ໄດ້ຈັດຕັ້ງການຕ້ອນຮັບບຸນເຕັດດ້ວຍການເຄື່ອນໄຫວຫລາຍຢ່າງທີ່ອຸດົມສົມບູນ, ຫລາຍຮູບແບບ. ໃນຊຸມມື້ ບຸນເຕັດຢູ່ເກາະເຈື່ອງຊາ ແມ່ນເລີ່ມຕົ້ນດ້ວຍລາຍການສະແດງສິລະປະຕ້ອນຮັບປີໃຫມ່ ແລະ ລໍຄອຍຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ທີ່ສັກກະລະບູຊາຢູ່ຫໍວັດທະນະທຳຂອງບັນດາເກາະ. ບັນດາລາຍກາງສະແດງສິລະປະເຖິງວ່າ ແມ່ນລຽບງ່າຍ ແຕ່ໄດ້ຊ່ວຍໃຫ້ ພະນັກງານ, ນັກຮົບ ພວມປະຕິບັດງານ ແລະ ປະຊາຊົນດຳລົງຊີວິດຢູ່ທີ່ນີ້ຫລຸດຜ່ອນຄວາມຄິດຮອດຄິດເຖິງຄອບຄົວຍາດຕິພີ່ນ້ອງຢູ່ເຂດດິນຕໍ່ແຜ່ນ. ພົນທະຫານຊັ້ນຫນຶ່ງ ຮ່ວາງວັນຫາຍ, ເຮັດວຽກຢູ່ເກາະ ນາມອຽດ ແບ່ງປັນວ່າ: ເຖິງວ່າໄດ້ຕ້ອນຮັບບຸນເຕັດຢູ່ເຂດທີ່ຫ່າງໄກກັບຄອບຄົວ ແຕ່ອ້າຍນອ້ງທີ່ຮ່ວມກົມກອງຢູ່ທີ່ນີ້ ພັດມີຄວາມຮັກແພງກັນ ແລະ ພ້ອມກັນຕ້ອນຮັບບຸນເຕັດຢ່າງເບີກບານມ່ວນຊື່ນ. ບັນດາການເຄື່ອນໄຫວວັດທະນະທຳກິລາກໍຊ່ວຍໃຫ້ພະນັກງານ, ນັກຮົບຍິ່ງມີຄວາມສະຫນິດຕິດພັນກວ່າ ແລະ ອຸ່ນອ່ຽນໃຈເພື່ອປະຕິບັດງານ.
“ຂ້າພະເຈົ້າຮູ້ສຶກເບີກບານມ່ວນຊື່ນເມື່ອໄດ້ເຂົ້າຮ່ວມລາຍການສະແດງສິລະປະທີ່ມີຄວາມໝາຍ ແລະ ເຕັມໄປດ້ວຍຄວາມເບີກບານມ່ວນຊື່ນ. ເປັນຄັ້ງທຳອິດມາຮັບຫນ້າທີ່ຢູ່ເກາະ, ນອກຈາກຊຸມວັນປະຕິບັດງານແລ້ວ, ຊຸມມື້ບຸນເຕັດກໍແມ່ນໂອກາດ ເພື່ອໃຫ້ອ້າຍນ້ອງພະນັກງານ, ນັກຮົບຍິ່ງໃກ້ຊິດສະຫນິດຕິດພັນກັນກວ່າ. ຢູ່ເກາະ ມີການເຄື່ອນໄຫວຫລາຍຢ່າງໃນຊຸມມື້ບຸນເຕັດຄື: ການຫໍ່ເຂົ້າຕົ້ມ, ຫລິ້ນໝາກຮຸກ, ດຶງເຊືອກ… ຂ້າພະເຈົ້າຮູ້ສຶກອົບອຸ່ນ ແລະ ມີຄວາມເບີກບານມ່ວນຊື່ນຄືໃນຄອບຄົວດຽວ.”
