(vovworld) - ກວ່າ 1 ປີຜ່ານມາ, ລັດຖະບານໄດ້ມີຄວາມມານະພະຍາຍາມຫຼາຍຢ່າງເພື່ອປັບປຸງລະບອບລະບຽບການເສດຖະກິດ ແລະ ປະຕິບັດການກະທຳຂ້ຽວຂາດຫຼາຍຢ່າງ ເພື່ອແນໃສ່ປັບປຸງສະພາບແວດລ້ອມແຫ່ງການດຳເນີນທຸລະກິດ. ສິ່ງສຳຄັນແມ່ນ, ຜົນງານຈາກການກໍ່ສ້າງລັດຖະບານແຫ່ງການສ້າງສັນ ໃນເບື້ອງຕົ້ນໄດ້ສ້າງຄວາມເຕີບໂຕໃນການພັດທະນາບັນດາວິສາຫະກິດ, ຈາກນັ້ນ ປະກອບສ່ວນຊຸກຍູ້ເສດຖະກິດພັດທະນາ. ປະສິດທິຜົນຈາກບັນດາການປ່ຽນໃໝ່ ເຊິ່ງລັດຖະບານແຫ່ງການສ້າງສັນນຳມາໃຫ້ໄດ້ຮັບການຮັບຮອງເອົາຈາກປະຊາຄົມວິສາຫະກິດ.
ຄວາມຕັດສິນໃຈສ້າງລັດຖະບານສັດຊື່ບໍລິສຸດ, ສ້າງສັນພັດທະນາ, ກະທຳ, ຮັບໃຊ້ປະຊາຊົນ, ວິສາຫະກິດ ເຊິ່ງທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຢືນຢັນຄືນໃໝ່ ໃນບົດກ່າວປາໄສຮັບດຳລົງຕຳແໜ່ງຕໍ່ໜ້າສະພາແຫ່ງຊາດ (ໃນເດືອນ 07/2016). ລັດຖະບານໄດ້ຫັນເປັນລະອຽດເທື່ອລະກ້າວດ້ວຍບັນດາມະຕິ, ຂໍ້ຕົກລົງທີ່ສຳຄັນຄື ມະຕິເລກທີ 19/2017 ກ່ຽວກັບເລື່ອງສືບຕໍ່ປະຕິບັດບັນດາໜ້າທີ່, ມາດຕະການແກ້ໄຂຕົ້ນຕໍ່ໃນການປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ່ງແຍ້ງແຫ່ງຊາດປີ 2017, ກຳນົດທິດເຖິງປີ 2020. ພ້ອມກັນນັ້ນ, ທ່ານນາຍົກລັດຖະມົນຕີກໍ່ມີມະຕິທຳອິດກ່ຽວກັບການພັດທະນາວິສາຫະກິດຢູ່ຫວຽດນາມ (ມະຕິເລກທີ 35/ມຕ - ບລ).
