(vovworld)- ວັດທະນະທຳແມ່ນຫນຶ່ງໃນ 3 ເສົາຄ້ຳຕົ້ນຕໍຂອງ ອາຊຽນ ໃນວິວັດການມຸ່ງໄປເຖິງຈຸດໝາຍສ້າງປະຊາຄົມ ອາຊຽນ ໃນປີ 2015. ມາຮອດປະຈຸບັນ, ເກືອບ 90% ໃນຍອດຈຳນວນເປົ້າໝາຍທີ່ກ່ຽວຂ້ອງເຖິງວິວັດການປະຕິບັດແຜນການສັງລວມຂອງປະຊາຄົມວັດທະນະທຳ ສັງຄົມ ອາຊຽນ ທີ່ບັນລຸໄດ້ນັ້ນ, ໄດ້ປະກອບສ່ວນປະຕິບັດການຫັນບັນດາຈຸດໝາຍທີ່ວາງອອກໃຫ້ປະກົດຜົນເປັນຈິງ. ຜົນສຳເລັດຂອງກອງປະຊຸມລັດຖະມົນຕີຮັບຜິດຊອບດ້ານວັດທະນະທຳ ແລະ ສິລະປະ ອາຊຽນ ຄັ້ງທີ 6 ຫາກໍ່ສິ້ນສຸດຢູ່ ນະຄອນ ເຫ້ວ ຂອງຫວຽດນາມ ອີກຄັ້ງຫນຶ່ງຢືນຢັນເຖິງຄວາມຕັດສິນໃຈຂອງບັນດາປະເທດ ອາຊຽນ ກ່ຽວກັບປະຊາຄົມດຽວ, ວິໄສທັດດຽວ ແລະ ສີສັນດຽວ.
ກອງປະຊຸມລັດຖະມົນຕີ ຮັບ ຜິດຊອບວັດທະນະທຳ ແລະ ສິລະປະ ອາຊຽນ ຄັ້ງທີ 6
photo:baodongnai.com.vn
|
ພາຍຫລັງ 47 ປີແຫ່ງການສ້າງຕັ້ງ ແລະ ພັດທະນາ, ຊາຍຄາລວມ ອາຊຽນ ໄດ້ມີບາດກ້າວພັດທະນາໃນວິວັດການສ້າງປະຊາຄົມ ໂດຍອີງໃສ່ 3 ເສົາຄ້ຳຄື: ການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳສັງຄົມ, ໃນນັ້ນ ວັດທະນະທຳແມ່ນປັດໄຈສຳຄັນ ສຳລັບການສ້າງຊາຍຄາລວມຂອງປະຊາຄົມອາຊຽນ ພັດທະນາແບບຍືນຍົງ.
ໃນໄລຍະຜ່ານມາ, ບັນດາຈຸດໝາຍກ່ຽວຂ້ອງເຖິງປະຊາຄົມວັດທະນະທຳ ສັງຄົມ ອາຊຽນ ໄດ້ຫລືພວມໄດ້ຮັບການປະຕິບັດຢ່າງມີປະສິດທິຜົນ ຜ່ານການເຄື່ອນໄຫວຫລາຍຢ່າງທີ່ແຕກຕ່າງກັນຄື: ສ້າງນະຄອນວັດທະນະທຳ ອາຊຽນ, ຄ້າຍຊາວຫນຸ່ມ ອາຊຽນ, ເຄືອຂ່າຍນະຄອນເດີມ ອາຊຽນ.
ວັດທະນະທຳພື້ນເມືອງທີ່ເປັນເອກະລັດສະເພາະ, ຫລາຍຮູບຫລາຍແບບ
ດ້ວຍພົນລະເມືອງ ກວ່າ 600 ລ້ານຄົນ, ມີທີ່ຕັ້ງຍຸດທະສາດ ແລະ ຖືກຕັ້ງຢູ່ໃຈກາງ ອາຊີ, ອາຊຽນ ໄດ້ຮັບການຕີລາຄາວ່າ ແມ່ນພາກພື້ນເຕົ້າໂຮມບໍ່ພຽງແຕ່ມໍລະດົກທຳມະຊາດຫລາຍແຫ່ງເທົ່ານັ້ນ ຫາກຍັງມີບັນດາມໍລະດົກວັດທະນະທຳອຸດົມສົມບູນ ແລະ ຫລາຍຮູບຫລາຍແບບອີກດ້ວຍ. ທີ່ກອງປະຊຸມລັດຖະມົນຕີ ຮັບ ຜິດຊອບວັດທະນະທຳ ແລະ ສິລະປະ ອາຊຽນ ຄັ້ງທີ 6 ຫາກໍ່ດຳເນີນໄປໃນທ້າຍອາທິດຜ່ານມາຢູ່ ນະຄອນ ເຫ້ວ, ທ່ານ ເລເລືອງມີງ,ເລຂາທິການໃຫຍ່ ອາຊຽນ ໄດ້ເນັ້ນຫນັກຢ່າງແຮງວ່າ: ໃນຈຳນວນມໍລະດົກວັດທະນະທຳຂອງໂລກ 33 ຢ່າງທີ່ໄດ້ຮັບການຮັບຮອງຈາກ UNESSCO, ອາຊຽນ ກວມເອົາເຖິງ 21 ມໍລະດົກ. ນີ້ແມ່ນທ່າໄດ້ປຽບອັນໃຫຍ່ຫລວງຂອງ ອາຊຽນ. ກ່ຽວກັບດ້ານເສດຖະກິດ, ຄວາມເປັນຫລາຍຮູບຫລາຍແບບ ແລະ ເອກະລັກສະເພາະຂອງວັດທະນະທຳພື້ນເມືອງຂອງບັນດາປະເທດໃນພາກພື້ນ ພວມແມ່ນປັດໄຈສຳຄັນ, ປະກອບສ່ວນຊຸກຍູ້ການພັດທະນາຂະແຫນງທ່ອງທ່ຽວ ໄດ້ນຳມາເຊິ່ງລາຍຮັບໃຫ້ແກ່ພື້ນຖານເສດຖະກິດຂອງແຕ່ລະປະເທດໃນພາກພື້ນ.
ຄວາມຈິງ, ໃນໄລຍະຜ່ານມາ, ໂດຍບໍ່ຫົວຊາຕໍ່ວິກິດການເສດຖະກິດ, ອາຊຽນ ຍັງຄົງແມ່ນພາກພື້ນດຶງດູດນັກທ່ອງທ່ຽວເປັນຈຳນວນຫລວງຫລາຍ. ຂະແຫນງທ່ອງທ່ຽວ ໄດ້ປະກອບສ່ວນອັນໃຫຍ່ຫລວງເຂົ້າໃນການພັດທະນາລວມຂອງພື້ນຖານເສດຖະກິດ ສັງຄົມຂອງບັນດາປະເທດສະມາຊິກ,ສ້າງວຽກເຮັດງານທຳ, ລົບລ້າງຄວາມອຶດຫິວຫລຸດຜ່ອນຄວາມທຸກຍາກ ແລະ ຊ່ວຍຮັດແຄບຊ່ອງຫວ່າງພັດທະນາເສດຖະກິດລະຫວ່າງບັນດາປະເທດສະມາຊິກ ອາຊຽນ, ສ້າງທ່າພັດທະນາເສດຖະກິດແບບຍືນຍົງໃຫ້ແກ່ພາກພື້ນ. ບັນລຸໄດ້ສິ່ງດັ່ງກ່າວກໍຍ້ອນມີການຮ່ວມສຳພັນຢ່າງແຫນ້ນແຟ້ນໃນ ອາຊຽນ ຊື່ງພົ້ນເດັ່ນແມ່ນຍຸດທະສາດ “ 10 ປະເທດ ຈຸດນັດພົບດຽວ” ໄດ້ຮັບການສ້າງຂຶ້ນເມື່ອປີ 2010 ໃນຈຸດໝາຍມຸ່ງໄປເຖິງປະຊາຄົມລວມໃນປີ 2015. ທ່ານ Ramon R Jimenez, ຮອງຫົວຫນ້າຫ້ອງການທ່ອງທ່ຽວ ຟິລິບປີນ ຖືວ່າ:
“ໃນອາຊຽນ, ຍາມໃດບັນດາປະເທດສະມາຊິກກໍ່ມີການຮ່ວມມືນຳກັນຢ່າງແຫນ້ນແຟ້ນ, ຫນູນຊ່ວຍເຊິ່ງກັນ ແລະ ກັນ ພ້ອມກັນພັດທະນາໃນຂົງເຂດເຊື່ອມຈອດ, ຊຸກຍູ້ການພັດທະນາຂະແຫນງທ່ອງທ່ຽວ ເພື່ອເຮັດແນວໃດນຳອາຊຽນ ໃຫ້ກາຍເປັນພາກພື້ນ ດຶງດູດຈຳນວນນັກທ່ອງທ່ຽວຢູ່ໃນລະດັບສູງກວ່າໝູ່. 10 ປະເທດ ອາຊຽນ ພວມມານະພະຍາຍາມສ້າງ ອາຊຽນ ກາຍເປັນຈຸດນັດພົບດຽວ ພ້ອມກັບຈຸດໝາຍສ້າງປະຊາຄົມລວມໃນປີ 2015.”
