ວັນທີ 20/1, ປະທານາທິບໍດີຜູ້ໄຊຊະນະໃນການເລືອກຕັ້ງຂອງອາເມລີກາ Donald Trump ໄດ້ສະບານຕົວເຂົ້າດຳລົງຕຳແໜ່ງ ແທນໃຫ້ທາ່ນ Barack Obama ເພື່ອກາຍເປັນປະທານານິບໍດີຄົນທີ 45 ຂອງອາເມລິກາຊຶ່ງກໍມີຄວາມໝາຍປຽບເໝືອນກັບເລື່ອງທ່ານ Donald Trump ຕ້ອງປະເຊີນໜ້າກັບສິ່ງທ້າທາຍທາງດ້ານການເມືອງ, ເສດຖະກິດຫຼາຍຢ່າງ, ໃນນັ້ນລວມທັງການແກ້ໄຂສາຍພົວພັນກັບຕ່າງປະເທດ ເພື່ອເຮັດແນວໃດຈະນຳມາເຊິ່ງຜົນປະໂຫຍດອັນໃຫຍ່ຫຼວງໃຫ້ແກ່ອາເມລິກາ. ນີ້ແມ່ນໜ້າທີ່ບໍ່ງ່າຍດາຍແຕ່ຢ່າງໃດ.
ທ່ານ Donald Trump ປະທານານິບໍດີຄົນທີ 45 ຂອງອາເມລິກາ |
ບັນດາສິ່ງທ້າທາຍດ້ານການຕ່າງປະເທດຊຶ່ງວົງການນັກໄຈ້ແຍກໄດ້ໃຫ້ຂ້ໍສັງເກດ ຈະກໍ່ຄວາມຫຍຸ້ງຍາກໃຫ້ແກ່ ປະທານານິບໍດີຄົນທີ 45 ຂອງອາເມລິກາ, ນັ້ນແມ່ນການແກ້ໄຂການພົວພັນກັບລັດເຊຍ, ຈີນ, ສະຫະພາບເອີລົບ, ບັນຫານິວເຄຼຍຂອງ ສ.ປ.ປ.ເກົາຫຼີ, ຊີຣີ, ບັນຫາການຄ້າເສລີ….
ແກ້ໄຂການພົວພັນກັບລັດເຊຍ, ຈີນ, ສະຫະພາບເອີລົບ
ສາຍພົວພັນກັບລັດເຊຍແມ່ນໜຶ່ງໃນບັນດາບັນຫາຈະເຮັດໃຫ້ທ່ານ Donald Trump ເຈັບຫົວ. ການພົວພັນລະຫວ່າງວໍຊິງຕັນ-ມົດສກູ ຍາມໃດກໍຖືກຕົກຢູ່ໃນສະພາບເຄັ່ງຕຶງນັບແຕ່ເວລາລັດເຊຍໂຮມແຫຼມ Crimea ເຂົ້າດິນແດນຂອງຕົນເມື່ອປີ 2014 ແລະ ອາເມລິກາໄດ້ກ່າວຫາລັດເຊຍໜູນຫຼັງແກ່ກຳລັງທວງເອົາເອກະລາດຢູ່ພາກຕາເວັນອອກຂອງຢູກະແຣນ. ນັບແຕ່ໄດ້ຮັບໄຊຊະນະໃນການເລືອກຕັ້ງ, ທ່ານ Donald Trump ໄດ້ສະແດງຄວາມຫວັງມາເປັນຫຼາຍຄັ້ງວ່າ ຢາກສ້າງສາຍພົວພັນ ອາເມລິກາ-ລັດເຊຍໃຫ້ອົບອຸ່ນຂຶ້ນ. ທ່ານ Donald Trump ໄດ້ແຕ່ງຕັ້ງທ່ານ Rex Tillerson ຊຶ່ງແມ່ນນັກທຸລະກິດມີການພົວພັນຢ່າງສະໜິດແໜ້ນກັບລັດເຊຍເປັນລັດຖະມົນຕີການຕ່າງປະເທດໃນອຳນາດການປົກຄອງໃໝ່. ສິ່ງນີ້ຍິ່ງເປັນການປັບປຸງເຈດຕະນາດີຢາກປົວແປງສາຍພົວພັນກັບລັດເຊຍຂອງອຳນາດການປົກຄອງຂອງທ່ານ Donald Trump.
