(vovworld) - ການເລືອກຕັ້ງປະທານາທິບໍດີ ຝຣັ່ງ ພວມກ້າວເຂົ້າສູ່ໄລຍະສຸດທ້າຍໃນຂະນະຍັງມີເວລາພຽງ 2 ເດືອນເທົ່ານັ້ນຈະດຳເນີນການປ່ອນບັດຮອບທຳອິດ. ເຖິງວ່າບັນດາຜູ້ສະໝັກເລືອກຕັ້ງທາງການຂອງບັນດາພັກຝ່າຍໄດ້ປະກົດຕົວແລ້ວກໍ່ຕາມ ແຕ່ໝາກຜົນຂອງການຊ່ວງເສັງເຂົ້າວັງ Elysée ຍັງບໍ່ສາມາດຄາດຄະເນລ່ວງໜ້າໄດ້ໃນຂະນະທີ່ເກີດຫຼາຍປັດໄຈໂດຍບັງເອີນ, ເຮັດໃຫ້ສະພາວະການສະໝັກຮັບເລືອກຕັ້ງມີການປ່ຽນແປງຢ່າງລຽນຕິດ. ບົດຂຽນ “ບັນດາບັນຫາເກີດຂຶ້ນໂດຍຍັງເອີນໃນການຊ່ວງເສັງເຂົ້າວັງ Elysée” ຂອງ ຮົ່ງເວີນ, ນັກຂ່າວ VOV.
ຜູ້ສະໝັກຮັບເລືອກຕັ້ງຄົນກາງອະດິດລັດຖະມົນຕີກະຊວງເສດຖະກິດ Emmanuel Macron.
(ພາບ: EPA/TTXVN)
|
ຄາດວ່າ ການເລືອກຕັ້ງປະທານາທິບໍດີ ຝຣັ່ງ ຕາມຮູບການທົ່ວໄປຈະຈັດຕັ້ງໃນທ້າຍເດືອນ 4 ຕົ້ນເດືອນ 5 ຈະມາເຖິງ (ຄາດວ່າ, ການເລືອກຕັ້ງຮອບທີ 1 ຈະຈັດຕັ້ງໃນວັນທີ 23/4, ຮອບທີ 2 ຈະຈັດຕັ້ງໃນວັນທີ 7/5). ປະຈຸບັນ, ບັນດາຜູ້ອອກສະໝັກຮັບເລືອກຕັ້ງທາງການໃນການຊ່ວງເສັງເຂົ້າວັງ Elysée ໄດ້ປະກົດຕົວແລ້ວ, ເຊິ່ງລວມມີທ່ານອະດິດນາຍົກລັດຖະມົນຕີ Francois Fillon, ຕາງໜ້າໃຫ້ຝ່າຍຂວາ, ທ່ານອະດິດລັດຖະມົນຕີກະຊວງສຶກສາ ຝຣັ່ງ Benoit Hamon, ຕາງໜ້າໃຫ້ຝ່າຍຊ້າຍ, ທ່ານນາງ Marine Le Pen, ຕາງໜ້າໃຫ້ຝ່າຍຂວາ ແລະ ຜູ້ສະໝັກຮັບເລືອກຕັ້ງຄົນກາງອະດິດລັດຖະມົນຕີກະຊວງເສດຖະກິດ Emmanuel Macron.