ເຖິງຢ່າງໃດກໍຕາມ, ເພື່ອໃຫ້ຄວາມເປັນຫລາຍຮູບຫລາຍແບບຂອງແຕ່ລະປະເທດສະມາຊິກ ອາຊຽນ ປະກອບສ່ວນຢ່າງມີປະສິດທິຜົນກວ່າເຂົ້າໃນການພັດທະນາລວມຂອງທັງພາກພື້ນ, ອາຊຽນ ຄວນມີຍຸດທະສາດພັດທະນາ, ມີການກຳນົດທິດຢ່າງຈະແຈ້ງ. ປະຊາຊົນ ອາຊຽນ ແຕ່ລະຄົນ ບໍ່ພຽງແຕ່ເຂົ້າໃຈແຈ້ງກ່ຽວກັບສິສັນ, ຄຸນຄ່າວັດທະນະທຳສະເພາະຂອງປະເທດຕົນເທົ່ານັ້ນ ຫາກຕ້ອງກຳແຫນ້ນຈຸດທີ່ເປັນເອກະລັກສະເພາະຂອງວັດທະນະທຳບັນດາປະເທດອື່ນໃນພາກພື້ນອີກດ້ວຍ.
ສ້າງຍຸດທະສາດວັດທະນະທຳໃຫ້ແກ່ປະຊາຄົມ ອາຊຽນ
ເພາະສະນັ້ນ, ກອງປະຊຸມລັດຖະມົນຕີຮັບຜິດຊອບວັດທະນະທຳ ແລະ ສິລະປະ ອາຊຽນ ຄັ້ງທີ 6 ພາຍໃຕ້ຫົວຂໍ້ວ່າ: ຍົກສູງບົດບາດວັດທະນະທຳສຳລັບການພັດທະນາແບບຍືນຍົງຂອງປະຊາຄົມ ອາຊຽນ ຖືກຈັດຂຶ້ນຢູ່ ຫວຽດນາມ ໃນເວລາ 2 ວັນ ຄືວັນທີ 19 ແລະ 20/4 ຜ່ານມາ ໄດ້ຮັບຄວາມສົນໃຈຈາກບັນດາລັດຖະມົນຕີ ວັດທະນະທຳ 10 ປະເທດ ອາຊຽນ, ເປັນຕົ້ນໃນສະພາບການທີ່ໃກ້ຈະຮອດປີ 2015. ບໍ່ພຽງແຕ່ກວດກາຄືນວິວັດການຮ່ວມມືດ້ານວັດທະນະທຳໃນຂອບເຂດຂອງ ອາຊຽນ ແລະ ປຶກສາຫາລືກ່ຽວກັບບົດບາດຂອງວັດທະນະທຳ ແລະ ສິລະປະ, ກອງປະຊຸມຄັ້ງນີ້ ຍັງຢືນຢັນສານທີ່ວ່າ: ວັດທະນະທຳ -ປັດໄຈສຳຄັນໃນຊີວິດຂອງ 10 ປະເທດ ອາຊຽນ, ແລະຖືວ່າ ນີ້ແມ່ນຈຸດໝາຍໃນຄວາມມານະພະຍາຍາມລວມເພື່ອສ້າງປະຊາຄົມ ອາຊຽນ: ວິໄສທັດດຽວ, ສິສັນດຽວ.
