ວັນທີ 20/11, ທ່ານນາຍົກລັດຖະມົນຕີຫວຽດນາມຫງວຽນເຕີ້ນຢຸງ ໄດ້ເດີນທາງອອກຈາກຮ່າໂນ້ຍໄປຍັງນະຄອນຫຼວງ ກົວລາລຳເປີ ປະເທດມາເລເຊຍເພື່ອເຂົ້າຮ່ວມກອງປະຊຸມຂັ້ນສູງອາຊຽນຄັ້ງທີ 27 ແລະ ບັນດາກອງປະຊຸມທີ່ກ່ຽວຂ້ອງແຕ່ວັນທີ 21 ຫາ 22/11. ທີ່ກອງປະຊຸມຄັ້ງນີ້, ຫວຽດນາມສືບຕໍ່ເສີມຂະຫຍາຍບົດບາດ, ໜ້າທີ່ຮັບຜິດຊອບຂອງຕົນເພື່ອປະກອບສ່ວນຊຸກຍູ້ອາຊຽນຮ່ວມສຳພັນຢ່າງແໜ້ນແຟ້ນກ່ວາ, ປັບປຸງ ແລະ ເພີ່ມທະວີຄວາມສາມັກຄີ, ຄວາມເປັນເອກະພາບ, ກໍຄືບົດບາດທີ່ສຳຄັນຂອງອາຊຽນໃນການຮັບປະກັນສັນຕິພາບ, ຄວາມໝັ້ນຄົງ, ການຮ່ວມມື ແລະ ການພັດທະນາໃນພາກພື້ນ.
ທ່ານນາຍົກລັດຖະມົນຕີຫວຽດນາມຫງວຽນເຕີ້ນຢຸງ |
ກອງປະຊຸມຂັ້ນສູງອາຊຽນຄັ້ງທີ 27 ໄດ້ດຳເນີນໃນຈຸດເວລາທີ່ສຳຄັນດ້ວຍເລື່ອງອາຊຽນພວມສຳເລັດບັນດາວຽກງານສຸດທ້າຍໃຫ້ແກ່ການສ້າງຕັ້ງປະຊາຄົມອາຊຽນ 2015 ໃນວັນທີ 31/12/2015 ຢ່າງເປັນທາງການ ແລະ ກະກຽມໃຫ້ແກ່ໄລຍະພັດທະນາຕໍ່ໄປ. ໃນຂະນະນັ້ນ, ສະພາບແວດລ້ອມສາກົນ ແລະ ພາກພື້ນສືບຕໍ່ມີການປ່ຽນແປງຫຼາຍຢ່າງ, ອັນໄດ້ສ້າງໃຫ້ມີບັນດາກາລະໂອກາດ ກໍຄືສິ່ງທ້າທາຍໃໝ່ສຳລັບອາຊຽນ.
ອາຊຽນ 27 : ຂີດໝາຍສຳຄັນໃນວິວັດທະນາການພັດທະນາຂອງອາຊຽນ
ກອງປະຊຸມຂັ້ນສູງອາຊຽນຄັ້ງທີ 27 ໄດ້ຮັບຖືວ່າເປັນຂີດໝາຍປະຫວັດສາດຂອງອາຊຽນ ຂະນະທີ່ບັນດາການນຳ 10 ປະເທດພ້ອມກັນລົງລາຍເຊັນໃນເອກະສານນິຕິກຳທີ່ສຳຄັນ 2 ສະບັບ. ນັ້ນແມ່ນຖະແຫຼງການກ່ຽວກັບການສ້າງຕັ້ງປະຊາຄົມອາຊຽນ 2015 ແລະ ຖະແຫຼງການກ່ຽວກັບວິໄສທັດປະຊາຄົມອາຊຽນ 2015: ພ້ອມກັນກ້າວຂຶ້ນຢ່າງໝັ້ນຄົງ. ດ້ວຍການລົງນາມໃນຖະແຫຼງການກ່ຽວກັບການສ້າງຕັ້ງປະຊາຄົມອາຊຽນ 2015, ບັນດາການນຳໄດ້ສະຖາປະນາປະຊາຄົມອາຊຽນຢ່າງເປັນທາງການ. ນີ້ແມ່ນຜົນງານຢ່າງໃຫຍ່ຫຼວງຊຶ່ງໄດ້ຮັບການເພີ່ມພູນຄູນສ້າງຈາກຂະບວນວິວັດແຫ່ງຄວາມມານະພະຍາຍາມ ແລະ ສູ້ຊົນຢ່າງບໍ່ຢຸດຢັ້ງຂອງອາຊຽນໃນຕະຫຼອດເກືອບເຄິ່ງສະຕະວັດທີ່ຜ່ານມາ. ຈາກສະຫະສະມາຄົມທີ່ຮ່ວມມືບໍ່ແໜ້ນແຟ້ນ, ແມ່ນກຸ່ມຍັງບໍ່ທັນມີສຽງເວົ້າຢູ່ອາຊີຕາເວັນອອກ, ອາຊຽນໄດ້ບືນຕົວຂຶ້ນຢ່າງແຂງແຮງ ກາຍເປັນປະຊາຄົມສາມັກຄີ, ຮ່ວມສຳພັນຢ່າງເລິກເຊິ່ງກ້ວາງຂວາງ, ສວມບົດບາດສຳຄັນທີີ່ມີຕໍ່ສັນຕິພາບ, ສະຖຽນລະພາບ ແລະ ວັດທະນາຖາວອນໃນພາກພື້ນ ແລະ ເປັນຄູ່ຮ່ວມມືທີ່ຂາດບໍ່ໄດ້ຂອງບັນດາປະເທດມະຫາອຳນາດ ແລະ ອົງການລະດັບພາກພື້ນອື່ນໆ.