ໃນສະພາວະທີ່ ອຳນາດການປົກຄອງຂອງທ່ານປະທານາທິບໍດີ Barack Obama ຫາກໍປະກາດບັນດາມາດຕະການລົງໂທດຢ່າງແຮງແນໃສ່ລັດເຊຍຊຶ່ງກ່ຽວຂ້ອງເຖິງການກ່າວຫາລັດເຊຍມົດສະກູແຊກແຊງເຂົ້າການເລືອກຕັ້ງ ປະທານານິບໍດີອາເມລິການັ້ນ, ປະທານາທິບໍດີຜູ້ໄຊຊະນະໃນການເລືອກຕັ້ງຂອງອາເມລີກາ Donald Trump ພັດຖະແຫຼງປະປ່ອຍໃຫ້ເປີດກໍລະນີຍົກເລີກຄຳສັ່ງລົງໂທດຖ້າຫາກມົດສະກູໜູນຊ່ວຍວໍຊິງຕັນໃນການສູ້ຮົບຕ້ານກໍ່ການຮ້າຍ ແລະ ບັນດາເປົ້າໝາຍທີ່ສຳຄັນອື່ນໆ. ແຕ່ທ່ານ Konstantin Kosachev ປະທານຄະນະກຳມາທິການສະພາສູງ ລັດເຊຍ ຖືວ່າ ລັດເຊຍບໍ່ຄວນຟ້າວຝັ່ງ, ຫາກຈຳເປັນຕ້ອງລະມັດລະວັງຕໍ່ຂໍ້ສະເໜີຂອງ Donald Trump.
ສຳລັບຈີນ, ປະທານານິບໍດີຄົນທີ 45 ຂອງອາເມລິກາຍັງຈະຕ້ອງປະເຊີນໜ້າກັບສິ່ງທ້າທາຍຫຼາຍຢ່າງກ່ຽວກັບເສດຖະກິດ, ການຄ້າ ແລະ ບັນດາໄພນາບຂູ່ຕໍ່ຄວາມປອດໄພທາງເຄືອຂ່າຍອິນເຕີເນັດ. ກ່ຽວກັບບັນຫາເສດຖະກິດ, ທ່ານ Donald Trump ເຄີຍຕຳໜິຕິຕຽນຈີນກໍ່ຄວາມຫຍຸ້ງຍາກໃຫ້ແກ່ບັນດາບໍລິສັດອາເມລິກາໃນການແກ່ງແຍ້ງ ແລະ ຈັດວາງອັດຕາພາສີສູງສຳລັບບັນດາຜະລິດຕະພັນທີ່ນຳເຂົ້າຈີນຈາກເອເມລິກາ. ທ່ານນາບຂູ່ວ່າ ຈະຈັດວາງອັດຕາພາສີນຳເຂົ້າ 45% ສຳລັບສິນຄ້າຂອງຈີນ. ແຕ່ສິ່ງນີ້ກໍບໍ່ແມ່ນງ່າຍດາຍເລີຍ. ຕາມສາດສະດາຈານ Anatol Lieven ສັງກັດມະຫາວິທະຍາໄລ Geogetown ແລ້ວ, ທ່ານ Donald Trump ຈະບໍ່ມີທາງເລືອກໃດອີກນອກເໜືອຈາກການສ້າງສາຍພົວພັນດ້ານການຄ້າໃໝ່ກັບຈີນເພື່ອປົກປ້ອງສິດຜົນປະໂຫຍດຂອງແຮງງານ ແລະ ບັນດາບໍລິສັດອາເມລິກາ. ໃນສະພາບທີ່ເສດຖະກິດຈີນພວມພັດທະນາຊັກຊ້າລົງ, ບັນຫານີ້ຍິ່ງປະສົບຄວາມຫຍຸ້ງຍາກ ແລະ ອຳນາດການປົກຄອງໃໝ່ຕ້ອງຍອມຮັບການຜ່ອນສັ້ນຜ່ອນຍາວບາງຢ່າງ. ໃນຂົງເຂດການເມືອງ, ເລື່ອງທ່ານ Donald Trump ກາຍເປັນປະທານານິບໍດີຄົນທຳອິດຂອງອາເມລິກາດຳເນີນການເຈລະຈາທາງໂທລະສັບກັບການນຳໄຕ້ຫວັນແຫ່ງປະເທດຈີນ ນັບແຕ່ປີ 1979 ເປັນຕົ້ນມາ ໄດ້ປະສົບກັບການຄັດຄ້ານຈາກຈີນ. Donald Trump ຍັງສະແດງການລະແວງສົງໄສຂະນະທີ່ຖືວ່າ ຈີນຍັງຄົງບໍ່ໃຫ້ການຮ່ວມມືກັບອາເມລິກາໃນບາງບັນຫາຄື: ເງິນຕາ, ສ.ປ.ປ. ເກົາຫຼີຫຼືຄວາມເຄັ່ງຕຶງຢູ່ທະເລຕາເວັນອອກ.
