(vovworld)- ກອງປະຊຸມລັດຖະມົນຕີເສດຖະກິດ ອາຊຽນ ຄັ້ງທີ 48 ໄດ້ໄຂຂຶ້ນໃນວັນທີ 3/8 ຢູ່ ນະຄອນຫລວງ ວຽງຈັນ ປະເທດລາວ. ໂດຍໄດ້ດຳເນີນເປັນຄັ້ງທຳອິດພາຍຫລັງປະຊາຄົມເສດຖະກິດ ອາຊຽນ ໄດ້ຮັບການສ້າງຕັ້ງ, ກອງປະຊຸມຄັ້ງນີ້ ສືບຕໍ່ສຸມໃສ່ບັນດາເນື້ອໃນບຸລິມະສິດຂອງເສົາຄ້ຳເສດຖະກິດ, ຊຸກຍູ້ການປະຕິບັດແຜນການປະຊາຄົມເສດຖະກິດ ອາຊຽນຮອດປີ 2025. ຫວຽດນາມ ໃນຖານະແມ່ນປະເທດສະມາຊິກຫນຶ່ງ, ສືບຕໍ່ມີບັນດາການປະກອບສ່ວນແທ້ຈິງໃຫ້ແກ່ວິວັດການນີ້.
ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ກ່າວປາໄສທີ່ກອງປະຊຸມ
|
ວັນທີ 31/12/2015 ເປັນຂີດໝາຍແຫ່ງບາດລ້ຽວປະຫວັດສາດໃນໄລຍະທາງ 48 ປີແຫ່ງວັນສ້າງຕັ້ງ ແລະ ພັດທະນາ ຂອງອາຊຽນ ເມື່ອປະຊາຄົມເສດຖະກິດ ອາຊຽນ (AEC) ໄດ້ຮັບການສ້າງຕັ້ງ ດ້ວຍຈຸດໝາຍມຸ່ງໄປເຖິງພາກພື້ນ ອາຊຽນ ມີສະຖຽນລະພາບ, ວັດທະນາຖາວອນ ແລະ ມີຄວາມແກ່ງແຍ້ງສູງ. ບັນດາປະເທດໄດ້ວາງຄາດໝາຍແມ່ນສ້າງຄວາມກົມກ່ຽວ ລະຫວ່າງຍຸດທະສາດເສດຖະກິດ, ທາບທາມຄຳເຫັນກ່ຽວກັບບັນດານະໂຍບາຍເສດຖະກິດມະຫາພາກ ແລະ ການເງິນຢ່າງແຫນ້ນແຟ້ນກວ່າ ເພີ່ມທະວີການເຊື່ອມຈອດພື້ນຖານໂຄງລ່າງ…
AEC ສ້າງກຳລັງຫນູນພັດທະນາ
ໃນ 3 ເສົາຄ້ຳ, AEC ໄດ້ຮັບຖືວ່າ ແມ່ນສຳຄັນທີ່ສຸດ. ການພັດທະນາຂອງ AEC ແມ່ນປະຖົມປັດໄຈຊຸກຍູ້ການປະຕິບັດ 2 ເສົາຄ້ຳທີ່ຍັງເຫລືອ. ຈຸດໝາຍຂອງ AEC ລວມມີ ສ້າງເປັນຕະຫລາດຫນຶ່ງ ແລະ ມີພື້ນຖານການຜະລິດເປັນເອກະພາບ, ເຂດເສດຖະກິດແກ່ງແຍ້ງ, ເຂດພັດທະນາຢ່າງສະຫມ່ຳສະເຫມີ ແລະ ມີການເຊື່ອມໂຍງເຂົ້າກັບພື້ນຖານເສດຖະກິດທົ່ວໂລກ. ໃນ 7 ເດືອນຜ່ານມາ ນັບແຕ່ເມື່ອ AEC ໄດ້ຮັບການສ້າງຕັ້ງ, ບັນດາປະເທດ ອາຊຽນ ມີຄວາມເອົາໃຈໃສ່ເຖິງການປະຕິບັດຫັນ 3 ຂົງເຂດໃຫຍ່ເປັນເສລີ ນັ້ນແມ່ນ ຫັນການຄ້າສິນຄ້າເປັນເສລີ, ຫັນການຄ້າການບໍລິການເປັນເສລີ, ຫັນການລົງທຶນ, ການເງິນ ແລະ ແຮງງານເປັນເສລີ. ລະອຽດຄື: ບັນດາປະເທດ ອາຊຽນ ຍູ້ໄວວິວັດການປະຕິບັດການຫລຸດຜ່ອນພາສີອາກອນ, ປະຕິຮູບລະບຽບການພາສີ ແລະ ບັນດາມາດຕະການສ້າງຄວາມສະດວກດ້ານການຄ້າອື່ນ.