ຢູ່ ເຈື່ອງຊາ ຕາມປະເພນີແລ້ວ ຮອດຕອນເຊົ້າວັນທີ 1/1 ໄລ່ຕາມຈັນທະປະຕິທີນ (ໝາຍເຖິງວັນທີ 1 ຂອງບຸນເຕັດ), ຢູ່ເກາະແຫ່ງຕ່າງໆກໍລ້ວນແຕ່ຈັດຕັ້ງພິທີເຄົາລົບທຸງຊາດຕົ້ນປີ. ພິທີນີ້ແມ່ນມູນເຊື້ອ , ແມ່ນຈຸດທີ່ດີງາມທາງດ້ານວັດທະນະທຳຂອງພະນັກງານ, ນັກຮົບ ແລະ ປະຊາຊົນຢູ່ເກາະທີ່ຫ່າງໄກ.
ທະຫານເຮືອປະດັບປະດາເພື່ອຕ້ອນຮັບບຸນເຕັດ
|
ພາຍໃຕ້ຄັນທຸງຊາດ, ສຽງຮ້ອງເພງຊາດຂອງບັນດາພະນັກງານ, ນັກຮົບ ແລະ ປະຊາຊົນ ຢູ່ເມືອງເກາະໄດ້ ດັງກ້ອງກັງວານໄປທົ່ວ. ຈາກເກາະ ເຈື່ອງຊາ, ຊອງຕືໄຕ, ນາມອຽດ, ຊີງຕົນ ຫລື ເກາະນ້ຳຖ້ວມ ຄືເກາະຫີນລາດ, ຫີນນາມ, ທ່ວຽນຈາຍ.. ສຽງເພງຊາດປະສານກັບສຽງຄຶ້ນທະເລ, ສຽງ ລົມພັດຈາກທະເລ ໄດ້ສ້າງບັນຍາກາດຕ້ອນຮັບລະດູບານໃຫມ່ພວມວຽນມາອີກວາລະຫນຶ່ງຢູ່ເມືອງເກາະ ເຈື່ອງຊາຢ່າງຄຶກຄື້ນທີ່ສຸດ. ສຽງຮ້ອງເພງຊາດກໍເປັນຄຳໝັ້ນໝາຍ, ຢັ້ງຢືນຄວາມຕັດສິນໃຈຂອງບັນດາພະນັກງານ, ນັກຮົບ ແລະ ປະຊາຊົນ ຢູ່ ໝູ່ເກາະ ເຈືອງຊາ ວ່າຈະພ້ອມກັນຮັກສາອະທິປະໄຕເຂດທະເລໝູ່ເກາະ ທີ່ສັກກະລະບູຊາຂອງປະເທດຊາດໄວ້ຢ່າງໝັ້ນຄົງຫນັກແຫນ້ນ. ພັນຕີ ເຈີນວັນຮຸ່ງ, ພະນັກງານການເມືອງ ເກາະ ນາມອຽດ ແບ່ງປັນວ່າ:
“ທຸຸງແດງດາວເຫລືອງ ແມ່ນຮູບພາບຂອງປະເທດຫວຽດນາມ ສະນັ້ນ ພະນັກງານ, ນັກຮົບ ແລະ ປະຊາຊົນເມືອງເກາະ ເມື່ອຢືນຢູ່ໃຕ້ຄັນທຸງລ້ວນແຕ່ມຸ່ງໄປເຖິງປະເທດຊາດທີ່ຮັກແພງ. ທຸງແດງດາວເຫລືອງເປັນການເພີ່ມກຳລັງແຮງເພື່ອໃຫ້ທະຫານ ແລະ ປະຊາຊົນເມືອງເກາະປະຕິບັດສຳເລັດຫນ້າທີ່ທີ່ໄດ້ຮັບການມອບໝາຍເປັນຢ່າງດີ, ປົກປັກຮັກສາປະເທດຫວຽດນາມ ສັງຄົມນິຍົມໃຫ້ໝັ້ນຄົງໄວ້ຫນັກແຫນ້ນ.”
