(vovworld)- ສືບຕໍ່ການຢ້ຽມຢາມປະເທດເອີລົບ ຈຳນວນຫນຶ່ງຢ່າງເປັນທາງການ, ວັນທີ 18/10, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ຈະໄປຢ້ຽມຢາມ ສຳນັກ ວາຕີກັງ ຢ່າງເປັນທາງການ ຕາມຄຳເຊີນຂອງ ສັນຕະປາປາ Francis. ບົນພື້ນຖານການພົວພັນອັນດີງາມລະຫວ່າງ ຫວຽດນາມ ແລະ ວາຕີກັງ ໃນຊຸມປີມໍ່ໆມານີ້, ການຢ້ຽມຢາມ ສຳນັກ ວາຕີກັງ ຂອງທ່ານນາຍົກລັດຖະມົນຕີ ຫງວຽນເຕີນຢູງ ຄັ້ງນີ້ ຈະສ້າງພື້ນຖານໃຫ້ແກ່ການພົວພັນທາງການທູດລະຫວ່າງ ຫວຽດນາມ ແລະ ວາຕີກັງ ໃຫ້ໝັ້ັ້ນແກ່ນກວ່າໃນໄລຍະຈະມາເຖິງ.
ແຈ້ງການຂອງສຳນັກ ວາຕີກັງ ກ່ອນການຢ້ຽມຢາມ ໄດ້ເນັ້ນຫນັກວ່າ: ສັນຕະປາປາ Francis ແລະ ທ່ານນາຍົກລັດຖະມົນຕີ ຫງວຽນເຕີນຢູງ ຈະມີການພົບປະ ໃນວັນທີ 18/10, ແລກປ່ຽນຫລາຍມາດຕະການຊຸກຍູ້ການພົວພັນສອງຝ່າຍກໍຄືບັນດາບັນຫາສາກົນຊື່ງຕ່າງຝ່າຍຕ່າງມີຄວາມສົນໃຈ. ການພົບປະຄັ້ງນີ້ ພ້ອມກັບການພົບປະສອງຝ່າຍຄັ້ງຕ່າງໆໃນຊຸມປີມໍ່ໆມານີ້ ແນ່ນອນວ່າ ຈະສ້າງພື້ນຖານອັນໝັັ້ນຄົງໃຫ້ແກ່ການພົວພັນທາງການທູດລະຫວ່າງ ຫວຽດນາມ ແລະ ວາຕີກັງ.
ທ່ານ Federico Lombardi, ໂຄສົກສຳນັກ ວາຕີກັງ
ພາບ:hanoimoi.com.vn
|
ການເຈລະຈາແມ່ນພື້ນຖານສ້າງ ແລະ ພັດທະນາການພົວພັນລະຫວ່າງຫວຽດນາມ ແລະ ວາຕີກັງ
ຫວນຄືນການພົວພັນລະຫວ່າງ ຫວຽດນາມ ແລະ ວາຕີກັງ ນັບແຕ່ເມື່ອປີ 1990 ຂອງສັດຕະວັດທີ XX ມາຮອດປະຈຸບັນ ອາດຈະຢືນຢັນໄດ້ວ່າ ວິວັດການເຈລະຈາ ໄດ້ປະກອບສ່ວນສຳຄັນໃນການພັດທະນາການພົວພັນລະຫວ່າງ ຫວຽດນາມ ແລະ ວາຕີກັງ ເທື່ອລະກ້າວ. ການເຈລະຈາບົນພື້ນຖານເຄົາລົບບັນດາຂໍ້ຕົກລົງມີລັກສະນະຫລັກການ ຊື່ງສອງຝ່າຍຖືເປັນສຳຄັນ ໄດ້ສ້າງຄວາມເຂົ້າອົກເຂົ້າໃຈເຊິ່ງກັນ ແລະກັນ ຈາກນັ້ນ ສອງຝ່າຍຊອກໄດ້ບັນດາຄວາມເຫັນດີເຫັນພ້ອມ ແລະ ພ້ອມກັນຊຸກຍູ້ການພົວພັນສອງຝ່າຍເພື່ອຜົນປະໂຫຍດລວມກໍຄືຂອງແຕ່ລະຝ່າຍ.