ເພື່ອບັນລຸຈຸດໝາຍສ້າງເຂດເສດຖະກິດແກ່ງແຍ້ງ, ໃນໄລຍະຜ່ານມາ AEC ສຸມໃສ່ເຂົ້າໃນການເຄື່ອນໄຫວຕົ້ນຕໍ 4 ປະການຄື: ນະໂຍບາຍແກ່ງແຍ້ງ, ປົກປ້ອງຜູ້ໃຊ້ສອຍ, ປົກປ້ອງສິດຊັບສິນທາງປັນຍາ ແລະ ພັດທະນາພື້ນຖານໂຄງລ່າງ. ຄຽງຄູ່ກັນນັ້ນ ເພື່ອສ້າງພາກພື້ນ ອາຊຽນ ໃຫ້ພັດທະນາຢ່າງສະຫມ່ຳສະເຫມີ, ອາຊຽນ ໄດ້ພິຈາລະນາ ສ້າງຍຸດທະສາດພັດທະນາວິສາຫະກິດຂະຫນາດກາງ ແລະ ນ້ອຍ, ສ້າງກອບໂຄງການລວມໃຫ້ແກ່ບັນດານັກທຸລະກິດ ອາຊຽນ ແລະ ຜັນຂະຫຍາຍຂໍ້ລິເລີ່ມເຊື່ອມໂຍງ ອາຊຽນ. ອາຊຽນ ກໍເຫັນດີຊຸກຍູ້ການເຈລະຈາບັນດາສັນຍາການຄ້າເສລີສອງຝ່າຍ ແລະ ສັນຍາຄູ່ຮ່ວມມືເສດຖະກິດຮອບດ້ານ, ເຂົ້າຮ່ວມຢ່າງແຮງເຂົ້າໃນລະບົບສະຫນອງທົ່ວໂລກ ເພື່ອເຊື່ອມໂຍງເຂົ້າກັບພື້ນຖານເສດຖະກິດທົ່ວໂລກຢ່າງແຮງ.
AEC ນຳມາເຊິ່ງບັນດາກາລະໂອກາດໃຫຍ່ໃຫ້ແກ່ຫວຽດນາມ
ເລື່ອງ AEC ໄດ້ຮັບການສ້າງຕັ້ງຂຶ້ນ ເປັນຂີດໝາຍໃນວິວັດການເຊື່ອມໂຍງຂອງ ອາຊຽນ. ການເຕີບໃຫຍ່ຂອງ ອາຊຽນ ໄດ້ນຳມາເຊິ່ງຜົນປະໂຫຍດຂອງທັງພາກພື້ນ ໃນນັ້ນ ມີຫວຽດນາມ. AEC ສ້າງໃຫ້ຫວຽດນາມ ກາລະໂອກາດສຳພັດກັບຕະຫລາດທີ່ກວ້າງໃຫຍ່ກວ່າ. ບໍ່ພຽງແຕ່ສະເພາະຕະຫລາດໃນອາຊຽນ ເທົ່ານັ້ນ ຫາກຍັງເປີດກວ້າງອອກສູ່ບັນດາປະເທດນອກພາກພື້ນ ອາຊຽນ ອີກດ້ວຍ, ເພາະ ບັນດາປະເທດ ອາຊຽນ ປະຈຸບັນ ລ້ວນແຕ່ມີບັນດາສັນຍາຮ່ວມມື, ເປັນຕົ້ນແມ່ນບັນດາສັນຍາກ່ຽວກັບການຄ້າເສລີກັບບັນດາຄູ່ຮ່ວມມືດ້ານການຄ້າລາຍໃຫຍ່ໃນໂລກ. ແລະ ຜ່ານ AEC ໄດ້ສ້າງເງື່ອນໄຂເພີ່ມຄວາມດູດດື່ມໃຫ້ສະພາບແວດລ້ອມແຫ່ງການລົງທຶນດຳເນີນທຸລະກິດຂອງຫວຽດນາມ. ຮອງສາດສະດາຈານ, ປອ ຈີ້ງທິທູເຮືອງ, ຮອງຫົວຫນ້າພະແນກເສດຖະກິດ ແລະ ດຳເນີນທຸລະກິດສາກົນ, ມະຫາວິທະຍາໄລການຄ້າຕ່າງປະເທດ ຮ່າໂນ້ຍ ຖືວ່າ:
“ສຳລັບບັນດາວິສາຫະກິດຫວຽດນາມ, ກາລະໂອກາດກ່ຽວກັບຕະຫລາດແມ່ນຈະແຈ້ງທີ່ສຸດ. ນັ້ນແມ່ນຕະຫລາດມີພົນລະເມືອງກວ່າ 600 ລ້ານຄົນ, ໃຫຍ່ອັນດັບທີ 3 ໃນໂລກ. ແລະ ຕະຫລາດນີ້ແມ່ນຢູ່ໃກ້ກັບພວກເຮົາ, ໝາຍຄວາມວ່າ ດ້ານພູມສາດລະຫວ່າງ ຫວຽດນາມ ກັບບັນດາປະເທດໃນພາກພື້ນ ບໍ່ຫ່າງໄກ ຄື ຫວຽດນາມ ກັບ ອີຢູ, ອາເມລິກາ ຫລື ຍີ່ປຸ່ນ. ສະນັ້ນ ວິສາຫະກິດຕ້ອງເຫັນໄດ້ຜົນປະໂຫຍດຈາກສິ່ງດັ່ງກ່າວ.”
