ວັນທີ 23/6, ສ.ປ.ປເກົາຫຼີ ໄດ້ປະກາດການທົດລອງຍິງລູກສອນໄຟນຳວິຖີໄລຍະກາງ Musudan ສຳເລັດຜົນ ແລະ ຖືວ່າ ມັນອາດຈະບຸກໂຈມຕີກຳລັງອາເມລິກາ, ນາບຂູ່ບັນດາປະເທດພັນທະມິດຂອງອາເມລິກາໃນພາກພື້ນ. ອີກເທື່ອໜຶ່ງ, ເຫດການນີ້ ໄດ້ພາໃຫ້ສະພາບການໃນພາກພື້ນເພີ່ມຄວາມເຄັ່ງຕຶງຂຶ້ນຕື່ມ ພ້ອມທັງເຮັດໃຫ້ຄວາມມານະພະຍາຍາມທຸກຢ່າງໃນການສ້າງແຫຼມເກົາຫຼີປອດນິວເຄຼຍຕົກເຂົ້າສູ່ສະພາບບໍ່ມີທາງອອກ.
2 ກໍລະນີ ທີ່ ສ.ປ.ປເກົາຫຼີຍິງລູກສອນໄຟໄດ້ປະຕິບັດຢູ່ນະຄອນທ່າກຳປັ່ນ Wonsan |
2 ກໍລະນີ ຍິງລູກສອນໄຟໄດ້ປະຕິບັດຢູ່ນະຄອນທ່າກຳປັ່ນ Wonsan. ກໍລະນີທຳອິດແມ່ນໄດ້ປະຕິບັດໃນເວລາ 5ໂມງ 58 ນາທີ່ຕາມເວລາທ້ອງຖິ່ນ, ແຕ່ບໍ່ປະສົບຜົນສຳເລັດ. ຫຼັງຈາກນັ້ນ 2 ຊົ່ວໂມງ ຄືໃນເວລາ 8 ໂມງ 5 ນາທີ່, ລູກສອນໄຟລູກທີ 2 ໄດ້ຖືກຍິງໄປ ແລະ ສາມາດບັນລຸໄລຍະຍິງ 150 ກິໂລແມັດ. ລູກສອນໄຟທີ່ພຽງຢາງຍິງໄປນັ້ນ ແມ່ນລູກສອນໄຟ Musadan, ຄາດວ່າມີໄລຍະຍິງເຖິງ 3000 ກິໂລແມັດ ຊຶ່ງສາມາດຍິງໄປເຖິງເກາະ Guam ຂອງອາເມລິກາຢູ່ເຂດມະຫາສະໝຸດປາຊີຟິກ. ສ.ປ.ປເກົາຫຼີໄດ້ຮັບຖືວ່າມີລູກສອນໄຟ Musadan ນັບ 10 ລູກ. ກໍລະນີຍິງລູກສອນໄຟນີ້ ກໍເປັນຂີດໝາຍທີ່ພຽງຢາງໄດ້ຍິງລູກສອນໄຟຄັ້ງທີ 5 ຢ່າງລຽນຕິດນັບແຕ່ຕົ້ນປີມາຮອດປະຈຸບັນ.
ຄວາມເຄັ່ງຕຶງພັດເພີ່ມຂຶ້ນ
ໃນຂະນະທີ່ການນຳ ສ.ປ.ປເກົາຫຼີ ທ່ານ Kim Jong – Un ໄດ້ຍ້ອງຍໍ 2 ກໍລະນີ ຍິງລູກສອນໄຟເມື່ອວັນທີ 22/6 ວ່າ ແມ່ນເຫດການໃຫຍ່ ເພື່ອເພີ່ມທະວີຄວາມສາມາດບຸກໂຈມຕີດ້ວຍນິວເຄຼຍຂອງ ສ.ປ.ປເກົາຫຼີ ນັ້ນ, ອາເມລິກາໄດ້ຄັດຄ້ານຢ່າງຮຸນແຮງຕໍ່ 2 ກໍລະນີຍິງລູກສອນໄຟດັ່ງກ່າວ ແລະ ຖືວ່າ ສ.ປ.ປເກົາຫຼີໄດ້ລະເມີດບັນດາມະຕິຂອງ ສ.ປ.ຊ, ຕາມນັ້ນແລ້ວ, ໄດ້ຫ້າມພຽງຢາງນຳໃຊ້ທຸກໆເຕັກໂນໂລຢີລູກສອນໄຟນຳວິຖີ. ຍີປຸ່ນ, ສ.ເກົາຫຼີໄດ້ຕັ້ງກອງທັບຂອງຕົນຢູ່ໃນສະພາບເຕືອນໄພ ແລະ ຕຳໜິຕິຕຽນ 2 ກໍລະນີຍິງລູກສອນໄຟໃນມໍ່ໆມານີ້ຂອງພຽງຢາງ ຈະເຮັດໃຫ້ເພີ່ມທະວີຄວາມມານະພະຍາຍາມທົ່ວໂລກເພື່ອຕ້ານໂຄງການອາວຸດຂອງສ.ປ.ປເກົາຫຼີ.
