(vovworld) - ໃນຊຸມປີຜ່ານມາ, ຂະແໜງທ່ອງທ່ຽວຫວຽດນາມ ໄດ້ມີບັນດາບາດກ້າວພັດທະນາຢ່າງຈະແຈ້ງ ແລະ ບັນລຸໄດ້ບັນດາຜົນງານທີ່ສຳຄັນເປັນໜ້າສົ່ງເສີມ. ເຖິງຢ່າງໃດກໍ່ຕາມ, ເມື່ອທຽບໃສ່ຄວາມສາມາດບົ່ມຊ້ອນທີ່ມີຢູ່ແລ້ວ, ຂະແໜງທ່ອງທ່ຽວຫວຽດນາມ ຍັງບໍ່ທັນນຳໃຊ້ບັນດາທ່າແຮງຂອງຕົນໄດ້ໝົດເທື່ອ ເພື່ອກາຍເປັນຂະແໜງເສດຖະກິດມີການປະກອບສ່ວນຢ່າງໃຫຍ່ຫຼວງເຂົ້າໃນການພັດທະນາຂອງປະເທດຊາດ. ຫວ່າງແລ້ວນີ້, ກົມການເມືອງຄະນະບໍລິຫານງານສູນກາງພັກກອມມູນິດຫວຽດນາມ ໄດ້ປະກາດໃຊ້ມະຕິເລກທີ 08, ລົງວັນທີ 16/01 ກ່ຽວກັບການພັດທະນາຂະແໜງທ່ອງທ່ຽວໃຫ້ກາຍເປັນຂະແໜງເສດຖະກິດປາຍແຫຼມຂອງປະເທດຊາດ, ໄດ້ເປີດທິດທາງພັດທະນາແບບຍືນຍົງໃຫ້ແກ່ຂະແໜງທ່ອງທ່ຽວຫວຽດນາມ. ບົດຂຽນຂອງນັກຂ່າວ ຢ້ຽວລິງ.
15 ປີຜ່ານມາ (2001 - 2016), ຂະແໜງທ່ອງທ່ຽວຫວຽດນາມ ໄດ້ຮັບການພັດທະນາຢ່າງແຮງ, ປະກອບສ່ວນຊຸກຍູ້ການຫັນປ່ຽນໂຄງປະກອບເສດຖະກິດ, ຍູ້ແຮງວິວັດທະນາການເຊື່ອມໂຍງກັບສາກົນ, ໂຄສະນາພາບພົດປະເທດຊາດ ແລະ ຊາວຫວຽດນາມ. ເພາະສະນັ້ນ, ມະຕິຂອງພັກກອມມູນິດຫວຽດນາມ ໄດ້ວາງຄາດໝາຍນຳການທ່ອງທ່ຽວຫວຽດນາມ ມຸ່ງໄປເຖິງຂະແໜງອາຊີບເທື່ອລະກ້າວ, ມີລະບົບພື້ນຖານດ້ານເຕັກນິກຢ່າງຄົບຊຸດ, ທັນສະໄໝເທື່ອລະກ້າວ; ຜະລິດຕະພັນທ່ອງທ່ຽວມີຄຸນນະພາບສູງ, ຫຼາຍຮູບຫຼາຍແບບ, ມີເຄື່ອງໝາຍການຄ້າ, ເຂັ້ມຂົ້ນໄປດ້ວຍສີສັນວັດທະນະທຳຂອງຊາດ, ສາມາດແກ່ງແຍ້ງກັບບັນດາປະເທດໃນພາກພື້ນໄດ້.
ປີ 2020, ຂະແໜງທ່ອງທ່ຽວຫວຽດນາມ ວາງອອກຄາດໝາຍບັນລຸລາຍຮັບ 30 ຕື້ USD.
ຄາດໝາຍລະອຽດຂອງຫວຽດນາມ ແມ່ນຮອດປີ 2020, ດຶງດູດນັກທ່ອງທ່ຽວສາກົນໃຫ້ໄດ້ແຕ່ 17 – 20 ລ້ານເທື່ອຄົນ, ນັກທ່ອງທ່ຽວພາຍໃນປະເທດ 82 ລ້ານເທື່ອຄົນ, ປະກອບເຂົ້າ GDP ໄດ້ກ່ວາ 10%; ຍອດລາຍຮັບຈາກນັກທ່ອງທ່ຽວບັນລຸແມ່ນ 35 ຕື້ USD; ມູນຄ່າສົ່ງອອກຜ່ານການທ່ອງທ່ຽວບັນລຸ 20 ຕື້ USD; ສ້າງວຽກເຮັດງານທຳໃຫ້ 4 ລ້ານຄົນ, ໃນນັ້ນມີ 1,6 ລ້ານຄົນເຮັດວຽກໂດຍກົງ. ສູ້ຊົນຮອດປີ 2030, ຂະແໜງທ່ອງທ່ຽວຈະກາຍເປັນຂະແໜງເສດຖະກິດປາຍແຫຼມຢ່າງແທ້ຈິງ, ຊຸກຍູ້ການພັດທະນາຂອງບັນດາຂະແໜງ, ຂົງເຂດອື່ນໆຢ່າງແຮງ, ນຳຫວຽດນາມ ເຂົ້າກຸ່ມບັນດາປະເທດມີຂະແໜງເສດຖະກິດຂຽວພັດທະນາແຖວໜ້າຢູ່ພາກພື້ນອາຊີຕາເວັນອອກສ່ຽງໃຕ້. ທ່ານ ຫງວຽນວັນຕ໋ວນ, ຫົວໜ້າກົມໃຫຍ່ທ່ອງທ່ຽວຫວຽດນາມ, ໃຫ້ຮູ້ວ່າ.
“ມະຕິເລກທີ 08 ແມ່ນເອກະສານມີຄວາມໝາຍສຳຄັນສຳລັບການພັດທະນາຂອງຂະແໜງທ່ອງທ່ຽວ. ນີ້ແມ່ນຂີດໝາຍພິເສດໃນປະຫວັດສາດການພັດທະນາຂອງຂະແໜງທ່ອງທ່ຽວຫວຽດນາມ ຍ້ອນນີ້ເປັນຄັ້ງທຳອິດຂະແໜງທ່ອງທ່ຽວມີມະຕິຂອງກົມການເມືອງ. ດ້ວຍທັດສະນະທີ່ເຂັ້ມແຂງ, ບັນດາເນື້ອໃນ ແລະ ຄາດໝາຍໃຫຍ່ ພ້ອມກັບລະບົບບັນດາມາດຕະການແກ້ໄຂຢ່າງຮອບດ້ານ, ຄົບຖ້ວນ, ມະຕິໄດ້ສະແດງຄວາມຕັດສິນໃຈຂອງຫວຽດນາມ ສ້າງບາດກ້າວພັດທະນາໃໝ່ໃຫ້ຂະແໜງທ່ອງທ່ຽວ ບົນເສັ້ນທາງກາຍເປັນຂະແໜງເສດຖະກິດປາຍແຫຼມ.”
ເຮັດໃຫ້ບັນດານະໂຍບາຍປະກົດຜົນເປັນຈິງໃນຊີວິດການເປັນຢູ່.
ຊັບພະຍາກອນທ່ອງທ່ຽວຫວຽດນາມ ໄດ້ຮັບການຕີລາຄາວ່າແມ່ນເຕັມໄປດ້ວຍຄວາມສາມາດບົ່ມຊ້ອນ ເມື່ອຖືກຈັດອັນດັບທີ 21/141 ປະເທດ, ແຕ່ຂະແໜງທ່ອງທ່ຽວຫວຽດນາມ ພັດຢືນອັນດັບທີ 75/141 ພື້ນຖານເສດຖະກິດ ກ່ຽວກັບກຳລັງຄວາມສາມາດແກ່ງແຍ້ງທ່ອງທ່ຽວໃນທົ່ວໂລກ. ເພາະສະນັ້ນ, ແຜນນະໂຍບາຍຂອງກົມການເມືອງ ກ່ຽວກັບການພັດທະນາການທ່ອງທ່ຽວ ໄດ້ຮັບຖືວ່າແມ່ນ “ກຳຫຼັງໜູນ” ອັນໃຫຍ່ຫຼວງໃຫ້ແກ່ຂົງເຂດນີ້, ພ້ອມທັງວາງອອກບາງໜ້າທີ່, ມາດຕະການແກ້ໄຂ ຄື: ປ່ຽນໃໝ່ຄວາມຮັບຮູ້ ແລະ ຈິນຕະນາການ ກ່ຽວກັບການພັດທະນາການທ່ອງທ່ຽວ; ສ້າງໂຄງປະກອບຂະແໜງທ່ອງທ່ຽວຄືນໃໝ່ຮັບປະກັນລັກສະນະອາຊີບ, ທັນສະໄໝ ແລະ ພັດທະນາແບບຍືນຍົງຕາມກົດເກນຂອງເສດຖະກິດການຕະຫຼາດ ແລະ ການເຊື່ອມໂຍງເຂົ້າກັບສາກົນ. ໃນນັ້ນ, ສຸມໃສ່ປັບປຸງລະບອບ, ນະໂຍບາຍກ່ຽວກັບການພັດທະນາການທ່ອງທ່ຽວ; ພັດທະນາພື້ນຖານໂຄງລ່າງ ແລະ ພື້ນຖານວັດຖຸເຕັກນິກ; ເພີ່ມທະວີການສົ່ງເສີມ, ໂຄສະນາການທ່ອງທ່ຽວ; ສ້າງສະພາບແວດລ້ອມທີ່ສະດວກໃຫ້ວິສາຫະກິດ ແລະ ປະຊາຄົມພັດທະນາການທ່ອງທ່ຽວ ແລະ ເອົາໃຈໃສ່ເປັນພິເສດເຖິງການພັດທະນາແຫຼ່ງຊັບພະຍາກອນມະນຸດດ້ານການທ່ອງທ່ຽວ… ທ່ານ ຫງວຽນວັນຕ໋ວນ, ຫົວໜ້າກົມໃຫຍ່ທ່ອງທ່ຽວຫວຽດນາມ, ໃຫ້ຮູ້ຕື່ມອີກວ່າ.
