(vovworld)- ປີ 2017, ຫວຽດນາມ ວາງຄາດໝາຍຮັກສາເສດຖະກິດມະຫາພາກເປັນປົກກະຕິ, ບັນລຸການເຕີບໂຕເສດຖະກິດຢູ່ໃນລະດັບ 6,7%, ຮັບປະກັນຊີວິດສັງຄົມ. ເພື່ອປະຕິບັດຫນ້າທີ່ດັ່ງກ່າວໃຫ້ໄດ້. ນັບແຕ່ຊຸມມື້ຕົ້ນປີ 2017, ລັດຖະບານ ແລະ ບັນດາກະຊວງ, ຂະແຫນງການ, ທ້ອງຖິ່ນຕ່າງໆໄດ້ວາງອອກຫລາຍໂຄງການດຳເນີນງານລະອຽດ.
ກອງປະຊຸມໂດຍກົງຜ່ານເຄືອຂ່າຍອິນເຕີແນັດກັບການນຳ
63 ແຂວງ, ນະຄອນ
ພາບ:baochinhphu.vn
|
3 ຄາດໝາຍສຳຄັນທີ່ສຸດໃນປີ 2017 ນັ້ນແມ່ນ ການເຕີບໂຕ GDP ຢູ່ໃນລະດັບ 6,7%, ໄພເງິນເຟີ້ສະເລ່ຍ ຢູ່ໃນລະດັບ 4% ແລະ ງົບປະມານຕ້ອງຮັບປະກັນທັງຢູ່ຂັ້ນສູນກາງ ແລະ ທ້ອງຖິ່ນ. ລັດຖະບານຫວຽດນາມ ສະແດງຄວາມຕັດສິນໃຈປະຕິບັດບັນດາຄາດໝາຍດັ່ງກ່າວ ຜ່ານການຜັນຂະຫຍາຍບັນດາຫນ້າທີ່ໃນໄຕມາດ 1 ປີ 2017. ບັນດາກະຊວງ, ຂະແຫນງການ ແລະ ທ້ອງຖິ່ນຕ່າງໆ ກໍໄດ້ຍົກອອກຫລາຍມາດຕະການຜັນຂະຫຍາຍລະອຽດ. ບັນດາການກະທຳນີ້ແມ່ນສະແດງໃຫ້ເຫັນຢ່າງຈະແຈ້ງແຜນນະໂຍບາຍຂອງລັດຖະບານທີ່ມີຄວາມຊັດສື່ບໍລິສຸດ, ສ້າງສັນ, ພັດທະນາ ແລະ ການກະທຳເພື່ອຮັບໃຊ້ປະຊາຊົນ.
ຄວາມຕັດສິນໃຈຂອງລັດຖະບານ
ທີ່ກອງປະຊຸມໂດຍກົງຜ່ານເຄືອຂ່າຍອິນເຕີແນັດກັບການນຳ 63 ແຂວງ, ນະຄອນ ເມື່ອວັນທີ (28 -29/12/2016), ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ເນັ້ນຫນັກເຖິງ 30 ຫນ້າທີ່ຈຸດສຸມຄວນໄດ້ຮັບການຜັນຂະຫຍາຍໃນປີ 2017. ບັນດາເນື້ອໃນນີ້ແມ່ນສະແດງໃຫ້ເຫັນ ຢ່າງຈະແຈ້ງ ຄວາມຕັດສິນໃຈມານະພະຍາຍາມປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ຍົກສູງສະມັດຕະພາບ, ຄຸນນະພາບ ປະສິດທິຜົນ, ກຳລັງແກ້ງແຍ້ງຂອງບັນດາຂະແຫນງການ, ຂົງເຂດ ແລະ ຂອງທັງພື້ນຖານເສດຖະກິດ; ຮັບປະກັນຄວາມປອດໄພສຳລັບຫນີ້ສາທາລະນະ, ປຸກລະດົມທົ່ວສັງຄົມ, ເປັນຕົ້ນແມ່ນບັນດາອົງການນຳໃຊ້ງົບປະມານຕ້ອງປະຕິບັດມາດຕະການປະຢັດມັດທະຍັດ.
