ເນື່ອງໃນໂອກາດລະດູບານໃໝ່ປີຣະກາ 2017, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ້ຈ້ອງໄດ້ໃຫ້ສຳພາດຕໍ່ນັກຂ່າວສຳນັກຂ່າວສານຫວຽດນາມ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງໄດ້ຊີ້ແຈ້ງເຖິງບັນດາຜົນງານຂອງປະເທດຊາດໃນຊຸມປີທີ່ຜ່ານມາ, ພ້ອມທັງເນັ້ນໜັກເຖິງເປົ້າໝາຍປ່ຽນແປງໃໝ່ຮູບແບບການເຕີບໂຕເພື່ອພັດທະນາປະເທດຊາດ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງຍັງຢືນຢັນຕ້ອງປະຕິບັດໜ້າທີ່ກໍ່ສ້າງພັກຕິດພັນກັບການພັດທະນາເສດຖະກິດ ແລະ ຮຽກຮ້ອງໃຫ້ມີຄວາມສາມັກຄີໃນທົ່ວພັກ, ທົ່ວປວງຊົນ, ທົ່ວກອງທັບເພື່ອກໍ່ສ້າງພັກໃຫ້ນັບມື້ນັບປອດໃສ, ໝັ້ນຄົງເຂັ້ມແຂງ, ປະເທດຊາດນັບມື້ນັບພັດທະນາ.
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ |
ຕາມທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ແລ້ວ, ໃນປີ 2016, ສະພາບການໂລກ ແລະ ຢູ່ພາຍໃນປະເທດພ້ອມກັບບັນດາເງື່ອນໄຂສະດວກໂດຍພື້ນຖານນັ້ນ, ກໍຍັງປະສົບກັບຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ. ໃນສະພາບການນັ້ນ, ດ້ວຍຄວາມສາມັກຄີ ເປັນຈິດໜຶ່ງໃຈດຽວ ແລະ ຄວາມຕັດສິນໃຈສູງຂອງ ທົ່ວພັກ, ທົ່ວປວງຊົນ, ທົ່ວກອງທັບນັ້ນ, ຫວຽດນາມໄດ້ຈັດຕັ້ງບັນດາເຫດການທີ່ມີຄວາມໝາຍສຳຄັນຍິ່ງຕໍ່ການພັດທະນາຍາວນານຂອງປະເທດຊາດຢ່າງສຳເລັດຜົນ.
ໝາກຜົນປີ 2016 ໄດ້ສ້າງທ່ວງທ່າທີ່ສະດວກເພື່ອໃຫ້ປະເທດຊາດກ້າວເຂົ້າສູ່ໄລຍະພັດທະນາໃໝ່.
ເຫດການການເມືອງທີ່ພົ້ນເດັ່ນໃນປີ 2016 ຊຶ່ງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງໄດ້ເຕື້ອງເຖິງທຳອິດ ແມ່ນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ ແລະ ການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆອາຍຸການ 2016 – 2021. ທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກນັ້ນ, ພັກກອມມູນິດຫວຽດນາມໄດ້ຢືນຢັນຄວາມຕັດສິນໃຈຍູ້ແຮງກິດຈະການປ່ຽນແປງໃໝ່ຢ່າງຮອບດ້ານ ແລະ ຄົບຊຸດ; ສູ້ຊົນນຳປະເທດຊາດກາຍເປັນປະເທດອຸດສາຫະກຳໂດຍພື້ນຖານຕາມທິດທັນສະໄໝ, ເດັດດ່ຽວປົກປັກຮັກສາປະເທດຊາດໃຫ້ໝັ້ນຄົງໜັກແໜ້ນ; ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ. ພາຍຫຼັງກອງປະຊຸມໃຫຍ່, ການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆອາຍຸການ 2016 – 2021 ໄດ້ຖືກດຳເນີນຢ່າງເປີດເຜີຍ, ມີປະຊາທິປະໄຕ, ຖືກຕ້ອງຕາມກົດໝາຍ. ກ່ວາ 99% ຍອດຈຳນວນຜູ້ມີສິດເລືອກຕັ້ງໄດ້ໄປປ່ອນບັດ, ສະແດງໃຫ້ເຫັນເຈດຈຳນົງ, ຄວາມມຸ່ງມາດປາດຖະໜາ ແລະ ຄວາມຮັບຜິດຊອບຂອງຕົນທີ່ມີຕໍ່ອະນາຄົດ ແລະ ຊາຕະກຳຂອງປະເທດຊາດ. ຕາມນັ້ນແລ້ວ, ຫວຽດນາມໄດ້ບູລະນະການຈັດຕັ້ງ, ບຸກຄະລາກອນກົງຈັກລັດຢ່າງວ່ອງໄວ, ຮັກສາສະຖຽນລະພາບ ແລະ ຮີບຮ້ອນກ້າວເຂົ້າສູ່ການຜັນຂະຫຍາຍປະຕິບັດບັນດາເປົ້າໝາຍ, ໜ້າທີ່ຊຶ່ງໄດ້ວາງອອກ. ຍ້ອນແນວນັ້ນ, ຕາມທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ແລ້ວ, ປີ 2016, ຍອດຜະລິດຕະພັນພາຍໃນ GDP ຍັງຄົງເຕີບໂຕສູງຄື : 6,21%, ເສດຖະກິດມະຫາພາກສືບຕໍ່ເປັນປົກກະຕິ, ເງິນເຟີ້ໄດ້ຮັບການຄວບຄຸມ, ບັນດາການດຸ່ນດຽງໃຫຍ່ຂອງພື້ນຖານເສດຖະກິດໄດ້ຮັບການຮັບປະກັນໂດຍພື້ນຖານ, ການສະສົມເງິນຕາຕ່າງປະເທດບັນລຸລະດັບເພີ່ມສູງສຸດນັບແຕ່ກ່ອນເປັນຕົ້ນມາ. ວຽກງານການພົວພັນຕ່າງປະເທດ ແລະ ເຊື່ອມໂຍງເຂົ້າກັບສາກົນສືບຕໍ່ໄດ້ຮັບການຜັນຂະຫຍາຍຢ່າງແຂງແຮງ, ຮອບດ້ານ, ອັນໄດ້ຍົກສູງທີ່ຕັ້ງບົດຂອງຫວຽດນາມໃນພາກພື້ນ ແລະ ສາກົນ.
ປ່ຽນແປງໃໝ່ຮູບແບບການເຕີບໂຕເພື່ອພັດທະນາແບບຍືນຍົງ
ໃນບົດຕອບສຳພາດ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງໄດ້ເນັ້ນໜັກເຖິງໝາກຜົນຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ. ທີ່ກອງປະຊຸມໃຫຍ່, ພັກກອມມູນິດຫວຽດນາມໄດ້ກຳນົດໜຶ່ງໃນ 6 ໜ້າທີ່ຈຸດສຸມຂອງທັງອາຍຸການແມ່ນ ສຸມໃສ່ປະຕິບັດບັນດາມາດຕະການຍົກສູງຄຸນນະພາບການເຕີບໂຕ, ສະມັດຕະພາບການອອກແຮງງານ ແລະ ກຳລັງແກ່ງແຍ້ງຂອງພື້ນຖານເສດຖະກິດ. ສືບຕໍ່ປະຕິບັດ 3 ບາດກ້າວບຸກທະລຸຍຸດທະສາດຢ່າງມີປະສິດທິຜົນ, ສ້າງໂຄງປະກອບພື້ນຖານເສດຖະກິດຄືນໃໝ່ຕິດພັນກັບການປ່ຽນແປງໃໝ່ຮູບແບບການເຕີບໂຕ. ທັດສະນະ ແລະ ກຳນົດທິດເຫຼົ່ານັ້ນ, ໄດ້ຖືກຫັນເປັນລະອຽດ ຈະແຈ້ງໃນມະຕິເລກ 05 ຂອງສູນກາງພັກ, ດ້ວຍ 8 ແຜນນະໂຍບາຍ, ນະໂຍບາຍໃຫຍ່ຄວນສຸມໃສ່ປະຕິບັດ ແນໃສ່ສືບຕໍ່ ປ່ຽນແປງໃໝ່ຮູບແບບການເຕີບໂຕ, ຍົກສູງຄຸນນະພາບການເຕີບໂຕ, ສະມັດຕະພາບການອອກແຮງງານ ແລະ ກຳລັງແກ່ງແຍ້ງຂອງພື້ນຖານເສດຖະກິດ.
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຖືວ່າ ປ່ຽນແປງໃໝ່ຮູບແບບການເຕີບໂຕຕິດພັນກັບການສ້າງໂຄງປະກອບພື້ນຖານເສດຖະກິດຄືນໃໝ່ຕ້ອງອີງບົນພື້ນຖານຄວາມສາມາດບົ່ມຊ້ອນ, ທ່າແຮງຂອງແຕ່ລະທ້ອງຖິ່ນ. ໃນຂະບວນວິວັດພັດທະນາກ້າວຂຶ້ນ, ແຕ່ລະທ້ອງຖິ່ນຕ້ອງສືບຕໍ່ປົວແປງສະພາບແວດລ້ອມແຫ່ງການລົງທຶນ, ດຳເນີນທຸລະກິດ, ສ້າງເງື່ອນໄຂສະດວກ, ສົ່ງເສີມວິສາຫະກິດສ້າງອາຊີບ ແລະ ພັດທະນາ, ລົງທຶນຢ່າງມີຈຸດສຸມ, ຫຼີກເວັ້ນການລົງທຶນແບບກະແຈກກະຈ່າຍ.