ເພື່ອເສີມຂະຫຍາຍບົດບາດວັດທະນະທຳໃນການສ້າງປະຊາຄົມ ອາຊຽນ ແບບຍືນຍົງ ບໍ່ອາດຂາດບົດບາດຂອງບັນດາປະເທດຄູ່ເຈລະຈາຂອງ ອາຊຽນໄດ້ ເພື່ອແນໃສ່ແບ່ງປັນບົດຮຽນ, ຍາດແຍ່ງການສະຫນັບສະຫນູນຂອງບັນດາປະເທດຄູ່ຮ່ວມມືອື່ນພາຍໃນ ແລະ ນອກພາກພື້ນ. ຜ່ານກອງປະຊຸມຄັ້ງນີ້, ອາຊຽນ ໄດ້ກ້າວຂຶ້ນອີກບາດກ້າວຫນຶ່ງໃນການເປັນເຈົ້າການຮ່ວມມືກັບບັນດາປະເທດຄູ່ເຈລະຈາ ຄື: ສເກົາຫລີ, ຍີ່ປຸ່ນ, ຈີນ. ທ່ານ ຮ່ວາງຕວນແອງ, ລັດຖະມົນຕີກະຊວງວັດທະນະທຳ ກິລາ ແລະ ທ່ອງທ່ຽວ ຫວຽດນາມ ຢືນຢັນວ່າ:
“ຍາມໃດ ອາຊຽນ ກໍເປັນເຈົ້າການ ກຳນົດບັນດາຮູບການສຳພັດຢ່າງແຫນ້ນແຟ້ນກັບບັນດາປະເທດຄູ່ເຈລະຈາ, ພິເສດແມ່ນ ຈີນ, ຍີປຸ່ນ, ສເກົາຫລີ. ສຳລັບ ຍີ່ປຸ່ນ, ພວກຂ້າພະເຈົ້າ ພວມສະເຫນີນະໂຍບາຍໃຫມ່ກ່ຽວກັບການພົວພັນແລກປ່ຽນວັດທະນະທຳ ອາຊີ ແລະ ໂຄງການຫນຶ່ງທີ່ມີຊື່ວ່າ: ມຸ່ງໄປສູ່ ອາຊີ ພວມໄດ້ຮັບການປະຕິບັດ ດ້ວຍການສ້າງສູນ ອາຊີ ຂຶ້ນກັບ ກອງທຶນພົວພັນແລກປ່ຽນວັດທະນະທຳ ຍີ່ປຸ່ນ, ເພື່ອເພີ່ມທະວີການເຊື່ອມຕໍ່ພົວພັນແລກປ່ຽນປະຊາຊົນ ແລະ ຮ່ວມມືໃນວັດທະນະທຳສິລະປະລະຫວ່າງ ອາຊຽນ.”
ເລື່ອງສ້າງປະຊາຄົມຢ່າງຄົບຖ້ວນຈະປະສົບຄວາມຫຍຸ້ງຍາກບໍ່ແມ່ນຫນ້ອຍ ໃນສະພາບດ້ານວັດທະນະທຳ, ພາສາປາກເວົ້າ, ສາດສະຫນາ ແລະ ລະດັບພັດທະນາຢູ່ພາກພື້ນ ອາຊີຕາເວັນອອກສ່ຽງໃຕ້ ມີຫລາຍຮູບຫລາຍແບບ.ແຕ່ດ້ວຍຄວາມຕັດສິນໃຈ ແລະ ວິວັດທະນາການລະອຽດ ຊື່ງອາຊຽນ ພວມປະຕິບັດ, ແນ່ນອນວ່າ ປະຊາຄົມ ອາຊຽນ ເຕັມໄປດ້ວຍສີສັນວັດທະນະທຳ, ມີຄວາມສາມັກຄີ ເພື່ອພ້ອມກັນພັດທະນາ ແລະ ວັດທະນາຖາວອນ ຈະໄດ້ຮັບການສ້າງຕັ້ງຂຶ້ນໃນໄລຍະຈະມາເຖິງ.