ບັນດາການນຳອາຊຽນ ໄດ້ພ້ອມກັນລົງນາມໃນຖະແຫຼງການກ່ຽວກັບວິໄສທັດປະຊາຄົມອາຊຽນ 2015, ຢືນຢັນຄວາມຕັດສິນໃຈ ແລະ ໝັ້ນໝາຍສືບຕໍ່ປັບປຸງ ແລະ ເຮັດໃຫ້ສາຍສຳພັນຂອງອາຊຽນເລິກເຊິ່ງຂຶ້ນຕື່ມໃນ 10ປີ ທີ່ຈະມາເຖິງ. ພ້ອມກັບຖະແຫຼງການນີ້, ບັນດາການນຳຈະຮັບຮອງເອົາວິໄສທັດປະຊາຄົມອາຊຽນ 2025 ພ້ອມກັບບັນດາແຜນການສັງລວມຜັນຂະຫຍາຍວິໄສທັດບົນ 3 ເສົາຄ້ຳ ການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ. ທ່ານເລຂາທິການໃຫຍ່ອາຊຽນຢືນຢັນວ່າ :
“ ຈຸດສຸມໃນວິວິໄສທັດ 2025 ຊຶ່ງການນຳອາຊຽນຈະຮັບຮອງເອົາຢູ່ທີ່ກອງປະຊຸມຂັ້ນສູງອາຊຽນຄັ້ງທີ 27 ແມ່ນສືບຕໍ່ປະຕິບັດນະໂຍບາຍພັດທະນາແບບຍືນຍົງ, ອີງໃສ່ການສືບຕໍ່ປະຕິບັດບັນດາມາດຕະການແນໃສ່ຮັດແຄບຄວາມແຕກໂຕນກັນລະຫວ່າງບັນດາປະເທດອາຊຽນໃໝ່ ແລະ ບັນດາປະເທດອາຊຽນເກົ່າ. ທັດສະນະຂອງອາຊຽນແມ່ນກໍ່ສ້າງເປັນປະຊາຄົມໜຶ່ງເພື່ອປະຊາຊົນ, ໂດຍປະຊາຊົນ, ໃນນັ້ນ ຫຼັກການທາບທາມທຸກໆພາກສ່ວນໃນສັງຄົມກ່ຽວກັບບັນດານະໂຍບາຍ ກໍຄືວິວັດການປະຕິບັດບັນດານະໂຍບາຍ, ພິເສດແມ່ນບັນດານະໂຍບາຍໃນຂົງເຂດພັດທະນາແບບຍືນຍົງ ”
ເລື່ອງລົງນາມໃນເອກະສານ 2 ສະບັບດັ່ງກ່າວແມ່ນພາຍໃຕ້ການເປັນສັກຂີພິຍານຂອງການນຳບັນດາປະເທດຄູ່ຮ່ວມມື, ຄູ່ເຈລະຈາຂອງອາຊຽນ ແລະ ທ່ານເລຂາທິການໃຫຍ່ ສ.ປ.ຊ. ນີ້ຖືກຖືວ່າ ແມ່ນຄຳປະກາດກັບໂລກຢ່າງເປັນທາງການກ່ຽວກັບການສ້າງຕັ້ງປະຊາຄົມອາຊຽນ 2015, ເປັນການຢັ້ງຢືນທີ່ຕັ້ງບົດບາດໃໝ່ຂອງປະຊາຄົມອາຊຽນໃນວົງຄະນະຍາດສາກົນ.