ພ້ອມກັບ 30 ຫນ້າທີ່ຈຸດສຸມ ຊື່ງທ່ານນາຍົກລັດຖະມົນຕີໄດ້ຍົກອອກມາ, ລັດຖະບານ ໄດ້ກະກຽມປະກາດໃຊ້ ມະຕິເລກທີ 01 ກ່ຽວກັບການປະຕິບັດແຜນການພັດທະນາເສດຖະກິດສັງຄົມ ແລະ ການສ້າງແຜນງົບປະມານແຫ່ງລັດປີ 2017. ຕາມທ່ານຮອງນາຍົກລັດຖະມົນຕີ ເວືອງດີງເຫ້ວ ແລ້ວ, ຮ່າງມະຕິໄດ້ເນັ້ນຫນັກຢ່າງແຮງເຖິງຄວາມຮຽກຮ້ອງຕ້ອງການທຳອິດ ນັ້ນແມ່ນ ຮັບປະກັນການຮັກສາເສດຖະກິດມະຫາພາກເປັນປົກກະຕິ ແມ່ນພື້ນຖານໃຫ້ແກ່ການພັດທະນາ, ຖັດມາ ແມ່ນການຍູ້ແຮງການສ້າງໂຄງປະກອບເສດຖະກິດຄືນໃຫມ່ ຕິດພັນກັບການເຕີບໂຕ ປະຕິບັດ 3 ຂອດບຸກທະລຸຍຸດທະສາດ, ຮັບປະກັນການພັດທະນາຢ່າງວ່ອງໄວ ແຕ່ຕ້ອງມີຄວາມໝັ້ນຄົງ. ໃນຍອດຈຳນວນ 10 ມາດຕະການພັດທະນາເສດຖະກິດ ສັງຄົມ ຊື່ງ ຮ່າງມະຕິໄດ້ເຕື້ອງເຖິງ, ມີບາງເນື້ອໃນ ລັດຖະບານ ສະເຫນີຕ້ອງໄດ້ຮັບການຜັນຂະຫຍາຍໃນໄຕມາດ 1 ປີ 2017. ທ່ານຮອງນາຍົກລັດຖະມົນຕີ ເວືອງດີງເຫ້ວ ໃຫ້ຮູ້ວ່າ:
“ໃນໄຕມາດ 1, ທະນາຄານແຫ່ງລັດ ຕ້ອງລາຍງານຄັ້ງສຸດທ້າຍຕໍ່ທ່ານນາຍົກລັດຖະມົນຕີກ່ຽວກັບແຜນຮ່າງຕ້ານການນຳໃຊ້ເງິນ USD ແລະ ຄຳເປັນຕົ້ນຕໍ ແລະ ມີແຜນຮ່າງລະດົມຄຳ, USD ຢ່າງມີປະສິດທິຜົນເພື່ອຮັບໃຊ້ເສດຖະກິດ. ບັນດາກະຊວງ, ຂະແຫນງການ, ທ້ອງຖິ່ນຕ່າງໆ ຕ້ອງຜັນຂະຫຍາຍແຜນງົບປະມານປີ 2017 ແລະ ແຜນການລົງທຶນຂອງລັດນັບແຕ່ຊຸມມື້ຕົ້ນປີຢ່າງມີປະສິດທິຜົນ. ສືບຕໍ່ສ້າງໂຄງປະກອບພື້ນຖານເສດຖະກິດຄືນໃຫມ່ ຕິດພັນກັບການປ່ຽນໃຫມ່ຮູບແບບການເຕີບໂຕ. ເນື້ອໃນຈິດໃຈໃນໄຕມາດ 1 ນັ້ນແມ່ນ ແຜນຮ່າງທັງໝົດສ້າງໂຄງປະກອບຄືນໃຫມ່ໃນ 3 ຂົງເຂດ (ສ້າງໂຄງປະກອບການລົງທຶນຂອງລັດຄືນໃຫມ່, ສ້າງໂຄງປະກອບລັດວິສາຫະກິດຄືນໃຫມ່ ແລະ ບັນດາອົງການສິນເຊື່ອຄືນໃຫມ່)ຕ້ອງຍື່ນສະເຫນີຕໍ່ລັດຖະບານ ແລະ ອົງການກ່ຽວຂ້ອງເພື່ອຈັດຕັ້ງການປະຕິບັດ.”