ຂີດໝາຍສຳຄັນຂອງການພົວພັນລະຫວ່າງ ຫວຽດນາມ ແລະ ວາຕີກັງ ແມ່ນການພົບປະລະຫວ່າງທ່ານ ນາຍົກລັດຖະມົນຕີ ຫງວຽນເຕີນຢູງ ກັບສັນຕະປາປາ Benedicto XVI ໃນວັນທີ 25/1/2007 ທີ່ ສຳນັກ ວາຕີກັງ. ການພົບປະຄັ້ງນີ້ໄດ້ຢືນຢັນນະໂຍບາຍການຕ່າງປະເທດອັນຖືກຕ້ອງ ແລະ ຈະແຈ້ງຂອງລັດຫວຽດນາມ, ເປັນຂີດໝາຍໝາກຜົນຂອງວິທີການເຈລະຈາ ຊື່ງທັງສອງຝ່າຍໄດ້ພ້ອມກັນສະແດງຄວາມຮັບຜິດຊອບ ນັບແຕ່ປີ 1990 ໃນການພົບປະຄັັ້ງທຳອິດ ແລະ ການຫັນປ່ຽນກ່ຽວກັບການພົວພັນ, ເຮັດໃຫ້ສອງຝ່າຍຫຍັບມໍ່ໃກ້ກັນກວ່າ. ທີ່ການພົບປະຄັ້ງນີ້, ນາຍົກລັດຖະມົນຕີ ຫງວຽນເຕີນຢູງ ໄດ້ຢືນຢັນ: “ລັດຖະບານຫວຽດນາມ ຍາມໃດກໍຖືການພົວພັນກັບ ສຳນັກວາຕີກັງເປັນສຳຄັນ. ລັດຖະບານຫວຽດນາມ ມີແຜນນະໂຍບາຍສືບຕໍ່ວິວັດການເຈລະຈາໂດຍກົງກັບສຳນັກ ວາຕີກັງ ບົນພື້ນຖານບັນດາຫລັກການ ຊື່ງສອງຝ່າຍໄດ້ເຫັນດີເປັນເອກະສັນກັນ ນັ້ັ້ັ້ນແມ່ນເຄົາລົບເຊິ່ງກັນ ແລະກັນ, ບໍ່ແຊກແຊງເຂົ້າວຽກງານພາຍໃນຂອງກັນ. ຫວຽດນາມ ປາດຖະຫນາຢາກ ສຳນັກວາຕີກັງ ມີສຽງເວົ້າສົ່ງເສີມປະຊາຄົມກາໂຕລິກ ຫວຽດນາມ ຍາມໃດກໍຕິດພັນກັບປະເທດຊາດ, ເປັນພື້ນຖານໃຫ້ແກ່ການພັດທະນາການພົວພັນລະຫວ່າງ ຫວຽດນາມ ແລະ ສຳນັກວາຕີກັງ”.
ຕໍ່ຈາກນັ້ນ, ວັນທີ 11/12/2009, ອະດີດປະທານປະເທດຫວຽດນາມ ຫງວຽນມີງຈຽດ ໄດ້ມີການພົບປະແລກປ່ຽນຄຳເຫັນກັບສັນຕະປາປາ Benedicto XVI ຢູ່ ວາຕີກັງ. ນີ້ໄດ້ຮັບຖືວ່າ ແມ່ນການຢ້ຽມຢາມຄັ້ງປະຫວັດສາດໃນການພົວພັນລະຫວ່າງສອງຝ່າຍ ແລະ ໄດ້ຮັບການຕີລາຄາສູງຈາກຫາງສຽງ. ແຈ້ງການຫນັງສືພິມຂອງສຳນັກວາຕີກັງ ຊີ້ແຈ້ງວ່າ: “ສຳນັກວາຕີກັງ ສະແດງຄວາມພຶງພໍໃຈຕໍ່ການຢ້ຽມຢາມ. ນີ້ແມ່ນບາດກ້າວມີຄວາມໝາຍສຳລັບການພັດທະນາສອງຝ່າຍລະຫວ່າງ ຫວຽດນາມກັບ ສຳນັກວາຕີກັງ.”
