ຫວຽດນາມຫາກໍສິ້ນສຸດການເຄື່ອນໄຫວໃນຖານະບົດບາດເປັນສະມາຊິກສະພາສິດທິມະນຸດແຫ່ງສະຫະປະຊາຊາດອາຍຸການ 2014-2016. ຂີດໝາຍອັນເລິກເຊິ່ງຊຶ່ງຫວຽດນາມໄດ້ສ້າງຂຶ້ນໃນອາຍຸການນີ້, ແມ່ນການປະກອບສ່ວນຢ່າງມີປະສິດທິຜົນເຂົ້າໃນການຊຸກຍູ້ການເຈລະຈາ ແລະ ການຮ່ວມມືສາກົນໃນຂົງເຂດສິດທິມະນຸດ, ເພີ່ມທະວີລັກສະນະປະສິດທິຜົນ, ໂປ່ງໃສ ແລະ ດຸ່ນດ່ຽງໃນວຽກງານຂອງສະພາສິດທິມະນຸດແຫ່ງສະຫະປະຊາຊາດ. ໄລຍະທີ່ຈະມາເຖິງນີ້, ຫວຽດນາມຈະສືບຕໍ່ຜັນຂະຫຍາຍປະຕິບັດບັນດາຂໍ້ລິເລີ່ມຂອງສະພາສິດທິມະນຸດແຫ່ງສະຫະປະຊາຊາດ, ຊຸກຍູ້ການເຈລະຈາ ແລະ ການຮ່ວມມືໃນຂົງເຂດສິດທິມະນຸດ.
ກອງປະຊຸມຄັ້ງໜຶ່ງຂອງສະພາສິດທິມະນຸດແຫ່ງສະຫະປະຊາຊາດ(reuters) |
ວັນທີ 12/11/2013, ດ້ວຍບັດເຫັນດີ 184 ບັດໃນຍອດຈຳນວນ 192 ບັດຄະແນນ, ຫວຽດນາມໄດ້ຊະນະໃນການເລືອກຕັ້ງດ້ວຍບັດຄະແນນເຫັນດີສູງສຸດໃນຈຳນວນ 14 ປະເທດພາຄີໃໝ່ ແລະ ເປັນຄັ້ງທຳອິດໄດ້ກາຍເປັນສະມາຊິກສະພາສິດທິມະນຸດແຫ່ງສະຫະປະຊາຊາດ ອາຍຸການ 2014-2016. ເຫດການນີ້ມີຄວາມໝາຍສຳຄັນທີ່ສຸດໃນການຜັນຂະຫຍາຍນະໂຍບາຍການຕ່າງປະເທດເອກະລາດ, ເປັນເຈົ້າຕົນເອງ, ຕັ້ງໜ້າ, ເປັນເຈົ້າການເຊື່ອມໂຍງເຂົ້າກັບສາກົນຂອງຫວຽດນາມ.
ສະມາຊິກທີ່ເປັນເຈົ້າການ, ຕັ້ງໜ້າ ແລະ ມີຄວາມຮັບຜິດຊອບ
ເຖິງວ່າແມ່ນສະມາຊິກເປັນຄັ້ງທຳອິດເຂົ້າຮ່ວມ ສະພາສິດທິມະນຸດແຫ່ງສະຫະປະຊາຊາດກໍຕາມ, ແຕ່ຫວຽດນາມໄດ້ຕັ້ງໜ້າຢ່າງແທ້ຈິງ, ປັນເຈົ້າການ ແລະ ມີຄວາມຮັບຜິດຊອບ, ພ້ອມກັບບັນດາປະເທດພາຄີອື່ນແກ້ໄຂບັນສິ່ງທ້າທາຍລວມຂອງມວນມະນຸດໃນຂົງເຂດສິດທິມະນຸດເປັນຢ່າງດີ. ແຕ່ລະປີ, ຫວຽດນາມ ກໍລ້ວນແຕ່ເຂົ້າຮ່ວມກອງປະຊຸມສຸດຍອດປະຈຳປີຂອງສະພາສິດທິມະນຸດແຫ່ງສະຫະປະຊາຊາດ ເພື່ອຢັ້ງຢືນສານກ່ຽວກັບການປົກປ້ອງ ແລະ ຊຸກຍູ້ສິດທິມະນຸດຢູ່ຫວຽດນາມ ກໍຄືບັນດາການປະກອບສ່ວນຢ່າງມີຄວາມຮັບຜິດຊອບໃນການແກ້ໄຂບັນດາບັນຫາສິດທິມະນຸດໃນທ່ົວໂລກ. ພາບພົດຢ່າງຕັ້ງໜ້າຂອງຫວຽດນາມໄດ້ສະແດງອອກຜ່ານຄວາມເຂັ້ມງວດໃນການປະຕິບັດກົນໄກກວດກາປະຈຳໄລຍະໂດຍທົ່ວໄປ(UPR) ຊຶ່ງແມ່ນກົນໄກສຳຄັນທີ່ສຸດຂອງສະພາສິດທິມະນຸດແຫ່ງສະຫະປະຊາຊາດ. ຫວຽດນາມໄດ້ຮັບການຕີລາຄາສູງບໍ່ພຽງແຕ່ໃນວິວັດການກວດກາ, ລາຍງານ, ເຈລະຈາກັບບັນດາປະເທດກ່ຽວກັບສະພາບການສິດທິມະນຸດເທົ່ານັ້ນ, ຫາກຍັງໄດ້ຮັບການຕີລາຄາສູງໃນຄວາມເຂັ້ມງວດໃນການປະຕິບັດບັນດາຄຳໝັ້ນສັນຍາໂດຍຫວຽດນາມໄດ້ຍອມຮັບອີກດ້ວຍ. ຫວຽດນາມແບກຫາບບົດບາດເປັນຜູ້ປະສານງານຂອງອາຊຽນໃນສະພາສິດທິມະນຸດແຫ່ງສະຫະປະຊາຊາດ, ເປັນສະມາຊິກອັນຕັ້ງໜ້າຂອງກຸ່ມບັນດາປະເທດທີ່ມີທັດສະນະຮ່ວມ, ບັນດາກຸ່ມລະຫວ່າງພາກພື້ນກ່ຽວກັບສິດທິຄົນພິການ, ຜົນກະທົບຈາກການປ່ຽນແປງຂອງດິນຟ້າອາກາດກັບສິດທິມະນຸດ…ດ້ວຍຄວາມໄວ້ວາງໃຈຂອງບັນດາປະເທດໃນກຸ່ມອາຊີ-ປາຊີຟິກ, ຫວຽດນາມໄດ້ກາຍເປັນຕົວແທນຂອງພາກພື້ນໃນກຸ່ມປະຕິບັດງານກ່ຽວກັບສະພາບການ, ບ່ອນພິຈາລະນາໃບຄຳຮ້ອງກ່ຽວກັບສິດທິມະນຸດໂດບກຸ່ມປະຕິບັດຂັ້ນລຸ່ມຍື່ນສະເໜີ. ຫວຽດນາມ ກໍໄດ້ເຈລະຈາເປັນປະຈຳບົນຈິດໃຈສ້າງສັນ ແລະ ກົງໄປກົງມາກັບອົງການຂ້າຫຼວງໃຫຍ່, ບັນດານັກປະຖະກະຖາ, ຜູ້ຊ່ຽວຊານພິເສດຂອງສະພາສິດທິມະນຸດແຫ່ງສະຫະປະຊາຊາດເນື່ອງໂອກາດມາຢ້ຽມຢາມ ແລະ ເຮັດວຽກຢູ່ຫວຽດນາມ.
ເຊີດຊູການເຈລະຈາ ແລະ ຮ່ວມມື
ໃນວິວັດການເຂົ້າຮ່ວມສະພາສິດທິມະນຸດແຫ່ງສະຫະປະຊາຊາດ, ຫວຽດນາມເຊີດຊູທັດສະນະການເຈລະຈາ ແລະ ການຮ່ວມມື, ພ້ອມກັນສູ້ຊົນເພື່ອເປົ້າໝາຍຊຸກຍູ້ ແລະ ຮັບປະກັນສິດທິມະນຸດບົນພື້ນຖານການແລກປ່ຽນ, ເຄົາລົບຊຶ່ງກັນ ແລະ ກັນ. ຫວຽດນາມໄດ້ໝູນໃຊ້ບັນດາກົນໄກຕ່າງໆຂອງສະພາສິດທິມະນຸດຢ່າງຊຳນານງານເພື່ອຢັ້ງຢືນທັດສະນະນີ້. ຫວຽດນາມກຳນົດການຮັບປະກັນສິດທິມະນຸດ, ກ່ອນອື່ນໝົດແມ່ນຄວາມຮັບຜິດຊອບຂອງແຕ່ລະປະເທດ ແລະ ປະຊາຊົນຂອງແຕ່ລະປະເທດຈະຕັດສິນເອງກ່ຽວກັບມາດຕະການ ຮັບປະກັນສິດທິມະນຸດ, ສອດຄ່ອງກັບສະພາບເສດຖະກິດ, ປະຫວັດສາດ, ວັດທະນະທຳ, ສັງຄົມຂອງເຂົາເຈົ້າ.