ຫວຽດນາມສືບຕໍ່ປະກອບສ່ວນເຂົ້າໃນຜົນສຳເລັດລວມຂອງກອງປະຊຸມຂັ້ນສູງອາຊຽນຄັ້ງທີ 27
20 ປີແຫ່ງການເຂົ້າຮ່ວມອາຊຽນ, ການປະກອບສ່ວນຂອງຫວຽດນາມໄດ້ເຮັດໃຫ້ອາຊຽນເພີ່ມກຳລັງແຮງຍິ່ງຂຶ້ນ. ເພາະສະນັ້ນ, ດ້ວຍຄວາມສຳຄັນ ແລະ ຄວາມໝາຍອັນໃຫຍ່ຫຼວງຂອງກອງປະຊຸມຂັ້ນສູງອາຊຽນຄັ້ງນີ້, ຫວຽດນາມສືບຕໍ່ເຂົ້າຮ່ວມດ້ວຍຄວາມຮັບຜິດຊອບ, ປະກອບສ່ວນກໍ່ສ້າງແນໃສ່ສ້າງຄວາມເຫັນດີເຫັນພ້ອມຢ່າງສູງ, ສາມັກຄີ ແລະ ເປັນເອກະພາບພາຍໃນກຸ່ມ. ໃນສະພາບທີ່ພາກພື້ນ ແລະ ໂລກມີການຫັນປ່ຽນຢ່າງວ່ອງໄວ ແລະ ສັບສົນນັ້ນ, ຫວຽດນາມພ້ອມກັບບັນດາປະເທດອາຊຽນພວມມານະພະຍາຍາມສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບເພື່ອໃຫ້ປະຊາຄົມອາຊຽນພັດທະນາຢ່າງໝັ້ນຄົງເຂັ້ມແຂງ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິງມິນ ຢືນຢັນວ່າ :
“ນີ້ບໍ່ພຽງແຕ່ແມ່ນຄວາມເອົາໃຈໃສ່ລວມຂອງຫວຽດນາມ ແລະ ບັນດາປະເທດໃນພາກພື້ນເທົ່ານັ້ນ, ຫາກຍັງແມ່ນຄວາມເອົາໃຈໃສ່ຂອງບັນດາປະເທດຢູ່ນອກພາກພື້ນອີກດ້ວຍ. ໂດຍເປັນສະມາຊິກທີ່ຕັ້ງໜ້າຂອງອາຊຽນ. ຫວຽດນາມໄດ້ຍົກອອກບັນດາຂໍ້ລິເລີ່ມ, ໃນນັ້ນມີບັນດາຂໍ້ລິເລີ່ມທີ່ກ່ຽວຂ້ອງເຖິງການສ້າງຄວາມເຊື່ອໝັ້ນ, ຍົກອອກບັນດາມາດຖານບໍ່ພຽງແຕ່ຂອງອາຊຽນເທົ່ານັ້ນ, ຫາກຍັງເປັນມາດຖານຂອງທັງພາກພື້ນດ້ວຍເປົ້າໝາຍກໍ່ສ້າງພາກພື້ນແຫ່ງສັນຕິພາບ, ສະຖຽນລະພາບພາຍຫຼັງປີ 2015 ”
ຜົນສຳເລັດຂອງກອງປະຊຸມຂັ້ນສູງອາຊຽນຄັ້ງທີ 27 ແມ່ນມີຄວາມໝາຍອັນຍິ່ງໃຫຍ່ສຳລັບທຸກໆປະເທດສະມາຊິກອາຊຽນ. ປະຊາຄົມອາຊຽນໄດ້ຮັບການສ້າງຕັ້ງຂຶ້ນ ກໍເປັນການສ້າງກຳລັງໜູນທີ່ສຳຄັນເພື່ອນຳອາຊຽນກ້າວເຂົ້າສູ່ໄລຍະຮ່ວມສຳພັນສູງກວ່າດ້ວຍທ່ວງທ່າໃໝ່, ມີຄວາມຕັດສິນໃຈ ແລະ ເຊື່ອໝັ້ນກວ່າເກົ່າ. ນີ້ແມ່ນຄວາມລໍຄອຍຮ່ວມຂອງບັນດາປະເທດ, ໃນນັ້ນ ມີຫວຽດນາມ