(vovworld) – ລະດູບານໃໝ່ປີລະກາ 2017 ໄດ້ວຽນມາແລ້ວ, ໃນທ່າມກາງຄວາມເບີກບານມ່ວນຊື່ນ, ຟົດຟື້ນກ່ຽວກັບບັນດາຜົນງານທີ່ປະທັບໃຈຂອງປະເທດ ຫວຽດນາມ ໃນປີຜ່ານມາ, ພ້ອມກັບຄວາມເບີກບານມ່ວນຊື່ນ, ຄວາມມຸ່ງມາດປາດຖະໜາກ່ຽວກັບປີໃໝ່ປະສົບຜົນສຳເລັດ.
 |
ປະຊາຊົນ ຫວຽດນາມ ໄດ້ພ້ອມກັນຜ່ານຜ່າຄວາມຫຍຸ້ງຍາກ, ສິ່ງທ້າທາຍຫຼາຍຢ່າງຂອງປີ 2016 ເພື່ອມີບັນດາການຫັນປ່ຽນຢ່າງຕັ້ງໜ້າ, ມີລັກສະນະປະຫວັດສາດໃນເສັ້ນທາງແຫ່ງການພັດທະນາຂອງປະເທດຊາດ. ໃນປີ 2016, ມະຕິກອງປະຊຸມໃຫຍ່ຄັ້ງທີ 12 ຂອງພັກກອມມູນິດ ຫວຽດນາມ ໄດ້ຫັນເປັນລະອຽດດ້ວຍການກະທຳຢ່າງວ່ອງໄວ. ຈາກສະພາແຫ່ງຊາດ, ລັດຖະບານ ຕະຫຼອດຮອດບັນດາຂັ້ນ, ຂະແໜງການ, ລ້ວນແຕ່ປ່ຽນໃໝ່ແບບວິທີການບໍລິຫານ, ຍົກສູງປະສິດທິຜົນການເຄື່ອນໄຫວ. ຄວາມມຸ່ງຫວັງປະຕິບັດລັດຖະບານ “ແຫ່ງການສ້າງສາ, ປອດໄສ, ຮັບໃຊ້ ແລະ ກະທຳ” ໄດ້ແຜ່ຂະຫຍາຍຢ່າງແທ້ຈິງ, ມັນໄດ້ດຶງດູດທົ່ວລະບົບການເມືອງ ແລະ ທົ່ວສັງຄົມເຂົ້າຮ່ວມ, ດ້ວຍຄວາມເຊື່ອໝັ້ນ ແລະ ຄວາມຕັດສິນໃຈສູງ. ມີຫຼາຍແຜນນະໂຍບາຍ, ລັດຖະນະໂຍບາຍເສດຖະກິດໃຫຍ່ໄດ້ຮັບການຜັນຂະຫຍາຍຢ່າງຄົບຊຸດ, ມີຜົນສະທ້ອນຢ່າງມີປະສິດທິຜົນ, ໂດຍກົງເຖິງພື້ນຖານພັດທະນາເສດຖະກິດ ສັງຄົມຂອງປະເທດຊາດ. ລະດັບການເຕີບໂຕຜະລິດຕະພັນພາຍໃນ (GDP) ໃນປີ 2016 ຂອງ ຫວຽດນາມ ບັນລຸລະດັບ 6,21%, ເຊິ່ງແມ່ນລະດັບເຕີບໂຕສູງໃນພາກພື້ນ. ໃນຄວາມມານະພະຍາຍາມບໍລິຫານເສດຖະກິດມະຫາພາກ, ປັບປຸງສະພາບແວດລ້ອມແຫ່ງການດຳເນີນທຸລະກິດຂອງລັດຖະບານ ຫວຽດນາມ ໄດ້ຊ່ວຍໃຫ້ສະພາບແວດລ້ອມແຫ່ງການດຳເນີນທຸລະກິດຂອງ ຫວຽດນາມ ເພີ່ມຂຶ້ນ 9 ຂັ້ນໃນຕາຕະລາງຈັດລະດັບຂອງທະນາຄານໂລກ.