ໜ້າທີ່ກໍ່ສ້າງພັກຕ້ອງປະຕິບັດຄຽງຄູ່ກັບການພັດທະນາເສດຖະກິດ
ເມື່ອເຕື້ອງເຖິງການກໍ່ສ້າງພັກ, ປັບປຸງພັກ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງໃຫ້ຮູ້ວ່າ : ນີ້ແມ່ນໜ້າທີ່ເປັນກຸ່ນແຈ, ພື້ນຖານຍາວນານ. ມະຕິກອງປະຊຸມສູນກາງພັກຄັ້ງທີ 4 ຊຸດທີ 12 ໄດ້ຊີ້ແຈ້ງ, ໄຈ້ແຍກຢ່າງເລິກເຊິ່ງກ່ຽວກັບສະພາບການ “ຜັນແປເອງ” ແລະ “ຫັນປ່ຽນເອງ” ຢູ່ພາຍໃນ. ມະຕິໄດ້ເຕື້ອງເຖິງກຸ່ມມາດຕະການແກ້ໄຂກ່ຽວກັບກົນໄກ, ນະໂຍບາຍ, ເຊີດຊູລະບຽບວິໄນ, ລັກສະນະເຄົາລົບກົດໝາຍ, ແກ້ໄຂບັນດາກໍລະນີລະເມີດກົດໝາຍທີ່ກໍ່ຄວາມຮ້ອນເຮັ່ງໃນຫາງສຽງສັງຄົມ.
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງຍັງຖືວ່າ ການກໍ່ສ້າງ, ປັບປຸງພັກແມ່ນໜ້າທີ່ຫຍຸ້ງຍາກ, ສັບສົນ ແຕ່ຕ້ອງປະຕິບັດຢ່າງເດັດຂາດ. ບັນຫາທີ່ວາງອອກນັ້ນ, ແມ່ນເຮັດແນວໃດເພື່ອໃຫ້ອົງການຈັດຕັ້ງພັກ, ແລະ ກົງຈັກລັດປອດໃສ, ເຂັ້ມແຂງ, ທັງພັດທະນາເສດຖະກິດ, ທັງສ້າງສະຖຽນລະພາບໃຫ້ສັງຄົມເພື່ອພັດທະນາປະເທດຊາດ. ເພາະສະນັ້ນ, ຕາມທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງແລ້ວ, ໜ້າທີ່ກໍ່ສ້າງພັກແມ່ນກຸນແຈຕ້ອງປະຕິບັດຄຽງຄູ່ກັບການພັດທະນາເສດຖະກິດ ແມ່ນໜ້າທີ່ຈຸດສຸມ. ມະຕິກອງປະຊຸມສູນກາງພັກຄັ້ງທີ 4 ຊຸດທີ 12 ກ່ຽວກັບການກໍ່ສ້າງພັກແມ່ນ ຕ້ອງປະຕິບັດຄຽງຄູ່ກັບບັນດາມະຕິອື່ນໆຂອງສູນກາງພັກ, ສະພາແຫ່ງຊາດ, ລັດຖະບານ, ສ້າງການຫັນປ່ຽນຢ່າງຄົບຊຸດ ແລະ ຮອບດ້ານໃນທຸກຂົງເຂດ.
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງເນັ້ນໜັກວ່າ ເພື່ອຍາດແຍ່ງກາລະໂອກາດ, ຜ່ານຜ່າສິ່ງທ້າທາຍ, ທົ່ວພັກ, ທົ່ວປວງຊົນ, ທົ່ວກອງທັບຄວນເພີ່ມທະວີຄວາມສາມັກຄີ, ຮ່ວມແຮງຮ່ວມໃຈ, ມານະພະຍາຍາມສູ້ຊົນນຳມະຕິ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກເຂົ້າສູ່ຊີວິດຕົວຈິງ, ຕັດສິນໃຈກໍ່ສ້າງພັກໃຫ້ນັບມື້ນັບປອດໃສ, ໝັ້ນຄົງເຂັ້ມແຂງ, ປະເທດຊາດນັບມື້ນັບພັດທະນາ, ຈະເລີນຮຸ່ງເຮືອງ; ປະຊາຊົນນັບມື້ນັບອີ່ມໜຳສຳລານ ແລະ ຜາສຸກ.