ສ້າງກົນໄກຊຸກຍູ້ການຮ່ວມມືສອງຝ່າຍ
ພາຍຫລັງການຢ້ຽມຢາມທີ່ມີລັກສະນະບາດລ້ຽວຂອງອະດີດປະທານປະເທດ ຫງວຽນມີງຈຽດ, ສອງຝ່າຍໄດ້ເຫັນດີຊຸກຍູ້ການພົວພັນສອງຝ່າຍ ດ້ວຍການສ້າງຕັ້ງກກຸ່ມຜູ້ຊ່ຽວຊານປະສົມຂອງແຕ່ລະຝ່າຍ ໂດຍທ່ານຮອງລັດຖະມົນຕີການຕ່າງປະເທດເປັນຫົວຫນ້າຄະນະ. ນັບແຕ່ນັ້ນມາຮອດປະຈຸບັນ, ບັນດາການເຈລະຈາໝູນວຽນໄດ້ຮັບການຈັດຂຶ້ນຢູ່ແຕ່ລະຝ່າຍປະຈຳປີ. ບົນຈິດໃຈກົງໄປກົງມາ, ເປີດເຜີຍ, ບັນດການເຈລະຈາ ໄດ້ແກ້ໄຂຫລາຍບັນຫາຄື: ແຕ່ງຕັ້ງບຸກຄະລາກອນໃຫ້ແກ່ສຳນັກສັງຄະລາດຢູ່ຫວຽດນາມ, ສ້າງຕັ້ງເຂດຊາວ ຄຼິດໃຫມ່, ການໄປຮຽນຂອງນັກບວດ, ຄູນພໍ່ຢູ່ຕ່າງປະເທດ ແລະ ເລື່ອງສະມາຄົມຄິດທະສາສະຫນາ ຫວຽດນາມ ເຊີນອົງການຫລືສ່ວນບຸກຄົນຊາວຄິດຈາກຕ່າງປະເທດເຂົ້າຫວຽດນາມ ເພື່ອເຄື່ອນໄຫວດ້ານສາສະຫນາ. ບັນດາການເຄື່ອນໄຫວແລກປ່ຽນ, ພົບປະລະຫວ່າງ ຫວຽດນາມ ແລະ ວາຕີກັງ ດຳເນີນໄປເປັນປະຈຳກວ່າ. ໃນການຢ້ຽມຢາມ ແລະ ເຮັດວຽກຄັ້ງຕ່າງໆນັ້ນ ຝ່າຍວາຕີກັງ ໄດ້ຮັບການຕ້ອນຮັບຢ່າງສົມກຽດຈາກບັນດາອົງການກ່ຽວຂ້ອງແຕ່ຂັັ້ນສູນກາງຕະຫລອດຮອດທ້ອງຖິ່ນຂອງຫວຽດນາມ ກໍຄື ບັນດາຝ່າຍສາສະນິກະຊົນ, ຍົດຖາບັນດາສັກ. ຜ່ານນັ້ນ ວາຕີກັງ ມີຄວາມເຂົ້າໃຈກ່ຽວກັບສະມາຄົມຄິດທະສາສະຫນາຫວຽດນາມ, ກ່ຽວກັບປະເທດຊາດ, ຊາວຫວຽດນາມ, ປະຫວັດສາດ, ວັດທະນະທຳຂອງຫວຽດນາມ ກວ່າ. ການພົວພັນລະຫວ່າງຫວຽດນາມ ແລະ ສຳນັກວາຕີກັງ ນັບມື້ນັບໄດ້ຮັບການປັບປຸງ ສະນັ້ນຕ້ອງມີເຈດຕະນາດີໃນການເຈລະຈາ ແລະ ວຽກງານຕົວຈິງ.
