ກອງປະຊຸມລັດຖະມົນຕີແມ່ນ້ຳຂອງ - ສ.ເກົາຫຼີ ຄັ້ງທີ 4 ຫາກໍຖືກອັດລົງໃນ ວັນທີ 29/7 ຢູ່ ສ.ເກົາຫຼີດ້ວຍໝາກຜົນທີ່ສຳຄັນແມ່ນໄດ້ຮັບຮອງເອົາແຜນການ ດຳເນີນງານໄລຍະ 2014 – 2017 ແລະ ບັນດາຂັ້ນຕອນນຳໃຊ້ກອງທຶນຮ່ວມມືແມ່ນ້ຳຂອງ - ສ.ເກົາຫຼີ. ນີ້ແມ່ນບາດກ້າວເດີນທີ່ສຳຄັນນັບແຕ່ເມືອ່ກົນໄກຮ່ວມມືແມ່ນ້ຳຂອງ - ສ.ເກົາຫຼີໄດ້ຮັບການສ້າງຕັ້ງເມື່ອປີ 2011. ເຂົ້າຮ່ວມກອງປະຊຸມຄັ້ງນີ້, ຫວຽດນາມສືບຕໍ່ຢືນຢັນຄວາມມານະພະຍາຍາມຂອງຕົນໃນການຊຸກຍູ້ ຮ່ວມມືແມ່ນ້ຳຂອງ - ສ.ເກົາຫຼີ, ພ້ອມກັນນັ້ນກໍເພີ່ມທະວີການພົວພັນຄູ່ຮ່ວມມືຍຸດທະສາດຫວຽດນາມ-ສເກົາຫຼີເວົ້າສະເພາະ ແລະ ບັນດາປະເທດແມ່ນ້ຳຂອງອື່ນໆເວົ້າລວມ.
ບັນດາລັດຖະມົນຕີປະເທດຕ່າງໆເຂົ້າຮ່ວມກອງປະຊຸມ |
ການຮ່ວມມືແມ່ນ້ຳຂອງ - ສ.ເກົາຫຼີໄດ້ຮັບການສ້າງຂຶ້ນເມື່ອປີ 2011 ໂດຍຂໍ້ລິເລີ່ມຂອງ ສ.ເກົາຫຼີ ຊຶ່ງລວມມີການເຂົ້າຮ່ວມຂອງກຳປູເຈຍ, ລາວ, ມຽນມາ, ໄທ, ຫວຽດນາມ ແລະ ສ.ເກົາຫຼີ. ນັບແຕ່ກອງປະຊຸມລັດຖະມົນຕີແມ່ນ້ຳຂອງ - ສ.ເກົາຫຼີ ຄັ້ງທີ 1 ຊຶ່ງຖືກໄຂຂຶ້ນຢູ່ເຊີອູນເມື່ອປີ 2011, ກົນໄກຮ່ວມມືແມ່ນ້ຳຂອງ - ສ.ເກົາຫຼີ ໄດ້ ແລະ ພວມຢັ້ງຢືນປະສິດທິຜົນທີ່ນັບມື້ນັບສູງ, ທັງໃນຂົງເຂດການເມືອງ ແລະ ເສດຖະກິດ.
ຈາກຖະແຫຼງການແມ່ນ້ຳຮານກາງເຖິງແຜນການດຳເນີນງານແມ່ນ້ຳຂອງ - ສ.ເກົາຫຼີ.