ເປັນຈິດຫນຶ່ງໃນດຽວຈາກບັນດາທ້ອງຖິ່ນ
ທ່ານ ຫງວຽນດືກຈູງ, ປະທານຄະນະກຳມະການປະຊາຊົນນະຄອນ ຮ່າໂນ້ຍ ໃຫ້ຮູ້ວ່າ: ປີ 2017, ຮ່າໂນ້ຍ ຈະໃກ້ຊິດຕິດແທດກັບການຊີ້ນຳຂອງລັດຖະບານ, ສົມທົບກັບບັນດາກະຊວງ, ແຫນງການ ຍູ້ແຮງການປັບປຸງສະພາບແວດລ້ອມແຫ່ງການດຳເນີນທຸລະກິດ, ສ້າງຄວາມສະດວກໃຫ້ແກ່ວິສາຫະກິດດຳເນີນທຸລະກິດ; ປະຕິບັດວຽກງານຮັບປະກັນຊີວິດສັງຄົມເປັນຢ່າງດີ. ທ່ານ ຫງວຽນແທງຟອງ, ປະທານຄະນະກຳມະການປະຊາຊົນນະຄອນ ໂຮ່ຈິມີນ ຢືນຢັນ: ປີ 2017, ນະຄອນ ຄວນສຸມໃສ່ຍົກສູງປະສິດທິຜົນບັນດານະໂຍບາຍຫນູນຊ່ວຍ, ສູ້ຊົນຈະສ້າງຕັ້ງວິສາຫະກິດໃຫມ່ 50.000 ແຫ່ງ. ນະຄອນ ໂຮ່ຈິມີນ ຈະລະດົມທຸກແຫລ່ງກຳລັງເພື່ອພັດທະນາເສດຖະກິດໃນປີ 2017, ປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ. ຢູ່ ດົງນາຍ, ທ່ານດີງກວກທາຍ, ປະທານຄະນະກຳມະການປະຊາຊົນແຂວງ ດົງນາຍ ໃຫ້ຮູ້ວ່າ:ແຂວງ ຈະຜັນຂະຫຍາຍບັນດາຫນ້າທີ່ພາຍຫລັງມີມະຕິເລກ 01 ຂອງລັດຖະບານ.
“ແຂວງດົງນາຍ ຕັດສິນໃຈປະຕິບັດລື່ນກາຍບັນດາຄາດໝາຍຊື່ງລັດຖະບານມອບໝາຍໃຫ້ເພື່ອພ້ອມກັບລັດຖະບານປະຕິບັດບັນດາຄາດໝາຍປີ 2017 ຢ່າງມີໄຊ. ສຳລັບບັນດາໂຄງການກໍ່ສ້າງເຮືອນຢູ່ໃຫ້ແກ່ກຳມະກອນ ດ້ວຍເນື້ອທີ່ກວ່າ 10 ເຮັກຕາ ແມ່ນອະນຸຍາດເມື່ອມີຄວາມຈຳເປັນຈະຄິດໄລ່ມູນຄ່າເນື້ອທີ່ດິນ 2% ໃຫ້ແກ່ເຮືອນຢູ່ສັງຄົມເປັນເງິນສົດເພື່ອຮັບໃຊ້ໃຫ້ບັນດາໂຄງການກໍ່ສ້າງເຮືອນຢູ່ສັງຄົມຊື່ງຕັ້ງຢູ່ໃກ້ກັບເຂດອຸດສາຫະກຳ ຫລື ບັນດາໂຮງງານ.”