ການກະທຳດັ່ງກ່າວໄດ້ມີຂຶ້ນໃນຂະນະທີ່ສ.ປ.ປເກົາຫຼີຍັງພວມຮັບຜົນກະທົບຈາກຄຳສັ່ງເກືອດຫ້າມຂອງ ສ.ປ.ຊ ກ່ຽວກັບການພັດທະນາອາວຸດນິວເຄຼຍ, ນຳໃຊ້ເຕັກໂນໂລຢີລູກສອນໄຟນຳວິຖີ. ການທົດລອງຍິງລູກສອນໄຟນີ້ ຍັງສະແດງໃຫ້ເຫັນວ່າ ມາຮອດປະຈຸບັນ, ຄຳສັ່ງລົງໂທດສາກົນ ຍັງບໍ່ສົ່ງຜົນສະທ້ອນເຖິງຄວາມສາມາດຊື້ວັດຖຸດິບ ແລະ ເຕັກໂນໂລຢີທີ່ຈຳເປັນເພື່ອຜະລິດອາວຸດຂອງສ.ປ.ປເກົາຫຼີ. ທີ່ການເຈລະຈາກ່ຽວກັບການຮ່ວມມືໃນພາກພື້ນອາຊີຕາເວັນອອກສ່ຽງເໜືອຄັ້ງທີ 26 ຊຶ່ງຈັດຂຶ້ນຢູ່ປັກກິງປະເທດຈີນເມື່ອວັນທີ 26/6 ນັ້ນ, ບັນດາທູດພິເສດຂອງອາເມລິກາ, ສ.ເກົາຫຼີ ແລະ ຍີປຸ່ນໄດ້ກ່າວປະນາມຢ່າງຮຸນແຮງຕໍ່ການກະທຳເກາະຜິດຂອງສ.ປ.ປເກົາຫຼີ. ເມືອຕອບໂຕ້ຄືນ, ທູດພິເສດຂອງສ.ປ.ປເກົາຫຼີໄດ້ກ່າວປົກປ້ອງໂຄງການພັດທະນານິວເຄຼຍຂອງສ.ປ.ປເກົາຫຼີ ແລະ ຢືນຢັນວ່າ ພຽງຢາງຈະບໍ່ມີວັນປະລະອາວຸດລ້າງຜານ ເວັ້ນເສຍກໍລະນີທົ່ວໂລກປະລະ ອາວຸດນິວເຄຼຍ.
