(vovworla) - ໜຶ່ງໃນບັນດາເນື້ອໃນສຳຄັນຂອງກອງປະຊຸມຄັ້ງທີ 11 ຄະນະບໍລິຫານງານສູນກາງພັກຊຸດທີ 11, ເຊິ່ງພວມດຳເນີນຢູ່ຮ່າໂນ້ຍ, ນັ້ນແມ່ນເລື່ອງກະກຽມບຸກຄະລາກອນໃຫ້ແກ່ ກອງປະຊຸມໃຫຍ່ຄັ້ງທີ 12. ໃນບົດກ່າວປາໄສໄຂກອງປະຊຸມ, ທ່ານເລຂາທິການໃຫຍ່ ຫງວຽນຟູ໋ຈ້ອງ, ໄດ້ເນັ້ນໜັກວ່າ, ນີ້ແມ່ນໜ້າທີ່ສຳຄັນຍິ່ງ, ຮຽກຮ້ອງໃຫ້ມີການກະກຽມຕາມຂັ້ນຕອນທີ່ແໜ້ນແຟ້ນ ແລະ ຄວາມຄືບໜ້າຢ່າງເໝາະສົມ.
ເນື້ອໃນສຳຄັນທີ່ສຸດຂອງກອງປະຊຸມໃຫຍ່ພັກແຕ່ລະຄັ້ງ, ແມ່ນການ ປຶກສາຫາລື, ຕົກລົງແນວທາງ, ໜ້າທີ່ການເມືອງຂອງພັກ ແລະ ເລືອກຕັ້ງບັນດາອົງການຊີ້ນຳນຳພາຂອງພັກ. ຕາມທ່ານເລຂາທິການໃຫຍ່ ຫງວຽນຟູ໋ຈ້ອງ ແລ້ວ, ສູນກາງໄດ້ໃຫ້ຄວາມເຫັນຕໍ່ບັນດາຮ່າງເອກະສານກອງປະຊຸມສູນກາງຄັ້ງທີ 9 ແລະ ທີ 10. ໜ້າທີ່ນັບແຕ່ນີ້ເຖິງກອງປະຊຸມໃຫຍ່ພັກທົ່ວປະເທດ, ພ້ອມກັບການສືບຕໍ່ປັບປຸງບັນດາຮ່າງເອກະສານກອງປະຊຸມໃຫຍ່ແລ້ວ, ຄະນະບໍລິຫານງານສູນກາງຕ້ອງສຸມໃສ່ວຽກງານກະກຽມບຸກຄະລາກອນກອງປະຊຸມໃຫຍ່ຕາມຂໍ້ກຳນົດຂອງກົດລະບຽບພັກ.
ທ່ານເລຂາທິການໃຫຍ່ ຫງວຽນຟູ໋ຈ້ອງ ກ່າວຄຳເຫັນທີ່ກອງປະຊຸມ
(ພາບ: VGP/Nhật Bắc)
|
ບຸກຄະລາກອນເພື່ອປະຕິບັດໜ້າທີ່ການເມືອງ
ທ່ານເລຂາທິການໃຫຍ່ ຫງວຽນຟູ໋ຈ້ອງ ໃຫ້ຮູ້ວ່າ, ທີ່ກອງປະຊຸມຄັ້ງນີ້, ສູນກາງໃຫ້ຄວາມເຫັນ, ປຶກສາຫາລື ແລະ ຕົກລົງທິດທາງວຽກງານບຸກຄະລາກອນຄະນະບໍລິຫານງານສູນກາງຊຸດທີ 12 ເພື່ອເປັນພື້ນຖານໃຫ້ແກ່ການກະກຽມບຸກຄະລາກອນເຂົ້າຮ່ວມຄະນະບໍລິຫານງານສູນກາງ, ກົມການເມືອງ, ຄະນະເລຂາ, ເລຂາທິການໃຫຍ່, ຄະນະກຳມະການກວດກາ
ສູນກາງຊຸດທີ 12 ແລະ ບຸກຄະລາກອນການນຳຫຼັກແຫຼ່ງຂອງບັນດາອົງການລັດອາຍຸການ 2016 – 2021 ທີ່ບັນດາກອງປະຊຸມຄັ້ງຕໍ່ໄປ. ຕາມທ່ານເລຂາທິການໃຫຍ່ ຫງວຽນຟູ໋ຈ້ອງ, ເລື່ອງກຳນົດທິດທາງວຽກງານບຸກຄະລາກອນ ຕ້ອງເລີ່ມມາຈາກຄວາມຕ້ອງການປະຕິບັດແນວທາງ, ໜ້າທີ່ການເມືອງຂອງພັກ, ການກໍ່ສ້າງ ແລະ ປົກປັກຮັກສາປະເທດຫວຽດນາມ ສັງຄົມນິຍົມ. ຄາດວ່າ, ໃນຊຸມປີຕໍ່ໜ້າ, ຫວຽດນາມ ມີທັງ ກາລະໂອກາດ ແລະ ການທ້າທາຍຫຼາຍຢ່າງ. ດັ່ງນັ້ນຕ້ອງສືບຕໍ່ເພີ່ມທະວີການກໍ່ສ້າງພັກໃຫ້ປອດໄສ, ໝັ້ນຄົງເຂັ້ມແຂງ; ເສີມຂະຫຍາຍກຳລັງແຮງຂອງທົ່ວທັງຊາດ ແລະ ປະຊາທິປະໄຕສັງຄົມນິຍົມ; ຍູ້ແຮງກິດຈະການປ່ຽນໃໝ່ຢ່າງຮອບດ້ານ ແລະ ຄົບຊຸດ; ປົກປັກຮັກສາປະເທດຊາດ; ຮັກສາສະພາບແວດລ້ອມສັນຕິພາບ, ສະຖຽນລະພາບຢ່າງໝັ້ນຄົງ; ສ້າງພື້ນຖານເພື່ອໃຫ້ຫວຽດນາມກາຍເປັນປະເທດອຸດສາຫະກຳ ຕາມທິດທັນສະໄໝໂດຍພື້ນ
ຖານ. ທ່ານເລຂາທິການໃຫຍ່, ເນັ້ນໜັກວ່າ:
“ເພື່ອປະຕິບັດສຳເລັດພາລະກິດອັນໃຫຍ່ຫຼວງ ແລະສັບສົນນັ້ນ, ພວກເຮົາຕ້ອງກໍ່ສ້າງຄະນະບໍລິຫານງານສູນກາງ - ອົງການນຳພາສູງສຸດຂອງພັກລະຫວ່າງກອງປະຊຸມໃຫຍ່ສອງຄັ້ງ - ເປັນກອງບັນຊາການສູ້ຮົບຢ່າງອົງອາດກ້າແກ່ນ, ເປັນແກ່ນສານນຳພາດ້ານການເມືອງ ທັງແມ່ນໃຈກາງແຫ່ງຄວາມສາມັກຄີ, ເອກະພາບສູງຂອງທົ່ວພັກ, ທົ່ວທັງຊາດຢ່າງແທ້ຈິງ. ນີ້ແມ່ນວຽກງານທີ່ກ່ຽວພັນເຖິງຊາຕາກຳຂອງພັກ, ຂອງຊາດ ແລະ ການພັດທະນາຂອງປະເທດຊາດ“.
ຄວາມຮັບຜິດຊອບໃນວຽກງານກະກຽມບຸກຄະລາກອນ
ຕາມທ່ານເລຂາທິການໃຫຍ່ ຫງວຽນຟູ໋ຈ້ອງ, ບົນພື້ນຖານສະຫຼຸບບົດຮຽນໃນການກະກຽມບຸກຄະລາກອນຈາກກອງປະຊຸມໃຫຍ່ຄັ້ງທີ 6 ເຖິງກອງປະຊຸມໃຫຍ່ຄັ້ງທີ 11 ຂອງພັກ, ທັງອີງໃສ່ຄວາມຮຽກຮ້ອງຕົວຈິງ, ອານຸກຳມະການບຸກຄະລາກອນ ໄດ້້ກະກຽມຮ່າງທິດທາງວຽກງານບຸກຄະລາກອນຄະນະບໍລິຫານງານສູນກາງອາຍຸການຊຸດທີ 12. ອານຸກຳມະການບຸກຄະລາກອນ ໄດ້ຈັດຕັ້ງການຮັບເອົາຄວາມເຫັນຈາກຄະນະພັກ ທຸກຂັ້ນ, ອົງການພັກ, ອົງການທີ່ຂຶ້ນກັບສູນກາງ. ຄະນະພັກທຸກຂັ້ນ, ອົງການພັກ, ອົງການທີ່ຂຶ້ນກັບສູນກາງເກືອບທັງໝົດລ້ວນແຕ່ເຫັນດີເປັນເອກະພາບກັບຮ່າງບຸກຄະລາກອນ; ຖືວ່າ ຮ່າງບຸກຄະລາກອນໄດ້ຮັບການກະກຽມຢ່າງລອບຄອບ, ລະອຽດ, ສືບທອດບົດຮຽນໃນວຽກງານບຸກຄະລາກອນຂອງກອງປະຊຸມໃຫຍ່ພັກຊຸດກ່ອນໆໂດຍມີການເລືອກເຝັ້ນ. ອານຸກຳມະການບຸກຄະລາກອນ ໄດ້ຮັບເອົາຄວາມເຫັນປະກອບ ແລະ ລາຍງານຕໍ່ກົມການເມືອງພິຈາລະນາ, ຍື່ນສະເໜີຕໍ່ກອງປະຊຸມສູນກາງຄັ້ງທີ 