ເດືອນ 10/2011, ກອງປະຊຸມລັດຖະມົນຕີແມ່ນ້ຳຂອງ - ສ.ເກົາຫຼີ ຄັ້ງທີ 1 ໄດ້ຮັບຮອງເອົາ ຖະແຫຼງການແມ່ນ້ຳຮານກາງກ່ຽວກັບການສ້າງ “ ການພົວພັນຄູ່ຮ່ວມມືຮອບດ້ານລະຫວ່າງບັນດາປະເທດແມ່ນ້ຳຂອງ ແລະ ສ.ເກົາຫຼີ ເພື່ອຄວາມວັດທະນາຖາວອນລວມ”, ຕາມນັ້ນແລ້ວ ກໍກຳນົດ 3 ຂົງເຂດຮ່ວມມືບຸລິມະສິດ, ຊຶ່ງລວມມີການເຊື່ອມຈອດອາຊຽນ, ພັດທະນາແບບຍືນຍົງ ແລະ ພັດທະນາເພື່ອມະນຸດ. ບັນດາຈຸດສຸມຊຶ່ງການຮ່ວມມືແມ່ນ້ຳຂອງ - ສ.ເກົາຫຼີມຸ່ງໄປເຖິງນັ້ນ, ແມ່ນພັດທະນາພື້ນຖານໂຄງລ່າງ, ພັດທະນາແຫຼ່ງຊັບພະຍາກອນມະນຸດ, ເຕັກໂນໂລຢີຂໍ້ມູນຂ່າວສານ, ສິ່ງແວດລ້ອມ, ການຄຸ້ມຄອງຊັບພະຍາກອນນ້ຳ, ກະສີກຳ ແລະ ຄວາມໝັ້ນຄົງດ້ານສະບຽງອາຫານ. ແລະ ກໍໃນກອງປະຊຸມຄັ້ງນີ້, ສ.ເກົາຫຼີໃຫ້ຄຳໝັ້ນສັນຍາເພີ່ມການຊ່ວຍເຫຼືອທຶນ ODA ຂຶ້ນທົບ 2 ເທົ່າໃຫ້ແກ່ບັນດາປະເທດອາຊຽນເຖິງປີ 2015, ໃນນັ້ນຕົ້ນຕໍແມ່ນສະຫງວນໃຫ້ແກ່ພາກພື້ນ ແມ່ນ້ຳຂອງ.
ປີ 2012, ສ.ເກົາຫຼີໄດ້ຕົກລົງສ້າງຕັ້ງກອງທຶນຊ່ວຍເຫຼືອແນໃສ່ໜູນຊ່ວຍບັນດາໂຄງການພັດທະນາຢູ່ 5 ປະເທດອາຊີຕາເວັນອອກສ່ຽງໃຕ້. ກອງທຶນນີ້, ດ້ວຍຈຳນວນເງິນຈະຄ່ອຍໆເພີ່ມຂຶ້ນ, ຖືກໃຊ້ຈາຍຕ່າງຫາກໂດຍອີງໃສ່ການຊ່ວຍເຫຼືອ 2 ຝ່າຍຢ່າງເປັນທາງການຂອງ ສ.ເກົາຫຼີກັບແຕ່ລະປະເທດໃນພາກພື້ນແມ່ນ້ຳຂອງ. ແລະ ກໍຢູ່ທີ່ກອງປະຊຸມລັດຖະມົນຕີການຕ່່າງປະເທດຄັ້ງນີ້ຢູ່ເຊີອູນປະເທດສ.ເກົາຫຼີ, ບັນດາລັດຖະມົນຕີການຕ່່າງປະເທດຂອງ 6 ປະເທດໄດ້ເປັນເອກະສັນກັນຮັບຮອງເອົາແຜນການດຳເນີນງານໄລຍະ 3 ປີແນໃສ່ເປີດກ້ວາງການຮ່ວມມືໃນຫຼາຍຂົງເຂດຄື ພື້ນຖານໂຄງລ່າງ, ພັດທະນາຂຽວ ແລະ ເຕັກໂນໂລຢີຂໍ້ມູນຂ່າວສານ. ທ່່ານຮອງລັດຖະມົນຕີການຕ່າງປະເທດຫວຽດນາມ ບຸຍແທງເຊີນ ໃຫ້ຮູ້ວ່າ :
“ ທີ່ 1 ແມ່ນເພີ່ມທະວີບັນດາໂຄງການຮ່ວມມື, ເຊື່ອມຕໍ່ອະນຸພາກພື້ນແມ່ນ້ຳຂອງ, ພິເສດແມ່ນເຊື່ອມຕໍ່ພື້ນຖານໂຄງລ່າງຄົມມະນາຄົມ, ຂົນສ່ົງ, ພະລັງງານ, ແນໃສ່ຊຸກຍູ້ການຮ່ວມສຳພັນ ແລະ ເຊື່ອມໂຍງເຂົ້າກັບເສດຖະກິດພາກພື້ນ. ທີ່ 2 ແມ່ນບັນດາໂຄງການເຊື່ອມຕໍ່ໃນກຸ່ມມູນຄ່າລວມຂອງບັນດາປະເທດອະນຸພາກພື້ນແມ່ນ້ຳຂອງ ແມ່ນເພື່ອແນໃສ່ເສີມຂະຫຍາຍທ່າໄດ້ປຽບເພີ່ມເຕີມຢ່າງສູງສຸດຂອງບັນດາປະເທດແມ່ນ້ຳຂອງ - ສ.ເກົາຫຼີໃນຂົງເຂດຜະລິດ, ປຸ່ງແຕ່ງກະສີກຳ, ເຕີບໂຕຂຽວ. ທີ່ 3 ແມ່ນພັດທະນາການພົວພັນຄູ່ຮ່ວມມືພາກລັດ-ເອກະຊົນແນໃສ່ຊຸກຍູ້ບັນດາວິສາຫະກິດເຂົ້າຮ່ວມຢ່າງເລິກເຊິ່ງ ແລະ ມີປະສິດທິຜົນກວ່າໃນການຮ່ວມມືແມ່ນ້ຳຂອງ - ສ.ເກົາຫຼີ.”