ໝາກຜົນໃນເບື້ອງຕົ້ນ
ໂດຍປະຕິບັດຄວາມຕັດສິນໃຈກໍ່ສ້າງລັດຖະບານແຫ່ງການສ້າງສັນໃຫ້ພັດທະນາ, ສັດຊື່ບໍລິສຸດ, ກະທຳຢ່າງຂ້ຽວຂາດ, ຮັບໃຊ້ປະຊາຊົນ, ລັດຖະບານໄດ້ສຸມໃສ່ປັບປຸງລະບອບລະບຽບການດ້ານກົດໝາຍ, ປັບປຸງສະພາບແວດລ້ອມແຫ່ງການລົງທຶນ ດຳເນີນທຸລະກິດ, ຍົກສູງກຳລັງແກ່ງແຍ້ງ, ສ້າງທຸກເງື່ອນໄຂສະດວກໃຫ້ວິສາຫະກິດ, ປະຊາຊົນພັດທະນາການຜະລິດ, ດຳເນີນທຸລະກິດ, ປ່ຽນໃໝ່ຢ່າງມີຫົວຄິດປະດິດສ້າງ, ສົ່ງເສີມການເລີ່ມທຸລະກິດ… ພ້ອມທັງ, ເອົາໃຈໃສ່ແກ້ໄຂບັນດາບັນຫາສັງຄົມທີ່ສຳຄັນ, ຮີບດ່ວນຄື: ປົກປັກຮັກສາສິດຜົນປະໂຫຍດອັນຊອບທຳຂອງປະຊາຊົນ, ວິສາຫະກິດ… ນັບແຕ່ກາງປີ 2016 ມາຮອດປະຈຸບັນ, ໜ່ວຍປະຕິບັດງານຂອງນາຍົກລັດຖະມົນຕີ ໂດຍທ່ານລັດຖະມົນຕີຫົວໜ້າຫ້ອງວ່າການສຳນັກງານນາຍົກລັດຖະມົນຕີ ມາຍຕ໋ຽນຢຸງ ເປັນຫົວໜ້າໄດ້ກະຕຸກຊຸກຍູ້ບັນດາກະຊວງ, ຂະແໜງການປະຕິບັດບັນດາມາດຕະການແກ້ໄຂເພື່ອໜູນຊ່ວຍວິສາຫະກິດ. ຕາມນັ້ນແລ້ວ, ບັນດາກະຊວງ, ຂະແໜງການໄດ້ຜັນຂະຫຍາຍບັນດາການເຄື່ອນໄຫວຫຼາຍຢ່າງເພື່ອປະຕິຮູບລະບຽບການບໍລິການ, ແກ້ໄຂຄວາມຫຍຸ້ງຍາກໃຫ້ປະຊາຄົມວິສາຫະກິດຢ່າງທັນການ. ຫຼາຍທ້ອງຖິ່ນໄດ້ນຳໃຊ້ບັນດາຮູບແບບໃໝ່ຄື: ສ້າງຕັ້ງສຸນບໍລິຫານພາກລັດ, ອົງການສົ່ງເສີມການລົງທຶນ ແລະ ໜູນຊ່ວຍການລົງທຶນພາຍໃຕ້ການຊີ້ນຳນຳພາໂດຍກົງຈາກປະທານ ແລະ ຮອງປະທານຄະນະກຳມະການປະຊາຊົນແຂວງ.
ນັກຊ່ຽວຊານດ້ານເສດຖະກິດ ເກີນວັນຫຼຶ້ກ
(ພາບ: VTV) ຈຳນວນວຽກງານໃນປີຜ່ານມາແມ່ນໃຫຍ່ຫຼວງຢູ່, ເຖິງຢ່າງໃດກໍ່ຕາມ ສິ່ງທີ່ປະຊາຊົນ ແລະ ປະຊາຄົມວິສາຫະກິດເຫັນໄດ້ຢ່າງຈະແຈ້ງນັ້ນແມ່ນ ຢູ່ບ່ອນໃດຂໍ້ມູນ “ລັດຖະບານແຫ່ງການສ້າງສັນ” ກໍ່ໄດ້ຮັບການຜັນຂະຫຍາຍຕີລາຄາກ່ຽວກັບປະສິດທິຜົນຂອງການສ້າງ ລັດຖະບານແຫ່ງການສ້າງສັນໃນໄລຍະຜ່ານມາ, ບັນດານັກຊ່ຽວຊານໃຫ້ຂໍ້ສັງເກດວ່າ ຫວຽດນາມ ບັນລຸໄດ້ບັນດາໝາກຜົນໃນເບື້ອງຕົ້ນກ່ຽວກັບການປ່ຽນແປງຈິນຕະນະການ ແລະ ແບບວິທີບໍລິຫານພື້ນຖານເສດຖະກິດ, ກ່ຽວກັບການສ້າງ ແລະ ປັບປຸງກຳລັງຄວາມສາມາດລະບຽບລະບອບການແຫ່ງລັດ. ພ້ອມກັນນັ້ນແມ່ນປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ສ້າງສະພາບແວດລ້ອມແຫ່ງການໜູນຊ່ວຍການເລີ່ມທຸລະກິດ, ການປ່ຽນໃໝ່ຢ່າງມີຫົວຄິດປະດິດສ້າງຂອງວິສາຫະກິດ. ນັກຊ່ຽວຊານດ້ານເສດຖະກິດ ເກີນວັນຫຼຶ້ກ ຖືວ່າ.
