(vovworld)- ວັນທີ 7/2, ທ່ານທອງລຸນ ສີສຸລິດ, ນາຍົກລັດຖະມົນຕີ ສປປ ລາວ ນຳຫນ້າຄະນະຜູ້ແທນລັດຖະບານ ລາວ ມາຢ້ຽມຢາມຫວຽດນາມ ຕາມຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ. ທ່ານນາຍົກລັດຖະມົນຕີ ທອງລຸນ ສີສຸລິດ ຈະພ້ອມກັບທ່ານນາຍົກລັດຖະມົນຕີ ຫງວຽນຊວນຟຸກ ເປັນປະທານຮ່ວມກອງປະຊຸມຄັ້ງທີ 39 ຄະນະກຳມະການລະຫວ່າງ ລັດຖະບານ ຫວຽດນາມ ແລະ ລາວ ຊື່ງຈັດຂຶ້ນຢູ່ ຮ່າໂນ້ຍ ໃນວັນທີ 8/2. ເຫດການນີ້ສະແດງໃຫ້ເຫັນວ່າ ສອງປະເທດບ້ານໃກ້ເຮືອນຄຽງ ພັດທະນາການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ -ລາວ ຢ່າງບໍ່ຢຸດຢັ້ງ. ບົດຂຽນຂອງນັກຂ່າວ ທູຮວາ ທີ່ມີຫົວຂໍ້ວ່າ: ຫວຽດນາມ ແລະ ລາວ ພັດທະນາການພົວພັນທີ່ເປັນມູນເຊື້ອແບບພິເສດຢ່າງບໍ່ຢຸດຢັ້ງ.
ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ແລະ
ທ່ານທອງລຸນ ສີສຸລິດ, ນາຍົກລັດຖະມົນຕີ ສປປ ລາວ
|
ຫວຽດນາມ ແລະ ລາວ ຈັດຕັ້ງກອງປະຊຸມຄະນະກຳມະການລະຫວ່າງລັດຖະບານ ເພື່ອແນໃສ່ສືບຕໍ່ຢັ້ງຢືນບຸລິມະສິດການຕ່າງປະເທດຂອງທັງສອງປະເທດແມ່ນພັດທະນາສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງຫວຽດນາມ ແລະລາວ ຢ່າງບໍ່ຢຸດຢັ້ງ. ນີ້ແມ່ນກອງປະຊຸມຄະນະກຳມະການລະຫວ່າງລັດຖະບານ ເປັນຄັ້ງທຳອິດ ໂດຍນາຍົກລັດຖະມົນຕີ ທັງສອງປະເທດເປັນປະທານຮ່ວມ ເພື່ອແນໃສ່ຜັນຂະຫຍາຍບັນດາຂໍ້ຕົກລົງຂັ້ນສູງທີ່ບັນລຸໄດ້ໃນກອງປະຊຸມລະຫວ່າງກົມການເມືອງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ ເມື່ອວັນທີ 7/1/2017 ໄດ້ເປັນເອກະພາບຕໍ່ແຜນການຮ່ວມມືລະຫວ່າງສອງປະເທດໃນປີ 2017.
ສາຍພົວພັນທີ່ເປັນມູນເຊື້ອແບບພິເສດ
ໂດຍແມ່ນສອງປະເທດບ້ານໃກ້ເຮືອນຄຽງ, ສອງຊາດຫວຽດນາມ ແລະລາວ ມີຄວາມສະຫນິດຕິດພັນມາແຕ່ດົນນານແລ້ວ. ຄວາມສະຫນິດຕິດພັນ ທີ່ເປັນມູນເຊື້ອ, ຄວາມສາມັກຄີເປັນແບບຢ່າງ, ບໍລິສຸດຜຸດຜ່ອງ ແລະ ການພົວພັນແບບພິເສດ, ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ຫວຽດນາມ ແລະ ລາວ ນັບມື້ນັບພັດທະນາ ແລະ ຂຶ້ນສູ່ລະດັບສູງໃຫມ່. ປະຊາຊົນສອງປະເທດ ໄດ້ຮຽງບ່າຮຽງໄລ່, ພ້ອມແລ້ວທີ່ຈະເສຍສະຫລະເພື່ອສອງປະເທດໃນການຕໍ່ສູ້ຍາດເອົາ ແລະ ຮັກສາພື້ນຖານເອກະລາດ, ເສລີພາບ. ພາຍໃຕ້ການຊີ້ນຳນຳພາຂອງພັກກອມມູນິດ ອິນດູຈີນ, ປະຈຸບັນ ແມ່ນພັກກອມມູນິດ ຫວຽດນາມ ແລະ ພັກປະຊາຊົນປະຕິວັດ ລາວ, ປະຊາຊົນສອງປະເທດຫວຽດນາມ ແລະ ລາວ ໄດ້ຮ່ວມທຸກຮ່ວມສຸກນຳກັນເພື່ອຍາດເອົາໄຊຊະນະສຸດທ້າຍໃນການຕໍ່ສູ້ປົດປ່ອຍຊາດ. ໂດຍສືບທອດ ແລະ ຜັນຂະຫຍາຍໝາກຜົນແຫ່ງການພົວພັນແບບພິເສດ ລະຫວ່າງ ຫວຽດນາມ ແລະລາວ, ໃນ 30 ປີຜ່ານມາ, ເມື່ອສອງປະເທດກ້າວເຂົ້າສູ່ໄລຍະດຳເນີນກິດຈະການປ່ຽນແປງໃຫມ່,ການພົວພັນແບບພິເສດ ຫວຽດນາມ ແລະລາວ ສືບຕໍ່ໄດ້ຮັບການເພີ່ມພູນຄູນສ້າງຈາກສອງພັກ, ສອງລັດ ແລະ ປະຊາຊົນສອງປະເທດຢ່າງບໍ່ຢຸດຢັ້ງ, ປະກອບສ່ວນສຳຄັນເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດຂອງແຕ່ລະປະເທດກໍຄືປະກອບສ່ວນຢ່າງຕັ້ງຫນ້າໃຫ້ແກ່ສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ.