ນະໂຍບາຍສະເຫມີຕົ້ນສະເຫມີປາຍກ່ຽວກັບສິດເສລີໃນການເຊື່ອຖືສາສະຫນາຂອງຫວຽດນາມ
ອາດຈະຢືນຢັນໄດ້ວ່າ ແຕ່ກອ່ນມາຮອດປະຈຸບັນ, ຍາມໃດຫວຽດນາມ ກໍປະຕິບັດນະໂຍບາຍສະເຫມີຕົ້ນສະເຫມີປາຍໃນການເຄົາລົບ ແລະ ຮັບປະກັນສິດເສລີໃນກການເຊື່ອຖື, ການເຫລື້ອມໃສສາສະຫນາຂອງປະຊາຊົນ. ນະໂຍບາຍສິດເສລີໃນການເຊື່ອຖືສາສະຫນານັ້ນ ໄດ້ຮັບການກວດຢັ້ງຢືນຈາກຜູ້ຕາງຫນ້າສຳນັກ ວາຕີກັງ ເມື່ອມາຢ້ຽມຢາມ ແລະເຮັດວຽກຢູ່ຫວຽດນາມ ໃນກວ່າ 20 ປີຜ່ານມາ. ທີ່ກອງປະຊຸມຄັ້ງທີ 5 ກຸ່ມວຽກງານປະສົມ ຫວຽດນາມ - ສຳນັກວາຕີກັງ ດຳເນີນໄປຢູ່ຮ່າໂນ້ຍ ເມື່ອເດືອນ 9 ຜ່ານມາ, ທ່ານ Antoine Camilleri, ຮອງລັດຖະມົນຕີການຕ່າງປະເທດ ສຳນັກວາຕີກັງ, ຫົວຫນ້າຄະນະຜູ້ແທນ ສຳນັກວາຕີກັງ ໄດ້ເນັ້ນຫນັກວ່າ: ຄະນະເຫັນໄດ້ຄວາມສະນິດສະຫນົມ, ເປີດອົກເປີດໃຈຂອງຊາວຫວຽດນາມ ແລະ ຊີວິດດ້ານຈິດວິນຍານຂອງຫວຽດນາມແມ່ນດີທີ່ສຸດ.
ບົນພື້ນຖານການພົວພັນອັນດີງາມນັ້ນ, ການຢ້ຽມຢາມຂອງທ່ານນາຍົກລັດຖະມົນຕີ ຫງວຽນເຕີນຢູງ ເຖິງສຳນັກວາຕີກັງ ແລະ ການພົບປະກັບສັນຕະປາປາ Francis ແນ່ນອນວ່າ ຈະແມ່ນບາດກ້າວໃຫມ່, ສ້າງພື້ນຖານອັນໝັັ້ນແກ່ນໃຫ້ແກ່ການພົວພັນລະຫວ່າງຫວຽດນາມ ແລະ ວາຕີກັງ. ການພົວພັນລະຫວ່າງຫວຽດນາມ ແລະ ວາຕີກັງ ພັດທະນາບໍ່ພຽງແຕ່ນຳມາເຊີ່ງຜົນປະໂຫຍດແທດຈິງໃຫ້ແກ່ຊາວກາໂຕລິກ ຫວຽດນາມ ກວ່າ 6 ລ້ານຄົນເທົ່ານັ້ນ ຫາກຍັງປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບຢູ່ພາກພື້ນ ແລະ ໃນໂລກອີກດ້ວຍ.