“ພວກເຮົາກຳນົດການສ້າງລັດຖະບານແຫ່ງການສ້າງສັນນັບແຕ່ປີ 2016. ສິ່ງດັ່ງກ່າວມີຄວາມໝາຍສຳຄັນທີ່ສຸດ ຍ້ອນແຕ່ດົນນານມາແລ້ວ ພວກເຮົາໄດ້ເຮັດວຽກງານຫຼາຍຢ່າງທີ່ກ່ຽວຂ້ອງເຖິງການປ່ຽນໃໝ່ລະບອບລະບຽບການ ແຕ່ຍັງບໍ່ທັນມີການປຸດທະລຸເພື່ອກຳນົດແຈ້ງບົດບາດຂອງລັດ ສຳລັບຕະຫຼາດ ແລະ ວິສາຫະກິດເທື່ອ. ປີ 2016, ລັດຖະບານໄດ້ຕັດສິນໃຈສ້າງຕັ້ງລັດຖະບານດ້ວຍບົດບາດສ້າງສັນ. ລັດໄດ້ສ້າງສະພາບແວດລ້ອມແຫ່ງການເຄື່ອນໄຫວໃຫ້ວິສາຫະກິດ, ປະຊາຊົນເທື່ອລະກ້າວ, ເພື່ອສາມາດເສີມຂະຫຍາຍແຫຼ່ງກຳລັງຂອງຕົນໃຫ້ໝົດ”.
ຄວາມເຫັນດີເຫັນພ້ອມຂອງທັງລະບົບ
ເຖິງວ່າບັນລຸໄດ້ບັນດາໝາກຜົນທີ່ໜ້າສົ່ງເສີມໃນການສ້າງລັດຖະບານແຫ່ງການສ້າງສັນໃຫ້ພັດທະນາ, ສັດຊື່ບໍລິສຸດ, ກະທຳກໍ່ຕາມ, ແຕ່ຢູ່ບັນດາເວທີປາໄສຢ່າງເປັນທາງການ, ລັດຖະບານຍາມໃດກໍ່ຮັບຮູ້ໄດ້ຢ່າງຈະແຈ້ງບັນດາສິ່ງທີ່ຍັງຄົງຄ້າງຕ້ອງສຸມໃສ່ແກ້ໄຂ ເພື່ອມຸ່ງໄປເຖິງຄາດໝາຍເຕີບໂຕຢ່າງວ່ອງໄວ, ໝັ້ນຄົງ. ໜຶ່ງໃນບັນດາສິ່ງທ້າທ້າຍນັ້ນແມ່ນການເຄື່ອນໄຫວຂອງທັງລະບົບໃນການປະຕິບັດແຜນນະໂຍບາຍດັ່ງກ່າວ. ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ເນັ້ນໜັກເປັນຫຼາຍຄັ້ງແລ້ວວ່າ ບໍ່ພຽງແຕ່ລັດຖະບານເຄື່ອນໄຫວ, ນາຍົກລັດຖະມົນຕີ, ຮອງນາຍົກລັດຖະມົນຕີ, ສະມາຊິກໃນລັດຖະບານເຄື່ອນໄຫວເທົ່ານັ້ນ, ຫາກ “ທັງລະບົບຕ້ອງມີການເຄື່ອນໄຫວ, ຕ້ອງເປັນແບບຢ່າງເພື່ອໃຫ້ກົງຈັກຈາກຂັ້ນສູນກາງຕະຫຼອດຮອດບັນດາກະຊວງ, ຂະແໜງການ, ແຂວງ, ນະຄອນ, ເມືອງ, ຕາແສງ ຕ້ອງເຄື່ອນໄຫວເພື່ອຮັບໃຊ້ໃຫ້ປະຊາຊົນ, ຮັບໃຊ້ວິສາຫະກິດ”. ເມື່ອເຕື້ອງເຖິງບັນຫານີ້, ທ່ານສາດສະດາຈານ, ປະລິຍາເອກ ໂງທັ໋ງເລີ້ຍ, ມະຫາວິທະຍາໄລເສດຖະກິດແຫ່ງຊາດ, ຖືວ່າ.