ຄວາມບັງເອີນເກີດຂຶ້ນຢ່າງລຽນຕິດ
ກ່ອນນີ້ 2, 3 ເດືອນ, ວົງການນັກໄຈ້ແຍກຖືວ່າ: ການເລືອກຕັ້ງປະທານາທິບໍດີ ຝຣັ່ງ ປີ 2017 ຈະແມ່ນການປະທະກັນລະຫວ່າງຜູ້ສະໝັກຮັບເລືອກຕັ້ງຂອງຝ່າຍຂວາ ນັ້ນແມ່ນ ທ່ານອະດິດປະທານາທິບໍດີ Nicolas Sarkozy ກັບຄູ່ແຂ່ງຂຶ້ນກັບພັກສັງຄົມ (PS), ທ່ານປະທານາທິບໍດີຜູ້ໃກ້ຈະໝົດອາຍຸການ Francois Hollande. ແຕ່ເຖິງຢ່າງໃດກໍ່ຕາມ, ສິ່ງທີ່ເກີດຂຶ້ນໂດຍບັງເອີນທຳອິດແມ່ນຂອງທ່ານອະດິດນາຍົກລັດຖະມົນຕີ Francois Fillon, ເຊິ່ງແມ່ນຜູ້ເຄີຍຖືກຈັດຢູ່ທາງຫຼັງໃນບັນດາການຢັ່ງຫາງສຽງ, ໄດ້ມີບາດກ້າວບຸກທະລຸເພື່ອກາຍເປັນຜູ້ຕາງໜ້າໃຫ້ຝ່າຍຂວາສະໝັກຮັບເລືອກຕັ້ງເປັນປະທານາທິບໍດີ ຝຣັ່ງ. ໃນຂະນະນັ້ນ, ຢູ່ຝ່າຍຊ້າຍ, ພາຍຫຼັງທີ່ທ່ານປະທານາທິບໍດີຄົນປະຈຸບັນ Francois Hollande ຂອງພັກ PS ກຳອຳນາດຕົກລົງບໍ່ສະໝັກຮັບເລືອກຕັ້ງອີກ, ທ່ານອະດິດລັດຖະມົນຕີກະຊວງສຶກສາ ຝຣັ່ງ Benoit Hamon ຂຶ້ນກັບ PS, ເຊິ່ງແມ່ນຜູ້ບໍ່ມີຊື່ສຽງໃດໆ, ໄດ້ຮັບຊະນະຕໍ່ທ່ານນາຍົກລັດຖະມົນຕີ Manuel Valls, ເພື່ອກາຍເປັນຜູ້ສະໝັກຮັບເລືອກຕັ້ງຂອງຝ່າຍຊ້າຍໃນການຊ່ວງເສັງເຂົ້າວັງ Elysée. ບັນດາສິ່ງເກີດຂຶ້ນໂດຍບັງເອີນຢ່າງລຽນຕິດໃນການເລືອກຕັ້ງເບື້ອງຕົ້ນຢູ່ທັງຝ່າຍຂວາ ແລະ ຝ່າຍຊ້າຍ ໄດ້ເປັນສັນຍານກ່ຽວກັບວິວັດທະນາການເລືອກຕັ້ງຢູ່ ຝຣັ່ງ ມີຫຼາຍສິ່ງທີ່ບໍ່ອາດຄາດຄະເນລ່ວງໜ້າໄດ້.
ໃນສະພາວະທີ່ຝ່າຍຊ້າຍຖືກແບ່ງແຍກ ແລະ ຊຸດໂຊມນັ້ນ, ວົງການນັກໄຈ້ແຍກໄດ້ໃຫ້ຂໍ້ສັງເກດວ່າ ຜູ້ສະໝັກຮັບເລືອກຕັ້ງໄດ້ລອດເຂົ້າຮອບທີ 2 ຂອງການເລືອກຕັ້ງປະທານາທິບໍດີໃນປີ 2017 ອາດຈະແມ່ນຜູ້ຕາງໜ້າຂອງຝ່າຍຂວາ Francois Fillon ແລະ ຜູ້ຕາງໜ້າຂອງຝ່າຍຂວາ ແມ່ນທ່ານນາງ Marine Le Pen. ຊ້ຳບໍ່ໜຳ, ທ່ານ Fillon ໄດ້ຮັບການຕີລາຄາວ່າ ອາດຈະໄດ້ຮັບເລືອກຕັ້ງເປັນປະທານາທິບໍດີ ຝຣັ່ງ. ເຖິງຢ່າງໃດກໍ່ຕາມ, ຫວ່າງແລ້ວນີ້, ທຸກໆເລື່ອງໄດ້ຖືກຕ່າວປິ້ນພາຍຫຼັງທີ່ສື່ມວນຊົນຝຣັ່ງ ໄດ້ເຜີຍແບ ແລະ ມີຄວາມລະແວງສົງໄສ ທ່ານສໍ້ໂກງໃນການຈ້າງ ແລະ ຈ່າຍເງິນເດືອນໃຫ້ແກ່ເມຍ ແລະ ລູກ 2 ຄົນຂອງຕົນໃນໄລຍະທີ່ຍັງເປັນສະມາຊິກສະພາສູງເປັນເວລາຫຼາຍປີກ່ອນນີ້. ເພາະສະນັ້ນ, ຈາກຜູ້ສະໝັກຮັບເລືອກຕັ້ງຄົນໜຶ່ງທີ່ມີຊື່ສຽງ, ອັດຕາສະໜັບສະໜູນທ່ານ Fillon ໄດ້ຫລຸດລົງຫຼາຍ, ຍັງເຫຼືອພຽງ 20% ເທົ່ານັ້ນ, ຕ່ຳກ່ວາເມື່ອທຽບໃສ່ຜູ້ສະໝັກເລືອກຕັ້ງຝ່າຍຂວາ ທ່ານນາງ Marine Le Pen (27%) ແລະ ຜູ້ສະໝັກເລືອກຕັ້ງເສລີນັ້ນແມ່ນອະດິດລັດຖະມົນຕີກະຊວງເສດຖະກິດ ທ່ານ Emmanuel Macron (23%)