ການເຈລະຈາ ແລະ ການຮ່ວມມືໄດ້ເປີດໂອກາດເພື່ອໃຫ້ຫວຽດນາມປະກອບສ່ວນຢູ່ໃນຫຼາຍຂົງເຂດທີ່ໄດ້ຮັບຄວາມສົນໃຈຂອງພາກພື້ນ ແລະ ບັນດາປະເທດພວມພັດທະນາ, ພິເສດແມ່ນໃນບັນດາຂົງເຂດຄື : ຮັບປະກັນສິດພັດທະນາ, ຕ້ານການໃຊ້ຄວາມຮຸນແຮງ ແລະ ການຈຳແນກປະພຶດ, ຕ້ານການຄ້າມະນຸດ, ຮັບປະກັນສິດທິເດັກ, ແມ່ຍິງ ແລະ ຄົນພິການ…ໃນອາຍຸການເປັນສະມາຊິກສະພາສິດທິມະນຸດ, ຫວຽດນາມໄດ້ເຂົ້າຮ່ວມຮຽບຮຽງມະຕິກ່ວາ 30 ສະບັບສຳລັບເນື້ອໃນເຫຼົ່ານັ້ນ, ອັນໄດ້ປະກອບວສ່ວນຍົກສູງລະດັບຄວາມຮັບຮູ້ລວມຂອງໂລກກ່ຽວກັບບັນດາຄຸນຄ່າສິດທິມະນຸດ.
ສືບຕໍ່ເດີນຕາມບັນດາຂໍ້ລິເລີ່ມກ່ຽວກັບສິດທິມະນຸດ
ເຖິງວ່າ ໄດ້ເຮັດສຳເລັດໜ້າທີ່ຢ່າງດີເດັ່ນໃນອາຍຸການເປັນສະມາຊິກສະພາສິດທິມະນຸດແຫ່ງສະຫະປະຊາຊາດກໍຕາມ, ແຕ່ໃນໄລຍະທີ່ຈະມາເຖິງນີ້, ຫວຽດນາມຍັງຈະສືບຕໍ່ເຂົ້າຮ່ວມປະກອບສ່ວນຢ່າງຕັ້ງໜ້າ, ແທດຈິງ ແລະ ມີຄວາມຮັບຜິດຊອບໃນບັນດາກົນໄກສິດທິມະນຸດແຫ່ງສະຫະປະຊາຊາດເວົ້າລວມ ແລະ ສະພາສິດທິມະນຸດເວົ້າສະເພາະ. ຕາມນັ້ນແລ້ວ, ຫວຽດນາມສືບຕໍ່ເຊີດຊູຈິດໃຈສົນທະນາ ແລະ ຮ່ວມມືໃນບັນຫາ ສິດທິມະນຸດ, ປະກອບສ່ວນເພີ່ມທະວີການພົວພັນຮ່ວມມື 2 ຝ່າຍກັບບັນດາປະເທດເພື່ອນມິດ, ບັນດາປະເທດຄູ່ຮ່ວມມື, ນັບທັງບັນດາປະເທດທີ່ມີທັດສະນະແຕກຕ່າງກັນກ່ຽວກັບ ສິດທິມະນຸດ…..ຫວຽດນາມຍັງສືບຕໍ່ເດີນຕາມບັນດາຂໍ້ລິເລີ່ມໂດຍຫວຽດນາມໄດ້ນຳສະເໜີຢູ່ ສະພາສິດທິມະນຸດແຫ່ງສະຫະປະຊາຊາດ, ກ່ຽວຂ້ອງເຖິງຄວາມມານະພະຍາຍາມຮັບມືກັບຜົນກະທົບຈາກການປ່ຽນແປງຂອງດິນຟ້າອາກາດ, ຮັບປະກັນສິດຂອງບັນດາກຸ່ມຄົນມີຄວາມສ່ຽງໄພສູງກ່ວາໝູ່, ປະຕິບັດບັນດາເປົ້າໝາຍພັດທະນາແບບຍືນຍົງ….
ປະຈຸບັນ, ຫວຽດນາມສຸມໃສ່ເຮັດສຳເລັດບົດບາດເປັນສະມາຊິກສະພາເສດຖະກິດ-ສັງຄົມແຫ່ງສະຫະປະຊາຊາດອາຍຸການ 2016-2018 ແລະ ສະພາບໍລິຫານງານ UNESCO ອາຍຸການ 2015-2019. ພ້ອມກັນນັ້ນ, ຫວຽດນາມກໍພວມມານະພະຍາຍາມຂົນຂວາຍການອອກສະໝັກຮັບເລືອກຕັ້ງເປັນສະມາຊິກບໍ່ປະຈຳສະພາຄວາມໝັ້ນຄົງ ສ.ປ.ຊ ອາຍຸການ 2020-2021. ໃນຈຸດເວລາທີ່ເໝາະສົມ, ຫວຽດນາມຈະພິຈາລະນະການເຂົ້າເປັນສະມາຊິກສະພາສິດທິມະນຸດແຫ່ງສະຫະປະຊາຊາດອີກສະໄໝໜຶ່ງ.