ແລະ ກໍຕາມແຜນການດຳເນີນງານນີ້, ໃນຮອບ 3 ປີທີ່ຈະມາເຖິງ, ສ.ເກົາຫຼີຈະສ້າງຕັ້ງສູນຄົ້ນຄ້ວາຄົມມະນາຄົມຢູ່ເຂດແມ່ນ້ຳຂອງເພື່ອໜູນຊ່ວຍ 5 ປະເທດໃນພາກພື້ນ. ສ.ເກົາຫຼີຍົງຈະໜູນຊ່ວຍຟື້ນຟູປ່າໃຫ້ແກ່ 5 ປະເທດອາຊີຕາເວັນອອກສ່ຽງໃຕ້ໂດຍຜ່ານອົງການຮ່ວມມືປ່າອາຊີ.
ຈຸດເວລາທີ່ດີໃຫ້ແກ່ກາລະໂອກາດຮ່ວມມື
ຄວາມສາມາດບົ່ມຊ້ອນຮ່ວມມືລະຫວ່າງ ສ.ເກົາຫຼີ ແລະ ບັນດາປະເທດອະນຸພາກພື້ນແມ່ນ້ຳຂອງແມ່ນໃຫຍ່ຫຼວງຢູ່ແລ້ວ. ນັ້ນແມ່ນກຳລັງແຮງງານໜຸ່ມ, ຫຼວງຫຼາຍ, ລະດັບພັດທະນາເປັນປົກກະຕິຢູ່ ບັນດາປະເທດແມ່ນ້ຳຂອງ, ພ້ອມທັງມີຫຼາຍຈຸດຄ້າຍຄືກັນທາງດ້ານວັດທະນະທຳ...ແຕ່ເລື່ອງ ອາຊຽນພວມກ້າວມໍ່ເຂົ້າກັບເປົ້າໝາຍສ້າງຕັ້ງປະຊາຄົມອາຊຽນໃນປີໜ້າ ກໍແມ່ນກຳລັງໜູນທີ່ໃຫຍ່ຫຼວງເພື່ອນຳການຮ່ວມມືແມ່ນ້ຳຂອງ - ສ.ເກົາຫຼີ ບຸກບືນຂຶ້ນ. ອາຊຽນໜຶ່ງກາຍເປັນຕະຫຼາດຮ່ວມ, ປະຊາຄົມເສດຖະກິດຮ່ວມພວມເປີດບັນດາກາລະໂອກາດອັນໃຫຍ່ຫຼວງໃຫ້ແກ່ບັນດາປະເທດອາຊຽນເວົ້າລວມ ແລະ ບັນດາປະເທດແມ່ນ້ຳຂອງເວົ້າສະເພາະ, ກໍຄືບັນດານັກລົງທຶນຢູ່ພາກພື້ນອາຊີ ໃນນັ້ນມີ ສ.ເກົາຫຼີ. ໂດຍຮັບຮູ້ໄດ້ເຖິງສິ່ງດັ່ງກ່າວ, ສ.ເກົາຫຼີມານະພະຍາຍາມຍູ້ແຮງການຮ່ວມມືເພື່ອຫັນບັນດາກາລະໂອກາດນີ້ໃຫ້ປະກົດຜົນເປັນຈິງ, ໃນນັ້ນ ໜ້າທີ່ຈຸດສຸມແມ່ນເພີ່ມທະວີການເຊື່ອມຕໍ່ໂຄງລ່າງ, ພັດທະນາແຫຼ່ງຊັບພະຍາກອນມະນຸດຢູ່ອະນຸພາກພື້ນແມ່ນ້ຳຂອງ.