ໝາກຜົນຍາກທີ່ຄາດຄະເນໄດ້ລ່ວງໜ້າ
ຕໍ່ໜ້າການຜັນແປດັ່ງກ່າວ, ໃນໄລຍະທີ່ຮີບຮ້ອນນີ້, ບັນດາຜູ້ສະໝັກເລືອກຕັ້ງໄດ້ອອກແຮງກໍ່ຜົນສະທ້ອນເພື່ອຍາດເອົາຄະແນນຈາກຜູ້ມີສິດເລືອກຕັ້ງ. ວັນທີ 4/2, ການນຳພັກຝ່າຍຂວາ ແນວໂຮມແຫ່ງຊາດ, ທ່ານນາງ Marine Le Pen ໄດ້ດຳເນີນບັ້ນຫາສຽງເລືອກຕັ້ງດ້ວຍຄວາມໝັ້ນໝາຍກ່ຽວກັບປະເທດ ຝຣັ່ງ ເສລີ. ທ່ານນາງ Marine Le Pen ໄດ້ປະກາດເປົ້າໝາຍຂອງການຫາສຽງເລືອກຕັ້ງນີ້ ແມ່ນສົ່ງຄວາມເສລີໃຫ້ແກ່ປະເທດ ຝຣັ່ງ ຄືນແລະ ສົ່ງສຽງເວົ້າໃຫ້ແກ່ຊາວ ຝຣັ່ງ. ໃນບັນດາຄຳໝັ້ນສັນຍາທີ່ໄດ້ຍົກອອກມານັ້ນ, ນັກການເມືອງຍິງ ໄດ້ສະເໜີປະເທດ ຝຣັ່ງ ພົ້ນອອກຈາກພາກພື້ນ Eurozone, ຈັດວາງອັດຕາພາສີ ສຳລັບບັນດາສັນຍາແຮງງານຂອງຊາວຕ່າງປະເທດ ຫລຸດລະດັບອາຍຸພັກກິນເບ້ຍບຳນານ ແລະ ເພີ່ມບາງກິດຈະກຳສະວັດດີການສັງຄົມໃນຂະນະທີ່ຫລຸດຜ່ອນພາສີ ໃຫ້ແກ່ບັນດາວິສາຫະກິດຂະໜາດໜ້ອຍ ແລະ ອາກອນລາຍໄດ້. ພ້ອມກັນນັ້ນ ກໍ່ແມ່ນການຈຳກັດບາງສິດຜົນປະໂຫຍດຄືພຽງແຕ່ພົນລະເມືອງ ຝຣັ່ງ ຈຶ່ງໄດ້ຊົມໄຊ້ສິດການສຶກສາໂດຍບໍ່ຄິດຄ່າ. ຈຳກັດຄົນເຂົ້າເມືອງ… ແຕ່ໂຄງການຫາສຽງເລືອກຕັ້ງດັ່ງກ່າວ ພັດຂາດບັນດາເນື້ອໃນລະອຽດ ກ່ຽວກັບເສດຖະກິດມະຫາພາກ, ບໍ່ວາງເປົ້າໝາຍໜີ້ສາທາລະນະ ຫຼື ການຂາດດຸ່ນງົບປະມານ ກໍ່ຄືບໍ່ສາມາດຍົກອອກທິດກ້າວເດີນທີ່ດີ ເພື່ອຈະດຸ່ນດຽງ ລະຫວ່າງ 2 ເນື້ອໃນປັບປຸງສະວັດດີການ ແລະ ຫລຸດຜ່ອນພາສີ. ຍິ່ງກ່ວານັ້ນ, ທ່ານນາງ Marine Le Pen ຍັງຖືກກ່າວຫາວ່າ ສ້າງວຽກເຮັດງານທຳປອມແປງໃນລັດຖະສະພາເອີລົບ, ບ່ອນທີ່ທ່ານນາງແມ່ນສະມາຊິກລັດຖະສະພາ. ລັດຖະສະພາເອີລົບ ໄດ້ຮຽກຮ້ອງໃຫ້ການນຳແນວໂຮມແຫ່ງຊາດສົ່ງຄືນຈຳນວນເງິນກ່ວາ 300.000 ເອີໂຣ ເຊິ່ງທ່ານນາງໄດ້ສະໜອງ ແລະ ນຳໃຊ້ເພື່ອຈ່າຍເງິນເດືອນແກ່ຜູ້ຊ່ວຍວຽກ 2 ຄົນ, ແຕ່ 2 ຄົນນີ້ບໍ່ເຮັດວຽກໃຫ້ລັດຖະສະພາເອີລົບ ຫາກເຮັດວຽກໃຫ້ແກ່ພັກຂອງທ່ານນາງ.