11. ຕາມນັ້ນແລ້ວ, ໃນບົດລາຍງານຂອງກົມການເມືອງທີ່ຍື່ນສະເໜີຕໍ່ສູນກາງ ໄດ້ມີຄວາມຮຽກຮ້ອງສ້າງຄະນະບໍລິຫານງານສູນກາງຊຸດທີ 12; ມາດຕະຖານກຳມະການຄະນະບໍລິຫານງານສູນກາງ, ກຳມະການກົມການເມືອງ, ຄະນະເລຂາ, ຈຳນວນ, ໂຄງປະກອບ, ຂັ້ນຕອນສະເໜີ, ເລືອກເຝັ້ນ ແລະ ບາງແຜນນະໂຍບາຍທີ່ຄວນຊີ້ນຳປະຕິບັດໃນວິວັດການກະກຽມ ແລະ ຜັນຂະຫຍາຍວຽກງານບຸກຄະລາກອນຄະນະບໍລິຫານງານສູນກາງ. ທ່ານເລຂາທິການໃຫຍ່ ຫງວຽນຟູ໋ຈ້ອງ ສະເໜີໃຫ້ບັນດາກຳມະການສູນກາງພັກ ມີຄວາມຮັບຮູ້ຢ່າງຄົບຖ້ວນຄວາມໝາຍອັນໃຫຍ່ຫຼວງຂອງການກະກຽມບຸກຄະລາກອນ, ສຸມໃສ່ປຶກສາຫາລື, ໄຈ້ແຍກ, ເຮັດໃຫ້ບັນດາເນື້ອໃນດັ່ງກ່າວເລິກເຊິ່ງກ່ວາອີກ. ທ່ານເລຂາທິການໃຫຍ່ ກໍ່ເນັ້ນໜັກເຖິງບັນດາຄວາມເອົາໃຈໃສ່ກ່ຽວກັບມາດຕະຖານຂອງກຳມະການຄະນະບໍລິຫານງານສູນກາງ, ກົມການເມືອງ, ຄະນະເລຂາຄື: ຄຸນນະທາດດ້ານການເມືອງ, ຄຸນສົມບັດ ແລະ ແບບແຜນການດຳລົງຊີວິດ, ສະຕິໃນການຮັກສາ ແລະ ປົກປັກຮັກສາຄວາມສາມັກຄີໃນພັກ. ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງວ່າ:
“ໃນວຽກງານກະກຽມບຸກຄະລາກອນ, ຕ້ອງເນັ້ນໜັກເປັນພິເສດເຖິງນ້ຳໃຈຄວາມຮັບຜິດຊອບສູງສຸດ, ຄວາມຍຸຕິທຳ, ພາວະວິໄສ, ປອດໄສ, ເປັນແບບຢ່າງ, ປະຕິບັດບັນດາຫຼັກການຈັດຕັ້ງ, ຂໍ້ກຳນົດ, ກົດລະບຽບຂອງພັກ, ຖືພາລະກິດລວມຂອງພັກ, ຂອງຊາດເປັນຕົ້ນຕໍ. ເດັດດ່ຽວຕ້ານທຸກໆປະກົດການຂອງລັດທິເຫັນແກ່ສ່ວນຕົວ, ສວຍໂອກາດ, ພັກຝ່າຍແບ່ງແຍກ…”
ພ້ອມກັບການກຳນົດທິດກ່ຽວກັບວຽກງານກະກຽມບຸກຄະລາກອນ, ທ່ານເລຂາທິການໃຫຍ່ ຫງວຽນຟູ໋ຈ້ອງ ກໍ່ໄດ້ເຈາະຈີ້ມບັນດາບັນຫາທີ່ກ່ຽວຂ້ອງເຖິງຈຳນວນ ແລະ ການຈັດແບ່ງຜູ້ແທນເຂົ້າຮ່ວມກອງປະຊຸມໃຫຍ່ພັກຄັ້ງທີ 12, ຮູບແບບອຳນາດການປົກຄອງທ້ອງຖິ່ນ, ໂຄງການສະໜາມບິນສາກົນ ລອງແທ່ງ. ທ່ານເລຂາທິການໃຫຍ່ ຮຽກຮ້ອງໃຫ້ບັນດາກຳມະການສູນກາງພັກ ຍົກສູງນ້ຳໃຈຄວາມຮັບຜິດຊອບກ່ວາອີກ, ເສີມຂະຫຍາຍພູມປັນຍາ, ປະກອບຫຼາຍຄຳເຫັນທີ່ເລິກເຊິ່ງ, ຊັດເຈນ, ຮັບປະກັນໃຫ້ກອງປະຊຸມຄະນະບໍລິຫານງານສູນກາງພັກຄັ້ງທີ 11 ບັນລຸຜົນສຳເລັດ.