ປີ 2016, ກໍ່ແມ່ນປີທີ່ບັນດາການນຳ ຫວຽດນາມ ມີການເຄື່ອນໄຫວພົວພັນຕ່າງປະເທດຕ່າງໆທີ່ຟົດຟື້ນ, ຍາດໄດ້ບັນດາຜົນງານເມື່ອຢ້ຽມຢາມຢ່າງເປັນທາງການບາງປະເທດໃຫຍ່ຄື: ລັດເຊຍ, ຈີນ, ເຂົ້າຮ່ວມກອງປະຊຸມສາກົນສຳຄັນຫຼາຍຄັ້ງຄື ກອງປະຊຸມສຸດຍອດ ອາຊີ - ເອີລົບ, ກອງປະຊຸມສຸດຍອດ ອາຊຽນ, ກອງປະຊຸມສຸດຍອດ ຈີ 7, ມັນສະແດງໃຫ້ເຫັນວ່າ ຫວຽດນາມ ແມ່ນປະເທດສະມາຊິກທີ່ຕັ້ງໜ້າ, ຂະຫຍັນຂັນເຄື່ອນ, ມີຄວາມຮັບຜິດຊອບ,ປະກອບສ່ວນເພື່ອສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ຄວາມວັດທະນາຖາວອນຢູ່ພາກພື້ນ ແລະ ຢູ່ໃນໂລກ.
ປີ 2016 ເປັນຂີດໝາຍປະເທດ ຫວຽດນາມ ຜ່ານຜ່າ 30 ປີແຫ່ງການປ່ຽນໃໝ່ ແລະ ເຊື່ອມໂຍງດ້ວຍບັນດາໄຊຊະນະ ແລະ ຜົນງານມີຄວາມໝາຍປະຫວັດສາດ. ມາຮອດປະຈຸບັນ, ຫວຽດນາມ ໄດ້ສ້າງຕັ້ງການພົວພັນທາງການທູດກັບ 187/193 ປະເທດສະມາຊິກ ສະຫະປະຊາຊາດ, ກໍ່ສ້າງເຄືອຂ່າຍການພົວພັນຄູ່ຮ່ວມມືຍຸດທະສາດກັບ 15 ປະເທດ, ການພົວພັນຄູ່ຮ່ວມມືຮອບດ້ານກັບ 10 ປະເທດ, ໃນນັ້ນ ມີທຸກໆປະເທດໃຫຍ່ ແລະ 5 ປະເທດສະມາຊິກຄະນະປະຈຳສະພາຄວາມໝັ້ນຄົງ ສປຊ. ຫວຽດນາມ ໄດ້ເປີດກ້ວາງການພົວພັນທາງດ້ານການຄ້າກັບກ່ວາ 155 ປະເທດ, ດຶງດູດການລົງທຶນໂດຍກົງຂອງບັນດາກຸ່ມບໍລິສັດ ແລະ ບໍລິສັດຂຶ້ນກັບ 70 ປະເທດ ແລະ ເຂດແຄ້ວນ. ຫວຽດນາມ ກໍ່ໄດ້ເຊັນສັນຍາການຄ້າເສລີ 2 ຝ່າຍ 88 ສະບັບ, ເປີດກ້ວາງການພົວພັນການຄ້າ, ການສົ່ງອອກສິນຄ້າເຖິງ 220 ຕະຫຼາດບັນດາປະເທດ ແລະ ເຂດແຄ້ວນ.
ດ້ວຍຈິດໃຈແຫ່ງການປ່ຽນໃໝ່, ເຊື່ອມໂຍງໃນປີ 2016 ແລະ ໃນ 30 ປີຜ່ານມາ, ກໍ່ຈະເພີ່ມກຳລັງແຮງ, ສະແດງໃຫ້ເຫັນຢ່າງແຮງກ່ວາ, ເດັດຂາດກ່ວາໃນປີ 2017, ດ້ວຍບັນດາໂຄງການ, ການເຄື່ອນໄຫວຂອງລັດຖະບານ, ບັນດາຄະນະ, ຂະແໜງການ, ອົງການຈັດຕັ້ງມະຫາຊົນ, ອຳນາດການປົກຄອງທຸກຂັ້ນເພື່ອການເຊື່ອມໂຍງບັນລຸຜົນສຳເລັດ.
ລະດູບານໃໝ່ໄດ້ວຽນມາ, ດ້ວຍພະລັງຊີວິດຂອງສັງຄົມທີ່ອຳໜຳສຳລານ ແລະ ສົມບູນພຸນສຸກ, ນຳມາເຊິ່ງຄວາມເຊື່ອໝັ້ນກ່ຽວກັບປະເທດ ຫວຽດນາມ ນັບມື້ນັບພັດທະນາ, ວັດທະນາຖາວອນ.