“ໜຶ່ງໃນບັນດາທັດສະນະບຸກທະລຸຢ່າງແຮງຂອງແຜນນະໂຍບາຍນີ້ ນັ້ນແມ່ນຂະແໜງທ່ອງທ່ຽວເປັນຂະແໜງເສດຖະກິດສັງລວມ, ເຊື່ອມຕໍ່ລະຫວ່າງຂະແໜງ, ລະຫວ່າງເຂດ ແລະ ຫັນເປັນສັງຄົມສູງ, ມີເນື້ອໃນວັດທະນະທຳຢ່າງເລິກເຊິ່ງ. ສະນັ້ນ, ພັດທະນາການທ່ອງທ່ຽວແມ່ນໜ້າທີ່ຂອງທັງລະບົບການເມືອງ, ຂອງທຸກຂັ້ນ, ທຸກຂະແໜງການ, ຂອງທົ່ວສັງຄົມ, ໃນນັ້ນ, ບົດບາດຂອງປະຊາຄົມວິສາຫະກິດ ແລະ ປະຊາຄົມຊຸມຊົນທ້ອງຖິ່ນແມ່ນມີຄວາມສຳຄັນທີ່ສຸດ. ບັນຫາສຳຄັນທີ່ສຸດແມ່ນຕ້ອງນຳບັນດາແຜນນະໂຍບາຍ, ນະໂຍບາຍເຂົ້າສູ່ຊີວິດຕົວຈິງ ແລະ ຢາກນຳເຂົ້າຊີວິດການເປັນຢູ່ໃຫ້ໄດ້ນັ້ນ ບັນດາອົງການຈັດຕັ້ງຕ້ອງສະແດງຄວາມຮັບຜິດຊອບຂອງຕົນໃນລະດັບສູງສຸດ”.
ຄາດວ່າ, ໃນເດືອນ 04 ຈະມາເຖິງ, ກະຊວງວັດທະນະທຳ, ກິລາ ແລະ ທ່ອງທ່ຽວຈະສ້າງຮ່າງໂຄງການດຳເນີນງານຂອງລັດຖະບານກ່ຽວກັບການພັດທະນາການທ່ອງທ່ຽວໃຫ້ສຳເລັດ, ເພື່ອຍື່ນສະເໜີຕໍ່ທ່ານນາຍົກລັດຖະມົນຕີ ພິຈາລະນາ ແລະ ປະກາດໃຊ້. ໂຄງການດຳເນີນງານໄດ້ກຳນົດຢ່າງຈະແຈ້ງໜ້າທີ່, ຫັນແນວທາງເປັນລະອຽດ, ນອກນັ້ນຈະອີງໃສ່ສະພາບຕົວຈິງຂອງແຕ່ລະທ້ອງຖິ່ນ, ຄະນະ, ຂະແໜງການ ເພື່ອມອບໜ້າທີ່ລະອຽດ. ພິເສດແມ່ນເອົາໃຈໃສ່ເປັນພິເສດເຖິງການ “ປ່ຽນໃໝ່ຄວາມຮັບຮູ້ຈິນຕະນາການກ່ຽວກັບການພັດທະນາການທ່ອງທ່ຽວ”, ຍູ້ແຮງວຽກງານໂຄສະນາ, ຍົກສູງຄວາມຮັບຮູ້ຂອງສັງຄົມ, ປະຊາຊົນກ່ຽວກັບການພັດທະນາການທ່ອງທ່ຽວ.