ບັນຫາຊີຣີ, ສ.ປ.ປ.ເກົາຫຼີ ແລະ ບັນດາຂໍ້ຕົກລົງຮ່ວມມື
ຂະນະທີ່ທ່ານ Donald Trump ກາຍເປັນຜູ້ນຳທຳນຽບຂາວ, ການປະທະກັນຢູ່ຊີຣີໄດ້ແກ່ຍາວໄປຮອດປີທີ 6. ທ່ານ Donald Trump ເຄີຍເຕື້ອງເຖິງກໍລະນີຈະຫຼຸດຜ່ອນການໜູນຫຼັງບັນດາກຸ່ມຝ່າຍຄ້ານຢູ່ຊີຣີ ແລະ ແທນທີ່ຈະສຸມໃສ່ດັບສູນອົງການກໍ່ການຮ້າຍລັດອິດສະລາມ IS ໂດຍອ້າງຊື່ເອງ. ບໍ່ພຽງແຕ່ເຊັ່ນນັ້ນ, ປະທານານິບໍດີຄົນທີ 45 ຂອງອາເມລິກາໄດ້ຍົກອອກຂໍ້ຕົກລົງກ່ຽວກັບວິທີສຳພັດກັບອຳນາດການປົກຄອງຂອງທ່ານປະທານານິບໍດີ Assad. ບັນດາຜູ້ຊ່ຽວຊານຖືວ່າ ອາດຈະແມ່ນວ່າ ທ່ານ Donald Trump ຈະຮັກສາບົດບາດການທະຫານຂອງອາເມລິກາຢູ່ຊີຣີຄືດັ່ງສະໄໝປະທານານິບໍດີອາເມລິກາ Barack Obama. ແຕ່ບາງເທື່ອ ທ່ານ Donald Trump ຈະແຊກແຊງເຂົ້າວິວັດການສ້າງສາຊີຣີຄືນໃໝ່. ນອກຈາກນັ້ນ, ທ່ານ Donald Trump ຍັງຕ້ອງແກ້ໄຂບັນດາຄວາມເປັນຫ່ວງກັງວົນຈາກບັນດາກໍລະນີທົດລອງນິວເຄຼຍ ແລະ ຍິງລູກສອນໄຟຂອງ ສ.ປ.ປ.ເກົາຫຼີໃນສະພາວະທີ່ຜູ້ຊ່ຽວຊານຫຼາຍທ່ານຖືວ່າ ນີ້ບໍ່ແມ່ນບັນຫາທີ່ທ່ານ Donald Trump ກຳບັນຫາຢ່າງຈະແຈ້ງ.
ດ້ວຍຄຳຂວັນ “ ປະເທດອາເມລິກາ ແມ່ນສຳຄັນເໜືອກ່ວາສິ່ງໃດໝົດ ”, ທ່ານ Donald Trump ໄດ້ຊອກຫາວິທີຖອນອອກຈາກບັນດາຂໍ້ຕົກລົງລະດັບພາກພື້ນ ແລະ ໂລກຊຶ່ງອາເມລິກາໄດ້ໃຫ້ຄຳໝັ້ນສັນຍາ. ນັບແຕ່ເມື່ອດຳເນີນບັ້ນຫາສຽງເລືອກຕັ້ງ, ທ່ານ Donald Trump ໄດ້ຖະແຫຼງຫຼາຍຄັ້ງ ຄັດຄ້ານບັນດາສັນຍາການຄ້າເສລີເພາະມັນເຮັດໃຫ້ຊາວອາເມລິກາຖືກວ່າງງານ. ໃນຂະນະທີ່ທ່ານ Donald Trump ຢືນຢັນ ອາເມລິກາຈະຖອນອອກຈາກສັນຍາຄູ່ຮ່ວມມືຂ້າມປາຊີຟິກ TPP ນັ້ນ, ທ່ານ Wilbur Ross ຜູ້ໄດ້ຮັບເລືອກເປັນລັດຖະມົນຕີການຄ້າອາເມລິກາ ຢືນຢັນວ່າ ສັນຍາການຄ້າເສລີອາເມລິກາເໜືອ (NAFTA) ກໍແມ່ນໜຶ່ງໃນບັນດາບຸລິມະສິດພິຈາລະນາທຳອິດຂອງລັດຖະບານໃໝ່. ແຕ່ບັນດາໜ້າທີ່ນີ້ຍັງຈະກໍ່ຜົນກະທົບເຖິງເສດຖະກິດອາເມລິກາ.
ໂດຍເຄີຍໄດ້ຮັບໄຊຊະນະຢ່າງກະທັນຫັນໃນການເລືອກຕັ້ງອາເມລິກາເມື່ອເດືອນ 11/2016 ນັ້ນ, ທ່ານ Donald Trump ຈະປະສົບຜົນສຳເລັດໃນການແກ້ໄຂບັນດາການພົວພັນກັບຕ່າງປະເທດໃນອາຍຸການ 4 ປີຂອງທ່ານຫຼືບໍ່. ເປັນທີ່ຈະແຈ້ງແລ້ວວ່າ ນີ້ແມ່ນໜ້າທີ່ບໍ່ງ່າຍດາຍສຳລັບຜູ້ນຳປະເທດທີ່ມີພື້ນຖານເສດຖະກິດເບີ 1 ຂອງໂລກ.