ໃນຂະນະນັ້ນ ທ່ານ ຫງວຽນຊວນດົງ, ປະທານຄະນະກຳມະການປະຊາຊົນ ແຂວງ ຮ່ານາມ ໃຫ້ຮູ້ວ່າ:
“ແຂວງຈະສົມທົບກັບບັນດາກະຊວງ, ຂະແຫນງການປະຕິບັດການປັບປຸງແຜນກຳນົດບັນດາເຂດອຸດສາຫະກຳຢູ່ບໍລິເວນແຂວງ. ກ່ຽວກັບກົນໄກນະໂຍບາຍ ຜັນຂະຫຍາຍບ້ວງສິນເຊື່ອໃຫ້ແກ່ການພັດທະນາກະສິກຳເຕັກໂນໂລຊີສູງ, ມີກົນໄກສ້າງແຫລ່ງກຳລັງເພື່ອດຳເນີນການລົງທຶນຢ່າງວ່ອງໄວຢູ່ເຂດອຸດສາຫະກຳ ນາມກາວ.”
ຕາມທ່ານ ຫງວຽນວັນຕຸງ, ປະທານຄະນະກຳມະການນະຄອນ ຫາຍຟ່ອງ ແລ້ວ, ປີ 2017, ນະຄອນ ສູ້ຊົນປະຕິບັດບັນດາຄາດໝາຍເສດຖະກິດສັງຄົມຢູ່ໃນລະດັບສູງ, ຕັດສິນໃຈສ້າງບາດກ້າວບຸທະລຸໃຫຍ່.
“ປີ 2017, ນະຄອນຕັດສິນໃຈບັນລຸລະດັບເຕີບໂຕຈາກ 12,5 -13%, ເກັບລາຍຮັບງົບປະມານຢູ່ທ້ອງຖິ່ນໃຫ້ໄດ້ 21.500 ຕື້ດົງ, ເພີ່ມຂຶ້ນກວ່າ 4000 ຕື້ດົງ ເມື່ອທຽບໃສ່ປີ 2016. ນະຄອນ ກໍຈະລົງທຶນ ແລະ ເລີ່ມປະຕິບັດຫລາຍໂຄງການສຳຄັນ. ເພື່ອຮັບໃຊ້ໃຫ້ແກ່ການພັດທະນາເສດຖະກິດ ນະຄອນ ຫາຍຟ່ອງ ສະເຫນີ ກໍ່ສ້າງທ່າກຳປັ່ນສາກົນຫາຍຟ່ອງ, ອະນຸຍາດກໍ່ສ້າງອາຄານຜູ້ໂດຍສານເລກ 2 ຕື່ມອີກ ຢູ່ ທ່າອາກາດສະຍານສາກົນ ກາດບີ ເພື່ອຕອບສະຫນອງການເຕີບໂຕທາງການບິນ”
ປີ 2017, ຫວຽດນາມ ຕ້ອງປະເຊີນຫນ້າກັບຄວາມຫຍຸ້ງຍາກຫລາຍຢ່າງຈາກພາຍໃນປະເທດ ແລະ ຕ່າງປະເທດ ແຕ່ດ້ວຍຄວາມຕັດສິນໃຈ, ການຊີ້ນຳຢ່າງໃກ້ຊິດຂອງລັດຖະບານ, ຄວາມເຫັນດີເຫັນພ້ອມຂອງບັນດາທ້ອງຖິ່ນ ຈະແມ່ນກຳລັງຫນູນໃຫຍ່ເພື່ອໃຫ້ຫວຽດນາມ ບັນລຸໄດ້ບັນດາຄາດໝາຍພັດທະນາເສດຖະກິດສັງຄົມ.