ທ່ານສາດສະດາຈານ, ປະລິຍາເອກ ໂງທັ໋ງເລີ້ຍ
(ພາບ: kinhtetrunguong.vn) “ເງື່ອນໄຂເພື່ອບັນລຸຜົນສຳເລັດແມ່ນຕ້ອງຮັບປະກັນລັກສະນະລະບົບໃນການສ້າງລັດຖະບານແຫ່ງການສ້າງສັນ. ລັກສະນະລະບົບດັ່ງກ່າວບໍ່ພຽງແຕ່ແມ່ນລັດຖະບານ, ບໍ່ພຽງແຕ່ແມ່ນບັນດາກະຊວງ, ຂະແໜງການເທົ່ານັ້ນ, ຫາກບັນດາອົງການບໍລິຫານຂັ້ນລຸ່ມຕ້ອງອີງໃສ່ລັກສະນະພິເສດສະເພາະຂອງທ້ອງຖິ່ນຕົນ ຈາກນັ້ນມີບັນດານະໂຍບາຍຢ່າງມີໄຫວພິບກວ່າ. ບໍ່ພຽງແຕ່ເໝາະສົມ, ຫາກຕ້ອງມີໄຫວພິບຕໍ່ທ້ອງຖິ່ນຂອງຕົນຢ່າງລະອຽດ ເພື່ອໃຫ້ບັນດາວິສາຫະກິດທ້ອງຖິ່ນເຫັນໄດ້ຄ່າສິ່ງດັ່ງກ່າວແມ່ນໃກ້ຊິດກັບເຂົາເຈົ້າທີ່ສຸດ. ເລື່ອງ ສ້າງລັດຖະບານແຫ່ງການສ້າງສັນ ບໍ່ພຽງແຕ່ສະເພາະລະບົບການເມືອງເທົ່ານັ້ນ, ຫາກບັນດາອົງການຈັດຕັ້ງສັງຄົມຕ້ອງເຮັດແນວໃດເພື່ອໃຫ້ປະຊາຊົນໃກ້ຊິດຕິດແທດກັບລັດຖະບານກວ່າ”.
ກວ່າ 1 ປີແຫ່ງການປະຕິບັດ, ບັນດາໝາກຜົນໃນເບື້ອງຕົ້ນໄດ້ຊີ້ໃຫ້ເຫັນວ່າ ແຜນນະໂຍບາຍກໍ່ສ້າງລັດຖະບານແຫ່ງການສ້າງສັນໃຫ້ພັດທະນາ, ສັດຊື່ບໍລິສຸດ, ກະທຳຢ່າງຂ້ຽວຂາດ, ຮັບໃຊ້ປະຊາຊົນ ໃນເບື້ອງຕົ້ນໄດ້ສ້າງການຫັນປ່ຽນຢ່າງຕັ້ງໜ້າ. ໃນໄລຍະທາງທີ່ຈະມາເຖິງຍັງປະສົບກັບຄວາມຫຍຸ້ງຍາກຫຼາຍຢ່າງ ແຕ່ດ້ວຍຄວາມຕັດສິນໃຈ ແລະ ບັນດາບາດກ້າວບຸກທະລຸໃນຍຸດທະສາດກະທຳຈາກຝ່າຍລັດຖະບານ, ບັນດາທ້ອງຖິ່ນຈະຫັນຄາດໝາຍນຳຫວຽດນາມ ກາຍເປັນໜຶ່ງໃນບັນດາພື້ນຖານເສດຖະກິດທີ່ມີກຳລັງແກ່ງແຍ້ງກ່ຽວກັບສະພາບແວດລ້ອມແຫ່ງການດຳເນີນທຸລະກິດແຖວໜ້າໃນພາກພື້ນເທື່ອລະກ້າວ.