ຫວຽດນາມມານະພະຍາຍາມຊຸກຍູ້ກົນໄກຮ່ວມມືແມ່ນ້ຳຂອງ - ສ.ເກົາຫຼີ
ໂດຍແມ່ນໜຶ່ງໃນບັນດາປະເທດໄດ້ຮັບການລົງທຶນໃຫຍ່ກ່ວາໝູ່ຈາກ ສ.ເກົາຫຼີ, ຫວຽດນາມຍາມໃດກໍສວມບົດບາດຕັ້ງໜ້າໃນການຊຸກຍູ້ການຮ່ວມມືຢ່າງມີປະສິດທິຜົນກວ່າລະຫວ່າງແມ່ນ້ຳຂອງ - ສ.ເກົາຫຼີ. ບໍ່ພຽງແຕ່ແມ່ນຂົວຕໍ່ທີ່ຕັ້ງໜ້າຊ່ວຍຊຸກຍູ້ສາຍພົວພັນຮ່ວມມືນີ້, ຫວຽດາມກໍພວມເປັນຈຸດນັດພົບທີ່ມີຄວາມສາມາດບົ່ມຊ້ອນ ໄດ້ຮັບການຕີລາຄາສູງຈາກວິສາຫະກິດຫຼາຍແຫ່ງຂອງສ.ເກົາຫຼີ ແລະ ບັນດາປະເທດໃນພາກພື້ນ. ທ່ານ ດັ້ງຊວນກວາງ ຮອງຫົວໜ້າກົມໆລົງທຶນຕ່າງປະເທດ, ກະຊວງແຜນການ ແລະ ການລົງທຶນຫວຽດນາມຢືນຢັນວ່າ :
“ສ.ເກົາຫຼີ ຍາມໃດກໍແມ່ນໜຶ່ງໃນບັນດາຄູ່ຮ່ວມມືນຳໜ້າໃນການລົງທຶນເຂົ້າຫວຽດນາມ. ມີຫຼາຍນັກລົງທຶນ ສ.ເກົາຫຼີ ໄດ້ລົງທຶນໃນໂຄງການໃຫຍ່ທີ່ສຸດເຂົ້າຫວຽດນາມ. ຜ່ານນັ້ນ ອາດຈະເຫັນຄວາມເຊື່ອໝັ້ນຍາວນານຂອງເຂົາເຈົ້າທີ່ມີຕໍ່ສະພາບແວດລ້ອມແຫ່ງການລົງທຶນຂອງຫວຽດນາມ.”
ໃນວິວັດທະນາການເຊື່ອມໂຍງເຂົ້າກັບສາກົນຢ່າງແຂງແຮງນັ້ນ, ນັບແຕ່ເມື່ອເຂົ້າຮ່ວມການພົວພັນຄູ່ຮ່ວມມືເພື່ອຄວາມວັດທະນາຖາວອນລວມລະຫວ່າງບັນດາປະເທດແມ່ນ້ຳຂອງ - ສ.ເກົາຫຼີ, ຫວຽດນາມໄດ້ມີການປະກອບສ່ວນຫຼາຍຢ່າງເຂົ້າໃນການພົວພັນຮ່ວມມືນີ້. ປີ 2014 ແມ່ນປີພົວພັນແລກປ່ຽນແມ່ນ້ຳຂອງ - ສ.ເກົາຫຼີ ແລະ ກໍແມ່ນປີທຳອິດທີ່ບັນດາປະເທດແມ່ນ້ຳຂອງ - ສ.ເກົາຫຼີສ້າງ ແລະ ປະຕິບັດໂຄງການດຳເນີນງານແມ່ນ້ຳຂອງ - ສ.ເກົາຫຼີ. ຫວຽດນາມສືບຕໍ່ມີບັນດາການປະກອບສ່ວນຢ່າງແທດຈິງ ເພື່ອປະກອບສ່ວນຍົກສູງປະສິດທິຜົນກົນໄກຮ່ວມມືແມ່ນ້ຳຂອງ - ສ.ເກົາຫຼີໃນໄລຍະທີ່ຈະມາເຖິງ.