ໄມຕິຈິດມິດຕະພາບໄດ້ຮັບການເພີ່ມພູນຄູນສ້າງຢ່າງບໍ່ຢຸດຢັ້ງ
ການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານຫວຽດນາມ -ລາວ ໄດ້ຮັບການປັບປຸງ ແລະ ພັດທະນາຢ່າງບໍ່ຢຸດຢັ້ງ. ສອງຝ່າຍ ໄດ້ມີການເຄື່ອນໄຫວແລກປ່ຽນຄະນະຜູ້ທນ ແລະ ການພົບປະຂັ້ນສູງກໍຄືທຸກຂັ້ນເປັນປະຈຳ. ໃນປີ 2016, ສອງຝ່າຍໄດ້ແລກປ່ຽນຄະນະຜູ້ແທນ 350 ຄະນະ, ໃນນັ້ນ ມີ 130 ຄະນະ ແຕ່ຂັ້ນຮອງລັດຖະມົນຕີຂຶ້ນໄປ.
ໃນໄລຍະມໍ່ໆມານີ້, ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ໄດ້ໄປຢ້ຽມຢາມສັນຖະວະໄມຕິ ສປປ ລາວ ຢ່າງເປັນທາງການເມື່ອເດືອນ 11/2016. ການພົວພັນດ້ານການເມືອງ ຫວຽດນາມ ແລະ ລາວ ນັບມື້ນັບສະຫນິດຕິດພັນ, ມີຄວາມໄວ້ເນື້ອເຊື່ອໃຈ, ພັດທະນາ ແລະ ເຂົ້າສູ່ລວງເລິກໃນທຸກຂົງເຂດ, ມີຄວາມເຫັນດີເຫັນພ້ອມຢ່າງສູງທີ່ບັນດາເວທີປາໄສການຮ່ວມມືພາກພື້ນ ແລະ ສາກົນ, ປະກອບສ່ວນເຂົ້າໃນການພັດທະນາຂອງແຕ່ລະປະເທດ ແລະ ຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກໄວ້ຢ່າງໝັ້ນຄົງ. ຫວຽດນາມໄດ້ຫນູນຊ່ວຍລາວຢ່າງມີປະສິດທິຜົນໃນການຮັບດຳລົງຕຳແຫນ່ງເປັນປະທານ ອາຊຽນ 2016 ແລະ ກອງປະຊຸມຂັ້ນສູງ ອາຊຽນ ເມືຶ່ອເດືອນ 9/2016 ສຳເລັດຜົນ. ສອງຝ່າຍໄດ້ສົມທົບນຳກັນເປັນຢ່າງດີໃນການຮ່ວມມືການປ້ອງກັນຊາດປ້ອງກັນຄວາມສະຫງົບ, ກໍ່ສ້າງເສັ້ນຊາຍແດນ ຫວຽດນາມ -ລາວໃຫ້ມີຄວາມສະຖຽນລະພາບ ແລະ ພັດທະນາຢ່າງຮອບດ້ານ; ຕໍ່ສູ້ຕ້ານບັນດາອິດທິກຳລັງເປັນປໍລະປັກ, ບັນດາອາດຊະຍາກຳຂ້າມຊາດ, ອາດຊະຍາກຳຢາເສບຕິດຢ່າງມີປະສິດທິຜົນ. ການຮ່ວມມືດ້ານເສດຖະກິດ, ການຄ້າ, ການລົງທຶນລະຫວ່າງສອງປະເທດມີການຫັນປ່ຽນສຳຄັນຫລາຍຢ່າງ. ມາຮອດປະຈຸບັນ, ທຶນຈົດທະບຽນການລົງທຶນຂອງວິສາຫະກິດຫວຽດນາມ ຢູ່ ລາວ ບັນລຸປະມານ 5,1 ຕື້ ໂດລາສະຫະລັດ, ຢືນອັນດັບ 3 