ມານະພະຍາຍາມເຊື່ອມໂຍງຮອບດ້ານໃນອາຊຽນ
ໂດຍຮັບຮູ້ໄດ້ບັນດາກາລະໂອກາດຊື່ງ AEC ນຳມາໃຫ້, ກ່ອນທີ່ AEC ໄດ້ຮັບການສ້າງຕັ້ງ ຫວຽດນາມ ໄດ້ມີການກະກຽມໃຫ້ແກ່ວິວັດການເຊື່ອມໂຍງຢ່າງລະອຽດ. ຄຽງຄູ່ກັບການຫນູນຊ່ວຍວິສາຫະກິດຍົກສູງຄວາມຮັບຮູ້, ຫວຽດນາມ ຍັງຍົກອອກບັນດານະໂຍບາຍປັບປຸງສະພາບແວດລ້ອມແຫ່ງການແກ່ງແຍ້ງຢ່າງທັນການ ແລະ ຍົກສູງກຳລັງຄວາມສາມາດຂອງພື້ນຖານເສດຖະກິດ. ທ່ານ ຫງວຽນກວາງວີງ, ຫົວຫນ້າຫ້ອງການວິສາຫະກິດເພື່ອການພັດທະນາແບບຍືນຍົງ, ຫ້ອງການການຄ້າ ອຸດສາຫະກຳ ຫວຽດນາມ ເນັ້ນຫນັກວ່າ:
“ຕົວຢ່າງ ໄລຍະຜ່ານມາ ຫວຽດນາມ ໄດ້ປະກາດໃຊ້ມະຕິເລກທີ 19 ກ່ຽວກັບການປັບປຸງສະພາບແວດລ້ອມແກ່ງແຍ້ງ ແລະ ຍົກສູງກຳລັງຄວາມສາມາດຂອງລັດຖະບານ. ນີ້ອາດຈະໄດ້ຮັບຖືວ່າແມ່ນການກະຕຸກຊຸກຍູ້ສຳຄັນເພື່ອໃຫ້ບັນດາກະຊວງ, ຂະແຫນງການປະຕິຮູບລະບຽບການບໍລິຫານ, ຫລຸດຜ່ອນເລລາເສຍພາສີ, ເວລາພັກສິນຄ້າຢູ່ດ່ານຊາຍແດນ.”
ພ້ອມກັບ ອາຊຽນ, ຫວຽດນາມ ພວມມານະພະຍາຍາມເຊື່ອມໂຍງ, ປັບປຸງ, ສ້າງສຳເລັດ ລະບອບເສດຖະກິດໃຫ້ສະດວກກວ່າ, ສອດຄອ່ງກັບທຳນຽມສາກົນ. AEC ເຊື່ອມຮອບດ້ານ ຈະນຳມາເຊິ່ງບັນດາຜົນປະໂຫຍດບໍ່ແມ່ນຫນ້ອຍໃຫ້ແກ່ຫວຽດນາມ, ເຖິງຢ່າງໃດກໍຕາມ ໄປຄຽງຄູ່ກັນນັ້ນແມ່ນສິ່ງທ້າທາຍຫລາຍຢ່າງ. ສະນັ້ນ ເມື່ອເຂົ້າຮ່ວມກອງປະຊຸມຄັ້ງນີ້, ຫວຽດນາມ ສືບຕໍ່ເປັນເຈົ້າການໃນການສະເຫນີ, ປະກອບຂໍ້ລິເລີ່ມພ້ອມກັບ ອາຊຽນ ຊຸກຍູ້ການປະຕິບັດແຜນການປະຊາຄົມເສດຖະກິດ ອາຊຽນ.