ຢູ່ ຕາແສງ ເກາະ ຊີງຕົນ ໃນຊຸມມື້ຕົ້ນປີໃຫມ່ ປະຊາຊົນໄດ້ພ້ອມກັນໄປວັດໃນຈຸເວລາຕົ້ນປີໃຫມ່ ແລະ ຖະຫວາຍທູບທຽນອາໄລຫາບັນດານັກຮົບເສຍສະຫລະຊີວິດເພື່ອຊາດ. ເອື້ອຍ ຫງວຽນທິຕຽມ, ດຳລົງຊີວິດຢູ່ ເກາະ ໃຫ້ຮູ້ວ່າ: ປີໃດກໍເຊັ່ນດຽວກັນ, ຮອດຕອນເຊົ້າວັນທີ 1 ໄລ່ຕາມຈັນທະປະຕິທິນ, ບັນດາຄອບຄົວໄດ້ພາກັນໄປວັດເພື່ອພາວະນາໃຫ້ປີໃຫມ່ມີໂຊກມີໄຊ, ມີຄວາມສະຫງົບສຸກ ແລະ ການຈັບຫາສິນທະເລໄດ້ຮັບຜົນດີ.
“ບັນດາຄອບຄົວດຳລົງຊີວິດໃນເກາະແຫ່ງນີ້ຍາມໃດກໍມີຄວາມສາມັກຄີສະຫນິດຕິດພັນນຳກັນຄືດັ່ງໃນຄອບຄົວດຽວ. ຢູ່ດິນຕໍ່ແຜ່ນ ໃນຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ ທຸກຄົນໃນຄອບຄົວສ່ວນຫລາຍແມ່ນຢູ່ເຮືອນເທົ່ານັ້ນ, ແຕ່ບັນດາຄອບຄົວຢູ່ເກາະໄດ້ມີການພົວພັນແລກປ່ຽນນຳກັນ ພ້ອມກັນກະກຽມເພື່ອໃຫ້ລູກຫລານໄດ້ຕ້ອນຮັບບຸນເຕັດຢ່າງເບີກບານມ່ວນຊື່ນ, ມີຄວາມຜາສຸກ.”
ບັນດາຫລານນ້ອຍຢູ່ເກາະກໍຮູ້ສຶກດີໃຈທີ່ສຸດຕໍ່ບັນຍາກາດຕ້ອນຮັບບຸນເຕັດ ເພາະວ່າ ພວກນ້ອງໄດ້ເຂົ້າຮ່ວມບັນດາການເຄື່ອນໄຫວລະຫລິ້ນກັບບັນດານັກຮົບໃນເກາະ. ຫລານ ຫວໍຈູງຕີນ, ອາຍຸ 10 ປີ ແບ່ງປັນວ່າ:
“ຫລານຕ້ອນຮັບບຸນເຕັດຢູ່ເກາະເປັນຫລາຍເທື່ອແລ້ວ. ໃນໂອກາດບຸນເຕັດມີການລະຫລິ້ນພື້ນເມືອງຫລາຍຢ່າງ. ບຸນເຕັດມີ ເຄື່ອງຂອງຄົບທຸກຢ່າງຄື: ເຂົ້າຕົ້ມ ແລະ ອາຫານຫລາຍເຍື່ອງ. ຊຸມມື້ບຸນເຕັດພວກຫລານໄດ້ເຂົ້າຮ່ວມການລະຫລິ້ນພື້ນເມືອງຫລາຍຢ່າງມ່ວນຊື່ນທີ່ສຸດ.”
ບຸນເຕັດຢູ່ ເຈື່ອງຊາ ປະຈຸບັນ, ຊີວິດທາງດ້ານວັດຖຸ ແລະ ຈິດໃຈໄດ້ຮັບການປັບປຸງ, ເຮັດໃຫ້ບັນຍາກາດຕ້ອນຮັບບຸນເຕັດຢູ່ເກາະຍິ່ງຄຶກຄື້ນ ແລະ ເບີກບານມ່ວນຊື່ນກວ່າ. ຢູ່ເກາະທີ່ຫ່າງໄກ, ພະນັກງານ, ນັກຮົບ ແລະ ປະຊາຊົນເມືອງເກາະເຈື່ອງຊາ ຍາມໃດກໍມີຄວາມສາມັກຄີກັນ, ໝັ້ນໝາຍນຳກັນເປັນຈິດຫນຶ່ງໃຈດຽວເພື່ອເປັນບ່ອນອີງທີ່ໝັ້ນຄົງ, ພ້ອມກັນປົກປັກຮັກສາຄວາມສະຫງົບສຸກໃຫ້ແກ່ເຂດທະເລໝູ່ເກາະຂອງບ້ານເກີດເມືອງນອນ.