ໃນຈຳນວນບັນດາປະເທດລົງທຶນຢູ່ລາວ. ມີຫລາຍໂຄງການລົງທຶນເສີມຂະຫຍາຍຢ່າງມີປະສິດທິຜົນ, ການຜະລິດດຳເນີນທຸລະກິດ ມີກຳໄລ, ປະກອບສ່ວນຢ່າງຕັ້ງຫນ້າເຂົ້າໃນກິດຈະການພັດທະນາຂອງສອງປະເທດ, ສ້າງວຽກເຮັດງານທຳ, ສະຫວັດດີການສັງຄົມ, ຊ່ວຍ ສປປລາວປະຕິບັດນະໂຍບາຍລົບລ້າງຄວາມອຶດຫິວຫລຸດຜ່ອນຄວາມທຸກຍາກເປັນຢ່າງດີ ແລະ ໄດ້ຮັບການຮັບຮູ້, ຕີລາຄາສູງ ຈາກຝ່າຍລາວ.
ການພົວພັນຮ່ວມມືລະຫວ່າງບັນດາກະຊວງ, ຄະນະ, ຂະແຫນງການ, ກຳມາທິການຂອງສະພາແຫ່ງຊາດ, ອົງການຈັດຕັ້ງມະຫາຊົນ, ບັນດາທ້ອງຖິ່ນ ນັບມື້ນັບສວມບົດບາດສຳຄັນ, ມີປະສິດທິຜົນ ແລະ ແທດຈິງ. ບັນດາແຂວງ, ນະຄອນ ຂອງຫວຽດນາມ ສືບຕໍ່ເປີດກວ້າງການພົວພັນຮ່ວມມືຢູ່ລາວ, ຫນູນຊ່ວຍບັນດາທ້ອງຖິ່ນຂອງລາວ ໃນການກໍ່ສ້າງພື້ນຖານໂຄງລ່າງ, ສົ່ງເສີມສຸຂະພາບ, ບຳລຸງສ້າງພັດທະນາແຫລ່ງຊັບພະຍາກອນມະນຸດ. ຫວຽດນາມ ແລະລາວ ກໍສົມທົບກັນຢ່າງແຫນ້ນແຟ້ນ, ສະຫນັບສະຫນູນເຊິ່ງກັນ ແລະກັນ ຢູ່ບັນດາເວທີປາໄສການຮ່ວມມືພາກພື້ນ ແລະ ສາກົນ, ສືບຕໍ່ເພີ່ມທະວີການຮ່ວມມື, ສົມທົບກັບບັນດາປະເທດສະມາຊິກ ອາຊຽນ ອື່ນ ໃນການສ້າງປະຊາຄົມ ອາຊຽນ ແລະ ຮັກສາຄວາມສາມັກຄີ, ຄວາມເຫັນດີເຫັນພ້ອມຂອງ ອາຊຽນ ໃນບັນດາບັນຫາມີຄວາມສຳຄັນຍຸດທະສາດຢູ່ພາກພື້ນ.
ກອງປະຊຸມຄັ້ງທີ 39 ຄະນະກຳມະການລະຫວ່າງ ລັດຖະບານ ຫວຽດນາມ -ລາວ ດຳເນີນໃນສະພາບການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ ແລະລາວ ພວມສືບຕໍ່ໄດ້ຮັບການປັບປຸງ ແລະ ພັດທະນາໃນທຸກດ້ານ. ສະພາບການນີ້ຈະແມ່ນປະຖົມປັດໄຈເພື່ອໃຫ້ກອງປະຊຸມປະສົບຜົນສຳເລັດຢ່າງຈົບງາມ, ເພື່ອແນໃສ່ເພີ່ມທະວີຄວາມໄວ້ເນື້ອເຊື່ອໃຈຮອບດ້ານລະຫວ່າງສອງລັດ, ສ້າງຄວາມເປັນເອກະພາບໃນການຊີ້ນຳນຳພາ ຊຸກຍູ້ຜັນຂະຫຍາຍບັນດາຂໍ້ຕົກລົງຂັ້ນສູງ, ຊຸກຍູ້ການພົວພັນຮ່ວມມືລະຫວ່າງສອງປະເທດໃນໄລຍະຈະມາເຖິງ.