ການເຈລະຈາ 6 ຝ່າຍກ່ຽວກັບໂຄງການ ອາວຸດນິວເຄຼຍຂອງ ສ.ປ.ປເກົາຫຼີ ຖືກຕົກເຂົ້າສູ່ສະພາບບໍ່ມີທາງອອກ
ນັບແຕ່ຕົ້ນປີມາຮອດປະຈຸບັນ, ສ.ປ.ປເກົາຫຼີໄດ້ ຍິງລູກສອນໄຟຢ່າງລຽນຕິດ, ພິເສດມີຄວາມສົນໃຈເຖິງ ລູກສອນໄຟ Musadan ຊຶ່ງມີໄລຍະຍິງ 3000-5500 ກິໂລແມັດ. ໃນເດືອນ 5 ທີ່ຜ່ານມາ, ປະເທດນີ້ໄດ້ປະຕິບັດການທັດລອງຍິງລູກສອນໄຟ Musadan ເປັນຄັ້ງທີ 4, ແຕ່ບໍ່ປະສົບຜົນສຳເລັດ. ໃນທ້າຍເດືອນ 4 ແລ້ວນີ້, 2 ກໍລະນີຍິງ ລູກສອນໄຟ Musadan ກໍຖືກປະລາໄຊ. ກ່ອນໜ້ານັ້ນ, ໃນໂອກາດສະເຫຼີມສະຫຼອງວັນຄ້າຍວັນເກີດຂອງຜູ້ນຳທີ່ຍິ່ງໃຫຍ່ຂອງ ສ.ປ.ປເກົາຫຼີ ທ່ານ Kim Il-sung, ສ.ປ.ປເກົາຫຼີກໍທົດລອງຍິງລູກສອນໄຟ ແຕ່ກໍບໍ່ປະສົບຜົນສຳເລັດ.
ຕາມວົງການນັກໄຈ້ແຍກແລ້ວ, ເລື່ອງພຽງຢາງໄດ້ດຳເນີນ ຍິງລູກສອນໄຟຢ່າງລຽນຕິດນັ້ນ ແມ່ນຍ້ອນຫຼາຍສາຍເຫດ, ໃນນັ້ນກໍບໍ່ເວັ້ນເສຍກໍລະນີປະສົບກັບສິ່ງທ້າທາຍທາງດ້ານການເງິນ. ແລະ ການຍິງລູກສອນໄຟຂອງພຽງຢາງ ເບິ່ງຄືວ່າ ແມ່ນມາດຕະການເພື່ອແນໃສ່ດຶງດູດຄວາມສົນໃຈຄັ້ງໃໝ່ຂອງປະຊາຄົມໂລກ ຊຶ່ງພຽງຢາງໄດ້ເລືອກເຟັ້ນ. ຕາມຂໍ້ສັງເກດຂອງວົງການນັກສັງເກດການແລ້ວ, ການພັດທະນາລູກສອນໄຟ ກໍມີຄວາມໝາຍເຊັ່ນດຽວກັນກັບການພັດທະນາອາວຸດນິວເຄຼຍ. ອາວຸດນິວເຄຼຍໄດ້ສ້າງກຳລັງແຮງໃຫ້ພຽງຢາງໃນການຜ່ອນສັ້ນຜ່ອນຍາວກັບສາກົນ.
ມາຮອດປະຈຸບັນ, ຫາງສຽງໄດ້ຕັ້ງຄຳຖາມກ່ຽວກັບປະສິດທິຜົນຂອງບັນດາມາດຕະການລົງໂທດຂອງສະພາຄວາມໝັ້ນຄົງ ສ.ປ.ຊ ທີ່ແນໃສ່ ສ.ປ.ປເກົາຫຼີ. ເບິ່ງຄືວ່າ ມາດຕະການເຫຼົ່ານັ້ນ ບໍ່ສາມາດເຮັດໃຫ້ເຈດຈຳນົງພັດທະນາອາວຸດນິວເຄຼຍຂອງພຽງຢາງຢຸດຕິລົງ. ອາເມລິກາ, ສເກົາຫຼີ ແລະ ຍີປຸ່ນຫວັງຊຸກຍູ້ບັນດາມາດຕະການທີ່ແຂງກະດ້າງກວ່າ ແນໃສ່ຈຳກັດການເຄື່ອນໄຫວດ້ານການເງິນ ແລະ ແຫຼ່ງກຳລັງຂອງ ສ.ປ.ປເກົາຫຼີ. ໃນຂະນະນັ້ນ, ລັດເຊຍ ແລະ ຈີນຫວັງຢາກຊອກຫາວິທີແກ້ໄຂດ້ວຍຄວາມອ່ອນຍົນກວ່າ.
ຈາກສະພາບການໃນປະຈຸບັນ, ເບິ່ງຄືວ່າ ຍາກທີ່ຈະຝາກຄວາມຫວັງຕໍ່ວິທີການແກ້ໄຂ ແນໃສ່ຫຼຸດຜ່ອນຄວາມເຄັ່ງຕຶງໃນແຫຼມເກົາຫຼີ.