ໃນຂະນະນັ້ນ, ເຖິງວ່າຄຳຖະແຫຼງຈະຕໍ່ສູ້ເຖິງຂັ້ນສຸດທ້າຍ ແລະ ບໍ່ປະລະການແຂ່ງຂັນກໍ່ຕາມ, ໂອກາດຮັບໄຊຊະນະຂອງອະດິດລັດຖະມົນຕີ Fillon ໃນປະຈຸບັນແມ່ນບໍ່ແນ່ນອນ. ວົງການນັກໄຈ້ແຍກໄດ້ໃຫ້ຂໍ້ສັງເກດວ່າ, ນັບທັງສືບຕໍ່ໄດ້ຮັບການໜູນຫຼັງຈາກຝ່າຍຂວາ ເພື່ອຮັກສາການແຂ່ງຂັນເຂົ້າວັງ Elysée ນັ້ນ, ຄວາມສາມາດຍາດເອົາຄືນທ່າດີນຳໜ້າຂອງທ່ານ Francois Fillon ແມ່ນສິ່ງທີ່ບໍ່ອາດປະຕິບັດໄດ້, ຂະນະທີ່ຮູບພາບຂອງທ່ານຖືກທຳລາຍພາຍຫຼັງຄວາມລະແວງສົງໄສມີຄວາມສັບສົນທາງດ້ານເງິນທຶນດັ່ງກ່າວ.
ໃນສະພາບການດັ່ງກ່າວ, ມີນັກສັງເກດການຫຼາຍຄົນແລ້ວ, ບຸກຄົນທີ່ຍັງບໍ່ທັນປະກົດຕົວໃນການເລືອກຕັ້ງປະທານາທິບໍດີ ຝຣັ່ງ ໃນປີ 2017 ແມ່ນທ່ານ Emmanuel Macron, ອະດິດລັດຖະມົນຕີເສດຖະກິດ ມີອາຍຸພຽງ 37 ປີ.
ແຕ່ເຖິງຢ່າງໃດກໍ່ຕາມ, ທຸກໆສິ່ງດັ່ງກ່າວຍັງຄົງແມ່ນການຄາດຄະເນເທົ່ານັ້ນ, ເພາະບັນດາກນຢັ່ງຫາງສຽງ ບໍ່ສາມາດສ່ອງແສງໄດ້ຢ່າງຊັດເຈນ ກ່ຽວກັບໝາກຜົນການເລືອກຕັ້ງແນ່ນອນ, ເປັນຕົ້ນແມ່ນພາຍຫຼັງເຫດການຜູ້ມີສິດເລືອກຕັ້ງອັງກິດ ປ່ອນບັດສະໜັບສະໜູນອອກຈາກ ອີຢູ ແລະ ໄຊຊະນະຂອງມະຫາເສດຖີ Donald Trump ໃນການເລືອກຕັ້ງປະທານາທິບໍດີ ອາເມລິກາ. ເພາະສະນັ້ນ, ດ້ວຍທຸກສິ່ງທີ່ເກີດຂຶ້ນຢ່າງກະທັນຫັນ, ການແຂ່ງຂັນເຂົ້າວັງ Elysée ຈະຍັງມີຫຼາຍບັນຫາທີ່ສັບສົນ.